Go na content

Go na a tra menu

Go na table of contents

Yehovah Kotoigi

Sranantongo

Studie-Waktitoren  |  maart 2018

Ibri Kresten musu teki dopu

Ibri Kresten musu teki dopu

„A dopu e frulusu unu.”​—1 PETR. 3:21.

SINGI: 52, 41

1, 2. (a) Fa son papa nanga mama e firi te den pikin wani teki dopu? (b) Fu san ede den brada e aksi wan sma di wani teki dopu efu a gi ensrefi abra na Yehovah? (Luku a prenki na a bigin fu na artikel.)

A PAPA nanga mama fu Maria e luku fa a yongu meisje fu den e opo tanapu makandra nanga den tra sma di o teki dopu. Nanga wan tranga sten Maria e piki den tu aksi di a takiman e poti gi den. Syatu baka dati, a e teki dopu.

2 A papa nanga mama fu Maria ben breiti taki a meisje fu den teki a bosroiti fu gi ensrefi abra na Yehovah èn fu teki dopu. Ma fosi Maria teki dopu, en mama ben e broko en ede pikinso. A ben e aksi ensrefi: ’Maria no yongu tumusi fu teki dopu? A e frustan trutru o seryusu a bosroiti disi de? A no ben o moro bun fu meki a wakti pikinso fosi a teki dopu?’ Furu papa nanga mama abi den sortu aksi disi te den pikin e taki dati den wani teki dopu (Preik. 5:5). Wi kan frustan disi fu di a moro prenspari bosroiti di wan Kresten kan teki na fu gi ensrefi abra na Yehovah èn fu teki dopu. ​—Luku a faki „ Yu gi yusrefi abra na Yehovah?

3, 4. (a) Fa na apostel Petrus sori o prenspari a de fu teki dopu? (b) Fu san ede Petrus agersi a dopu nanga a bow di Noa ben bow na ark?

3 Na apostel Petrus ben agersi dopu nanga a bow di Noa ben bow na ark. A taki: „Now a dopu e frulusu unu na wan srefi sortu fasi.” (Leisi 1 Petrus 3:20, 21.) Na ark ben e sori ala sma krin taki Noa ben wani du a wani fu Gado nanga en heri ati. Fu di Noa ben abi bribi, meki a du a wroko di Yehovah gi en. Iya, a bribi fu Noa meki taki Yehovah kibri en nanga en osofamiri di a Frudu kon. San Petrus ben wani leri wi?

4 Te sma ben si na ark, den ben sabi taki Noa ben abi bribi na ini Gado. Te sma e si fa wan sma e teki dopu, dan dati e sori den taki a sma gi ensrefi abra na Yehovah fu di a e bribi na ini Krestes di kisi wan opobaka. Neleki Noa, den sma di e teki dopu e gi yesi na Gado èn den e du a wroko di Gado gi den fu du. Te na ogri grontapu disi o kisi pori, dan Yehovah o frulusu den dopu anbegiman fu en di tan gi yesi na en, neleki fa a ben frulusu Noa di a Frudu kon (Mark. 13:10; Openb. 7:9, 10). Disi e sori taki a prenspari srefisrefi taki wan sma gi ensrefi abra na Gado èn teki dopu. Efu wan sma e draidrai fu teki dopu, dan a kan taki a no o kisi têgo libi.

5. San wi o luku na ini na artikel disi?

5 Fu di dopu na wan seryusu sani, meki wi musu poti prakseri na dri aksi. San Bijbel e taki fu dopu? San wan sma musu du fosi a dopu? Fu san ede wi musu tan hori na prakseri o prenspari a de fu teki dopu, te wi e studeri nanga wi pikin noso nanga wan Bijbelstudie?

 SAN BIJBEL E TAKI FU DOPU?

6, 7. (a) Fu san ede sma ben e go na Yohanes fu teki dopu? (b) Fu san ede a dopu fu Yesus ben e difrenti fu a di fu den tra sma di Yohanes ben dopu?

6 A fosi sma na ini Bijbel di ben e dopu trawan, na Yohanes a Dopuman (Mat. 3:1-6). Den sma di ben kon na Yohanes fu teki dopu, ben e du dati fu sori taki den ben abi berow fu di den no ben hori densrefi na a Wet fu Moses. Ma a moro prenspari sma di go na Yohanes fu teki dopu, no ben du dati fu di a ben abi berow fu en sondu. Yohanes ben abi a grani fu dopu Yesus, a Manpikin fu Gado di no ben abi sondu (Mat. 3:13-17). Fu di Yesus no ben abi sondu, meki a no ben abi fu sori berow (1 Petr. 2:22). A dopu fu en ben e sori taki a ben de klariklari fu gebroiki en libi fu du a wani fu Gado.​—Hebr. 10:7.

7 Baka di Yesus bigin preiki a bun nyunsu na grontapu, den bakaman fu en ben bigin dopu sma tu (Yoh. 3:22; 4:1, 2). Neleki den sma di Yohanes ben e dopu, den sma disi ben e dopu fu sori taki den abi berow fu di den no ben hori densrefi na a Wet fu Moses. Ma baka di Yesus dede èn a kisi wan opobaka, dan a dopu ben wani taki wan tra sani.

8. (a) Sortu wroko Yesus gi den bakaman fu en baka di a kisi wan opobaka? (b) Fu san ede wan Kresten musu teki dopu?

8 Na ini a yari 33, baka di Yesus kisi wan opobaka, a taki nanga moro leki 500 sma. Na ini a grupu disi yu ben abi mansma, umasma èn kande pikin-nengre srefi. Kande na a okasi dati a taki den wortu disi: „Go na sma fu ala kondre èn meki den tron disipel. Dopu den na ini a nen fu a Tata, fu a Manpikin, èn fu a santa yeye. Leri den fu du ala san mi taigi unu fu du” (Mat. 28:19, 20; 1 Kor. 15:6). Iya, a sori leki hondrohondro bakaman fu Yesus ben de drape di Yesus gi den a wroko fu meki disipel. Den sani di Yesus ben taki e sori taki ala sma di wani tron wan disipel fu en musu teki dopu (Mat. 11:29, 30). Ibri sma di wani dini Gado na a fasi di a feni bun, musu frustan taki Yehovah e gebroiki Yesus fu du san a abi na prakseri. Baka dati so wan sma kan teki dopu na ini watra. Na a dopu disi wawan Gado feni bun. Bijbel abi furu eksempre di e sori taki na a ten fu den apostel, den nyun disipel fu Krestes ben e frustan o prenspari a de fu teki dopu. Den no ben e draidrai fu teki dopu.​—Tori 2:41; 9:18; 16:14, 15, 32, 33.

NO DRAIDRAI FU TEKI DOPU

9, 10. San na eksempre fu na Etiopia man nanga na apostel Paulus e leri wi fu dopu?

9 Leisi Tori fu den apostel 8:35, 36. Luku na eksempre fu wan Etiopia man di ben teki a Dyu bribi. A man disi di ben go na Yerusalem fu anbegi Gado, ben e drai go baka na en oso. Wan engel fu Yehovah taigi Filipus fu go na a man disi fu „fruteri en a bun nyunsu fu Yesus”. San na Etiopia man du? Fu di a ben abi warderi gi den sani di a leri, meki a ben wani du san Yehovah e aksi fu ibri Kresten. Sobun, a teki dopu wantewante.

10 Wan tra eksempre na a di fu Saulus di ben e frufolgu den Kresten. A ben de wan Dyu èn a pipel disi ben gi densrefi abra na Gado. Ma te fu kaba Yehovah no ben wani den Dyu moro leki en pipel. Saulus ben denki taki Yehovah ben breiti ete nanga a fasi fa den Dyu ben e anbegi en èn dati meki a ben e frufolgu den Kresten. Ma wan dei Yesus taki  nanga Saulus komoto fu hemel. San Saulus du? A teki a yepi di a Kresten disipel Ananias gi en. Bijbel e taki dati „a opo èn a teki dopu” (Tori 9:17, 18; Gal. 1:14). Bakaten sma kon sabi Saulus leki na apostel Paulus. Luku taki, baka di Paulus kon frustan taki Gado e gebroiki Yesus fu du san a abi na prakseri, a dopu wantewante.​—Leisi Tori fu den apostel 22:12-16.

11. (a) Fu san ede sma di e studeri Bijbel e teki dopu na ini a ten disi? (b) Fa wi e firi te wi e si taki sma e teki dopu?

11 Na a srefi sani sma di e studeri Bijbel na ini a ten disi e du, awinsi den yongu noso owru. Fu di den abi bribi èn fu di den de nanga tangi gi den sani di Bijbel e leri, meki den e gi densrefi abra na Gado èn den e teki dopu. Na ibri kring konmakandra nanga kongres wan dopu-lezing e hori spesrutu gi den sma disi. Yehovah Kotoigi breiti te wan Bijbelstudie e frustan den tru leri fu Bijbel èn te a e go na fesi teleki a teki dopu. Kresten papa nanga mama breiti tu te den pikin fu den e teki dopu. Na ini a dienstyari 2017, moro leki 284.000 sma gi densrefi abra na Yehovah èn den teki dopu (Tori 13:48). A de krin taki den nyun disipel disi e frustan taki ibri Kresten musu teki dopu. Ma san den ben musu du fu man teki dopu?

12. San wan Bijbelstudie musu du, fosi a kan teki dopu?

12 Fosi wan Bijbelstudie kan teki dopu, a musu leri sabi Gado bun, a musu kon sabi san Gado o du gi libisma nanga grontapu èn san a du fu frulusu libisma (1 Tim. 2:3-6). A musu kon abi wan tranga bribi tu na ini den sani disi. A bribi disi o yepi en fu gi yesi na den wet fu Gado èn fu no du sani di Gado no feni bun (Tori 3:19). Wan sma no kan gi ensrefi abra na Gado efu a e du sani di o meki taki a no man kisi a Kownukondre fu Gado (1 Kor. 6:9, 10). Ma a no dati wawan. Wan sma di wani gi ensrefi abra na Gado, musu go na den konmakandra, a musu abi a gwenti fu preiki a bun nyunsu èn a musu yepi sma fu tron disipel. Yesus ben taki dati iniwan sma di wani tron en disipel musu du a wroko disi (Tori 1:8). Baka te wan sma du ala den sani disi, dan fosi a kan gi ensrefi abra na Gado. Dati wani taki dati a o pramisi Yehovah na ini begi taki a o du a wani fu en. Te a du disi, a kan teki dopu.

WAN BIJBELSTUDIE MUSU FRUSTAN O PRENSPARI DOPU DE

Hori na prakseri o prenspari a de fu teki dopu èn meki yu Bijbelstudie kon frustan dati (Luku paragraaf 13)

13. Te wi e studeri nanga trawan, dan fu san ede wi musu hori na prakseri taki den musu dopu efu den wani tron disipel?

13 Te wi e yepi wi pikin nanga wi Bijbelstudie fu du san Yehovah e aksi fu den, dan wi no musu frigiti taki efu den wani tron disipel fu Yesus, den musu teki dopu. Te wi e hori a sani disi na prakseri, dan wi o sabi fa wi musu yepi den. Ten na ten, wi o suku a yoisti okasi fu sori den o prenspari a de fu gi densrefi abra na Gado èn fu teki dopu. Wi wani taki den pikin fu wi nanga tra Bijbelstudie musu go na fesi, so taki den kan teki dopu.

14. Fu san ede wi no e dwengi sma fu teki dopu?

14 A no de fu taki dati nowan sma musu dwengi wan pikin noso wan Bijbelstudie fu teki dopu. Yehovah no e dwengi nowan sma fu dini en (1 Yoh. 4:8). Te wi e studeri nanga trawan, dan wi musu yepi den fu frustan o prenspari a de fu kon abi wan bun matifasi nanga  Gado. Te wan studenti kon abi warderi gi den sani di a e leri fu Gado èn te a wani libi leki wan tru Kresten, dan dati o meki taki a o wani teki dopu.​—2 Kor. 5:14, 15.

15, 16. (a)  Wan sma musu doro wan spesrutu yari fu man teki dopu? Fruklari dati. (b) Fu san ede wan sma musu teki dopu leki wan Yehovah Kotoigi awinsi a ben dopu kaba na ini wan tra kerki?

15 Bijbel no e taki omeni yari wan sma musu abi fu man teki dopu. Ibri sma de tra fasi. Son sma e go na fesi moro gaw leki trawan. Furu sma dopu di den ben yongu èn den tan dini Yehovah teleki den kon owru. Son sma ben owru kaba di den kon leri sabi Yehovah èn teki dopu. Sonwan fu den ben pasa 100 yari srefi.

16 Wan owru frow di ben e studeri Bijbel, ben dopu kaba na ini difrenti tra kerki. Dati meki a aksi a sisa di ben e studeri nanga en efu a de fanowdu trutru fu dopu baka. A sisa sori en wan tu Bijbeltekst di piki na aksi fu en. Di a frow disi kon frustan now san Bijbel e taki, a teki dopu syatu baka dati. Aladi a ben pasa 70 yari kaba, toku a no ben feni moro taki a no de fanowdu fu teki dopu. Iya, Yehovah o feni a dopu fu wi bun, soso te wi kon sabi den tru leri fu Bijbel. Dati meki awinsi wan sma ben dopu na ini wan tra kerki, a musu dopu baka leki wan Yehovah Kotoigi.​—Leisi Tori fu den apostel 19:3-5.

17. San wan sma musu prakseri tapu a dei te a e teki dopu?

17 A dei di wan sma e teki dopu na wan prisiri dei. Ma na a dei dati wan sma musu prakseri tu san a dopu fu en wani taki. Wan tru Kresten musu meki tranga muiti fu man du san Yehovah e aksi fu en. Dati meki Yesus agersi a frantwortu fu wan tru Kresten, nanga wan tyatyari. Disipel fu Yesus „no musu libi gi densrefi moro, ma gi a sma di dede gi den èn di kisi wan opobaka”.​—2 Kor. 5:15; Mat. 16:24.

18. Sortu aksi wi o luku na ini a tra artikel?

18 Soleki fa wi si na ini na artikel disi, dan a bosroiti di wan sma e teki fu tron wan disipel, na wan seryusu sani. Na a sani disi a mama fu Maria ben e prakseri di a poti den aksi na a bigin fu na artikel. Efu yu na wan papa noso mama, dan kande yu e aksi yusrefi: ’A pikin fu mi klari fu teki dopu? A sabi nofo fu Yehovah so taki a kan gi ensrefi abra na en? Mi pikin musu kisi bun skoroleri èn a musu abi wan bun wroko, fosi a kan teki dopu? Fa a o de efu mi pikin du wan seryusu sondu baka te a dopu?’ Wi o luku den aksi disi na ini a tra artikel. Wi o luku tu san o yepi Kresten papa nanga mama fu abi a yoisti denki fu dopu.