Go na content

Go na a tra menu

Go na table of contents

Yehovah Kotoigi

Sranantongo

Studie-Waktitoren  |  maart 2016

Esekièl ben de klariklari fu didon na tapu en sei fu sori fa sma ben o lontu Yerusalem

Teki na eksempre fu den profeiti

Teki na eksempre fu den profeiti

YU DENKI taki yu nanga den profeiti fu owruten de na ini a srefi situwâsi? Na ini a Wortubuku na bakasei fu a Bijbel fu wi skrifi san na wan profeiti. Drape skrifi: „Disi na wan sma di Gado e gebroiki fu meki trawan sabi san a wani èn san a abi na prakseri. A e fruteri sma boskopu fu Gado. A kan taki a e fruteri sani di o pasa na ini a ten di e kon, ma a wortu srefi no e sori taki dati na a moro prenspari sani di a e du.” Aladi yu no e meki sani bekènti leki fa den profeiti ben e du en, toku yu e taki gi Gado fu di yu e fruteri sma a boskopu fu en di skrifi na ini en Wortu.Mat. 24:14.

Wi abi a moi grani fu taki nanga trawan fu wi Gado Yehovah èn fu leri den san a wani gi libisma. Wi e du a wroko disi makandra nanga na ’engel di e frei na loktu’ (Openb. 14:6). Ma son leisi wi kan kisi tesi di kan meki taki wi e frigiti sortu moi grani wi abi. San na wan tu fu den tesi disi? Kande wi skin e weri, wi e lasi-ati noso wi e firi leki wi no warti nofo. Den profeiti fu owruten ben e firi so tu, ma toku den no ben tapu nanga a wroko fu den. Yehovah yepi den tu fu du a wroko disi. Luku wan tu eksempre di o sori fa wi kan de leki den.

DEN BEN E DU ALA SAN DEN MAN

Son leisi wi kan kon weri fu den sani di wi musu du ala dei èn kande wi no e firi fu go na ini a preikiwroko. A tru taki wi alamala abi rostu fanowdu. Srefi Yesus nanga den apostel ben e rostu (Mark. 6:31). Ma prakseri Esekièl nanga a wroko di Gado ben gi en fu du. A ben libi na Babilon makandra nanga a pipel fu Gado di den Babilonsma ben tyari gowe leki katiboman. Wan leisi Gado taigi en fu teki wan ston èn fu krabu wan prenki fu a foto Yerusalem na en tapu. Dan a ben musu go didon 390 dei na tapu en kruktusei na fesi a foto disi. Baka dati a ben musu go didon 40 dei na tapu en retisei. Na so a ben musu sori fa sma ben o lontu a foto fu feti nanga en. Yehovah taigi Esekièl: „Mi o tai yu nanga titei, so taki yu no man drai go na tapu yu tra sei, teleki yu kaba feti nanga a foto” (Esek. 4:1-8). Moro leki wán yari Esekièl ben abi fu du a  sani disi di e weri skin. Di den Israelsma si san Esekièl du, dan kande den ben aksi densrefi san pasa nanga en. Ma fa a profeiti ben man du a sani disi di Gado ben taigi en fu du?

Esekièl ben frustan fu san ede Gado ben seni en go na den Israelsma leki profeiti. Di Gado seni en, a taki: „Awinsi den [Israelsma] arki, noso den no arki, den o sabi taki wan profeiti ben de na den mindri” (Esek. 2:5). Esekièl tan prakseri fu san ede a ben kisi a wroko disi fu du. Dati meki a ben de klariklari fu du san Gado taigi en, so taki den Israelsma ben man si fa sma ben o teki Yerusalem abra. A sori taki a ben de wan trutru profeiti. Bakaten en nanga den tra Israelsma ben kisi a nyunsu disi: „Sma pori a foto!” Iya, now fosi den Israelsma ben kon si taki a heri pisi ten dati wan profeiti ben de na den mindri.Esek. 33:21, 33.

Na ini a ten disi, wi e warskow sma taki a heri grontapu fu Satan o kisi pori. Aladi a kan taki wi e weri, toku wi e gebroiki wi krakti fu preiki Gado Wortu, fu go baka na sma èn fu hori Bijbelstudie. Now di wi e si fa den profeititori di e taki fu a kaba e kon tru, wi kan breiti taki wi na den sma di e fruteri trawan san Gado o du.

DEN BEN LASI-ATI

Fu di Yehovah e gi wi krakti nanga yepi fu en santa yeye, meki wi man wroko tranga. Toku a kan pasa son leisi taki wi e lasi-ati fu di furu sma no wani arki a boskopu fu wi. Dati meki a bun fu luku na eksempre fu a profeiti Yeremia. Fu di a ben meki Gado boskopu bekènti, meki den Israelsma ben e spotu en, den ben e kosi en èn den ben e dreigi en. Wan leisi Yeremia taki srefi: „Mi no o taki moro fu en, èn mi no o taki na ini en nen moro.” Yeremia ben de wan man di ben abi den srefi firi leki wi. Toku a tan fruteri sma a boskopu fu Gado. Fu san ede? A profeiti taki: „A boskopu fu Gado de leki wan faya na ini mi ati èn na ini mi bonyo. Mi kon weri fu hori en gi misrefi. Mi no man tapu fu taki fu en.”Yer. 20:7-9.

Sobun, efu wi lasi-ati fu di furu sma no wani arki wi boskopu di wi e preiki, dan a bun fu denki dipi fu a boskopu disi so taki wi kan firi bun baka. A boskopu fu wi kan ’de leki wan faya na ini wi bonyo’. Te wi abi a gwenti fu leisi Bijbel ala dei, dan dati o meki taki a faya disi tan bron na ini wi.

DEN BEN E FIRI BROKOSAKA, MA DEN NO GI ABRA

Son Kresten di kisi wan wroko na ini na organisâsi, ben firi brokosaka fu di den no ben frustan fu san ede den kisi a wroko dati. Kande a profeiti Hosea ben e firi so tu. Yehovah ben taigi en: „Go trow nanga wan uma di o du hurudu èn teki den pikin di a o meki nanga wan tra man” (Hos. 1:2). Prakseri fa yu ben o firi efu yu ben o trow, ma dan Gado e taigi yu taki a frow di yu o trow o huru. Toku Hosea du san Yehovah taigi en. A trow nanga Gomer, dan a kisi wan manpikin. Bakaten Gomer kisi wan umapikin nanga ete wan manpikin. Soleki fa a sori, dan den tu pikin disi ben de fu tra man. Yehovah ben taigi Hosea taki a frow di a ben o trow nanga en, ben o „lon go na baka den freiri fu en”. A tekst no e taki fu wán freiri nomo, ma fu moro leki wán. Baka dati a ben o pruberi fu drai kon baka na Hosea. We, efu yu ben de a profeiti disi, yu ben o teki a wefi fu yu baka? Dati na san Yehovah taigi Hosea fu du. A profeiti pai furu moni srefi fu bai a wefi fu en baka.Hos. 2:7; 3:1-5.

Kande Hosea ben aksi ensrefi fu san ede a ben musu du a sani dati. Ma fu di Hosea du en, meki dati e yepi wi fu frustan fa a hati na Almakti Gado di Israel drai baka gi en. Ma a tori e sori wi tu taki son reti-ati Israelsma drai kon baka na en.

Na ini a ten disi, Gado no e aksi nowan sma fu „trow nanga wan uma di o du hurudu”. Toku wi kan leri wan sani fu Hosea di ben de klariklari fu du san Gado ben aksi en. Wi srefi musu de klariklari fu preiki a bun nyunsu fu a Kownukondre „na fesi ala sma èn oso fu oso”, aladi a muilek gi wi kande (Tori 20:20). A kan taki son fasi fa wi e du a Kownukondre preikiwroko no makriki gi yu. Furu sma di studeri Bijbel nanga Yehovah Kotoigi ben taki  dati den lobi a studie, ma taki noiti den ben o go oso fu oso fu preiki a boskopu. Ma bakaten furu fu den sma disi bigin du san den ben denki taki den no ben o man. Yu e si san disi e leri wi?

Ete wan sani de di wi kan leri fu a muilek sani di Hosea ben musu du. Di Yehovah aksi en fu teki a wefi fu en baka, a ben kan begi Gado fu no meki a du dati. Efu Hosea no ben skrifi fu a tori disi, nowan sma ben o sabi taki a ben musu du so wan sani. Wi srefi kan kon na ini wan situwâsi tu pe wi abi na okasi fu taki nanga wan sma fu Yehovah. Kande tra sma no ben o sabi taki wi kisi so wan okasi. Dati pasa nanga Anna, wan yongu sisa di ben go na wan heiskoro na Amerkankondre. A jufrow fu en ben aksi den pikin fu skrifi wan tori di den e bribi tranga na ini. Baka dati den ben musu pruberi fu kon nanga buweisi fu sori a klas taki a sani di den e bribi de so trutru. Anna ben kan meki na okasi disi pasa sondro fu taki fu Yehovah. Ma a ben si en leki wan okasi di Gado gi en. Fu di a ben sabi san den pikin fu en klas ben o du kande, meki a begi Yehovah. Ne a kisi a firi fu gebroiki na okasi disi fu preiki. A tori di Anna skrifi fu en, ben nen: „Evolutie: Wi abi buweisi fu dati?”

Den yonguwan fu wi e teki na eksempre fu den profeiti fu di den e taki fu wi Mekiman Yehovah sondro fu frede

Di Anna go na fesi a klas fu taki fu a tori di a skrifi, wan meisje di ben e bribi tranga na ini evolutie kon nanga wan lo aksi. Ma Anna ben man piki ala den aksi disi. A jufrow ben lobi a fasi fa Anna taki fu a tori. Dati meki a gi en wan prijs fu di a tori di a ben skrifi ben de a moro moiwan èn fu di a ben man sori den pikin krin taki na evolutie-leri no tru. Sensi a ten dati, Anna kisi moro okasi fu taki nanga a meisje di ben poti den aksi gi en. Anna, di teki na okasi di Yehovah gi en, e taki: „Now mi no e frede moro fu preiki a bun nyunsu.”

Aladi a wroko fu wi de pikinso tra fasi leki di fu den profeiti fu owruten, toku wi kan teki na eksempre fu profeiti soleki Esekièl, Yeremia nanga Hosea di ben meki muiti fu du a wani fu Yehovah. Na so wi srefi o abi bun bakapisi tu te wi e du a wani fu Yehovah. Te wi abi wi Osofamiri Anbegi noso te wi e studeri nanga wisrefi, dan a ben o bun fu leisi tori fu tra profeiti fu owruten èn fu denki dipi fu na eksempre fu den.