Go na content

Go na a tra menu

Go na table of contents

Yehovah Kotoigi

Sranantongo

Studie-Waktitoren  |  november 2017

Fa yu kan fiti yusrefi na a nyun gemeente fu yu?

Fa yu kan fiti yusrefi na a nyun gemeente fu yu?

„MI BEN e senwe di mi ben musu froisi kon dyaso”, na so Allen e taki. * A e taki moro fara: „Mi no ben sabi efu mi ben o man meki nyun mati noso efu sma ben o lobi mi.” Allen e meki muiti fu fiti ensrefi na wan nyun gemeente di de moro leki 1400 kilometer moro fara fu pe a e tan.

Efu yu froisi go na wan tra gemeente, dan kande yu srefi e frede pikinso. San kan yepi yu fu fiti yusrefi? San yu kan du efu a moro muilek gi yu fu fiti yusrefi leki san yu ben denki? Ma efu yu no e froisi go na wan tra gemeente, dan fa yu kan meki en moro makriki gi nyun sma di e kon na ini a gemeente?

FA YU KAN FITI YUSREFI ÈN GO NA FESI?

Luku na eksempre disi: Te sma e diki wan bon puru fu go prani en na wan tra presi, dan a bon musu teki rutu baka. Nofo tron te sma diki wan bon puru na ini a gron, dan den e koti furu fu den rutu puru, so taki den kan tyari a bon gowe moro makriki. Te den prani a bon disi baka, dan a musu meki nyun rutu esi-esi. Na so a de tu te yu froisi go na wan tra gemeente. Kande a no o makriki gi yu na a bigin. Na ini a gemeente pe yu ben de fosi, yu ben teki rutu kaba fu di yu ben meki bun mati èn yu ben e teki prati doronomo na a diniwroko fu Yehovah. Ma now di yu de na ini wan tra gemeente, yu musu teki rutu baka fu man go na fesi. San o yepi yu? Fiti den rai fu Bijbel. Meki wi luku wan tu fu den rai disi.

A sma di gwenti leisi Gado Wortu de „leki wan bon di prani na sei watra, di e gi froktu te a ten fu en doro èn di den wiwiri fu en no e kon drei. Ala sani di a man e du, o waka bun.” ​Ps. 1:1-3.

Neleki fa wan bon abi watra fanowdu doronomo fu man gro bun, na so wan Kresten musu studeri Gado Wortu doronomo tu fu man abi wan tranga bribi. Dati meki yu musu tan leisi Bijbel ibri dei èn yu musu go na den konmakandra doronomo tu. Tan abi a gwenti fu hori yu Osofamiri Anbegi èn fu studeri. Iniwan sani di yu ben e du na ini yu fosi gemeente fu man abi wan bun matifasi nanga Yehovah, yu o abi fu du tu na ini a nyun gemeente.

„A sma di e gi trawan watra bogobogo, o kisi watra bogobogo tu.”​Odo 11:25.

Yu o kisi krakti baka èn yu o man fiti yusrefi moro esi te yu e teki prati doronomo na a preikiwroko. Kevin, wan Kresten owruman e taki: „A sani di yepi mi nanga mi wefi furu, na taki wi bigin dini leki yepipionier syatu baka di wi doro na ini wi nyun gemeente. A no teki langa fosi wi kon sabi den brada nanga sisa, den pionier, nanga a kontren.” Roger ben froisi go na wan kontren di de sowan 1600 kilometer moro fara fu pe a ben e tan. A e taki: „A moro bun sani di kan yepi yu fu fiti yusrefi na ini wan nyun gemeente, na te yu abi a gwenti fu teki prati na a preikiwroko. Boiti dati, meki den owruman kon sabi taki yu de klariklari fu yepi nanga iniwan wroko. Kande yu kan yepi krin a Kownukondre zaal, kande yu kan hori wan lezing te a sma di ben musu hori en no man hori en, noso kande yu kan gebroiki yu oto fu tyari wan sma go na zaal. Te den brada nanga sisa e si taki yu leki nyun memre fu a gemeente e du muiti fu yepi trawan, dan den o kon lobi yu.”

„Opo un ati moro.”​2 Kor. 6:13.

Du muiti fu leri sabi ala den brada nanga sisa. Baka di Melissa nanga en osofamiri froisi go na wan nyun gemeente, dan den du muiti fu meki nyun mati. A e taki: „Fosi a konmakandra wi ben e meki  muiti fu leri sabi den brada nanga sisa èn wi ben e du dati tu baka a konmakandra. Wi no ben e gi den odi nomo, ma wi ben abi na okasi fu taki nanga den fu tra sani sosrefi.” A sani disi yepi na osofamiri disi fu leri sabi den nen fu den brada nanga sisa moro esi. Boiti dati, den kari sma kon na den oso èn na so den meki nyun mati. Melissa e taki moro fara: „Wi gi den wi telefon nomru, so taki den ben kan bel wi te den ben wani taki wi teki prati na sani di abi fu du nanga a gemeente, noso fu du tra sani makandra nanga den.”

Efu yu e frede fu taki nanga nyun sma, dan wan tu sani de di yu kan du fu meki en moro makriki gi yusrefi. Lafu nanga den sma, awansi yu no e firi fu du dati na a bigin. Te yu e lafu, dan sma o wani kon taki nanga yu. Rachel di froisi go na wan gemeente di de farawe fu pe a ben e tan, e taki: „Mi e syensyen. Son leisi mi musu dwengi misrefi fu taki nanga den brada nanga sisa na ini mi nyun gemeente. Mi e luku na ini a zaal suma e sidon èn no e taki nanga wan trawan. Kande a sma dati e syensyen leki mi.” Fu san ede yu no e meki muiti fu taki nanga wan tra sma fosi a konmakandra èn baka a konmakandra?

Ma a kan taki na ini den fosi wiki, yu e prisiri fu leri sabi nyun sma. Ma baka wan pisi ten, yu o kon sabi ala sma kaba. Te dati de so, dan yu musu tan meki muiti fu meki nyun mati.

Te sma e diki wan bon puru fu go prani na wan tra presi, dan a bon musu teki rutu baka, ma te fu kaba a bon e kisi nyun rutu

ABI PASENSI

Gi son bon a e teki moro langa fu teki rutu baka te sma prani den na wan tra presi. Na so a de tu taki ala sma no e fiti densrefi so esi na wan nyun gemeente. Efu yu froisi go na wan tra gemeente no so langa pasa èn a muilek ete gi yu fu fiti yusrefi, dan kande den Bijbel rai disi o yepi yu:

„Wi no musu tapu fu du san bun, bika na a reti ten wi sa koti den froktu efu wi no kon weri.”​Gal. 6:9.

Abi pasensi nanga yusrefi te yu e si taki yu abi moro ten fanowdu fu fiti yusrefi. Fu eksempre, furu zendeling di kisi leri na Gileadskoro, e tan wan tu yari na ini a kondre pe den musu go dini, fosi den e go baka na den eigi kondre fu go luku den sma fu den. A sani disi e yepi den fu kon gwenti den brada nanga sisa fu a kondre pe den go dini èn fu fiti densrefi na wan nyun kulturu.

Alejandro di froisi go na wan tra gemeente difrenti leisi, sabi taki a e teki ten fosi wan sma fiti ensrefi na wan gemeente. A e fruteri: „A lasti leisi di wi froisi go na wan tra gemeente, dan mi wefi taki: ’Ala mi mati de na ini a gemeente pe wi ben de fosi!’” A memre en wefi taki a ben taki a srefi sani tu yari na fesi di den ben musu froisi go na wan tra gemeente. Ma na ini den tu yari dati, a leri sabi trawan èn sma di a no ben sabi fosi kon tron bun mati fu en.

„No taki: ’Fosi, sani ben betre moro now’, bika a no wan koni sani fu taki so.” ​Preik. 7:10.

No teki a nyun gemeente fu yu gersi nanga a owruwan. Fu eksempre, kande den brada na ini yu nyun gemeente no e taki so fri nanga sma leki den wan na ini a gemeente pe yu komopo, noso kande den brada dati e taki krin fa den e denki. Poti prakseri na den bun fasi fu den, neleki fa yu ben o wani taki den du nanga yu. Son sma di ben musu froisi go na wan tra gemeente no ben fruwakti taki den ben o abi fu aksi densrefi a sani disi: ’A de so trutru taki mi lobi ala mi brada nanga sisa?’​—1 Petr. 2:17.

 „Tan aksi, dan unu sa kisi.”​Luk. 11:9.

Tan suku yepi na Gado. David, wan owruman, e taki: „No pruberi fu horidoro nanga yu eigi krakti. Furu sani di wi kan du, na fu di Yehovah e yepi wi. Begi Gado fu yepi yu!” Rachel di wi ben kari kaba e agri nanga dati. A e taki: „Efu mi nanga mi masra e firi leki wi no de wán nanga a gemeente, dan wi e begi Gado fu sori wi krin san wi musu du. Wi e aksi en: ’Grantangi meki wi kon sabi efu wi e du wan sani di e tapu pasi gi trawan fu hari kon na wi.’ Baka dati, wi e pruberi fu moksi moro nanga den brada nanga sisa.”

Papa nanga mama, efu a muilek gi den pikin fu unu fu fiti densrefi na a gemeente, dan begi makandra nanga den fu a tori disi. Yepi den fu meki nyun mati. Seti sani so taki den e feni okasi fu moksi nanga sma di kan tranga a bribi fu den.

YEPI NYUN SMA FU FIRI SWITI NA INI A GEMEENTE

San yu kan du fu yepi nyun sma di froisi kon na yu gemeente? Du muiti wantewante fu tron wan mati fu den. Fu man du dati, dan yu musu aksi yusrefi san yu ben o wani taki sma du gi yu efu yu ben de wan nyun sma na ini a gemeente, èn du den sani dati (Mat. 7:12). Kande yu kan gi den nyun sma wan kari fu teki prati na yu Osofamiri Anbegi, noso fu luku a programa fu JW Broadcasting makandra nanga yu. Kande yu kan aksi fu wroko makandra nanga den na ini a preikiwroko. Efu yu e aksi den fu kon nyan na yu oso, dan den no o frigiti noiti fa yu sori switifasi gi den. Sortu tra sani yu kan du fu yepi nyun sma di e kon na a gemeente?

Carlos e taki: „Di wi doro na ini wi nyun gemeente, dan wan sisa gi wi den nen fu wan tu wenkri pe sani no ben diri so. A sani dati ben de wan bigi yepi gi wi.” Sma di komoto fu presi pe a weer de tra fasi, kande o breiti te yu e sori den sortu krosi den musu weri, now di den e tan na ini wan kontren pe kande a weer moro waran, moro kowru, noso kande alen e fadon drape furu. Yu kan yepi den tu fu abi moro bun bakapisi na ini a preikiwroko te yu e fruteri den pikinso fu a historia fu a birti, noso sortu bribi den sma drape abi moro furu.

YU O KISI WINI TE YU E FITI YUSREFI

Allen di kari na a bigin fu na artikel de na ini en nyun gemeente moro leki wán yari kaba. A e taki: „Na a bigin, mi ben musu dwengi misrefi fu kon sabi den brada nanga sisa. Ma now mi e si den leki famiri èn mi de koloku.” Allen e si taki a no lasi mati di a froisi go na wan nyun gemeente. Na presi fu dati, a meki nyun mati, èn a e howpu taki den o tan en mati en heri libi langa.

^ paragraaf 2 Wi kenki wan tu nen.