Go na content

Go na a tra menu

Go na table of contents

Yehovah Kotoigi

Sranantongo

Studie-Waktitoren  |  mei 2017

„Yu lobi mi moro den wan disi?”

„Yu lobi mi moro den wan disi?”

„Simon, manpikin fu Yohanes, yu lobi mi moro den wan disi?”YOH. 21:15.

SINGI: 128, 45

1, 2. San Petrus kon leri baka di a ben fisi wan heri neti?

SEIBI fu den disipel fu Yesus ben e fisi heri neti na ini a Se fu Galilea, ma den no ben fanga noti. Yesus di ben kisi wan opobaka ben de na sekanti e luku a grupu. Ne a taigi den: „’Trowe a fisinèt go na a reti-anusei fu a boto, dan unu o feni fisi.’ Di den trowe a fisinèt, den no ben man hari en kon na ini a boto, fu di someni fisi ben de.”Yoh. 21:1-6.

2 Baka di Yesus meki nyanyan gi den, a drai luku Simon Petrus èn a taigi en: „Simon, manpikin fu Yohanes, yu lobi mi moro den wan disi?” Fu san ede Yesus ben aksi en dati? Petrus ben lobi a fisiwroko. Sobun, a kan taki Yesus ben e aksi en san ben moro prenspari gi en. A ben lobi a fisiwroko moro leki Yesus nanga den sani di Yesus ben e leri sma? Petrus piki en: „Iya Masra, yu sabi taki mi lobi yu” (Yoh. 21:15). A no de fu taki dati Petrus sori taki a ben lobi Yesus trutru. Sensi a dei dati, a wroko tranga fu meki disipel èn a tron wan pilari na ini a Kresten gemeente fu a fosi yarihondro.

3. Nanga sortu sani Kresten musu luku bun?

3 San wi kan leri fu a sani di Yesus taigi Petrus? Wi musu  luku bun taki a lobi di wi abi gi Krestes no e kon swaki, fu di dati kan meki taki sani puru wi prakseri na Kownukondre afersi. Yesus ben sabi heri bun sortu broko-ede libisma e kisi na ini a sistema disi. Na ini na agersitori fu a saiman Yesus ben taki dati son sma ben o teki „a wortu fu a Kownukondre” èn den ben o go na fesi pikinso, ma te fu kaba „den broko-ede fu a grontapu disi nanga a bedrigifasi fu gudu” ben o „kiri a wortu” (Mat. 13:19-22; Mark. 4:19). A tru taki efu wi no luku bun, dan den problema fu a libi kan abi krakti na wi tapu, so taki wi no e du so furu moro na ini na anbegi. Dati meki Yesus warskow den disipel fu en: „Luku bun taki noiti unu nyan pasa marki, taki unu no dringi tumusi furu, noso taki unu no broko un ede nanga na aladei libi, so taki un ati kon hebi.”Luk. 21:34.

4. San o yepi wi fu kon sabi efu wi lobi Krestes nanga wi heri ati? (Luku a prenki na a bigin fu na artikel.)

4 Neleki Petrus wi kan poti a wroko fu Krestes na a fosi presi na ini wi libi. Na so wi e sori taki wi lobi Yesus trutru. Fa wi kan sorgu taki wi e tan du dati? Ten na ten wi musu aksi wisrefi: ’San moro prenspari gi mi? Mi e kisi moro prisiri te mi e teki prati na grontapu sani noso te mi e teki prati na sani di abi fu du nanga na anbegi?’ Wi o luku dri sani di kan meki taki a lobi di wi abi gi Krestes e kon kowru. Dati na a grontapuwroko fu wi, prisiriten, nanga gudu.

NO MEKI A WROKO FU YU TRON A MORO PRENSPARI SANI NA INI YU LIBI

5. Sortu frantwortu Gado gi famiri-edeman?

5 Petrus no ben e du a fisiwroko soso fu di a ben lobi a sani dati, ma a ben e du en fu sorgu en osofamiri. Famiri-edeman na ini a ten disi sabi taki Gado gi den a frantwortu fu sorgu gi den osofamiri (1 Tim. 5:8). Den musu wroko tranga fu man du dati. Ma na ini den lasti dei disi, grontapuwroko e gi furu sma broko-ede.

6. Fu san ede grontapuwroko kan gi sma broko-ede?

6 Aladi furu sma abi wroko fanowdu, toku furu wroko no de fu feni. Dati meki den wan di abi wan wroko feni taki den musu wroko moro yuru, awansi den no e kisi nofo pai son leisi. Èn fu di den bisnis e tan suku fu meki moro sani aladi den no abi furu wrokoman, meki furu sma e kon weri, den e kon abi furu broko-ede èn sonwan fu den e siki srefi. Wrokoman di no wani wroko moro yuru kan lasi den wroko.

7, 8. (a) San musu de a moro prenspari sani gi wi? (b) Sortu prenspari sani wan brada na ini Thailand leri?

7 Na a fosi presi, wi leki Kresten e gi yesi na Yehovah fu di a prenspari moro ala sani noso ala sma, sosrefi moro a basi fu wi (Luk. 10:27). Nofo tron wi e du wan grontapuwroko so taki wi kan sorgu wisrefi èn so taki wi kan horibaka gi a preikiwroko. Ma efu wi no e luku bun, dan a grontapuwroko fu wi kan meki taki wi no abi nofo ten gi na anbegi fu wi. Fu eksempre, wan brada na ini Thailand e taki: „Mi ben e meki computer gi sma èn mi ben lobi a wroko dati. Ma fu di mi ben e wroko langa yuru, meki pikinmoro mi no ben abi ten gi na anbegi fu mi. Te fu kaba mi kon si taki efu mi ben wani poti Kownukondre afersi na a fosi presi, dan mi ben o abi fu du wan tra wroko.” San a brada disi du?

 8 A e fruteri: „Mi teki wan yari fu poti moni na wan sei èn fu luku san mi ben o du. Te fu kaba mi bosroiti fu seri ice-cream na strati. Na a bigin mi no ben e meki furu moni èn mi ben e firi brokosaka. Te mi ben e miti sma fu mi owru wrokope, dan den ben e lafu mi èn den ben e aksi mi fu san ede mi ben e denki taki a ben moro bun fu seri ice-cream leki fu wroko na ini wan kantoro di ben abi airco. Mi begi Yehovah fu yepi mi fu horidoro, so taki mi ben kan du moro na ini na anbegi. Fosi yu denki, sani bigin waka moro bun. Mi kon sabi moro bun sortu ice-cream sma ben lobi èn mi leri meki ice-cream moro bun tu. Heri esi mi ben e seri ala mi ice-cream ibri dei. Fu taki en leti, mi ben e meki moro moni leki di mi ben e wroko nanga computer. Mi e firi moro koloku fu di mi no abi den broko-ede di mi ben abi na a tra wroko fu mi. Èn san moro prenspari, na taki now mi e firi taki mi abi wan moro bun matifasi nanga Yehovah.”Leisi Mateyus 5:3, 6.

9. Fa wi kan sorgu taki wi e tan abi a yoisti denki fu a grontapuwroko fu wi?

9 Yehovah lobi te wi e wroko tranga èn a sani dati e tyari blesi kon gi wi (Odo 12:14). Toku wi musu luku bun taki a grontapuwroko fu wi no e kon moro prenspari leki a diniwroko di wi e du gi Yehovah. Yesus ben taki: „Fu dati ede, tan suku fosi a Kownukondre nanga Gado en retidu, dan unu o kisi ala den tra sani tu” (Mat. 6:33). Efu wi wani sabi san na den moro prenspari sani gi wi, dan a bun fu aksi wisrefi: ’A de so taki mi lobi du a grontapuwroko fu mi, ma mi no e prisiri fu du den sani di abi fu du nanga na anbegi fu mi?’ Te wi e ondrosuku fa wi e denki fu a grontapuwroko fu wi èn fu den sani di abi fu du nanga na anbegi fu wi, dan dati kan yepi wi fu kon si san moro prenspari gi wi.

10. Sortu prenspari sani Yesus ben leri Marta?

10 Yesus e sori wi san musu de a moro prenspari sani na ini wi libi. Wan leisi, Yesus go na a oso fu Maria nanga en sisa Marta. Aladi Marta ben e lonlon fu sreka nyanyan, Maria go sidon na Yesus en futu fu arki san a ben e taki. Di Marta krutu gi Yesus taki Maria no ben e yepi en nanga a wroko, dan Yesus taigi Marta: „Maria teki a bun pisi, èn mi no o puru disi na en anu” (Luk. 10:38-42). Yesus ben e leri Marta wan prenspari sani. Efu wi no wani taki grontapu sani e hari wi prakseri puru fu a tru anbegi, èn efu wi wani sori taki wi lobi Krestes trutru, dan wi musu tan teki „a bun pisi”. Dati wani taki dati wi musu poti na anbegi fu wi na a fosi presi.

A FASI FA WI E SI PRISIRITEN

11. Fa Bijbel e sori taki a bun fu rostu fu kan kisi krakti baka?

11 A de fanowdu taki wi e rostu fu a tranga wroko fu wi so taki wi kan kisi krakti baka. Gado Wortu e taki: „A moro bun sani di wan libisma kan du fu dati ede, na fu nyan, dringi èn prisiri nanga a tranga wroko fu en” (Preik. 2:24). Yesus ben sabi taki a bun fu rostu ten na ten. Wan dei, baka di a ben preiki wan heri pisi ten, a taigi den disipel fu en: „Kon meki wi wawan go na wan presi fu kan rostu pikinso.”Mark. 6:31, 32.

12. Fu san ede wi musu luku bun nanga prisiriten? Gi wan eksempre.

12 A tru taki a bun fu abi prisiriten te dati fiti. Ma wi musu luku bun taki prisiriten  no e tron a moro prenspari sani na ini wi libi. Na ini a ten fu den disipel, furu sma ben abi a denki disi: „Meki wi nyan èn dringi, bika tamara wi o dede” (1 Kor. 15:32). Na a srefi denki dati furu sma abi na ini a ten disi. Fu eksempre, wan tu yari pasa, wan yonguman na ini Europa bigin go na den Kresten konmakandra. Ma a ben lobi prisiriten so te taki a tapu fu abi demakandra nanga a pipel fu Yehovah. Baka wan pisi ten a kon frustan taki a lobi di a ben abi gi prisiriten ben tyari soso problema nanga sari kon gi en. Sobun, a bigin studeri Bijbel baka èn te fu kaba a ben mag tron wan preikiman fu a bun nyunsu. Baka di a dopu a taki: „A wan-enkri sani di e hati mi, na taki mi lasi so furu ten fosi mi kon si taki wan sma e firi moro koloku te a e dini Yehovah leki te a e poti prisiriten na a fosi presi na ini en libi.”

13. (a) Gi wan agersitori di e sori fu san ede a no bun fu gebroiki tumusi furu fu wi ten gi prisiriten. (b) San kan yepi wi fu tan abi a yoisti denki fu prisiriten?

13 Prisiriten na fu gi wi okasi fu rostu pikinso so taki wi kan kisi krakti baka. Ma o furu ten wi musu gebroiki gi prisiriten? Luku na agersitori disi: Furu sma lobi nyan kuku nanga tra switisani. Ma wi sabi taki te wi e nyan soso den sani dati, dan dati no bun gi a gosontu fu wi. Dati meki wi e nyan gosontu nyanyan moro furu. Na so a de tu taki te wi e gebroiki furu fu wi ten fu meki prisiri, dan dati kan pori a matifasi di wi abi nanga Gado. Efu wi no wani taki dati pasa, dan wi musu teki prati doronomo na sani di abi fu du nanga na anbegi fu wi. Fa wi kan kon sabi efu wi abi a yoisti denki fu prisiriten? Wi kan luku na ini wan wiki omeni yuru wi e gebroiki fu go na den konmakandra, fu teki prati na a preikiwroko, fu studeri èn fu hori wi Osofamiri Anbegi. Dan wi kan luku tu omeni yuru fu a srefi wiki dati wi e gebroiki fu du sani soleki sport, fu du sani di wi lobi, fu luku telefisi, noso fu prei game. Gi sortu sani wi e gebroiki moro furu fu wi ten? A de fanowdu taki wi e tyari kenki kon?Leisi Efeisesma 5:15, 16.

14. San kan yepi wi fu abi prisiriten di fiti?

14 Yehovah e gi pasi taki wi srefi e bosroiti sortu prisiriten wi abi èn famiri-edeman kan bosroiti dati tu gi na osofamiri fu den. Na ini Bijbel, Yehovah e sori wi fa a e denki èn wi kan gebroiki den leri dati fu teki bun bosroiti. * Prisiriten di fiti na wan „presenti fu Gado” (Preik. 3:12, 13). A no de fu taki dati ala sma abi wan tra fasi fa den lobi fu abi prisiriten (Gal. 6:4, 5). Ma awansi na sortu fasi wi o abi prisiriten, a no musu tron a moro prenspari sani na ini wi libi. Yesus ben taki: „Pe yu gudu de, na drape yu ati o de tu” (Mat. 6:21). Sobun, te wi lobi Yesus, dan den sani di wi e denki, e taki èn e du o sori taki a Kownukondre na a moro prenspari sani na ini wi libi.Fil. 1:9, 10.

WI NO MUSU FETI BAKA GUDU

15, 16. (a) Fa wan Kresten kan bigin feti baka gudu? (b) Sortu bun rai Yesus ben gi wi?

15 Furu sma na ini a ten disi de nomonomo fu weri den moro nyun modo, fu abi a moro nyun telefon, computer nanga tra sani. Dati meki ibri Kresten musu luku doronomo sortu sani moro  prenspari gi en. Wan Kresten musu aksi ensrefi: ’A de so taki mi e gebroiki moro furu fu mi ten fu luku sortu nyun oto noso nyun modo de fu bai, na presi taki mi e sreka mi srefi gi den gemeente konmakandra? Mi e gebroiki so furu ten gi den aladei sani fu a libi taki mi no e begi noso leisi Bijbel so furu moro?’ Efu wi kon si taki a lobi di wi abi gi Krestes kon kowru fu di wi e feti baka gudu, dan wi musu prakseri a sani disi di Yesus ben taki: „Luku bun taki unu no kisi bigi-ai na nowan fasi” (Luk. 12:15). Fu san ede Yesus taki a seryusu sani disi?

16 Yesus ben taki dati „nowan sma kan dini tu masra leki srafu”. A taki moro fara: „Unu no kan dini Gado èn dini Gudu na a srefi ten.” Dati e kon fu di ala tu „masra” o wani taki yu e gi den ala yu ten. Wi o „teige a wan masra èn lobi a trawan” noso wi o „horibaka gi a wan èn wisiwasi a trawan”, na so Yesus ben taki (Mat. 6:24). Leki sondusma wi no musu „du san a skin wani”, sobun, wi no musu feti baka gudu.Ef. 2:3.

17. (a) Fu san ede sma di abi libisma denki no man si sani soleki fa Gado e si sani? (b) San kan yepi wi fu no feti baka gudu?

17 Sma di abi libisma denki no man si gudu na a fasi fa Gado e si sani. Fu san ede? Fu di den no sabi moro san bun èn san no bun. (Leisi 1 Korentesma 2:14.) Fu di den no e gebroiki den frustan, meki a moro muilek gi den fu sabi san bun èn san no bun (Hebr. 5:11-14). A sani disi e meki taki son sma e tan feti baka gudu fu di den no de tevrede nanga san den abi (Preik. 5:10). Koloku taki wan sani de di kan yepi wi fu no feti baka gudu: Wi musu leisi Gado Wortu, Bijbel, doronomo (1 Petr. 2:2). Neleki fa Yesus ben man kakafutu gi tesi fu di a ben e denki dipi fu a Wortu fu Gado, na so wi no o feti baka gudu te wi e du san Bijbel e leri (Mat. 4:8-10). Na a fasi dati wi e sori Yesus taki wi lobi en moro leki iniwan gudu.

San na den moro prenspari sani na ini yu libi? (Luku paragraaf 18)

18. San yu o tan du?

18 Di Yesus aksi Petrus: „Yu lobi mi moro den wan disi?”, dan a ben e memre Petrus taki a ben musu poti na anbegi fu en na a fosi presi na ini en libi. Petrus en nen wani taki „Wan ston”, èn a nen disi ben fiti fu di a tan du san Gado ben aksi fu en (Tori 4:5-20). Na ini a ten disi wi e tan sori lobi gi Krestes èn wi e luku bun taki a grontapuwroko fu wi, prisiriten, nanga gudu no e tron den moro prenspari sani na ini wi libi. Meki den bosroiti di wi e teki sori taki wi abi a srefi denki leki Petrus di ben taigi Yesus: „Masra, yu sabi taki mi lobi yu.”

^ paragraaf 14 Luku na artikel „Yu abi prisiri na wan fasi di fiti?” na ini A Waktitoren fu 15 oktober 2011, blz. 9-12, par. 6-15.