Go na content

Go na a tra menu

Go na table of contents

Yehovah Kotoigi

Sranantongo

Studie-Waktitoren  |  februari 2016

Tan anbegi Yehovah nanga prisiri

Tan anbegi Yehovah nanga prisiri

SAN ben de a moro moi dei na ini yu libi? Na a dei di yu trow noso di yu kisi yu fosi pikin? Noso na a dei di yu gi yusrefi abra na Yehovah èn teki dopu? Kande yu e si a dei dati leki a moro prenspari dei na ini yu libi. Den brada nanga sisa ben breiti srefisrefi taki yu sori na fesi ala sma taki yu lobi Gado nanga yu heri ati, yu heri libi, yu heri frustan nanga ala yu krakti.Mark. 12:30.

A no de fu taki dati sensi di yu dopu yu si taki a e gi yu furu prisiri fu anbegi Yehovah. Ma son Kownukondre preikiman lasi a prisiri di den ben abi fosi. Fa dati du kon? San meki taki wi kan tan anbegi Yehovah nanga prisiri?

FU SAN EDE SON SMA LASI DEN PRISIRI?

A Kownukondre boskopu di wi e preiki taki heri esi Yehovah o pori na ogri grontapu disi èn taki a o tyari wi go na ini en nyun grontapu, e meki wi de nanga prisiri. Boiti dati, Sefanya 1:14 e gi wi a dyaranti disi: „A bigi dei fu Yehovah de krosibei. A de krosibei èn a e hasti ensrefi trutru.” Kande wi e wakti a dei disi wan langa pisi ten kaba, ma a no doro ete. Disi kan meki taki wi lasi wi prisiri èn taki wi no e dini Gado so fayafaya moro.Odo 13:12.

Te wi de makandra nanga Gado pipel, dan dati e gi wi a krakti fu tan anbegi Yehovah nanga prisiri. Kande na a bun fasi fa den futuboi fu Yehovah e tyari densrefi, meki taki wi kon na ini a tru anbegi èn wi bigin dini Yehovah nanga prisiri (1 Petr. 2:12). Ma san kan pasa efu wan Kresten kisi piri-ai fu di a no gi yesi na den wet fu Gado? A sani dati kan meki taki son brada noso sisa na ini a gemeente firi brokosaka èn taki den lasi den prisiri.

Den reklame fu na ogri grontapu fu Satan, kan meki tu taki wi lasi a prisiri di wi ben abi. Fa so? We, Didibri e gebroiki a grontapu fu en fu meki wi bribi taki wi abi son sani fanowdu di no de prenspari trutru. Dati meki a bun fu hori na prakseri san Yesus ben taki: „Nowan sma kan dini tu masra leki srafu. Bika a o teige a wan masra èn lobi a trawan, noso a o horibaka gi a wan èn wisiwasi a trawan. Unu no kan dini Gado èn dini Gudu na a srefi ten” (Mat. 6:24). Wi no o  man anbegi Yehovah nanga prisiri èn na a srefi ten wi e feti na baka den sani fu a grontapu disi.

’PRISIRI NANGA A GADO DI O FRULUSU WI’

Den sma di lobi Yehovah, no e si en leki wan hebi fu anbegi en (1 Yoh. 5:3). No frigiti taki Yesus ben taki: „Un alamala di musu wroko hebi èn di musu tyari hebi lai, un kon na mi èn mi o gi unu krakti baka. Teki mi tyatyari na un tapu èn leri fu mi, bika mi abi safri-ati nanga sakafasi èn unu o kisi krakti baka. Bika a tyatyari fu mi switi fu tyari èn mi lai lekti” (Mat. 11:28-30). Te wi e du den sani di wi leki Kresten musu du, dan dati e gi wi krakti èn a e meki wi de nanga prisiri. A no de fu taki dati a diniwroko fu Yehovah e gi wi furu prisiri tu. Meki wi go luku dri sani di e yepi wi fu ’prisiri nanga a Gado di o frulusu wi’.Hab. 3:18.

Wi e dini a koloku Gado di gi wi libi (Tori 17:28; 1 Tim. 1:11). Wi e frustan taki na fu di a Mekiman wani, meki wi de na libi. Dati meki wi e tan anbegi en nanga prisiri, awinsi omeni yari pasa kaba sensi di wi teki dopu.

Héctor de nanga prisiri ala ten fu di a e hori a howpu di a Kownukondre e gi en na prakseri èn a e tan preiki fayafaya

Luku na eksempre fu Héctor di dini Yehovah leki kring-opziener 40 yari langa. Srefi di a kon owru, a tan de nanga prisiri (Ps. 92:12-14). Di Héctor frow kon siki, dan Héctor no ben man du so furu moro na ini a diniwroko. Ma disi no meki taki a lasi en prisiri. A e taki: „Aladi mi e sari fu si fa a gosontu fu mi wefi e go na baka èn a muilek gi mi fu sorgu gi en, toku mi no meki disi tapu mi fu dini a tru Gado nanga prisiri. Mi sabi taki na Yehovah gi mi libi èn a no meki libisma fu soso. Dati meki mi lobi en trutru èn mi e dini en nanga mi heri ati. Mi e pruberi fu tan preiki fayafaya èn mi e tan prakseri a howpu di a Kownukondre e gi wi. Dati meki mi no lasi mi prisiri.”

Yehovah sorgu gi wan frulusu-ofrandi èn a sani dati e gi wi prisiri na ini a libi. „Gado ben lobi grontapu so te, taki a gi en wan-enkri Manpikin, so taki ala sma di e bribi na ini en no sa dede, ma sa kisi têgo libi” (Yoh. 3:16). Iya, wi kan kisi pardon fu den sondu fu wi èn wi kan libi fu têgo te wi e sori bribi na ini a lusu-paiman di Gado gi wi fu di a lobi wi. Yu no feni taki disi musu meki wi de nanga tangi? Yu no feni taki a musu meki wi dini Yehovah nanga prisiri?

Jesús no e feti na baka gudu moro, ma a e dini Yehovah omeni yari kaba nanga prisiri

Wan brada di nen Jesús, e libi na Meksikow. A e taki: „Mi ben lobi mi wroko so te taki mi no ben man sondro en. Son leisi a ben e pasa taki omeni dei langa, mi ben wroko furu yuru fu di  mi ben wani meki moro moni. Ne mi kon leri sabi Yehovah èn taki a gi en lobi Manpikin fu frulusu libisma. Mi ben angri fu dini en. Dati meki mi ben wani gi mi libi abra na Yehovah. Sobun, baka di mi wroko 28 yari langa gi a bedrijf, mi bosroiti fu libi a wroko èn mi bigin nanga a furuten diniwroko.” Sensi a ten dati a brada disi e dini Yehovah nanga prisiri èn a e du dati furu yari kaba.

Wi o prisiri. Wi no o sari. Yu sabi ete fa yu libi ben de, fosi yu kon leri sabi Yehovah? Na apostel Paulus ben memre den Kresten na Rome taki fosi den „ben de srafu fu sondu”, ma baka dati den tron „srafu fu retidu”. A bakapisi fu disi ben de taki den ben „kon santa” èn dati ben o gi den na okasi fu kisi têgo libi (Rom. 6:17-22). Fu di wi srefi e libi wan krin libi tu, meki wi no e du hurudu noso ogridu. Dati meki wi e prisiri. Wi no e sari.

„Den yari di mi anbegi Yehovah, na den moro moiwan fu mi libi.”—Jaime

Luku na eksempre fu Jaime. A man disi no ben e bribi na ini Gado. A ben e bribi na ini na evolutie-leri èn a ben lobi boks. Ne Jaime bigin go na den konmakandra. A naki en ati di a si fa den brada nanga sisa drape ben sori lobi gi makandra. Ma fu kan tapu nanga a fasi fa a ben e libi, Jaime ben abi fu aksi Yehovah fu yepi en fu bribi na ini en. Jaime e taki: „Safrisafri mi ben kon si taki wan hemel Papa de di lobi wi èn taki a de wan Gado di abi sari-ati. Fu di mi du san Yehovah e taki, meki mi de na libi ete. Efu mi no ben kenki, sma ben o kiri mi neleki san pasa nanga wan tu owru mati fu mi di ben e boks tu. Den yari di mi anbegi Yehovah, na den moro moiwan fu mi libi.”

NO GI ABRA!

Fa wi musu firi, aladi wi e wakti a kaba fu na ogri grontapu disi? No frigiti taki wi „e sai nanga a yeye na prakseri” èn taki wi o „koti têgo libi”. Dati meki „wi no musu tapu fu du san bun, bika na a reti ten wi sa koti den froktu efu wi no kon weri” (Gal. 6:8, 9). Meki Yehovah yepi yu fu tan horidoro, fu tan du muiti fu kon abi den fasi di o yepi yu fu pasa „a bigi banawtu” èn fu tan dini en nanga prisiri, srefi te yu e kisi tesi.Openb. 7:9, 13, 14; Yak. 1:2-4.

Wi kan de seiker taki te wi e horidoro, Gado o blesi wi fu di a sabi heri bun sortu wroko wi e du. A sabi tu taki wi lobi en nanga a nen fu en. Efu wi tan dini Yehovah nanga prisiri, dan wi o de leki a psalm skrifiman David di ben taki: „Doronomo mi e prakseri Yehovah. Fu di a de na mi reti-anusei, meki mi no o naki futu. Dati meki mi ati e prisiri trutru. Iya, mi breiti srefisrefi. Boiti dati, sani o go bun nanga mi.”Ps. 16:8, 9.