Go na content

Go na a tra menu

Go na table of contents

Yehovah Kotoigi

Sranantongo

Studie-Waktitoren  |  maart 2017

Sori taki yu abi bribi—Teki koni bosroiti!

Sori taki yu abi bribi—Teki koni bosroiti!

„Meki a tan aksi nanga bribi. A no musu tweifri kwetikweti.”YAK. 1:6.

SINGI: 81, 70

1. Fu san ede Kain no teki wan koni bosroiti èn san ben de a bakapisi?

KAIN ben musu teki wan bosroiti: A ben o basi den sondu firi fu en, noso a ben o meki den firi fu en abi krakti tapu den bosroiti di a ben o teki? Awansi fa a no fa, a bosroiti di a ben o teki ben o abi krakti na tapu en heri libi. Wi sabi san Kain du, a no teki wan bun bosroiti. A bosroiti di a teki tyari dede kon gi en reti-ati brada Abel. Boiti dati, Kain lasi a matifasi di a ben abi nanga en Mekiman.Gen. 4:3-16.

2. O prenspari a de fu teki bun bosroiti?

2 Wi musu teki bosroiti tu. Son leisi wi musu teki seryusu bosroiti, ma tra bosroiti no seryusu so. Furu fu den bosroiti di wi e teki kan abi furu krakti na wi tapu. Dati meki te wi sabi fa fu teki bun bosroiti, dan dati kan yepi wi fu no abi tumusi furu problema na ini wi libi. Ma te wi e teki don bosroiti, dan wi libi o lai nanga dyugudyugu èn nanga broko-ede.Odo 14:8.

3. (a) Sortu frutrow wi musu abi efu wi wani teki bun bosroiti? (b) Sortu aksi wi o luku now?

3 San o yepi wi fu teki bun bosroiti? A no de fu taki dati wi  musu abi a frutrow taki Gado wani yepi wi fu de konisma èn taki a man du dati tu. Wi musu abi a frutrow tu taki den rai na ini Gado Wortu na bun rai. (Leisi Yakobus 1:5-8.) O moro wi e kon sabi Yehovah èn o moro wi e lobi a Wortu fu en, o moro wi o frutrow taki a wani san bun gi wi. Dati meki wi musu kon abi a gwenti fu suku rai na ini Gado Wortu fosi wi teki wan bosroiti. Ma san kan yepi wi fu teki moro bun bosroiti? Èn te wi teki wan bosroiti kaba, dan dati wani taki dati wi no mag kenki a bosroiti dati?

WI ALAMALA MUSU TEKI BOSROITI

4. Sortu bosroiti Adam ben musu teki èn san ben de a bakapisi?

4 Sensi di Gado meki libisma, man nanga uma ben musu teki prenspari bosroiti. Adam ben musu bosroiti efu a ben o arki en Mekiman noso efu a ben o arki Eva. Wi sabi taki Adam teki wan bosroiti tu. Ma fa yu feni a bosroiti di a teki? En wefi meki taki a teki wan bosroiti di no ben bun kwetikweti. A sani dati meki taki a lasi a grani di a ben abi fu libi na ini a Paradijs èn bakaten a lasi en libi. Ma a sani di a du ben o tyari moro takru bakapisi kon. Te now ete wi e ondrofeni den takru bakapisi fu dati.

5. Fa wi musu si a frantwortu di wi abi fu teki bosroiti?

5 Son sma feni taki a libi ben o moro switi efu wi no ben abi fu teki bosroiti. Na so yu e denki tu? Hori na prakseri taki Yehovah no meki libisma leki robot di no man denki gi densrefi èn di no man teki bosroiti. Bijbel e leri wi fa wi kan teki koni bosroiti. Yehovah wani taki wi teki wi eigi bosroiti èn disi na wan prenspari frantwortu. Meki wi go luku fu san ede wi kan bribi dati.

6, 7. Sortu bosroiti den Israelsma ben musu teki èn fu san ede a ben muilek gi den fu teki wan bun bosroiti? (Luku a prenki na a bigin fu na artikel.)

6 Di den Israelsma ben e tan na ini a Pramisi Kondre, den ben musu teki wan prenspari bosroiti: Den ben o anbegi Yehovah noso den ben o anbegi tra gado? (Leisi Yosua 24:15.) Kande a gersi leki a bosroiti disi no ben muilek fu teki. Ma a bosroiti di den ben o teki ben kan tyari libi noso dede kon gi den. Na a ten fu den krutuman, den Israelsma ben teki don bosroiti ibri tron baka. Den drai baka gi Yehovah èn den bigin anbegi falsi gado (Krut. 2:3, 11-23). Na a ten fu a profeiti Elia, a pipel fu Gado ben musu teki wan bosroiti tu. A profeiti sori den krin sortu bosroiti den ben kan teki: Anbegi Yehovah noso anbegi a falsi gado Bâal (1 Kow. 18:21). Elia piri-ai gi a pipel fu di den no ben man teki wan bosroiti. Kande yu e prakseri taki a no ben muilek fu teki so wan bosroiti fu di ala ten a e tyari wini kon te wi e anbegi Yehovah. Fu taki en leti, nowan sma nanga bun frustan ben o wani anbegi Bâal. Ma toku den Israelsma ben e „draidrai fu teki wan bosroiti”. Dati meki Elia gi den a koni rai fu anbegi Yehovah, fu di en na a tru Gado.

7 Fu san ede a ben muilek gi den Israelsma fu teki wan koni bosroiti? A fosi sani, na taki a bribi di den ben abi na ini Yehovah ben kon swaki èn den no ben wani gi yesi na Gado. Den no ben teki ten fu kon sabi Yehovah noso a koni fu en èn den no ben e frutrow na en tapu. Efu den ben kon sabi Yehovah, dan dati ben o yepi den fu teki koni bosroiti (Ps. 25:12). Wan tra sani, na taki den  ben gi pasi taki trawan ben abi krakti na den tapu noso taki den sma dati teki bosroiti gi den. Fu di trakondre sma ben abi krakti tapu a denki fu den Israelsma, meki den Israelsma bigin anbegi den falsi gado fu den. Yehovah ben warskow den taki a sani disi ben o pasa.Eks. 23:2.

WI MUSU MEKI TRAWAN TEKI BOSROITI GI WI?

8. Sortu prenspari sani wi e leri fu den Israelsma?

8 Wi e leri wan moi sani fu den eksempre disi. Ibriwan fu wi musu teki en eigi bosroiti èn wi o man teki koni bosroiti te wi e hori wisrefi na san Bijbel e taki. Galasiasma 6:5 e gi a rai disi: „Ibri sma sa tyari en eigi lai.” Wi no musu meki tra sma teki bosroiti gi wi. Na presi fu dati, wi srefi musu kon sabi san Gado feni bun, dan wi musu bosroiti fu du dati.

9. Fu san ede wi no musu meki trawan teki bosroiti gi wi?

9 Fa wi ben kan gi pasi taki trawan e teki bosroiti gi wi? Kande wi e du nomo san tra sma e taigi wi. Ma dati kan meki wi teki bosroiti di no bun (Odo 1:10, 15). Ma awansi fa trawan e pruberi fu dwengi wi fu du wan sani, na wisrefi abi a frantwortu fu arki a konsensi fu wi èn fu du san Bijbel e leri wi. Te wi e meki trawan teki bosroiti gi wi, dan wi e „du san den e du”. A bosroiti dati kan tyari takru bakapisi kon gi wi.

10. Sortu warskow Paulus ben gi den Galasiasma?

10 Na apostel Paulus ben warskow den Galasiasma fu no meki trawan teki bosroiti gi den. (Leisi Galasiasma 4:17.) Son sma na ini a gemeente ben wani teki bosroiti gi trawan fu di den ben wani taki den sma dati drai baka gi den apostel. Fu san ede? Den sma dati di ben e denki densrefi nomo ben e suku biginen. Den no ben abi sakafasi èn den no ben e lespeki a reti di den Kresten brada nanga sisa fu den ben abi fu teki den eigi bosroiti.

11. Fa wi kan yepi trawan fu teki bun bosroiti?

11 Wi kan leri furu fu na eksempre fu Paulus. A ben sabi taki den brada ben  abi a reti fu teki den eigi bosroiti èn a ben e lespeki a reti dati. (Leisi 2 Korentesma 1:24.) Na ini a ten disi owruman musu teki na eksempre fu Paulus te den e gi sma rai na ini afersi pe sma musu teki den eigi bosroiti. Den de klariklari fu sori den skapu san Gado Wortu e taki. Toku owruman e luku bun taki den no e teki bosroiti gi brada nanga sisa. A sani dati prenspari fu di na den sma dati o abi fu tyari a frantwortu fu a bosroiti di den teki. Wan prenspari sani di wi musu hori na prakseri na disi: Wi kan sori sma taki wi e broko wi ede nanga den èn wi kan gi den rai fu Bijbel. Ma toku den sma disi abi a reti nanga a frantwortu fu teki den eigi bosroiti. Te den sma disi e teki koni bosroiti, dan dati o tyari wini kon gi den.

Lobi-ati owruman e leri trawan fa fu teki den eigi bosroiti (Luku paragraaf 11)

NO MEKI DEN FIRI FU YU BASI YU TE YU E TEKI BOSROITI

12, 13. Fu san ede wi no musu du san wi ati wani te wi ati e bron noso te wi e firi brokosaka?

12 Wan sani di sma gwenti taki na: Du san yu ati wani. Ma a sani dati kan tyari problema kon gi wi. Fu taki en leti, a sani disi no e kruderi nanga Bijbel. Bijbel e warskow wi taki wi no musu meki a sondu ati fu wi noso den firi fu wi basi wi te wi e teki bosroiti (Odo 28:26). Difrenti tori na ini Bijbel e sori tu sortu takru bakapisi a e tyari kon te sma e du san den ati wani. Bijbel e sori san na a problema fu wi leki sondusma. A e taki: „Na ati na a moro bedrigi sani di de èn a ogri srefisrefi” (Yer. 3:17; 13:10; 17:9; 1 Kow. 11:9). Sobun, san kan pasa te wi e du san wi ati wani?

13 Na ati fu wan Kresten prenspari fu di Bijbel e taki dati wi musu lobi Yehovah nanga wi heri ati èn taki wi musu lobi tra sma leki fa wi lobi wisrefi (Mat. 22:37-39). Ma den Bijbeltekst di kari na ini a paragraaf na fesi e sori san kan pasa te wi e meki den firi fu wi abi krakti tapu a fasi fa wi e denki èn e du sani. Fu eksempre, san kan pasa te wi e teki bosroiti te wi ati e bron? Efu na dati wi du na ini a ten di pasa, dan wi sabi kaba san na a piki (Odo 14:17; 29:22). Noso yu denki taki yu o teki koni bosroiti te yu e firi brokosaka? (Num. 32:6-12; Odo 24:10) Hori na prakseri taki Gado Wortu e sori wi fu san ede a bun fu de „wan srafu fu a wèt fu Gado” (Rom. 7:25). A de krin taki den firi fu wi kan kori wi makriki te wi musu teki prenspari bosroiti.

TE WI MUSU KENKI PRAKSERI

14. Fu san ede a fiti son leisi fu kenki wan bosroiti di wi ben teki kaba?

14 A de fanowdu taki wi teki koni bosroiti. Ma te wi teki wan bosroiti kaba, dan dati no wani taki dati wi no mag kenki prakseri. Son leisi a bun fu luku efu a bosroiti di wi teki na wan bunwan, fu di a kan de fanowdu fu teki wan tra bosroiti bakaten. Luku san Yehovah du na ini a tori fu den Ninefeisma, na a ten fu Yona. Bijbel e taki: „Ne a tru Gado si san den du. A si taki den tapu nanga den ogri di den ben e du. A ben taki dati a ben o tyari rampu kon na den tapu. Ma dan a kenki prakseri èn a no tyari rampu kon na den tapu moro” (Yona 3:10). Di Yehovah si taki den Ninefeisma sori berow, dan Yehovah teki wan tra bosroiti. Na so a sori taki a man fiti ensrefi, taki a abi sakafasi èn taki a e firi gi trawan. Boiti dati, Yehovah no de leki libisma. Srefi te en ati e bron a no e teki dondon bosroiti.

15. O ten a kan de fanowdu fu teki wan tra bosroiti?

 15 Son leisi a bun fu kenki wan bosroiti di wi teki kaba. Kande wi e du dati fu di wan situwâsi kenki. Son leisi Yehovah du dati tu (1 Kow. 21:20, 21, 27-29; 2 Kow. 20:1-5). A kan de tu taki wi e kon sabi nyun sani di e meki taki wi musu teki wan tra bosroiti. Sma ben fruteri lei fu Mefiboset, a granpikin fu Saul èn dati meki David gi ala den sani fu Mefiboset na wan tra sma. Bakaten di David kon sabi fa sani ben de trutru, dan a kenki a bosroiti di a ben teki (2 Sam. 16:3, 4; 19:24-29). Son leisi a bun fu du a srefi.

16. (a) Sortu rai kan yepi wi fu teki koni bosroiti? (b) Fu san ede a de fanowdu son leisi fu poti prakseri baka na wan bosroiti di wi ben teki? San wi musu du baka dati?

16 Gado Wortu e sori wi taki wi no musu de gaw fu teki prenspari bosroiti (Odo 21:5). Te wi e denki bun fosi wi teki wan bosroiti, dan nofo tron wi o abi bun bakapisi (1 Tes. 5:21). Te wan famiri-edeman musu du wan prenspari sani, dan a bun te a e teki ten fu ondrosuku san Bijbel nanga den tra buku fu wi e taki fu a tori. Den musu luku tu fa den tra sma na ini na osofamiri e denki. Memre taki Gado ben taigi Abraham fu arki san en wefi ben abi fu taki (Gen. 21:9-12). Owruman musu teki ten tu fu ondrosuku sani. Ma kande den e kon sabi moro sani di e sori taki den musu teki wan tra bosroiti. Efu den abi sakafasi, dan den o teki a bosroiti dati, fu di den no o frede taki trawan o lasi lespeki gi den. Den musu de klariklari fu kenki prakseri èn fu teki wan tra bosroiti te dati fiti. Wi alamala musu du a srefi tu. Na so freide sa de na ini a gemeente èn sani o waka na wan orga fasi.Tori 6:1-4.

DU SAN YU BOSROITI

17. San kan yepi wi fu teki moro bun bosroiti?

17 Son bosroiti seryusu moro trawan. Te wi musu teki seryusu bosroiti, dan wi musu denki bun èn wi musu begi Gado fu yepi wi. A sani disi kan teki ten. Son Kresten musu bosroiti efu den o trow èn nanga suma den o trow. Wan tra seryusu bosroiti di kan tyari furu blesi kon gi wi, na te wi e luku efu wi man go na ini a furuten diniwroko èn o ten wi o du dati. Te wi musu teki den sortu bosroiti dati, dan a prenspari fu abi a frutrow taki Yehovah man gi wi bun rai èn taki a e du dati tu (Odo 1:5). Sobun, wi musu hori na prakseri taki Bijbel e gi wi a moro bun rai. Dati meki wi musu luku san Bijbel e taki èn wi musu begi Yehovah fu yepi wi fu teki wan bun bosroiti. Wi no musu frigiti tu taki Yehovah kan gi wi a koni di wi abi fanowdu fu teki bosroiti di e kruderi nanga a wani fu en. Te wi musu teki prenspari bosroiti, dan ala ten wi musu aksi wisrefi: ’A bosroiti di mi o teki o sori taki mi lobi Yehovah? A o meki taki mi osofamiri de koloku? A o sori taki mi abi pasensi nanga switifasi?’

18. Fu san ede Yehovah e fruwakti fu wi taki wi e teki wi eigi bosroiti?

18 Yehovah no e dwengi wi fu lobi en èn fu dini en. Na wi srefi e bosroiti efu wi o du dati. Fu di a gi wi a grani fu teki wi eigi bosroiti, meki a e lespeki a frantwortu nanga a reti di wi abi fu „bosroiti” efu wi o dini en (Yos. 24:15; Preik. 5:4). Ma te wi bosroiti fu dini en, dan a e fruwakti taki wi e du san a Wortu fu en e taki. Te wi e bribi taki Yehovah sabi san bun gi wi èn te wi e hori wisrefi na den rai fu en, dan wi o man teki koni bosroiti. Na so wi e sori taki wi na sma di no e degedege.Yak. 1:5-8; 4:8.