Go na content

Go na a tra menu

Go na table of contents

Yehovah Kotoigi

Sranantongo

Studie-Waktitoren  |  mei 2017

A fasi fa Gayus yepi den brada fu en

A fasi fa Gayus yepi den brada fu en

GAYUS nanga tra Kresten na ini a fosi yarihondro ben kisi fu du nanga wan tu problema. Son sma na ini a gemeente ben e prati falsi leri fu di den ben wani swaki a bribi fu den brada nanga sisa èn den ben wani tyari prati kon na ini a gemeente (1 Yoh. 2:18, 19; 2 Yoh. 7). Wan man di ben nen Diotrefes ben e taki „wan lo ogri” fu na apostel Yohanes nanga trawan. A man disi ben weigri fu sori switifasi gi Kresten di ben komoto fu tra presi èn a ben e gi trawan deki-ati fu teki na eksempre fu en (3 Yoh. 9, 10). Na dati ben de a situwâsi di Yohanes skrifi a brifi gi Gayus. A brifi disi di na apostel skrifi na ini a yari 98, na „A di fu dri brifi fu Yohanes” na ini den Griki Buku fu Bijbel.

Aladi den sani disi ben e pasa, toku Gayus tan dini Yehovah nanga en heri ati. Fa a sori dati? Fu san ede wi wani de leki Gayus na ini a ten disi? Fa a brifi fu Yohanes kan yepi wi fu du dati?

WAN BRIFI GI WAN LOBI MATI

A skrifiman fu a di fu dri brifi fu Yohanes e kari ensrefi „a owru man”. A sani disi ben o yepi Gayus fu sabi taki a sma di ben skrifi a brifi disi ben de na apostel Yohanes di ben de leki wan papa gi en. Na wan switi fasi Yohanes ben kari Gayus „a lobiwan, di mi lobi trutru”. Yohanes ben skrifi tu taki a ben howpu taki Gayus ben gosontu èn taki a bribi fu en ben tranga. Dati na wan moi sani di Yohanes ben skrifi gi Gayus!3 Yoh. 1, 2, 4.

A kan taki Gayus ben de wan owruman na ini a gemeente, ma a brifi no e taki dati krin. Yohanes ben prèise Gayus taki a ben gi den brada wan switikon aladi a no ben sabi den. Gi Yohanes disi ben de wan buweisi taki Gayus ben de wan reti-ati man fu di den futuboi fu Gado ala ten abi a gwenti fu sori switifasi gi trawan.Gen. 18:1-8; 1 Tim. 3:2; 3 Yoh. 5.

Den bun sani di Yohanes taki fu Gayus e sori taki Kresten di ben e go luku den gemeente ben gwenti go na Yohanes, èn a musu de so taki den taigi Yohanes fu den sani di miti den. Kande na so Yohanes ben e kon sabi san ben e pasa na ini den gemeente disi.

A no de fu taki dati Kresten di ben de na pasi fu go na tra presi ben o wani tan na brada nanga sisa. Den presi pe sma ben kan yuru kamra no ben bun fu tan, fu di sma ben e du wan lo hurudu drape. Dati meki sma di ben e go na tra presi ben e tan nanga mati èn Kresten ben e tan na a oso fu tra Kresten.

 „NA FU EN NEN EDE . . . DEN BEN GO PREIKI”

Yohanes ben gi Gayus deki-ati fu tan sori switifasi gi Kresten di ben e komoto fu tra presi. A taigi en: „Sorgu den [brada nanga sisa di e kon drape] te den o gowe baka. Du dati na wan fasi di Gado feni bun.” Disi wani taki dati den ben o abi fu gi den san den ben abi fanowdu fu man doro a presi pe den ben go. A ben de krin taki Gayus ben du disi kaba gi tra Kresten di ben kon tan na en oso, fu di den sma disi ben fruteri Yohanes fa a reti-ati man Gayus ben sori lobi gi den.3 Yoh. 3, 6.

A kan taki den sma di ben kon tan na Gayus oso ben de zendeling, boskopuman fu Yohanes, noso opziener di ben e go luku den gemeente. Awinsi fa a no fa, den ben go na tra gemeente fu horibaka gi a bun nyunsu. Yohanes ben taki: „Na fu en nen ede meki den ben go preiki” (3 Yoh. 7). Na ini a vers na fesi Yohanes ben taki fu Gado (luku vers 6), sobun wi kan frustan taki den wortu „fu en nen ede” abi fu du nanga Yehovah en nen. Fu di den brada ben de memre fu a Kresten gemeente, meki a ben fiti taki sma ben gi den wan switikon. A de soleki fa Yohanes ben skrifi: „A de wi plekti fu gi den sma disi wan switikon, so taki wi kan tron sma di e wroko nanga makandra na ini a tru anbegi.”3 Yoh. 8.

DEN KISI YEPI DI PROBLEMA BEN DE

Yohanes no ben skrifi a brifi gi Gayus soso fu di a ben wani taki en tangi. Yohanes ben wani yepi en tu nanga wan seryusu problema. Wi no sabi fu san ede, ma wan brada na ini a gemeente di ben nen Diotrefes, no ben wani gi den Kresten di ben e kon luku a gemeente wan switikon. A ben wani tapu trawan srefi fu du dati.3 Yoh. 9, 10.

A no de fu taki dati reti-ati Kresten no ben o wani tan na Diotrefes en oso, awinsi a ben gi den okasi fu du dati. Diotrefes ben lobi fu teki a fosi presi na ini a gemeente, a no ben e teki san Yohanes ben e taigi en, a no ben abi nowan lespeki gi en, èn a ben e taki wan lo ogri fu den apostel èn fu trawan. Aladi Yohanes no kari Diotrefes wan falsi leriman noiti, toku a ben de so taki Diotrefes ben e weigri fu saka ensrefi na ondro na apostel. Fu di Diotrefes ben e angri fu kisi biginen èn fu di a no ben e tyari ensrefi leki wan Kresten, meki sma bigin tweifri efu a ben e horibaka gi Gado. A tori fu Diotrefes e sori fa sma di e suku biginen èn di abi heimemre kan pruberi fu tyari prati kon na ini a gemeente. Dati meki Yohanes e gi Gayus nanga ala tra Kresten a rai disi: „No teki na eksempre fu a sma di e du san ogri.”3 Yoh. 11.

FU SAN EDE WI MUSU DU BUN?

Yohanes e taki tu fu Demetriyus, ma a e taki dati a brada disi na wan bun eksempre. Yohanes e skrifi: „Ala sma e taki bun fu Demetriyus . . . Fu taki en leti, wisrefi e taki bun fu en èn yu sabi taki san wi e taki de tru” (3 Yoh. 12). A kan taki Demetriyus ben abi a yepi fu Gayus fanowdu èn taki na apostel ben e gebroiki a di fu dri brifi fu Yohanes fu meki Gayus kon sabi suma na Demetriyus èn sortu bun sani a ben du. Kande na Demetriyus srefi ben tyari a brifi gi Gayus. A kan taki Demetriyus ben de wan boskopuman fu Yohanes, noso wan opziener di e go luku den gemeente. Kande a tyari kon na krin moro fara gi Gayus san Yohanes ben skrifi na ini a brifi fu en.

Fu san ede Yohanes gi Gayus deki-ati fu tan gi den brada wan switikon, aladi Gayus ben gwenti du dati kaba? A de so taki Yohanes ben si taki Gayus ben abi deki-ati fanowdu? Yu denki taki Yohanes ben e prakseri taki Gayus ben o frede fu gi Kresten wan switikon, fu di Diotrefes ben wani puru sma leki en na ini a gemeente? Awinsi fa a no fa, Yohanes gi Gayus a deki-ati disi: „A sma di e du san bun, na fu Gado” (3 Yoh. 11). Dati meki wi musu du bun èn wi musu tan du dati tu.

A de so taki Gayus tan gi Kresten wan switikon soleki fa a brifi fu Yohanes ben taigi en?  Wi kan bribi taki a du dati fu di a di fu dri brifi fu Yohanes de fu feni na ini Bijbel èn a e gi sma deki-ati fu „teki na eksempre fu a sma di e du san bun”.

SANI DI WI KAN LERI FU A DI FU DRI BRIFI FU YOHANES

Dati na ala san wi sabi fu wi lobi brada Gayus fu owruten. Toku wi kan leri wan tu sani te wi e luku syatu fa a libi fu en ben de.

Fa wi kan „gi sma wan switikon”?

A fosi sani, na taki furu fu wi kon sabi den tru tori fu Bijbel fu di reti-ati man ben de klariklari fu teki pasi go na tra presi so taki wi kan kon sabi Gado Wortu. A no de fu taki dati na ini a ten disi a no ala sma fu a Kresten gemeente e go na farawe presi fu preiki a bun nyunsu. Ma neleki Gayus, wi kan horibaka gi den wan di e du dati èn wi kan gi den deki-ati. Dati na sma soleki a kring-opziener nanga a wefi fu en. Noso kande wi kan du sani fu yepi den brada nanga sisa di e froisi go tan na boitipresi noso na tra kondre fu dini pe moro preikiman de fanowdu. Sobun, meki wi „abi a gwenti fu gi sma wan switikon”.Rom. 12:13; 1 Tim. 5:9, 10.

A di fu tu sani, na taki wi no musu fruwondru efu oiti sma e opo densrefi teige den wan di e teki fesi na ini a gemeente. Sma ben opo densrefi teige Yohanes èn den ben du dati tu nanga na apostel Paulus (2 Kor. 10:7-12; 12:11-13). Ma san wi musu du te wi e si taki son sma e tyari den sortu problema disi kon na ini a gemeente? Paulus gi Timoteyus a rai disi: „Wan srafu fu Masra no musu meki trobi, ma a musu sori switifasi gi ala sma èn a musu abi a koni fu man gi sma leri. Te ogri e miti en, a musu man hori ensrefi. Nanga safri-ati a musu gi leri na den sma di no wani arki.” Te wi e tan sori safri-ati, srefi te sma e suku trobi nanga wi, dan kande den wan di lobi krutu sani o kenki a denki fu den te fu kaba. Te dati pasa dan „kande Gado o meki den abi berow, so taki den kan kon sabi finifini san na den tru tori fu Gado.”2 Tim. 2:24, 25.

A di fu dri sani, na taki te Kresten brada nanga sisa e tan dini Yehovah aladi den e kisi gens, dan wi musu warderi den èn wi musu prèise den fu di den e horidoro. A no de fu taki dati na apostel Yohanes gi Gayus deki-ati èn a trowstu en taki a ben e du bun. Neleki Yohanes, owruman na ini a ten disi musu gi den brada nanga sisa deki-ati so taki den ’no e kon weri’.Yes. 40:31; 1 Tes. 5:11.

A brifi di na apostel Yohanes skrifi gi Gayus abi 219 wortu nomo èn fu dati ede a de a moro syatu buku na ini Bijbel. Toku a brifi disi prenspari srefisrefi gi Kresten na ini a ten disi.