Go na content

Go na a tra menu

Go na table of contents

Yehovah Kotoigi

Sranantongo

Studie-Waktitoren  |  maart 2018

Aksi fu leisiman

Aksi fu leisiman

Fu san ede den buku fu Yehovah Kotoigi e sori taki na apostel Paulus ben abi wan piri-ede noso taki a no ben abi furu wiwiri?

Fu taki en leti, nowan sma na ini a ten disi kan taki krin fa Paulus ben tan. Den prenki nanga den fowtow fu Paulus na ini den buku fu wi na sani di wisrefi teken. Noiti sabiman feni wan sani fu Paulus di e sori fa a ben tan trutru.

Ma wan tu buweisi de di e sori pikinso fa Paulus ben tan. Fu eksempre, na ini Zion’s Watch Tower fu 1 maart 1902 skrifi: ’A buku „Acts of Paul and Thecla” di skrifi na ini a yari 150 na a wan-enkri buku di e fruteri pikinso fa Paulus ben tan soleki fa furu sma ben e bribi. A e taki dati Paulus ben de „wan man di ben syatu, en ede ben piri, a ben abi ow-futu èn a ben stampu. Den wenkbrauw fu en ben furu èn en noso ben langa.”’

Wan wortubuku e taki: „A kan taki den sani di skrifi na ini a buku ’Acts of Paul and Thecla’ tru” (The Oxford Dictionary of the Christian Church [1997 edition]). Hondrohondro yari langa sma si a buku disi leki wan prenspari buku. Dati meki 80 kopi fu en de ete na ini Grikitongo èn den vertaal en tu na ini difrenti tongo. Sobun, den tekening di wi e meki fu Paulus e kruderi nanga son owruten buku di e taki fu a fasi fa Paulus ben tan.

Ma hori na prakseri taki moro prenspari sani de leki a fasi fa Paulus ben tan. Di Paulus ben e du a diniwroko fu en, son sma ben taki dati ’a no gersi wan kefalek sma, èn taki na soso sani a e taki’ (2 Kor. 10:10). Ma wi no musu frigiti taki a tron wan Kresten baka di a yere Yesus en sten komoto fu hemel. Wi musu hori na prakseri tu taki Yesus Krestes ben teki Paulus ’fu go fruteri den trakondre sma fu a nen fu en’ (Tori 9:3-5, 15; 22:6-8). Èn prakseri o furu wi kan leri fu den Bijbel buku di Yehovah meki Paulus skrifi.

Paulus no meki bigi fu den sani di a du fosi a tron wan Kresten èn a no skrifi fa a ben tan (Tori 26:4, 5; Fil. 3:4-6). A ben taki: „Mi na a moro pikinwan fu den apostel èn mi no warti fu den kari mi wan apostel” (1 Kor. 15:9). Bakaten a ben skrifi: „Gado sori mi a bun-ati disi, aladi mi na a moro pikinwan fu ala den santawan. Dati meki mi kan fruteri den trakondre sma a bun nyunsu di abi fu du nanga a kefalek bigi gudu fu Krestes” (Ef. 3:8). A no de fu taki dati a boskopu di Paulus ben e preiki ben prenspari moro a fasi fa a ben tan. Dati meki wi no abi fu broko wi ede tumusi furu nanga a sani disi.