Go na content

Go na a tra menu

Go na table of contents

Yehovah Kotoigi

Sranantongo

Studie-Waktitoren  |  mei 2017

Wan libi di e gi prisiri

Wan libi di e gi prisiri

DANIEL NANGA MIRIAM trow na ini september fu a yari 2000, èn den go tan na ini a foto Barcelona, na Spanyorokondre. Daniel e taki: „Wi no ben e si nowan problema nanga a fasi fa wi ben e libi. A wroko fu wi ben e gi wi okasi fu nyan na ini diri restaurant, fu go nanga fakansi na tra kondre, èn fu weri diri krosi. Wi ben e teki prati doronomo tu na a preikiwroko.” Ne sani kon kenki.

Na wan kongres di hori na ini 2006, Daniel yere wan lezing di naki en ati trutru. Na ini a lezing dati a brada poti na aksi disi: „Wi e du ala san wi man fu yepi den wan ’di sma e tyari go kiri’ fu feni a pasi di e tyari sma go na têgo libi?” (Odo 24:11) A lezing sori krin taki wi abi a frantwortu fu preiki a Bijbel boskopu di e kibri sma libi (Tori 20:26, 27). Daniel e taki: „Mi ben firi leki Yehovah ben e taki nanga mi.” A lezing sori tu taki wan sma o de moro koloku te a e du moro na ini a preikiwroko. Daniel ben sabi taki a sani dati tru. Miriam ben bigin pionier kaba èn a ben kisi moi blesi.

Daniel e taki: „Mi kon si taki mi ben musu drai mi libi 180 graden.” Èn na dati a du tu. A no ben e wroko so furu yuru moro, a bigin pionier, èn a prakseri fa en nanga Miriam ben o kisi prisiri te den ben o go dini na wan presi pe moro Kownukondre preikiman ben de fanowdu.

WI E PASA WAN TU PROBLEMA MA WI E KISI MOI NYUNSU TE FU KABA

Na ini mei fu a yari 2007, Daniel nanga Miriam gowe libi a wroko fu den èn den go na Panama, wan kondre pe den ben go wan leisi kaba. Den ben o go dini now na den èilanti fu Bocas del Toro na ini a Karibis Se pe moro furu den Ngabe ingi e libi. Daniel nanga Miriam ben denki taki den ben o man tan aiti mun na ini Panama nanga a moni di den ben poti na wan sei.

Den ben e go fu a wan èilanti na a trawan nanga yepi fu boto nanga baisigri. Den sabi ete fa a ben de a fosi leisi di den rèi sowan 32 kilometer nanga baisigri. Den ben musu kren a pasi na ini a faya son. Daniel ben weri so te taki pikinmoro a flaw. Toku den Ngabe ingi di ben e tan na sei pasi ben e gi den wan switikon, spesrutu di Daniel nanga Miriam meki muiti fu leri wan tu wortu fu a tongo fu den. Fosi yu denki, den ben e studeri Bijbel nanga 23 sma.

Ma di a moni fu Daniel nanga Miriam kon kaba, dan den ben e sari. Daniel e taki: „Wi ai ben e furu nanga watra te wi ben e prakseri taki wi ben musu drai go baka na Spanyorokondre. Wi ben e sari so te taki wi ben musu libi den Bijbelstudie fu wi.” Ma wán mun baka dati, den kisi moi nyunsu. Miriam e taki: „Wi kisi a kari fu dini leki spesrutu pionier. Wi ben breiti srefisrefi taki wi ben mag tan dini drape!”

WAN SANI DI GI DEN FURU PRISIRI

Na ini 2015 wan tu kenki kon na ini na organisâsi èn Daniel nanga Miriam ben musu dini now leki gewoon pionier. San den ben o du? Den poti den frutrow na ini a pramisi di skrifi na Psalm 37:5 pe skrifi: „Meki Yehovah tiri yu libi, frutrow tapu en, dan ensrefi o yepi yu.” Den feni wroko fu sorgu densrefi leki pionier èn tide na a dei den e dini na ini wan gemeente na ini a distrikt Veraguas, na Panama.

Daniel e fruteri: „Fosi wi gowe libi Spanyorokondre, wi no ben sabi seiker efu wi ben o man libi sondro den sani di wi ben gwenti. Ma tide na a dei wi abi den moro prenspari sani di wi abi fanowdu.” San e gi den furu prisiri? Den e taki: „A sani di e gi wi furu prisiri, na taki wi man yepi sakafasi sma fu kon sabi Yehovah!”