Go na content

Go na a tra menu

Go na table of contents

Yehovah Kotoigi

Sranantongo

Studie-Waktitoren  |  mei 2016

Bijbel e kenki yu libi ete?

Bijbel e kenki yu libi ete?

„Kenki un denki, so taki unu kan kenki un libi.”ROM. 12:2.

SINGI: 61, 52

1-3. (a) San kan muilek gi wi fu kenki baka te wi dopu? (b) Te wi no e go na fesi so esi leki san wi ben fruwakti, dan san wi kan aksi wisrefi? (Luku den prenki na a bigin fu na artikel.)

BAKA DI Kevin [1] leri sabi a tru anbegi, a ben wani tron wan bun mati fu Yehovah. Ma fosi a tron wan Kotoigi, na omeni yari langa a ben e dòbel, smoko, dringi furu sopi èn gebroiki drugs. Efu Kevin ben wani taki Gado feni en bun, a ben o abi fu tapu nanga den takru gwenti disi. Èn na dati a du, fu di a ben frutrow na tapu Yehovah èn fu di Gado Wortu ben gi en a krakti fu kenki en libi.Hebr. 4:12.

2 Baka di Kevin dopu, a ben musu tan meki muiti fu kenki en libi so taki a ben kan tron wan moro bun Kresten (Ef. 4:31, 32). Fu eksempre, a ben si taki a ben muilek fu hori ensrefi, so taki a no kisi atibron esi. Kevin e taki: „Fu taki en leti, a ben moro muilek gi mi fu leri fu hori misrefi leki fu tapu nanga den takru gwenti di mi ben abi fosi.” Kevin ben man kenki fu di a ben begi Gado fayafaya èn fu di a ben lobi studeri Bijbel.

3 Fosi wi dopu, furu fu wi ben abi fu kenki someni sani na  ini wi libi tu fu man du san Bijbel e taki. Baka dati wi si taki wi ben musu tan meki muiti fu kenki son fruferi fasi fu wi, so taki wi ben kan kon gersi Gado nanga Krestes moro nanga moro (Ef. 5:1, 2; 1 Petr. 2:21). Fu eksempre, kande wi si taki wi ben lobi krutukrutu, noso taki wi ben frede fu san tra sma o taki noso denki fu a bribi fu wi. Kande wi ben lobi taki sma tori noso wi ben abi wan tra swakifasi. A kan taki yu no ben fruwakti taki a ben o muilek gi yu fu kenki den fasi disi. Efu na so, dan kande yu e aksi yusrefi: ’Mi tapu nanga someni takru gwenti kaba, dan fu san ede a muilek gi mi so fu kenki den pikinpikin fruferi fasi fu mi? San moro mi kan du fu meki Bijbel kenki mi libi?’

NO FRUWAKTI TUMUSI FURU FU YUSREFI

4. Fu san ede wi no man prisiri Yehovah ati ala ten?

4 Di wi leri sabi Yehovah èn wi kon lobi en, wi ben wani sori en nanga wi heri ati taki wi o du san a feni bun. Ma awinsi omeni muiti wi e du fu prisiri en ati, wi no man du dati ala ten fu di wi na sondusma. Son leisi wi e firi leki na apostel Paulus di ben taki: „Mi wani du san bun, ma mi no man du en.”Rom. 7:18; Yak. 3:2.

5. Sortu sani wi kenki fosi wi dopu, ma nanga sortu swakifasi wi e feti ete kande?

5 Fosi wi ben man tron wan Kotoigi fu Yehovah, wi ben musu tapu nanga den takru gwenti fu wi (1 Kor. 6:9, 10). Ma toku wi na sondusma ete (Kol. 3:9, 10). Sobun, wi no kan fruwakti taki wi no o meki fowtu moro baka te wi dopu. Awinsi o langa wi e dini Yehovah kaba, wi o tan meki fowtu. A o pasa wanwan leisi tu taki wi e du wan sani baka, aladi wi ben tapu nanga en èn son leisi wi o denki sani di no bun. A kan taki a o teki omeni yari fu feti nanga den swakifasi fu wi.

6, 7. (a) Fu san ede wi kan de mati fu Yehovah, aladi wi na sondusma? (b) Fu san ede wi no musu draidrai fu aksi Yehovah fu gi wi pardon?

6 Ma aladi wi na sondusma, toku wi man abi wan bun matifasi nanga Yehovah èn wi man tan dini en. Prakseri a sani disi: Di Yehovah meki wi tron mati fu en, a ben sabi taki son leisi wi ben o sondu (Yoh. 6:44). Fu di Gado sabi den fasi fu wi èn a sabi san de na ini wi ati, meki a ben sabi tu nanga sortu swakifasi wi ben o abi fu feti. A ben sabi taki wanwan leisi wi ben o meki fowtu. Ma toku a no tapu wi fu tron mati fu en.

7 Na fu di Gado lobi wi, meki a gi wi wan moi kado. A gi wi a frulusu-ofrandi fu en lobi Manpikin (Yoh. 3:16). Fu di Yehovah du a moi sani disi gi wi, meki wi kan aksi en pardon efu wi abi berow èn wi no abi fu tweifri taki wi de wan mati fu en ete (Rom. 7:24, 25; 1 Yoh. 2:1, 2). Awinsi wi na sondusma noso awinsi wi abi a firi taki wi no krin na Gado ai, wi no musu draidrai fu aksi en efu a wani gebroiki a lusu-paiman fu gi wi pardon. Efu wi ben o draidrai fu du dati, dan a ben o de neleki te wi e weigri fu wasi wi anu aladi den doti. A lusu-paiman de gi sondu libisma di abi berow. Dati meki wi musu breiti taki wi kan de mati fu Yehovah, aladi wi na sondu libisma.Leisi 1 Timoteyus 1:15.

8. Fu san ede wi no musu si den swakifasi fu wi leki pikinpikin sani?

8 Ma dati no wani taki dati wi musu si den swakifasi fu wi leki pikinpikin sani. Efu wi wani de bun mati fu Yehovah, dan wi musu pruberi fu kon de leki Gado nanga Krestes èn wi musu pruberi fu tron  wan sma di den feni bun (Ps. 15:1-5). Wi musu meki muiti tu fu dwengi den sondu firi fu wi, èn efu a kan wi musu pruberi fu no abi den firi disi moro. Awinsi wi dopu paspas noso wi na wan futuboi fu Yehovah omeni yari kaba, wi musu ’tan kenki wi denki’.2 Kor. 13:11.

9. Fa wi sabi taki wi kan tan meki muiti fu kon abi nyun fasi?

9 Efu wi wani ’kenki wi denki’ èn sori taki wi na sma di abi „nyun fasi”, dan wi musu tan meki muiti ala ten baka. Paulus ben taigi den Kresten brada nanga sisa fu en: „Un musu puru na owru fasi fa unu ben de èn den sani di unu ben e du fosi. Bika na owru fasi fa unu ben de no bun kwetikweti, fu di unu ben e meki un firi kori unu. Tan du muiti fu meki a denki fu unu kon nyun. Un musu kisi nyun fasi fu tron sma di de leki fa Gado wani, sobun, reti-ati sma di e gi yesi na Gado ala ten” (Ef. 4:22-24). Den wortu ’tan du muiti fu kon nyun’, e sori taki ala ten baka wan sma musu meki muiti fu kon abi nyun fasi. Te wi e leisi disi, dan a e gi wi deki-ati fu di wi sabi taki awinsi o langa wi e dini Yehovah kaba, wi kan tan meki muiti fu de wan moro bun Kresten di abi nyun fasi. Iya, Bijbel kan tan kenki wi libi.

FU SAN EDE A MUILEK SO?

10. San wi musu du efu wi wani meki Gado Wortu tan kenki wi èn san wi kan aksi wisrefi?

10 Efu wi wani taki Gado Wortu e tan kenki wi, dan wi musu meki bun furu muiti. Ma fu san ede wi musu meki someni muiti? Efu Yehovah e blesi den muiti di wi e du, dan a musu de moro makriki fu go na fesi, a no so? Fu san ede Yehovah no e puru ala sondu firi fu wi so taki a no muilek gi wi fu sori den moi fasi fu en?

11-13. Fu san ede Yehovah e fruwakti fu wi taki wi musu meki muiti fu feti nanga den swakifasi fu wi?

11 Te wi e prakseri den sani di wi e si na hemel èn na grontapu, dan dati e sori wi taki Yehovah abi furu makti. Fu eksempre, a meki a son di faya srefisrefi. Ibri sekonde, a son e puru someni faya nanga leti taki wan pikinso fu en nomo de fanowdu fu meki libi de na grontapu (Ps. 74:16; Yes. 40:26). Yehovah breiti fu gi den futuboi fu en pikinso fu en krakti te dati de fanowdu (Yes. 40:29). A ben kan gi wi a krakti srefi fu feti nanga iniwan swakifasi sondro taki a ben o hebi gi wi èn sondro taki wi ben o abi fu meki fowtu fosi. Ma fu san ede a no e du dati?

12 Yehovah gi wi wan moi kado èn dati na taki wi kan teki wi eigi bosroiti. Te wi srefi e teki a bosroiti fu du a wani fu Gado èn wi e meki muiti fu en, dan wi e sori Yehovah omeni wi lobi en èn taki wi wani prisiri en ati. Wi e sori en tu taki wi e si en leki wi Moro Hei Tiriman. Sensi a bigin, Satan ben feni taki Yehovah no abi a reti fu de wi Tiriman. Sobun, te wi srefi e teki a bosroiti fu dini Yehovah leki wi Tiriman èn wi e du ala san wi man fu horibaka gi en, dan wi lobi-ati hemel Tata o warderi dati trutru (Yob 2:3-5; Odo 27:11). Ma efu Yehovah ben o meki en tumusi makriki gi wi fu feti nanga den sondu firi fu wi, dan wi no ben abi fu du furu muiti fu prisiri en ati. Wi ben o taki nomo dati wi e tai hori na en èn taki wi e horibaka gi a tiri fu en, ma wi no ben o man buweisi dati trutru.

13 Dati meki Yehovah e taigi wi fu meki „ala muiti” fu kon abi den fasi fu en. (Kol. 3:12; leisi 2 Petrus 1:5-7.) A wani taki wi musu meki muiti fu dwengi den  firi fu wi èn fu no prakseri sani di no fiti (Rom. 8:5; 12:9). Te wi e du ala san wi man, dan wi o kisi moro prisiri fu di wi o si taki Bijbel e kenki wi libi ete.

MEKI GADO WORTU TAN KENKI YU

14, 15. San wi kan du fu kisi den fasi di Yehovah lobi? (Luku a faki di nen „ Bijbel nanga begi kenki den libi”.)

14 San wi kan du fu kisi den fasi di Yehovah feni bun? Wi no musu denki taki wi o man du dati nanga wi eigi krakti nomo. Nôno. Wi o abi fu du tu san Gado e taki, fu di na Romesma 12:2 wi e leisi: „No libi moro leki den sma fu a grontapu disi, ma kenki un denki, so taki unu kan kenki un libi. Dan unu o sabi san na a wani fu Gado di bun, di e gi en prisiri, èn di no e mankeri noti.” Yehovah e gebroiki en Wortu nanga en santa yeye fu meki wi si san na a wani fu en. Na so wi o man du san a wani èn wi o du ala san wi man fu kenki wi libi so taki a kan feni wi bun. Wan tu fu den sani di wi musu du na taki wi musu leisi Bijbel ibri dei, wi musu denki dipi fu den Bijbeltekst di wi e leisi èn wi musu begi Gado fu a gi wi en santa yeye (Luk. 11:13; Gal. 5:22, 23). Te wi e meki Gado santa yeye tiri wi èn wi e pruberi fu si sani leki fa Yehovah e si sani, dan moro nanga moro wi o kon abi a denki fu Yehovah, wi o du san a feni bun èn wi o taki leki fa a leri wi. Ma awinsi wi e du ala den sani disi, toku wi musu tan feti nanga den swakifasi fu wi ete.Odo 4:23.

Kande wi kan kibri son Bijbeltekst nanga artikel di e yepi wi fu feti nanga den swakifasi fu wi èn wanwan leisi wi kan luku den baka (Luku paragraaf 15)

15 Boiti taki wi musu leisi Bijbel ibri dei, wi musu studeri Gado Wortu makandra nanga den buku nanga tijdschrift fu wi, so taki wi kan kisi den moi fasi fu Yehovah. Son Kresten kibri wan tu Bijbeltekst nanga son artikel fu A Waktitoren nanga Ontwaakt! di ben yepi den fu kon abi moi Kresten fasi noso fu feti nanga wan swakifasi. Wanwan leisi den e luku den Bijbeltekst noso den artikel disi baka.

16. Fu san ede wi no musu lasi-ati te wi no man kenki so esi leki fa wi wani?

16 Kande yu feni taki yu no e go na fesi so esi. Ma hori na prakseri taki a e teki ten fu kenki wi libi. Ala ten wi o abi fu tan meki muiti fu kisi den fasi fu Gado. Sobun, te wi e tan meki muiti fu meki Bijbel kenki wi libi, dan wi musu abi pasensi. Na a bigin, wi o abi fu dwengi wisrefi fu du san Bijbel e taki. Ma o moro wi e kisi a denki fu Yehovah, o moro a o makriki gi wi fu denki èn fu du sani soleki fa Gado wani.Ps. 37:31; Odo 23:12; Gal. 5:16, 17.

 PRAKSERI A MOI TEN DI E WAKTI WI

17. Sortu moi ten e wakti wi efu wi e tan dini Yehovah?

17 Te fu kaba, den futuboi fu Yehovah no o abi sondu moro èn den o kisi a grani fu dini en fu têgo. Na a ten dati, wi no o abi fu meki muiti moro fu sori den fasi fu Gado, ma nanga prisiri wi o man sori den fasi disi. Ma nownow kaba wi man dini wi lobi-ati Gado fu di a gi wi a lusu-paiman. Efu wi e tan meki muiti fu meki Bijbel kenki wi libi, wi o man tan dini Gado aladi wi na sondusma.

18, 19. Fu san ede wi kan de seiker taki Bijbel man kenki wi libi?

18 Kevin, a brada di wi ben kari na a bigin fu na artikel, du ala san a man fu no kisi atibron so esi moro. A denki dipi fu Bijbel gronprakseri èn a du san a leri. A teki a rai fu tra brada nanga sisa tu èn a meki den yepi en. Baka wan tu yari, Kevin ben man kenki furu sani na ini en libi. Te fu kaba, a ben man tron wan dinari ini a diniwroko èn now a de wan owruman sowan 20 yari kaba. Ma toku a sabi taki a musu tan feti nanga den swakifasi fu en ete.

19 Na ondrofenitori fu Kevin e sori taki Bijbel e yepi Gado pipel fu tan kenki a libi fu den so taki den kan tron moro bun Kresten. Sobun, meki wi no tapu fu du san de fanowdu fu meki Gado Wortu kenki wi. Tan meki muiti fu kenki yu libi èn dati o yepi yu fu kon moro krosibei na Yehovah (Ps. 25:14). Te wi e si taki Yehovah e blesi den muiti di wi e meki, dan wi no o tweifri taki Bijbel kan tan kenki wi libi.Ps. 34:8.

^ [1] (paragraaf 1) Wi kenki a nen.