„Yu a no wan Gado di lobi ogridu. Noiti wan ogri sma kan kon tan nanga yu.”​—PS. 5:4.

SINGI 142 Hori steifi na a howpu fu wi

SAN WI O LERI *

1-3. (a) Soleki fa Psalm 5:4-6 e sori, dan fa Yehovah feni en te sma e du ogri? (b) Fu san ede wi kan taki dati wan sma di abi seks nanga pikin no e hori ensrefi na „a wèt fu Krestes”?

YEHOVAH GADO no lobi ogridu kwetikweti. (Leisi Psalm 5:4-6.) Wi kan de seiker taki Yehovah no lobi en kwetikweti te wan sma abi seks nanga wan pikin. A e tegu gi a sani disi. A sani disi na wan bigi ogri èn wan seryusu sondu! Fu di wi na Kotoigi fu Yehovah, meki wi no lobi srefisrefi tu te sma abi seks nanga pikin. Èn efu wi sabi taki wan sma na ini a gemeente du so wan sani, wi no e libi a tori so.​—Rom. 12:9; Hebr. 12:15, 16.

2 Iniwan sma di e du ogri nanga pikin, no e hori ensrefi kwetikweti na „a wèt fu Krestes”! (Gal. 6:2) Fu san ede wi kan taki dati? We, soleki fa wi leri na ini na artikel na fesi, dan a wet fu Krestes na ala den sani di Yesus leri wi. A fruteri wi den sani disi èn a leri wi den nanga yepi fu na eksempre fu en. Lobi na a fondamenti fu a wet disi èn a e yepi wi fu du san reti. Fu di tru Kresten musu hori densrefi na a wet disi, meki den e kibri den pikin fu den èn den e meki den pikin firi taki den lobi den trutru. Ma wan sma di abi seks nanga wan pikin e denki ensrefi nomo èn a e du wan bigi ogri. A e gi a pikin a firi taki nowan sma e kibri en èn taki nowan sma lobi en.

3 A de wan sari sani taki a sani disi e miti pikin na heri grontapu. Srefi nanga tru Kresten a sani disi pasa. Fa a du kon? „Ogri sma nanga bedrigiman” lai èn sonwan fu den e kon na ini a gemeente (2 Tim. 3:13). Boiti dati, son sma na ini a gemeente meki den fisti sekslostu fu den basi den èn den abi seks nanga pikin. Wi o go luku now fu san ede a sani disi na  wan bigi sondu. Baka dati wi o luku san owruman e du te wan sma du wan seryusu sondu soleki te a abi seks nanga wan pikin. Wi o si tu fa papa nanga mama kan kibri den pikin gi den sortu sma disi. *

WAN SERYUSU SONDU

4-5. Fu san ede wi kan taki dati te wan sma abi seks nanga wan pikin, dan a du wan bigi ogri nanga en?

4 Te wan sma abi seks nanga wan pikin, dan dati kan tyari takru bakapisi kon di e hati sma fu wan langa pisi ten. A sani disi e hati a pikin, ma sosrefi den famiri fu a pikin èn den Kresten brada nanga sisa fu en. Fu abi seks nanga wan pikin, na wan seryusu sondu.

5 A sma du wan bigi ogri nanga a pikin. Te sma e du ogri nanga trawan èn te den e hati den, dan dati na wan sondu. Soleki fa wi o si na ini a tra artikel, dan wan sma di abi seks nanga pikin du wan seryusu sondu. Aladi a pikin ben e frutrow en, a du wan hati sani nanga en. Disi kan meki taki a pikin no e frutrow nowan sma moro. Wi musu kibri den pikin gi den sortu sma disi. Wi musu trowstu èn yepi den wan di miti so wan sani.​—1 Tes. 5:14.

6-7. (a) Fu san ede wi kan taki dati wan sma di abi seks nanga wan pikin sondu teige a gemeente? (b) Fu san ede wi kan taki dati a sma pasa wan wet fu lanti?

6 A sma sondu teige a gemeente. Te wan sma na ini a gemeente abi seks nanga wan pikin, dan a e meki a gemeente kisi porinen (Mat. 5:16; 1 Petr. 2:12). Wán sma e tyari porinen gi ala den milyunmilyun reti-ati Kresten di e du tranga muiti fu hori densrefi na a „Kresten leri” (Yud. 3). Te wan sma du wan seryusu sondu èn a no e sori berow, dan wi no e meki a sma dati tan wan memre fu a gemeente.

7 A sma pasa wan wet fu lanti. Kresten musu ’saka densrefi na ondro den tiriman’ (Rom. 13:1). Wi e du disi te wi e lespeki den wet fu lanti èn te wi e gi yesi na den. Efu wan sma na ini a gemeente pasa wan wet fu a kondre, soleki fu abi seks nanga wan pikin, dan a sondu teige lanti. (Luku Tori fu den apostel 25:8.) Den owruman no abi a reti fu strafu wan sma te a pasa lanti wet. Ma efu wan sma abi seks nanga wan pikin, dan den no e kibri en te lanti o strafu en fu na ogri di a du (Rom. 13:4). San a sma sai, na dati a o koti.​—Gal. 6:7.

8. Fa Yehovah feni en te wan libisma e sondu teige wan tra libisma?

8 A sma sondu teige Gado (Ps. 51:4). Te wan libisma e sondu teige wan tra libisma, dan a e sondu tu teige Yehovah. Luku wan eksempre na ini a Wet di Gado ben gi den Israelsma. A Wet ben taki dati te wan sma bedrigi wan trawan, dan a e „trangayesi Yehovah” (Lef. 6:2-4). Na so a de tu taki te wan sma na ini a gemeente abi seks nanga wan pikin, dan a kori a pikin. A pikin ben frutrow en, ma now a pikin abi a firi taki a no man frutrow nowan sma moro. A sma di du a sondu gi Yehovah porinen. Dati meki a sani disi na wan bigi sondu teige Gado.

9. Sortu Bijbel rai na organisâsi fu Yehovah gi na ini den yari di pasa, èn fu san ede den e tyari kenki kon efu dati de fanowdu?

9 Na ini den yari di pasa na organisâsi fu Yehovah tyari furu artikel kon na doro pe den gi Bijbel rai di abi fu du nanga a  tori disi. Difrenti artikel na ini A Waktitoren nanga na Ontwaakt! sori san den sma di ondrofeni a sani disi kan du te den e firi brokosaka. Den tijdschrift disi taki tu fa tra sma kan yepi den èn gi den deki-ati, èn fa papa nanga mama kan kibri den pikin fu den. Na organisâsi gi owruman krin rai tu di e sori den san den musu du te wan sma abi seks nanga wan pikin. Doronomo na organisâsi e luku den rai disi èn den e tyari kenki kon efu dati de fanowdu. Fu san ede den e du dati? Fu di den wani taki den owruman musu sori lobi nanga retidu te den e krutu den sortu tori disi. Na so den e hori densrefi na a wet fu Krestes.

SAN DEN OWRUMAN E DU TE WAN SMA DU WAN SERYUSU SONDU?

10-12. (a) San den owruman e hori na prakseri te wan sma du wan seryusu sondu, èn san den musu du? (b) Soleki fa Yakobus 5:14, 15 e sori, dan san owruman e pruberi fu du?

10 Te wan sma du wan seryusu sondu, dan den owruman e hori na prakseri taki den musu hori densrefi na a wet fu Krestes. Den musu sori lobi gi a gemeente èn den musu du san reti na ini Gado ai. Dati meki den musu hori difrenti sani na prakseri te den kon sabi taki wan sma du wan seryusu sondu. A moro prenspari sani gi den owruman, na fu sorgu taki Yehovah no kisi porinen (Lef. 22:31, 32; Mat. 6:9). Boiti dati, den wani du ala san den man fu yepi den brada nanga sisa fu a gemeente fu tan abi wan bun matifasi nanga Yehovah èn den wani yepi den sma di trawan du ogri nanga den.

11 Boiti dati, efu a sma di du a sondu na wan sma na ini a gemeente, dan den owruman e pruberi fu yepi en fu abi wan bun matifasi baka nanga Yehovah efu a sori berow. (Leisi Yakobus 5:14, 15.) Wan Kresten di du wan seryusu sondu fu di a no basi den sondu firi fu en, de leki wan sma di siki. Disi wani taki dati a pori en matifasi nanga Yehovah. * Den owruman de leki datra. Den e pruberi fu yepi „a sma di siki”, dati na a sma di du na ogri, fu „kon betre”. A rai di a e kisi fu Bijbel kan yepi en fu tron wan mati fu Gado baka, ma disi o man soso te a sori trutru berow.​—Tori 3:19; 2 Kor. 2:5-10.

12 A de krin taki den owruman abi wan hebi frantwortu. Den e broko den ede trutru nanga den skapu di Gado gi den fu luku (1 Petr. 5:1-3). Den wani taki den brada nanga sisa musu si a gemeente leki wan presi pe den no abi fu frede taki sma o du ogri nanga den. Dati meki te den owruman yere taki wan sma du wan seryusu sondu, dan wantewante den e luku a tori. Na dati den e du tu te wan sma abi seks nanga wan pikin. Na ini den paragraaf di e kon now, wi o luku wan tu aksi di abi fu du nanga a tori disi.

13-14. Te wan sma abi seks nanga wan pikin, dan den owruman musu tyari a tori go na skowtu? Fruklari dati.

13 Na ini son kondre lanti abi wan wet taki te wan sma abi seks nanga wan pikin, dan a tori musu go na skowtu. Den owruman musu hori densrefi na a wet disi? Iya. Na ini kondre di abi a wet disi, den owruman e gi yesi na a wet disi (Rom. 13:1). A wet disi no de teige den wet fu Gado (Tori 5:28, 29). Sobun, te den owruman kon sabi taki wan sma abi seks nanga wan pikin, dan den musu suku rai na a bijkantoro fu kon sabi fa den kan gi yesi na den wet fu lanti.

14 Te den owruman e taki nanga a pikin èn nanga en papa nanga mama noso nanga iniwan sma di sabi san pasa, dan den o  memre den taki den abi a reti fu tyari a tori go na skowtu. Ma fa a de te den yere taki na wan sma na ini a gemeente du a sondu èn den sma na ini a birti sabi a tori? A de so taki a brada noso sisa di tyari a tori go na skowtu musu denki taki a gi Gado porinen? Nôno. Na a sma di du a sondu gi Gado porinen.

15-16. (a) Soleki fa 1 Timoteyus 5:19 e sori, dan san owruman musu du fosi den seti wan krutu komte? (b) San owruman musu du te wan sma taigi den taki wan sma na ini a gemeente abi seks nanga wan pikin?

15 Efu wan sma na ini a gemeente du wan seryusu sondu, dan fu san ede tu kotoigi musu de, fosi den owruman kan seti wan krutu komte fu luku a tori? Fu di Bijbel e sori taki disi na a yoisti fasi fu krutu wan tori. Efu a sma feni taki a no du na ogri, dan tu kotoigi de fanowdu fosi den owruman kan seti wan krutu komte (Deut. 19:15; Mat. 18:16; leisi 1 Timoteyus 5:19). Ma disi wani taki dati te wan sma abi seks nanga wan pikin, dan tu kotoigi de fanowdu fosi wan sma kan tyari a tori go na skowtu? Nôno. Tu kotoigi no de fanowdu fosi den owruman noso tra sma kan tyari a tori go na skowtu.

16 Te den owruman kon yere taki wan sma na ini a gemeente ben abi seks nanga wan pikin, dan den o tyari a tori go na skowtu efu lanti wet e taki dati. Baka dati den o ondrosuku a tori fu kon sabi finifini san pasa. Den o luku san Bijbel e taki fu a tori èn efu a de fanowdu fu seti wan krutu komte. Efu a sma taki dati a no du a sondu, den owruman o arki san den kotoigi abi fu taki. Efu tu sma taki dati den sabi taki a sma ben abi seks nanga a pikin, dan dati na nofo buweisi gi den owruman fu seti wan krutu komte. Wan fu den kotoigi disi musu de a sma di tyari a tori go na den owruman (a kan de a pikin srefi) èn a tra kotoigi musu de wan sma di si taki a sma ben abi seks nanga a pikin disi noso nanga wan tra pikin. * Efu tu kotoigi no de, dan dati no wani taki dati a sma di tyari a tori go na den owruman e lei. Awinsi tu kotoigi no de fu sori taki wan sma ben abi seks nanga wan pikin, toku den owruman e hori na prakseri taki a kan taki a sma du wan ogri trutru. Den owruman o tan trowstu a pikin nanga en famiri èn den o yepi den. Boiti dati, fu di den owruman wani kibri a gemeente, meki den o tan luku a sma di trawan taki fu en taki a du na ogri.​—Tori 20:28.

17-18. Fruteri san wan krutu komte e du.

17 San wan krutu komte e du? A wortu „krutu” no wani taki dati den owruman e luku efu den musu tyari a sma go na skowtu fu di a pasa a wet fu lanti. Den owruman no e bumui nanga den tori fu skowtu. Efu wan sma pasa wan wet fu lanti, dan den owruman e meki lanti srefi bosroiti fa den o strafu a sma (Rom. 13:2-4; Tit. 3:1). Ma den owruman e luku efu a sma di du a seryusu sondu kan tan wan memre fu a gemeente.

18 Te owruman e seti wan krutu komte, dan den o luku fa den kan yepi a sma di du na ogri, fu tron wan mati baka nanga Gado èn nanga en Kresten brada nanga sisa. Den e gebroiki Bijbel fu luku efu a sma abi berow. Efu a no abi berow, dan den o puru en fu a gemeente èn den e meki bekènti na ini a gemeente taki a sma no de wan Yehovah Kotoigi moro (1 Kor. 5:11-13). Efu a sma abi berow, dan a kan tan wan memre fu a gemeente. Ma den owruman o taigi en taki kande noiti a o kisi grani noso frantwortu na ini a gemeente. Fu kibri den pikin na ini  a gemeente, den owruman kan bosroiti fu taigi papa nanga mama di abi yongu pikin taki den musu luku bun te den pikin fu den de na ini a birti fu a sma. Efu den owruman o du disi, dan den musu luku bun taki den no kari a nen fu den sma di miti so wan hati sani.

FA PAPA NANGA MAMA KAN KIBRI DEN PIKIN?

Papa nanga mama kan kibri den pikin gi sma di wani du ogri nanga den, te den e sori den san den musu sabi fu seks. Den kan gebroiki den sani di na organisâsi meki fu gi den pikin leri. (Luku paragraaf 19-22)

19-22. San papa nanga mama kan du fu kibri den pikin fu den? (Luku a fowtow tapu a kafti.)

19 Suma abi a frantwortu fu sorgu taki ogri no miti den pikin? Dati na papa nanga mama. * Yu pikin na wan kado fu Gado, den na wan „gudu di Yehovah gi yu” (Ps. 127:3). Yehovah gi yu a frantwortu fu kibri yu pikin. San yu kan du fu kibri yu pikin gi sma di wani abi seks nanga den?

20 Kon sabi moro fu a tori disi. Kon sabi sortu sma e du na ogri disi nanga pikin èn san den e du fu kori den. Luku bun nanga sma di ben kan du ogri nanga yu pikin noso nanga situwâsi pe disi kan pasa nanga den (Odo 22:3; 24:3). Hori na prakseri taki nofo tron a sma di abi seks nanga a pikin, na wan sma di a pikin sabi kaba noso di a e frutrow.

21 Taki krin nanga yu pikin èn gi den deki-ati fu taki krin nanga yu (Deut. 6:6, 7). Dati wani taki dati yu musu arki bun (Yak. 1:19). Hori na prakseri taki nofo tron wan pikin e frede fu taigi trawan taki wan sma ben abi seks nanga en. Kande a e frede taki sma no o bribi en noso kande a sma di abi seks nanga en taigi en taki a o du wan ogri nanga en efu a taigi tra sma. Efu yu si taki wan sani e trobi yu pikin, dan poti aksi gi en na wan switi fasi èn arki nanga pasensi te a e taki.

22 Leri yu pikin san den musu du. Taigi den pikin san den musu sabi fu seks, ma te yu e du dati hori na prakseri omeni yari den abi èn san den man frustan. Leri den san den musu taki èn san den musu du te wan sma e pruberi fu fasi den na wan fasi di no fiti. Gebroiki den sani di Yehovah en organisâsi meki fu kibri yu pikin.​—Luku a faki „ Sabi san yu nanga yu pikin musu du”.

23. Fa wi e feni en te wan sma abi seks nanga wan pikin èn sortu aksi wi o luku na ini a tra artikel?

23 Yehovah Kotoigi e si en leki wan bigi ogri èn wan seryusu sondu te wan sma abi seks nanga wan pikin. Wi e du san a wet fu Krestes e taki èn wi no e kibri den sma di e du so wan ogri gi den bakapisi fu a sondu fu den. Ma fa wi kan yepi wan brada noso sisa fu a gemeente, efu wan sma ben abi seks nanga en di a ben pikin? A tra artikel o piki na aksi disi.

SINGI 103 Gado gi wi bun skapuman

^ paragraaf 5 Na artikel disi o sori fa wi kan kibri pikin gi sma di wani abi seks nanga den. Wi o leri tu fa den owruman kan kibri a gemeente gi den sortu sma disi èn fa papa nanga mama kan kibri den pikin fu den.

^ paragraaf 3 Wan sma di abi seks nanga wan pikin e du disi soso fu plisi den sekslostu fu en. A kan taki so wan sma e gebroiki en mofo fu prei nanga a syenpresi fu a pikin noso a e meki a pikin du dati nanga en. Kande a e gebroiki a bakasei fu a pikin fu abi seks nanga en, a e fasi a pikin en syenpresi, en bobi nanga en bille, noso a e du iniwan tra morsu sani nanga a pikin. A prenspari fu sabi taki te wan sma abi seks nanga wan pikin, dan a du wan trutru hati sani nanga en. A prenspari fu sabi tu taki noiti a fowtu de na a pikin. Aladi sma e du a sani disi furu nanga meisje, den e du en nanga boi tu. Èn aladi moro furu mansma e du a sani disi, son umasma abi seks tu nanga pikin-nengre.

^ paragraaf 11 Awinsi wan sma du wan seryusu sondu fu di en bribi kon swaki, toku a musu gi frantwortu na Yehovah.​—Rom. 14:12.

^ paragraaf 16 Te den owruman o taki nanga a sma di trawan taki fu en dati a ben abi seks nanga wan pikin, dan noiti den owruman o aksi a pikin fu de na a takimakandra dati.

^ paragraaf 19 Den rai di wi e gi papa nanga mama, de tu gi sma di e kweki wan pikin di no de fu den.