Go na content

Go na a tra menu

Go na table of contents

Yehovah Kotoigi

Sranantongo

Studie-Waktitoren  |  maart 2017

Fa fu de wan bun mati te sani kan pori a matifasi fu yu nanga trawan

Fa fu de wan bun mati te sani kan pori a matifasi fu yu nanga trawan

Gianni nanga Maurizio na mati sowan 50 yari kaba. Ma wan ten ben de di sani no ben e go so bun nanga den. Maurizio e taki: „Na ini wan muilek pisi ten na ini mi libi, mi meki wan tu seryusu fowtu. A sani dati meki taki wi no ben e bumui so furu moro nanga makandra.” Gianni e taki: „Maurizio ben studeri Bijbel nanga mi. A ben e yepi mi fu tron wan moro bun mati fu Gado. Dati meki mi no ben man bribi san a du. A sani disi hati mi so te, fu di mi ben sabi taki wi no ben o man de mati moro. Mi ben e firi leki a ben drai baka gi mi.”

ALA sma abi bun mati fanowdu, ma a no e kon fu ensrefi taki sma e tan bun mati omeni yari langa. Efu sani de di kan pori a matifasi di yu abi nanga wan trawan, dan san yu kan du? Wi kan leri furu fu wan tu sma di kari na ini Bijbel. Den sma disi ben de trutru mati fu makandra, ma bakaten sani no ben e go bun moro nanga den.

TE WAN MATI E MEKI WAN FOWTU

A no de fu taki dati David, di ben de skapuman nanga kownu, ben abi bun mati. Kande a fosi sma di yu e prakseri na Yonatan (1 Sam. 18:1). Ma David ben abi tra mati tu, soleki a profeiti Natan. Bijbel no e sori o ten den tron mati. Ma wan dei,David fruteri Natan san ben de na tapu en ati, neleki fa wan sma e taki nanga wan mati. David ben wani bow wan oso gi Yehovah. A musu de so taki a kownu ben wani sabi fa Natan ben e denki fu a tori disi, fu di Natan ben de en mati èn a ben abi a yeye fu Yehovah.2 Sam. 7:2, 3.

Ma wan sani pasa di ben kan pori a matifasi fu den. Kownu David du hurudu nanga Batseiba èn bakaten a meki sma kiri Uria, a  masra fu Batseiba (2 Sam. 11:2-21). Furu yari langa, David ben e dini Yehovah nanga en heri ati èn a ben lobi retidu. Ne a du a bigi sondu disi! San ben pasa nanga a bun kownu? A no ben man si sortu seryusu fowtu a ben meki? A ben denki taki a ben kan kibri a sondu disi gi Gado?

San Natan ben o du? A ben o meki wan tra sma sori a kownu taki a ben sondu? Tra sma ben sabi taki David ben meki sma kiri Uria. Sobun, fu san ede Natan ben o bumui na ini a tori te dati ben kan pori a matifasi di en nanga David ben abi so langa kaba? Efu Natan ben o taki wan sani, dan a ben kan lasi en libi srefi, bika David ben meki sma kiri Uria kaba aladi a no ben du nowan ogri.

Ma Natan ben de a boskopuman fu Gado. A profeiti ben sabi taki efu a no ben o taki noti, dan sani no ben o de a srefi moro na mindri en nanga David. Boiti dati, a ben o abi konsensi fonfon. En mati David ben du wan sani di Yehovah no ben feni bun. Wan sma ben musu yepi a kownu fu meki sani bun baka nanga Yehovah. Iya, David ben abi wan bun mati fanowdu. Natan ben de so wan mati. A bosroiti fu taki fu a tori. A gebroiki wan agersitori di ben o naki na ati fu a kownu di ben de wan skapuman fosi. Natan tyari a boskopu fu Gado na so wan fasi taki a yepi David fu frustan o seryusu a fowtu ben de di a ben meki. A sani dati meki taki David sori berow èn a tyari kenki kon.2 Sam. 12:1-14.

San yu ben o du efu yu ben abi wan mati di meki wan bigi fowtu noso di du wan seryusu sondu? Kande yu o feni taki a matifasi fu unu ben o pori efu yu sori yu mati sortu fowtu a meki. Noso yu kan feni taki yu mati o feni taki yu lagi te yu e fruteri den owruman di kan yepi en, sortu sondu a du. San yu ben o du?

Gianni di wi ben taki fu en kaba e memre: „Mi kon si taki sani ben kenki. Maurizio no ben e taki fri nanga mi leki fosi. Mi bosroiti fu taki nanga en, aladi a sani dati no ben makriki srefisrefi. Mi ben e aksi misrefi: ’San moro mi kan taigi en? A sabi kaba san a musu du. Kande en ati o bron na mi tapu!’ Ma mi memre ala den sani di a ben leri mi di a ben e studeri nanga mi. A sani dati gi mi deki-ati fu taki nanga en. Na dati Maurizio ben du tu nanga mi te mi ben abi yepi fanowdu. Mi no ben wani taki a matifasi fu wi pori, ma mi ben wani yepi en tu fu di mi ben lobi en.”

Maurizio e taki: „Gianni taki krin nanga mi èn a ben abi leti. Mi ben sabi taki a no en èn taki a no Yehovah ben abi a fowtu fu den sani di ben miti mi. Na mi ben teki den don bosroiti dati. Dati meki mi arki a rai di den owruman gi mi èn te fu kaba mi meki sani bun baka nanga Gado.”

TE WAN MATI ABI PROBLEMA

David ben abi tra mati di ben e horibaka gi en na ini muilek ten. Wan fu den ben de Husai di Bijbel e kari „a mati fu David” (2 Sam. 16:16; 1 Kron. 27:33). A kan taki Husai ben de wan heihei man di ben e wroko gi kownu. A ben de wan mati fu a kownu èn son leisi a ben musu du sani gi a kownu sondro taki tra sma ben sabi fu dati.

Di Absalom, a manpikin fu David teki a makti abra nanga tranga, dan furu Israelsma teki a sei fu Absalom. Ma Husai no du dati. Di David ben e lowe, dan Husai go na en. A ben e hati David srefisrefi taki en eigi manpikin nanga wan tu sma di a ben e frutrow ben tori en. Ma Husai tan horibaka gi David èn a ben de klariklari fu du wan sani fu gens Absalom nanga den man fu en. A no fu di Husai ben e wroko gi kownu meki a ben e firi taki a musu horibaka gi kownu. Ma a ben du dati fu di a ben de wan trutru mati fu David.2 Sam. 15:13-17, 32-37; 16:15–17:16.

 A moi fu si fa Kresten brada nanga sisa na ini a ten disi abi wánfasi. Den abi trutru lobi gi makandra awinsi sortu frantwortu den abi na ini a gemeente. Te den e du sani gi wan trawan, dan a de neleki den e taigi a sma: „Mi na yu mati, a no fu di mi musu, ma na fu di mi lobi yu trutru.”

Na dati wan brada di nen Federico ben ondrofeni. En bun mati Antonio ben yepi en di a ben abi problema. Federico e fruteri: „Di Antonio froisi kon na ini a gemeente fu wi, dan wi tron mati esi-esi. Wi ala tu ben de dinari ini a diniwroko èn wi ben lobi wroko makandra. Syatu baka dati Antonio tron owruman. Boiti taki a ben de mi mati, a ben de wan eksempre tu gi mi.” Ne Federico meki wan fowtu. A suku yepi wantewante na den owruman, ma a no ben mag de wan pionier moro èn a lasi a grani di a ben abi fu de wan dinari ini a diniwroko. San Antonio du?

Di Federico ben abi problema, dan en mati Antonio arki en èn a gi en deki-ati

Federico e taki: „Mi ben kan si taki Antonio ben e sari fu a sani di pasa nanga mi. A du ala muiti fu gi mi deki-ati. A ben wani taki mi kisi misrefi baka èn a no drai baka gi mi noiti. A gi mi deki-ati fu tranga a bribi fu mi èn fu no lasi-ati.” Antonio e taki: „Mi ben meki moro ten gi Federico. Mi ben wani en fu firi taki a ben man taki nanga mi fu iniwan sani, sosrefi fu a fasi fa a ben e firi.” Koloku taki baka wan pisi ten Federico kisi ensrefi baka. Te fu kaba a kisi a grani baka fu pionier èn fu dini leki dinari ini a diniwroko. Antonio e taki: „Aladi wi e dini na ini tu difrenti gemeente now, toku wi na heri bun mati.”

FA YU BEN O FIRI?

Fa yu ben o firi te wan bun mati fu yu e drai baka gi yu te yu abi en tranga fanowdu? Dati na wan hati sani trutru. Yu ben o wani gi en pardon? Yu nanga en ben o tan bun mati?

Prakseri san pasa nanga Yesus na ini den lasti dei di a ben de na grontapu. A ben de furu nanga den apostel fu en di a ben e si leki en brada. Yesus ben abi leti fu kari den en mati (Yoh. 15:15). Ma san pasa di den feanti fu Yesus grabu en? Den apostel lowe  gowe libi en. Petrus ben taki na fesi trawan taki a no ben o drai baka gi en Masra noiti, ma a srefi neti dati Petrus strei taki a no ben sabi Yesus!Mat. 26:31-33, 56, 69-75.

Yesus ben sabi taki a ben o abi fu pasa en lasti tesi en wawan. Toku a ben kan firi sari fu a sani di pasa, a ben kan mandi srefi. Ma te wi e luku den sani di a ben taigi den disipel wan tu dei baka di a kisi wan opobaka, dan wi no e si kwetikweti taki en ati ben e bron, taki a ben abi bita-ati, noso taki a ben e sari. Yesus no ben feni en fanowdu fu kari ala den fowtu fu den disipel, noso fu taki fu a fasi fa den ben tyari densrefi a neti di sma grabu en.

Na presi fu dati, Yesus trowstu Petrus nanga den tra apostel. A gi den a dyaranti taki a ben e frutrow na den tapu. A sori den fa den ben musu du wan prenspari wroko di no ben du noiti ete. Den ben o abi fu gi sma leri na heri grontapu. Yesus ben e si den apostel ete leki en mati. Noiti den ben o frigiti a lobi di Yesus ben abi gi den. Noiti moro den ben o meki a Masra fu den fesi fadon. Iya, den ben man du a wroko di Yesus gi den bakaman fu en.Tori 1:8; Kol. 1:23.

Wan sisa di nen Elvira e memre heri bun di a ben abi wan pikin trobi nanga en bun mati Giuliana. Elvira e taki: „Di a taigi mi taki a sani di mi du hati en, dan mi sari. A ben abi leti fu mandi nanga mi. Ma mi no ben man bribi taki a ben e frede san ben o pasa nanga mi efu mi ben e tan tyari misrefi na a fasi dati. Noiti mi o frigiti taki a no tan luku a fowtu di mi meki, ma taki a ben e broko en ede nanga den problema di mi ben e suku gi misrefi. Mi taigi Yehovah tangi taki mi ben abi wan mati di ben e tan broko en ede nanga mi aladi mi ben du wan hati sani nanga en.”

Sobun, san wan bun mati o du te sani kan pori a matifasi di a abi nanga wan trawan? A mati dati o taki krin nanga a trawan èn a o taki na wan switi fasi. A o de leki Natan nanga Husai di tan horibaka gi a mati fu den srefi na ini muilek ten. A o de tu leki Yesus di ben de klariklari fu gi pardon. Yu na so wan mati?