Go na content

Go na a tra menu

Go na table of contents

Yehovah Kotoigi

Sranantongo

Studie-Waktitoren  |  mei 2017

Yepi „trakondre sma” fu „dini Yehovah nanga prisiri”

Yepi „trakondre sma” fu „dini Yehovah nanga prisiri”

„Yehovah e kibri den trakondre sma di e libi na mindri en pipel.”PS. 146:9.

SINGI: 84, 73

1, 2. (a) Sortu tesi e miti son brada nanga sisa fu wi? (b) Sortu aksi e opo kon?

„DI WAN borgufeti broko na ini Burundi, dan a famiri fu mi ben de na wan bigi konmakandra”, na so Brada Lije e fruteri. A e taki moro fara: „Wi ben kan si fa sma ben e lon èn fa sma ben e sutu tapu trawan. Mi papa nanga mama nanga 11 fu den pikin fu den ben musu lowe nanga soso den krosi na den skin. Sonwan fu den brada nanga sisa fu mi ben man doro wan loweman-kampu na ini Malawi, di ben de sowan 1600 kilometer moro fara. Den trawan ben abi fu lowe go na tra presi.”

2 Na heri grontapu, sowan 65.000.000 sma lowe gowe libi den tanpresi fu di wan feti ben broko drape noso fu di sma ben e frufolgu den. Noiti ete so furu loweman ben de. * Dusundusun fu den sma disi na Yehovah Kotoigi. Furu fu den lasi lobiwan fu den èn pikinmoro ala san den ben abi. Sortu tra tesi miti den sma disi? Fa wi kan yepi den brada nanga sisa disi fu „dini Yehovah nanga prisiri”, aladi den abi problema? (Ps. 100:2) Fa wi kan preiki a  bun nyunsu gi loweman di no sabi Yehovah ete?

A LIBI FU WAN LOWEMAN

3. Fa a du kon taki Yesus nanga furu fu den disipel fu en tron loweman?

3 Baka di na engel fu Yehovah warskow Yosef taki Kownu Herodes ben e suku fu kiri Yesus, dan a yongu pikin Yesus nanga en papa nanga mama lowe go na Egepte. Den tan drape teleki Herodes dede (Mat. 2:13, 14, 19-21). Wan heri pisi ten baka dati, den fosi disipel fu Yesus „panya na ini den kontren fu Yudea nanga Samaria” fu di sma ben e frufolgu den (Tori 8:1). Yesus ben si na fesi taki furu fu den bakaman fu en ben o abi fu gowe libi a tanpresi fu den. A taigi den: „Te den e frufolgu unu na ini a wan foto, dan lowe go na wan tra foto” (Mat. 10:23). Awansi fa a no fa, noiti a makriki fu gowe libi yu oso fu lowe go na wan tra presi.

4, 5. Sortu ogri kan miti loweman (a) te den e lowe go na wan presi? (b) te den e libi na ini wan loweman-kampu?

4 Ogri kan miti loweman te den e lowe go na wan presi noso te den e libi na ini wan loweman-kampu. Gad, a pikin brada fu Lije, e taki: „Wi waka omeni wiki èn wi si omeni dedeskin na seipasi. Mi ben abi 12 yari. Mi futu ben sweri so te taki mi taigi mi famiri fu libi mi drape. Fu di mi papa no ben e prakseri fu libi mi gi den srudati di ben opo densrefi teige a tirimakti, meki a syow mi go na a presi pe wi ben e go. Ibri dei wi ben e begi Yehovah èn wi ben e frutrow na en tapu. Son leisi wi ben e nyan manya di wi ben piki na sei pasi. Na den sani dati hori wi na libi.”Fil. 4:12, 13.

5 Te fu kaba, furu sma fu a famiri fu Lije tan omeni yari langa na ini loweman-kampu fu den Verenigde Naties. Ma toku ogri ben kan miti den drape tu. Lije di de wan kring-opziener now, e taki: „Furu sma no ben abi wroko. Den ben e taki sma tori, den ben e dringi sopi, den ben e dòbel èn den ben e du hurudu.” Fu man kakafutu gi den takru sani dati, den Kotoigi na ini den kampu ben musu gebroiki den ten fu teki prati na a diniwroko (Hebr. 6:11, 12; 10:24, 25). Fu di den ben wani tan abi wan tranga bribi, meki den ben e gebroiki den ten bun. Furu fu den ben e pionier. Den no lasi-ati, fu di den ben e hori na prakseri taki den no ben o tan na ini a kampu fu ala ten, neleki fa Israel no ben tan waka na ini a gran sabana fu ala ten.2 Kor. 4:18.

SORI LOBI GI LOWEMAN

6, 7. (a) Fa a lobi di wi abi gi Gado e gi wi deki-ati fu yepi wi brada nanga sisa di de na nowtu? (b) Gi wan eksempre.

6 Te wi „lobi Gado”, dan wi o sori lobi gi makandra, spesrutu te wi brada nanga sisa de na ini muilek situwâsi. (Leisi 1 Yohanes 3:17, 18.) Di angriten ben miti den Kresten fu Yudea na ini a fosi yarihondro, dan brada nanga sisa orga sani fu yepi den (Tori 11:28, 29). Na apostel Paulus nanga Petrus ben e gi Kresten deki-ati tu fu sori switifasi gi makandra (Rom. 12:13; 1 Petr. 4:9). Efu Kresten musu sori switifasi gi brada nanga sisa di e kon na den oso noso na a gemeente fu den, dan a no de fu taki dati den musu sori switifasi tu gi brada nanga sisa di lowe fu di sma wani kiri den noso fu di sma e frufolgu den!Leisi Odo 3:27. *

7 No so langa pasa, dusundusun Yehovah Kotoigi na owstusei fu Ukraini ben musu lowe gowe libi a tanpresi fu den, fu di feti ben broko drape èn fu di sma ben e frufolgu den. A sari taki sonwan fu den sma disi lasi den libi. Ma furu fu den ben kan go tan na den Kresten brada nanga sisa fu den na tra presi na ini Ukraini. Wan bigi grupu go tan na Kotoigi na ini Rosiakondre. Na ini ala tu kondre den no ben e teki sei na ini politiek fu di den „no de wan pisi fu grontapu” èn den tan  „preiki a bun nyunsu” fayafaya.Yoh. 15:19; Tori 8:4.

TRANGA A BRIBI FU LOWEMAN

8, 9. (a) Sortu tesi kan miti loweman na ini wan nyun kondre? (b) Fu san ede wi musu teki ten fu yepi den?

8 Son sma ben musu lowe go na wan tra presi na ini a kondre fu den, ma furu sma ben musu go na wan tra kondre di den no sabi. A kan taki lanti fu den kondre dati e gi den loweman disi nyanyan, krosi, nanga wan tanpresi, ma kande den no e kisi nyanyan di den gwenti nyan. Loweman di e komoto fu waran kondre, kande e kon na ini wan kowru kondre fu a fosi leisi èn den no sabi sortu krosi den musu weri. Efu den ben de pôtisma, dan a kan taki den no o sabi fa fu wroko nanga den nyun sani di sma e gebroiki na ini-oso.

9 Na ini son kondre lanti seti programa fu yepi loweman so taki den kan fiti densrefi na a nyun situwâsi fu den. Ma baka wan tu mun lanti e fruwakti taki den loweman musu man sorgu gi densrefi. A sani dati kan hebi gi den loweman disi. Den sma disi musu leri wan nyun tongo, den musu leri fu fiti densrefi na nyun wet nanga tra gwenti, den musu leri fu de biten, fu pai belasting, fu pai gi tra sani, fu go na skoro èn den musu leri den pikin fu den fa fu tyari densrefi na a yoisti fasi. Prakseri fa a kan muilek fu du ala den sani disi na a srefi ten! Yu denki taki yu kan yepi den brada nanga sisa di de na ini den sortu situwâsi disi? Yu o abi pasensi nanga den èn yu o sori lespeki gi den?Fil. 2:3, 4.

10. Fa wi kan tranga a bribi fu loweman te den doro na ini wi kondre? (Luku a prenki na a bigin fu na artikel.)

10 Son leisi lanti e gens brada nanga sisa di de loweman te den wani miti sma fu a gemeente. Te den brada nanga sisa disi e weigri fu teki wan wroko di e tapu pasi gi den fu go na den konmakandra, dan son lantikantoro e tapu skreki gi den taki den no o yepi den moro noso taki den no o kisi primisi fu tan na ini a kondre. Son brada teki den wroko dati fu di den ben frede. Dati meki te brada nanga sisa lowe kon na wi kondre, dan wi no musu draidrai fu go na den. Den musu man si taki wi e broko wi ede nanga den. Te den e si taki wi e firi gi den èn taki wi wani yepi den, dan dati kan tranga a bribi fu den.Odo 12:25; 17:17.

DU SANI FU YEPI LOWEMAN

11. (a) Sortu sani loweman abi fanowdu na a bigin? (b) Fa loweman kan sori taki den de nanga tangi?

11 Na a bigin, a kan de fanowdu taki wi e gi wi brada nanga sisa nyanyan, krosi, nanga tra prenspari sani. * Kande wan brada sa breiti srefisrefi te wi e gi en wan pikin sani soleki wan das. Te loweman e sori taki den de nanga tangi, sondro taki den e dwengi sma fu du sani gi den, dan dati e meki en moro makriki gi sma fu yepi den nanga prisiri. Toku a prenspari taki loweman e leri fu sorgu densrefi te fu kaba. Disi kan yepi den fu tan abi wan bun denki fu densrefi èn fu tan abi wan bun matifasi nanga den brada nanga sisa (2 Tes. 3:7-10). Awansi fa a no fa, den abi yepi fanowdu.

Fa wi kan yepi wi brada nanga sisa di de loweman? (Luku paragraaf 11-13)

12, 13. (a) Sortu sani wi kan du fu yepi loweman? (b) Gi wan eksempre.

12 Te wi e du sani fu yepi loweman, dan wi no abi furu moni fanowdu. A moro prenspari sani di den abi fanowdu na wi ten nanga lobi. Kande yu musu sori den pe den kan go teki bus, fa fu bai gosontu nyanyan di no diri, noso fa fu bai wrokosani soleki wan naimasyin noso wan masyin fu koti grasi. Na so den o man du wroko di kan yepi den fu sorgu  densrefi. San moro prenspari, na taki yu kan yepi den fu firi switi na ini a nyun gemeente fu den. Efu a kan, dan yu kan meki den rèi nanga yu go na a konmakandra. Sori den tu fa den musu preiki a Kownukondre boskopu gi sma na ini a kontren fu yu. Tyari den brada nanga sisa disi fu go wroko nanga yu na ini a preikiwroko.

13 Di fo brada di ben de loweman doro na ini wan gemeente, dan difrenti owruman leri den fa fu rèi wagi, fa fu wroko nanga computer èn fa fu skrifi brifi fu suku wroko. Den leri den tu fa fu gebroiki den ten na so wan fasi taki den kan poti na anbegi fu den na a fosi presi (Gal. 6:10). Fosi yu denki, den ala fo tron pionier. A yepi di den kisi èn a muiti di den srefi meki fu go na fesi na ini na anbegi, yepi den fu gro èn fu no lasi gowe na ini a grontapu fu Satan.

14. (a) Nanga sortu sani loweman musu luku bun? (b) Gi wan eksempre.

14 Neleki ala tra Kresten, loweman musu luku bun taki den no e bigin feti baka gudu fu di dati kan pori a matifasi di den abi nanga Yehovah. * Lije, di wi ben kari na a bigin, e memre ete san en papa ben leri en nanga den brada nanga sisa fu en di den ben e lowe. A e taki: „A teki ibriwan fu den sani di wi no ben abi fanowdu trutru èn a trowe den wan-fru-wan. Dan a hori a leigi tas na loktu èn a taigi wi na wan switi fasi: ’Un si? Na disi nomo un abi fanowdu!’”Leisi 1 Timoteyus 6:8.

YEPI LOWEMAN NANGA DEN MORO PRENSPARI SANI DI DEN ABI FANOWDU

15, 16. (a) Fa wi kan tranga a bribi fu loweman? (b) Fa wi kan gi den deki-ati?

15 Boiti taki loweman abi krosi nanga nyanyan fanowdu, a moro prenspari fu tranga a bribi fu den èn fu gi den deki-ati (Mat. 4:4). Wan fasi fa owruman kan yepi den loweman, na te den e gi den tijdschrift nanga buku na ini a tongo fu den, èn te den e yepi den fu miti nanga brada di e taki a tongo fu den. Furu loweman e misi den famiri, a tanpresi fu den, nanga a gemeente fu den. Dati meki a prenspari taki den Kresten brada nanga sisa fu den e sori den taki Yehovah lobi den èn taki a e firi gi den. Efu dati no e pasa, dan den o moksi moro furu nanga famiriman di no de na bribi noso nanga kondreman fu den di abi a srefi kulturu nanga ondrofeni leki den (1 Kor. 15:33). Te wi e meki den firi taki a gemeente  lobi den, dan na so wi e yepi Yehovah fu „kibri den trakondre sma di e libi na mindri en pipel”.Ps. 146:9.

16 Neleki fa a ben de nanga a yongu boi Yesus nanga a famiri fu en, a kan taki loweman no man drai go baka na a kondre fu den, solanga ogri-ati tiriman de na makti drape. Boiti dati, „furu papa nanga mama si fa sma kiri famiriman fu den noso fa sma dwengi den fu abi seks, èn den no wani tyari den pikin fu den go drape baka kwetikweti”, na so Lije e fruteri. Fu man yepi den wan di ondrofeni den takru sani dati, brada na ini den kondre pe loweman mag go tan, musu ’sori taki den e firi gi tra sma, den musu lobi den brada fu den, den musu de klariklari fu sori sari-ati gi trawan èn den musu abi sakafasi’ (1 Petr. 3:8). Fu di sma ben e frufolgu loweman, meki sonwan fu den loweman disi no wani taki nanga tra sma. Kande den e syen fu fruteri fa den nyan pina, spesrutu te den pikin fu den de drape. Aksi yusrefi: ’Efu na mi, fa mi ben o wani taki sma libi nanga mi?’Mat. 7:12.

PREIKI GI LOWEMAN DI NO DE KOTOIGI

17. Fa loweman e feni trowstu te wi e preiki a bun nyunsu gi den?

17 Na ini a ten disi furu loweman e komoto fu kondre pe lanti tapu pasi gi wi fu preiki fri. Tangi fu a tranga wroko fu den Kotoigi na ini den kondre pe loweman mag go tan, meki dusundusun loweman e yere „a wortu fu a Kownukondre” fu a fosi leisi (Mat. 13:19, 23). Furu loweman di e „tyari hebi lai” e feni trowstu na den konmakandra fu wi èn heri esi den e kon si taki „Gado de trutru na un mindri”.Mat. 11:28-30; 1 Kor. 14:25.

18, 19. Fa wi kan sori koni te wi e preiki gi loweman?

18 Den Kotoigi di e preiki gi loweman musu „luku bun”, iya, den musu koni (Mat. 10:16; Odo 22:3). Arki bun te den loweman e fruteri yu san de na tapu den ati, ma no taki fu politiek. Hori yusrefi na den rai di a bijkantoro e gi èn na den wet fu lanti. Noiti no du noso taki sani di kan poti yu noso trawan na ini problema. Leri fu lespeki a bribi nanga a kulturu fu den loweman. Fu eksempre, sma fu son kondre feni taki umasma musu weri spesrutu sortu krosi. Dati meki te wi e preiki gi loweman, wi no musu weri krosi di e sori taki wi no e lespeki a fasi fa den e denki.

19 Neleki a Samariaman na ini na agersitori fu Yesus, wi wani yepi sma di e pina, sosrefi den wan di no de Kotoigi (Luk. 10:33-37). A moro bun fasi fa yu kan du dati, na fu preiki a bun nyunsu gi den. Wan owruman di yepi furu loweman e taki: „A prenspari fu taigi den loweman wantewante taki wi na Yehovah Kotoigi èn taki wi no e kon fu gi den sani, ma fu yepi den fu kon sabi Gado. Efu wi no e du dati, dan sonwan fu den kan moksi nanga wi soso fu man kisi wini gi densrefi.”

MOI BAKAPISI

20, 21. (a) Sortu bun bakapisi a abi te wi leki Kresten e sori lobi gi loweman? (b) San wi o luku na ini a tra artikel?

20 Te wi leki Kresten e sori lobi gi „trakondre sma”, dan dati abi bun bakapisi. Wan sisa e fruteri taki en famiri lowe komoto na ini Eritrea fu di sma ben e frufolgu den. Baka di fo fu den pikin fu en pina aiti dei na ini a sabana, den doro na ini Sudan. A sisa disi e fruteri: „Den brada drape gi den nyanyan, krosi, wan tanpresi èn den ben gi den moni fu man go pe den ben musu go. Den ben e si den leki famiri. Suma ben o meki sma di den no sabi kon tan na ini den oso soso fu di den e anbegi a srefi Gado leki den? Na Yehovah Kotoigi wawan!”Leisi Yohanes 13:35.

21 Fa a de nanga den someni pikin di e doro na ini wan kondre makandra nanga den papa nanga mama? Na ini a tra artikel wi o luku fa wi alamala kan yepi den fu dini Yehovah nanga prisiri.

^ paragraaf 2 Na ini na artikel disi wi e gebroiki a wortu „loweman” gi den sma di ben abi fu gowe libi den tanpe, fu di feti broko drape, fu di sma ben e frufolgu den, noso fu di rampu miti den. Kande den lowe go na wan tra kondre noso na wan tra presi na ini a kondre fu den. Soleki fa na organisâsi di e yepi loweman na heri grontapu e taki, dan tide na a dei „1 fu ibri 113 sma” na heri grontapu ben musu „lowe gowe libi a tanpresi fu en”.

^ paragraaf 6 Luku na artikel „Sori switifasi gi sma fu tra kondre”, na ini A Waktitoren fu oktober 2016, blz. 8-12.

^ paragraaf 11 Te wan loweman doro na ini a kondre, dan wantewante owruman musu du san skrifi na ini a buku Wi orga fu du a wani fu Yehovah, kapitel 8, paragraaf 30. Na tapu jw.org den owruman kan aksi a bijkantoro na ini den eigi kondre fu seni wan brifi go na a gemeente pe a loweman komoto fu kon sabi moro fu a sma. Na a srefi ten den owruman kan bigin aksi en sani fu a gemeente èn fu a preikiwroko fu en, sondro fu meki a firi wan fasi. Na so den kan kon sabi fa a de nanga a bribi fu a sma disi.

^ paragraaf 14 Luku den artikel „Nowan sma kan dini tu masra” nanga „Abi deki-ati—Yehovah na yu yepiman!” na ini A Waktitoren fu 15 april 2014, blz. 17-26.