ALA sma wani abi wan koloku libi. Ma fu di wi e libi na ini den lasti dei di „tranga fu pasa”, meki wi alamala e kisi problema (2 Tim. 3:1). Son sma e lasi den prisiri fu di sma e du ogri nanga den, fu di den kon siki, fu di den lasi den wroko, fu di wan sma fu den dede noso fu di den abi tra broko-ede. Srefi futuboi fu Gado kan lasi den prisiri fu di den e firi brokosaka. Efu so wan sani pasa nanga yu, dan fa yu kan de nanga prisiri baka?

Fu man piki na aksi disi, wi musu kon sabi fosi san na trutru prisiri èn san yepi trawan fu no lasi den prisiri aladi den kisi tesi. Baka dati wi o si san wi kan du fu tan abi prisiri èn san o yepi wi fu abi moro prisiri srefi.

SAN NA PRISIRI?

Trutru prisiri a no a srefi leki te wan sma lobi lafu. Luku na eksempre disi: A kan taki wan drunguman e lafulafu baka te a dringi furu sopi. Ma baka te a kisi ensrefi a no e lafu moro, ma a e si taki den problema fu en no lusu. A lafu di a ben e lafu no ben de trutru prisiri.​—Odo 14:13.

Ma trutru prisiri na wan firi di e komoto fu wi ati. Na „wan firi di wan sma abi te a e kisi wan bun sani noso te a e fruwakti wan bun sani”. A firi disi e tan awinsi wi de na ini muilek situwâsi (1 Tes. 1:6). Fu taki en leti, wan sma kan abi problema, ma toku a e prisiri na ini en ati. Fu eksempre, sma ben wipi den apostel fu di den ben e fruteri sma fu Yesus. Toku den „gowe libi a Grankrutu fu den Dyu nanga bigi prisiri, fu di Gado ben feni taki den warti fu kisi syen fu Yesus nen ede” (Tori 5:41). A no de fu taki dati den no ben e prisiri fu di sma ben wipi den, ma fu di den ben man tan gi yesi na Gado.

Nowan sma e gebore nanga prisiri, èn prisiri no e kon fu ensrefi tu. Fu san ede? Fu di trutru prisiri na wan fasi di a santa yeye e meki sma kisi. Na Gado yeye e yepi wi fu kon abi „nyun fasi”, èn prisiri na wan fu den (Ef. 4:24; Gal. 5:22). Èn te wi abi prisiri, dan dati o yepi wi te wi abi problema.

SMA DI DE BUN EKSEMPRE GI WI

Yehovah no ben wani taki ogri pasa na grontapu. A ben abi soso bun sani na prakseri gi wi. Toku den ogri di sma e du no e meki taki Yehovah lasi en prisiri. Gado Wortu e taki: „Pe a e libi, na drape krakti nanga prisiri de” (1 Kron. 16:27). Boiti dati, den bun sani di den futuboi fu Yehovah e du, e meki en „ati prisiri”.​—Odo 27:11.

Te wi no e broko wi ede tumusi te sani no e go soleki fa wi ben fruwakti, dan wi e teki na eksempre fu Yehovah. Na presi taki wi lasi wi prisiri, wi musu poti prakseri na den bun sani di wi abi now èn wi musu wakti nanga pasensi tapu den moi blesi di wi o kisi na ini a ten di e kon. *

Na ini Bijbel wi e feni furu eksempre tu  fu sma di no lasi den prisiri aladi den ben de na ini muilek situwâsi. Sani pasa nanga Abraham di ben kan meki taki a lasi en libi èn sma ben du ogri nanga en (Gen. 12:10-20; 14:8-16; 16:4, 5; 20:1-18; 21:8, 9). Toku Abraham no lasi en prisiri. San ben yepi en? A ben e prakseri a howpu di a ben abi fu libi na ini a nyun grontapu te a Mesias o tiri (Gen. 22:15-18; Hebr. 11:10). Yesus ben taki: „Un tata Abraham ben prisiri srefisrefi fu di a ben fruwakti fu si a dei fu mi” (Yoh. 8:56). Wi kan teki na eksempre fu Abraham te wi e prakseri a prisiri di e wakti wi.​—Rom. 8:21.

Neleki Abraham, na apostel Paulus nanga Silas ben e tan prakseri den pramisi fu Gado. A bribi fu den ben tranga èn den ben tan de nanga prisiri aladi ogri ben miti den. Fu eksempre, di sma wipi den èn poti den na strafu-oso, ’Paulus nanga Silas ben e begi èn den ben e singi prèisesingi gi Gado na mindrineti’ (Tori 16:23-25). Boiti taki a howpu fu den ben gi den deki-ati, Paulus nanga Silas ben e prisiri tu fu di den ben nyan pina fu Krestes ede. Wi kan teki na eksempre fu Paulus nanga Silas te wi e prakseri den bun bakapisi di a e tyari kon te wi e gi yesi na Gado.​—Fil. 1:12-14.

Na ini a ten disi wi abi furu brada nanga sisa di de nanga prisiri aladi tesi miti den. Fu eksempre, na ini november 2013, wan bigi drai winti pori moro leki 1000 oso fu Kotoigi na ini den Filippijnen. George, di ben e tan na ini a foto Tacloban, lasi en oso. A e taki: „Den brada nanga sisa de nanga prisiri aladi den lasi furu sani. Mi no abi wortu nofo fu taki fa wi e firi.” Awinsi sortu problema e miti wi, wi kan de nanga prisiri efu wi e denki dipi fu den sani di Yehovah du gi wi. Sortu tra sani Yehovah gi wi di e meki wi prisiri?

DEN SANI DI E MEKI WI PRISIRI

A moro prenspari sani di e gi wi prisiri na a matifasi di wi abi nanga Gado. Prakseri a sani disi: Wi sabi a Moro Hei Tiriman. En na wi Tata, wi Gado èn wi Mati!​—Ps. 71:17, 18.

Wi e warderi a libi di wi kisi leki wan kado èn wi e prisiri nanga den bun sani fu a libi (Preik. 3:12, 13). Fu di Yehovah hari wi kon na en, meki wi e frustan fa a wani taki wi musu libi (Kol. 1:9, 10). Dati meki wi de koloku trutru èn wi sabi san wi musu du nanga wi libi. Ma furu sma no sabi san den musu du nanga den libi. Paulus meki wi frustan a tori disi di a skrifi: „’Nowan ai no si, nowan yesi no yere èn nowan sma prakseri fu den sani di Gado sreka gi den wan di lobi en.’ Ma Gado tyari den sani dati kon na krin gi wi nanga yepi fu a yeye fu en” (1 Kor. 2:9, 10). Wi e prisiri taki wi kon sabi san Yehovah wani èn san a o du na ini a ten di e kon.

Luku sortu tra sani Yehovah du gi en pipel. Wi breiti taki wi kan kisi pardon fu sondu (1 Yoh. 2:12). Wi abi a howpu taki dyonsro wi o libi na ini a nyun grontapu (Rom. 12:12). Nownow kaba Yehovah e gi wi furu brada nanga sisa (Ps. 133:1). Gado Wortu e gi wi a dyaranti tu taki Yehovah e kibri en pipel so taki Satan nanga den ogri yeye fu en no du den ogri (Ps. 91:11). Efu wi e denki dipi fu den blesi disi, dan wi o de nanga moro prisiri.​—Fil. 4:4.

SAN KAN YEPI YU FU ABI MORO PRISIRI?

Wan Kresten di de nanga prisiri kaba, kan kon abi moro prisiri? Yesus ben taki: „Mi taigi unu den sani disi, so taki unu kan prisiri leki fa mi e prisiri èn unu kan prisiri srefisrefi” (Yoh. 15:11). Disi e sori taki wi kan kon abi moro prisiri. Yu kan agersi a prisiri di wi abi nanga wan faya. Efu yu wani taki wan faya kon moro bigi, dan yu musu poti moro udu gi en. Na so a de tu taki efu wi wani abi moro prisiri, dan wi musu tan aksi Gado fu gi wi en santa yeye, fu di na a santa yeye e yepi wi fu kon abi prisiri. Boiti dati, wi musu  tan denki dipi fu den sani di wi e leri fu Bijbel di skrifi nanga yepi fu santa yeye.​—Ps. 1:1, 2; Luk. 11:13.

Yu o kon abi moro prisiri tu te yu e du sani di e meki Yehovah prisiri (Ps. 35:27; 112:1). Fu san ede dati de so? Fu di Yehovah meki wi fu du a wani fu en. Preikiman 12:13 e taki: „Lespeki a tru Gado èn hori den komando fu en, fu di dati na san libisma musu du.” Sobun, wi o de moro koloku te wi e dini Yehovah. *

DEN WINI DI WI E KISI TE WI DE NANGA PRISIRI

Wi o kisi furu wini te wi de nanga prisiri. Fu eksempre, wi hemel Tata o breiti nanga wi te wi e tan dini en nanga prisiri awinsi sortu problema wi e kisi (Deut. 16:15; 1 Tes. 5:16-18). Boiti dati, te wi abi trutru prisiri, dan wi no o feti baka gudu fu di wi sabi taki dati a no a moro prenspari sani na ini a libi. Wi o du ala san wi man fu poti a Kownukondre fu Gado na a fosi presi (Mat. 13:44). Te wi e si sortu bun bakapisi dati e tyari kon, dan wi o kon abi moro prisiri, wi o denki bun fu wisrefi èn wi o meki tra sma prisiri tu.​—Tori 20:35; Fil. 1:3-5.

„Nofo tron sma di de koloku now èn di breiti nanga a fasi fa den libi e go, de gosontu te den kon moro owru.” Na dati wan sabiman fu Nebraska Universiteit na Amerkankondre skrifi baka di a ondrosuku sani di abi fu du nanga a gosontu fu sma. A sani disi e kruderi nanga san Bijbel e taki: „Wan ati di e prisiri, bun leki dresi” (Odo 17:22). Iya, te wan sma de nanga prisiri, dan nofo tron a e abi wan bun gosontu.

Sobun, awinsi wi e libi na ini muilek ten, wi kan abi trutru prisiri te wi e begi Gado fu gi wi en santa yeye, te wi e studeri Bijbel èn te wi e denki dipi fu den sani di wi e leri. Wi e kon abi moro prisiri tu te wi e prakseri den blesi di wi e kisi nownow kaba, te wi e teki a bun eksempre fu trawan èn te wi e meki muiti fu du a wani fu Gado. Te wi e du den sani disi, dan wi o ondrofeni san skrifi na Psalm 64:10: „Den reti-ati sma o breiti nanga den sani di Yehovah du gi den èn den o suku kibri na en.”

^ paragraaf 10 Na ini wan tra artikel di o taki fu „den fasi di a yeye e meki sma kisi”, wi o taki fu pasensi.

^ paragraaf 20 Efu yu wani sabi san yu kan du fu kon abi moro prisiri, dan luku a faki „ Tra sani di yu kan du fu kon abi moro prisiri”.