Go na content

Go na a tra menu

Go na table of contents

Yehovah Kotoigi

Sranantongo

Studie-Waktitoren  |  mei 2016

 A historia fu wi

„Gi den sma di kisi a wroko”

„Gi den sma di kisi a wroko”

MUNDE 1 september 1919, baka di alen fadon omeni dei, son bigin skèin èn a weer ben e kon waran baka. Na a bakadina dati, sowan 1000 sma nomo kon makandra na ini wan stadion di ben kan hori 2500 sma. Den ben kon arki a fosi lezing fu a kongres na Cedar Point, Ohio, Amerkankondre. Ma di neti tapu, moro leki 2000 sma ben kon drape nanga boto, nanga wagi èn nanga loko. Tapu tudewroko, yu ben abi someni sma taki den ben abi fu sidon arki den tra lezing fu a kongres na ondro den bigi bon dorosei fu a stadion.

A son ben e skèin na mindri den bon èn yu ben kan si a skaduw fu den blad na tapu a krosi fu den man. Wan switi winti di ben e komoto fu Lake Erie ben e waiwai na ati fu den umasma. Wan brada ben taki: „A presi ben lai moi bon nanga bromki èn nowan babari fu na owru grontapu ben de fu yere. A ben gersi wan paradijs trutru.”

Ma san ben moro moi, na fu si a prisiri fesi fu ala den sma drape. Wan koranti ben taki: „Yu ben kan si taki den sma drape no ben e meki spotu nanga a kerki fu den, ma toku den ben e prisiri.” Ma san ben meki den Bijbel Ondrosukuman de nanga moro prisiri na taki den ben de nanga makandra, baka di den kisi someni hebi tesi na ini den yari na fesi. Na a ten fu a Fosi Grontapufeti sma ben e gens den, sma na ini a gemeente ben opo densrefi, Brooklyn Betel ben tapu, den ben sroto furu brada nanga sisa fu di den ben e horibaka gi a Kownukondre èn aiti brada di ben teki fesi na ini na organisâsi fu wi, ben musu go na strafu-oso 20 yari langa. *

Na ini den muilek yari disi, son Bijbel Ondrosukuman ben tapu fu preiki fu di den ben lasi-ati èn den no ben sabi moro san fu du. Ma furu brada nanga sisa ben meki muiti fu horidoro, aladi den tiriman ben e frufolgu den. Wan sma di ben ondrosuku san sma ben e du nanga den Bijbel Ondrosukuman, taki dati aladi den tiriman ben warskow den, toku den ben feni taki den ben o „tan preiki a wortu fu Gado te na a kaba”.

A heri pisi ten disi di den brada kisi tesi, den ben „si fa Masra tiri den . . . èn den ben begi ala ten meki a Tata yepi den”. Ma now den ben de nanga makandra baka na a kongres na Cedar Point. Wan sisa ben aksi ensrefi fa den „ben o bigin preiki fayafaya baka èn fa den ben o man orga a wroko bun baka”. Disi na san furu sma drape ben aksi densrefi tu. Ma san moro prenspari na taki den ben wani bigin nanga a preikiwroko baka!

 DEN KISI WAN NYUN YEPISANI!

A heri wiki, den sma di ben de na a kongres aksi densrefi san den tu letter „GA” ben wani taki. Den letter disi ben de tapu a kongres programa, tapu pikin karta di den ben meki fu gi sma wan switikon èn tapu bord di ben de na ala sei fu a kongres dyari. Tapu freida, „a dei fu den wrokoman”, Brada Joseph F. Rutherford sori ala den 6000 sma drape taki den letter „GA” ben wani taki The Golden Age (A Gowtu Ten), wan nyun tijdschrift gi a preikiwroko. *

Disi na san Brada Rutherford ben taki fu den salfu brada nanga sisa fu en: „Aladi den e libi na ini wan muilek ten, a bribi fu den e meki taki den man si a ’Gowtu ten’ te a Mesias o tiri. . . . Den e si en leki wan bigi grani fu du a prenspari wroko disi fu taigi grontapu taki wan ’Gowtu ten’ de fu kon. Na a wroko disi Gado gi den fu du.”

Na tapu a kafti fu The Golden Age ben skrifi taki a de „wan tijdschrift di e taki fa sani de trutru, a e gi sma howpu èn a e tranga a bribi fu sma”. Den ben o gebroiki a tijdschrift disi fu preiki a bun nyunsu na wan nyun fasi. Den ben o go oso fu oso fu aksi sma efu den ben wani gi den nen fu kan kisi a tijdschrift disi ibri mun. Di den aksi omeni sma ben wani du a wroko disi, ala sma dyompo opo. Ne „den alamala bigin singi nanga den heri ati leki san fayafaya bakaman fu Yesus gwenti du”. A singi disi ben nen „Masra, seni yu leti nanga yu tru leri kon”. J. M. Norris e taki: „Noiti mi o frigiti a dei dati. Wi ben singi so tranga taki a ben gersi leki den bon ben e seki.”

Baka a programa, sma go tanapu na ini langa rèi omeni yuru langa fu kan de den fosi sma di kisi a tijdschrift. Mabel Philbrick ben taki: „Wi ben breiti fu sabi taki wi ben abi wroko baka!” Furu sma drape ben firi leki a sisa disi.

„GI DEN SMA DI KISI A WROKO”

Sowan 7000 Bijbel Ondrosukuman ben de srekasreka fu bigin wroko. Den ben kisi a traktaat di ben nen Organization Method (Fa a wroko orga) nanga wan brochure To Whom the Work Is Entrusted (Gi den sma di kisi a wroko). A traktaat nanga a brochure disi ben sori finifini fa a nyun Dienstafdeling na a edekantoro ben o orga a wroko. Na ini ibri gemeente wan Diniwroko Komte ben o seti èn wan brada di ben o teki fesi ben o sori fa a preikiwroko ben o du. Den ben musu prati a kontren na ini grupu fu 150 te go miti 200 oso. Fodewroko neti wan Diniwroko Konmakandra ben o hori gi brada di ben o fruteri ondrofenitori èn den ben o gi preikiwroko raportu.

Herman Philbrick e taki: „Di wi drai go na oso baka, wi alamala bigin nanga a wroko fu suku sma di ben wani kisi a nyun tijdschrift.” Na ala sei sma ben wani arki wi. Sisa Beulah Covey e taki: „A ben gersi leki fu di sma ben e sari baka a feti, meki den alamala ben breiti fu yere taki wan bun ten ben o kon.” Arthur Claus ben skrifi: „A heri gemeente ben breiti fu yere taki furu sma ben gi den nen fu kisi a tijdschrift.” Tu mun baka di The Golden Age kon na doro, sowan afu milyun tijdschrift ben prati èn 50.000 sma ben gi den nen fu kisi a tijdschrift disi.

Na ini The Watch Tower fu 1 yuli 1920, yu ben abi wan artikel di nen „A bun nyunsu fu a Kownukondre”. Bakaten Brada A. H. Macmillan taki dati „disi na a fosi leisi di na organisâsi gi brada nanga sisa na heri grontapu a deki-ati fu preiki a bun nyunsu”. Na artikel disi aksi ala salfu Kresten fu „meki bekènti na heri grontapu taki a kownukondre fu hemel ben de krosibei”. Na ini a ten disi, milyunmilyun brada nanga sisa e preiki fayafaya makandra nanga den brada fu Krestes di kisi a wroko disi. Den alamala e wakti a bun ten di a Mesias Kownukondre o tyari kon.

^ paragraaf 5 Luku Jehovah’s Getuigen — Verkondigers van Gods koninkrijk, kapitel 6, „Een tijd van beproeving (1914-1918)”.

^ paragraaf 9 Na ini 1937, den kenki a nen The Golden Age kon tron Consolation (Vertroosting) èn na ini 1946 a tron Ontwaakt!