Go na content

Go na a tra menu

Go na table of contents

Yehovah Kotoigi

Sranantongo

Studie-Waktitoren  |  maart 2016

Yonguwan—Fa un kan sreka unsrefi fu teki dopu?

Yonguwan—Fa un kan sreka unsrefi fu teki dopu?

„Gado, mi prisiri fu du yu wani.”PS. 40:8.

SINGI: 51, 58

1, 2. (a) Fruteri fu san ede dopu na wan seryusu sani. (b) Fosi wan sma teki dopu, fu san a musu de seiker?

YU NA wan yonguwan di wani teki dopu? Efu dati de so, dan yu o kisi a moro bigi grani di wan libisma kan abi. Ma soleki fa a tra artikel ben sori, dan dopu na wan seryusu sani. Te yu e teki dopu, dan yu e sori sma taki yu gi yusrefi abra na Gado. Yu e pramisi Yehovah taki yu o dini en fu têgo èn taki a wani fu en o de a moro prenspari sani na ini yu libi. A no de fu taki dati yu musu teki dopu soso te yu lepi kaba fu du disi, te yusrefi wani du dati èn te yu e frustan san a wani taki fu gi yusrefi abra na Gado.

2 Ma kande yu no de seiker taki yu de srekasreka kaba fu teki dopu. Noso kande yu wani dopu, ma yu papa nanga mama feni taki yu musu wakti fu di den feni taki leki Kresten yu musu kisi moro ondrofeni. Efu dati de so, dan no lasi-ati. Ma gebroiki na okasi disi fu go na fesi so taki te fu kaba yu man teki dopu. Fu dati ede yu musu poti prakseri na dri sani: (1) Den sani di yu e bribi, (2) den sani di yu e du èn (3) a fasi fa yu e sori warderi.

 DEN SANI DI YU E BRIBI

3, 4. San yonguwan kan leri fu na eksempre fu Timoteyus?

3 Prakseri fa yu ben o piki den aksi disi: Fu san ede mi e bribi taki Gado de? Fu san ede mi e bribi taki Bijbel na a Wortu fu Gado? Fu san ede mi feni taki a moro bun fu libi leki fa Gado wani leki fu du san grontapu wani? Den aksi disi a no fu meki yu tweifri na sani. Ma den kan yepi yu fu du san na apostel Paulus ben taki. A ben taki dati wi musu kon „sabi san na a wani fu Gado di bun, di e gi en prisiri, èn di no e mankeri noti” (Rom. 12:2). Den Kresten na Rome ben teki a tru bribi kaba. Dan fu san ede Paulus taki dati den ben musu kon sabi wan sani di den ben e bribi kaba?

4 Luku wan eksempre na ini Bijbel? Timoteyus ben sabi Gado Wortu bun. En mama nanga en granmama ben leri en sani fu Bijbel ’sensi di a ben de wan beibi’. Toku Paulus ben taigi Timoteyus: „Tan du den sani di yu leri èn di yu e bribi, fu di sma sori yu krin taki den de so” (2 Tim. 3:14, 15). Sobun, Timoteyus ben e bribi den sani di a leri, fu di en mama nanga en granmama ben gi en krin buweisi taki den sani dati tru. A ben de seiker taki a ben abi a tru bribi. A no teki a tru anbegi fu di en mama nanga en granmama taigi en, ma na fu di a ben denki dipi fu den sani di a ben leri èn fu di a ben abi buweisi taki den sani disi tru.Leisi Romesma 12:1.

5, 6. Fu san ede a prenspari fu leri fu gebroiki yu „frustan” yonguyongu kaba?

5 Fa a de nanga yu? Kande yu ben sabi den tru tori fu Bijbel langa ten kaba. Efu dati de so, dan fu san ede yu no e go luku moro fini san meki yu e bribi den sani disi? Disi o meki a bribi fu yu kon moro tranga èn a o yepi yu fu no meki den speri fu yu dwengi yu fu teki don bosroiti. A o yepi yu tu fu no teki a denki fu grontapu abra èn fu no du nomo san yusrefi e firi.

6 Te yu e leri fu gebroiki yu „frustan” yonguyongu kaba, dan disi o yepi yu fu piki den speri fu yu te den e poti aksi soleki: ’Fa yu kan de seiker taki wan Gado de? Fu san ede wan Gado di abi lobi e gi pasi taki ogri de? Fa a kan taki Gado ben de ala ten?’ Te yu de srekasreka, dan den sortu aksi disi no o meki a bribi fu yu kon swaki, ma den o gi yu deki-ati fu studeri moro.

7-9. Fruteri fa a pisi di nen „Wat leert de Bijbel echt?” tapu a website fu wi, kan yepi yu fu kon de seiker fu den sani di yu e bribi.

7 Te yu e studeri Bijbel fayafaya, dan dati kan yepi yu fu gi piki tapu aksi di sma e poti, fu no tweifri èn fu kon de seiker fu den sani di yu e bribi (Tori 17:11). Wi abi wan tu sani di kan yepi yu fu du dati. Furu yonguwan si taki a yepi den di den luku a brochure Vijf belangrijke vragen over het ontstaan van het leven, noso kapitel 5 fu a buku Kon krosibei na Yehovah. Boiti dati, furu yonguwan ben lobi a pisi di nen „Wat leert de bijbel echt? (werkbladen)” di de fu feni tapu a website fu wi èn den ben kisi furu wini fu dati. Yu kan feni disi tapu jw.org/nl na WAT DE BIJBEL LEERT. [1] Ibriwan fu den tori na fu yepi yu fu kon de seiker fu den sani di Bijbel e leri.

8 Fu di yu sabi Bijbel kaba, meki kande yu man piki wan tu fu den aksi na a pisi dati. Ma fu san ede yu de seiker fu den piki di yu e gi? Den tori di de na den pisi disi e yepi yu fu denki dipi fu wan tu Bijbeltekst èn fu skrifi san yu e denki fu den tekst disi. Disi kan yepi yu fu luku fa yu o fruklari den Bijbel tori di yu e bribi. A pisi „Wat leert de Bijbel echt? di de tapu a website fu wi, yepi furu yonguwan fu kon de seiker fu den sani di den e bribi. Efu yu man go tapu a website disi, dan fu san ede  yu no e poti en leki marki fu studeri den tori disi ala wiki?

9 Te yu e studeri fu kon de seiker taki den sani di yu e bribi de so trutru, dan disi o yepi yu fu sreka yusrefi gi a dopu. Wan yongu sisa e taki: „Fosi mi teki dopu, mi studeri Bijbel èn mi kon si taki disi na a tru bribi. Ibri dei a bribi fu mi e kon moro tranga.”

DEN SANI DI YU E DU

10. Fu san ede dopu Kresten musu du sani fu sori a bribi fu den?

10 Na ini Bijbel skrifi: „Efu wan sma e taki dati a abi bribi, ma a no e du sani fu sori a bribi fu en, dan a bribi dati na wan dede sani” (Yak. 2:17). Te a bribi fu yu tranga, dan yu o du sani fu sori a bribi disi. San yu o du? Bijbel e taki dati wi musu ’tyari wisrefi na wan santa fasi èn taki wi musu du sani di e sori taki wi e dini Gado fayafaya’.Leisi 2 Petrus 3:11.

11. Fruklari san a wani taki fu ’tyari yusrefi na wan santa fasi’.

11 Efu yu wani ’tyari yusrefi na wan santa fasi’, dan yu musu libi wan krin libi. Na so yu e libi? Fu eksempre, denki den siksi mun di pasa. Fa yu sori taki yu leri fa fu gebroiki yu frustan fu man sabi san bun noso san ogri? (Hebr. 5:14) Yu man memre wan situwâsi pe yu ben musu meki tranga muiti fu no du wan sani di no bun noso fu no meki tra pikin dwengi yu fu du wan don sani? A fasi fa yu e tyari yusrefi na skoro e meki sma taki bun fu a bribi fu yu? Yu sori taki yu no frede fu taki fu a bribi fu yu? Noso yu e du leki den tra pikin na ini yu klas fu di yu no wani taki den lafu yu? (1 Petr. 4:3, 4) A tru taki ala sma e meki fowtu. Srefi sma di e dini Yehovah wan langa ten kaba kan frede son leisi fu taki fu a bribi fu den. Ma wan sma di gi ensrefi abra na Yehovah, musu breiti fu tyari Gado nen èn dati meki a o tyari ensrefi na wan bun fasi.

12. San na wan tu sani di yu kan du fu ’sori taki yu e dini Gado fayafaya’ èn fa yu musu si den sani disi?

12 San na den sani di yu kan du fu ’sori taki yu e dini Gado fayafaya’? Wan tu fu den sani disi, na te yu e go na den konmakandra noso te yu de na ini a preikiwroko. Den sani disi yu e du nanga a gemeente. Tra sani di yu kan du na fu begi èn fu studeri. Den sani disi yu e du te yu de yu wawan. Wan sma di gi ensrefi abra na Yehovah, no o si den sani disi leki wan hebi. Na presi fu dati, a o firi leki Kownu David di ben taki: „Gado, mi prisiri fu du yu wani. A wèt fu yu de na ini mi ati.”Ps. 40:8.

13, 14. San kan yepi yu fu ’du sani di e sori taki yu e dini Gado fayafaya’, èn fa son yonguwan kisi wini fu dati?

13 Fu yepi yu fu sreka yusrefi gi a dopu, dan luku den aksi disi: Te yu e begi, yu e fruteri Yehovah finifini san de tapu yu ati èn den begi fu yu e sori taki yu lobi en? Te yu e studeri nanga yusrefi, dan sortu tori yu e luku? Yu e go na ini a preikiwroko, awinsi yu papa nanga mama no e go? [2] Skrifi den piki tapu den aksi disi. Na so yu o man luku sortu marki yu kan poti gi yusrefi te a abi fu du nanga begi, studeri nanga a preikiwroko.

14 Son yonguwan di wani teki dopu, kon si taki den kisi furu wini di den skrifi a piki tapu den aksi disi. Wan yongu sisa di nen Tilda taki dati fu di a skrifi den piki tapu den aksi disi, meki dati yepi en fu poti marki gi ensrefi. Safrisafri a ben man du ala den sani di a ben poti leki marki èn baka wán yari a ben de srekasreka fu teki dopu. Wan yongu brada di nen Patrick ben kisi wini tu di a du a srefi sani disi. A e taki: „Mi ben sabi kaba san mi ben wani du, ma fu di  mi skrifi den sani disi, dan dati yepi mi fu meki moro muiti fu du den.”

Yu ben o tan dini Yehovah, awinsi yu papa nanga mama no e du dati moro? (Luku paragraaf 15)

15. Fruklari fu san ede na yusrefi musu teki a bosroiti fu gi yusrefi abra na Gado.

15 Wan fu den prenspari aksi na: „Yu ben o tan dini Yehovah srefi te yu papa, yu mama, noso den mati fu yu no wani dini en moro?” Hori na prakseri taki te yu gi yusrefi abra na Yehovah èn yu teki dopu, dan na yusrefi bosroiti fu tron wan mati fu en. Sobun, a no yu papa nanga mama noso tra sma musu bosroiti gi yu fa yu o dini Yehovah. Te yu e tyari yusrefi na wan santa fasi èn yu e du sani di e sori taki yu e dini Gado fayafaya, dan sma o si taki yu de seiker taki yu abi a tru bribi èn taki yu de srekasreka fu teki dopu.

SORI TAKI YU ABI WARDERI

16, 17. (a) San musu meki taki wan sma wani tron wan Kresten? (b) Gi wan eksempre di kan yepi yu fu kisi moro warderi gi a lusu-paiman.

16 Wan leisi wan man di ben sabi a Wet fu Moses bun, aksi Yesus: „San na a moro bigi komando?” Yesus piki en: „Yu musu lobi Yehovah yu Gado nanga yu heri ati, nanga yu heri libi, èn nanga yu heri frustan” (Mat. 22:35-37). Na so Yesus sori taki lobi gi Yehovah musu meki taki wan sma wani teki dopu èn tron wan Kresten. Wan fu den moro bun fasi fa yu kan kisi moro lobi gi Yehovah, na fu denki dipi fu a moro bigi kado di a gi wi. Dati na a frulusu-ofrandi fu en Manpikin. (Leisi 2 Korentesma 5:14, 15; 1 Yohanes 4:9, 19.) Te yu denki dipi fu a lusu-paiman disi èn san a wani taki gi yu, dan dati o meki yu kisi moro warderi.

17 Luku wan eksempre di o sori yu fa yu musu si a lusu-paiman. Kon meki wi taki dati yu fadon na ini wan liba èn yu de fu dede, dan wan sma kon puru yu na ini a watra. San yu ben o du? Yu ben o go na oso, drei yu skin èn frigiti san a sma du gi yu? Nôno! Yu ben o de nanga tangi gi san a du gi yu. Fu taki en leti, na fu di a yepi yu, meki yu de na libi. Yehovah Gado nanga Yesus Krestes du wan moro bigi sani gi wi. Sondro a lusu-paiman, wi alamala ben o lasi libi fu di wi abi sondu. Na fu di Gado nanga Yesus sori wi so wan bigi lobi, meki wi abi a moi howpu fu libi fu têgo na ini wan paradijs na grontapu.

 18, 19. (a) Fu san ede yu no musu frede fu pramisi Yehovah taki yu o de fu en? (b) Fa yu libi o kon moro bun te yu e dini Yehovah?

18 Yu e warderi san Yehovah du gi yu? Efu dati de so, dan a fiti fu gi yu libi abra na Yehovah èn teki dopu. No frigiti taki te  yu gi yusrefi abra na Yehovah, dan yu e pramisi en taki yu o du a wani fu en fu ala ten, awinsi san e pasa. Yu musu frede fu pramisi en so wan sani? Kwetikweti! Hori na prakseri taki Yehovah e suku soso a bun fu yu èn taki na en „e pai den wan di e suku en fayafaya” (Hebr. 11:6). Te yu e gi yusrefi abra na Yehovah èn yu e teki dopu, yu libi no o kon moro takru. Na presi fu dati, te yu e dini Yehovah, yu libi o kon moro bun. Wan brada fu 24 yari di teki dopu di a ben yongu ete, e taki: „Kande mi ben o frustan sani moro bun efu mi ben moro owru, ma fu di mi gi misrefi abra na Yehovah di mi ben yongu, meki dati yepi mi fu no feti baka grontapu sani.”

19 Yehovah de heri tra fasi leki Satan di no abi a bun fu yu na prakseri kwetikweti. Satan no man gi den sma di e teki en sei wan bun sani. Fa a o man gi yu wan sani di ensrefi no abi? A no abi nowan bun nyunsu gi wi èn ensrefi no abi nowan howpu. A wan-enkri sani di a kan du gi yu, na taki a kan meki yu lasi yu libi na ini a ten di e kon, neleki fa ensrefi o lasi en libi.Openb. 20:10.

20. San wan yonguwan kan du efu a wani go na fesi so taki a kan gi ensrefi abra na Gado èn teki dopu? (Luku a faki di nen „ Sani di kan yepi yu fu go na fesi”.)

20 A de krin taki te yu e gi yu libi abra na Yehovah, dan dati na a yoisti sani. Yu denki taki yu de srekasreka fu du dati? Efu dati de so, dan no draidrai. Ma efu yu abi moro ten fanowdu, dan gebroiki den rai di gi na ini na artikel disi fu go na fesi so taki yu kan teki dopu te fu kaba. Paulus ben skrifi den Kresten na Filipi: „Efu a de so taki wi go na fesi kaba, dan meki wi tan go na fesi na a srefi fasi” (Fil. 3:16). Te yu teki a rai disi, dan a no o teki langa fosi yu gi yu libi abra na Yehovah èn teki dopu.

^ [1] (paragraaf 7) Efu yu no man go tapu a website fu wi, dan luku a buku „San Bijbel e leri wi trutru”.

^ [2] (paragraaf 13) Son yonguwan kisi furu wini di den gebroiki a pisi na tapu bladzijde 308 nanga 309 fu a buku Wat jonge mensen vragenPraktische antwoorden, Pisi 2.