Go na content

Go na a tra menu

Go na table of contents

Yehovah Kotoigi

Sranantongo

Studie-Waktitoren  |  februari 2016

Leri wan sani fu den futuboi fu Yehovah di tai hori na en

Leri wan sani fu den futuboi fu Yehovah di tai hori na en

„Te sma e tai hori na yu, dan yusrefi o tai hori na den.”PS. 18:25.

SINGI: 63, 43

1, 2. Fa David sori taki a ben e tai hori na Gado? (Luku a prenki na a bigin fu na artikel.)

A DE mindrineti. David nanga Abisai e waka safri na mindri den 3000 srudati di e sribi. Na mindrisei fu a legrekampu den e si Kownu Saul e sribi bun dipi. A kon suku David te na Yudea-sabana fu kiri en. Nanga wan safri sten Abisai e taki: „Meki mi dyuku [Saul] fasi na a gron. Wán leisi sari kaba. Mi no o abi fu dyuku en wan di fu tu leisi.” Ma David e gi en wan moi piki. A e taki: „No kiri en. Sensi o ten wan sma langa en anu fu kiri a salfuwan fu Yehovah, sondro fu kisi strafu? . . . Te mi e prakseri a fasi fa Yehovah e si sani, dan noiti mi kan langa mi anu fu kiri a salfuwan fu Yehovah!”1 Sam. 26:8-12.

2 David ben sabi san a wani taki fu tai hori na Gado. Dati meki a no ben wani du ogri nanga Saul. Fu san ede? Fu di Saul ben de a kownu fu Israel di Gado ben salfu. Futuboi fu Yehovah di e tai hori na en, e lespeki den sma di a poti fu teki fesi. Yehovah wani taki en pipel musu ’tai hori na en’.Leisi Psalm 18:25.

3. Fa Abisai sori taki a ben e tai hori na David?

 3 Abisai ben e lespeki David. Fa wi du sabi dati? Luku wan eksempre. Di David du hurudu nanga Batseiba, a pruberi fu kibri a tori. Dati meki a taigi Yoab, a brada fu Abisai, fu seti sani so taki Uria ben kan dede na ini a feti (2 Sam. 11:2-4, 14, 15; 1 Kron. 2:16). Kande Abisai ben sabi pikinso fu a tori, ma toku a tan si David leki a kownu di Gado ben poti fu tiri. Wan tra sani na taki noiti Abisai pruberi fu gebroiki a posisi di a ben abi leki legre-edeman fu teki a makti abra na ini Israel. Na presi fu dati, a feti gi David di feanti ben wani du ogri nanga en.2 Sam. 10:10; 20:6; 21:15-17.

4. (a) Fa David sori taki a tai hori na Gado ala ten? (b) Sortu tra eksempre wi o luku?

4 Soleki fa wi si, dan David no ben wani kiri Kownu Saul. Na so a sori taki a ben de wan futuboi fu Yehovah di tai hori na en. Di David ben yongu, a no ben frede fu feti nanga a langa bigiskin Filistea man Goliat di ben prefuru fu „spotu a legre fu a libilibi Gado” (1 Sam. 17:23, 26, 48-51). Di David tron kownu, dan a du hurudu èn a kiri sma. Den sani disi ben de bigi sondu. Ma toku a teki a piri-ai di a profeiti Natan gi en èn a sori berow (2 Sam. 12:1-5, 13). Srefi di David kon owru, a tai hori na Gado. Fu eksempre, a gi furu moni, gowtu nanga tra sani fu yepi bow a tempel fu Yehovah (1 Kron. 29:1-5). Sobun, aladi David meki bigi fowtu, toku a tai hori na Gado (Ps. 51:4, 10; 86:2). Te wi o luku tra tori fu David èn te wi o taki fu tra sma di ben e libi na a ten fu en, dan meki wi pruberi fu piki den aksi disi: Fa wi kan bosroiti o ten wi musu tai hori na Yehovah na presi fu tai hori na wan tra sma? Sortu fasi o yepi wi fu tai hori na Gado?

YU O TAI HORI NA YEHOVAH?

5. San wi kan leri fu a fowtu di Abisai meki?

5 Di Abisai kroipi go na ini a legrekampu fu Saul, dan a sori taki a no ben frustan o ten a bun fu tai hori na Yehovah na presi fu David. Dati meki a ben wani kiri Kownu Saul. Ma David tapu en fu du dati, fu di a ben frustan taki a no ben bun „fu kiri a salfuwan fu Yehovah” (1 Sam. 26:8-11). Disi e leri wi wan prenspari sani: Aladi a no fowtu fu tai hori na Yehovah èn na tra sma, toku Bijbel rai kan yepi wi fu sabi o ten a prenspari fu tai hori na Yehovah na presi fu tra sma.

6. Aladi a no fowtu fu tai hori na wi famiri nanga wi mati, toku wi musu luku bun. Fu san ede?

6 Fu di wi lobi trawan nanga wi heri ati, meki wi wani tai hori na den. Ma wi ati kan bedrigi wi (Yer. 17:9). Sobun, a kan taki wan sma di e tai hori na Gado, lobi en famiri noso wan bun mati so te taki awinsi a famiri noso a mati e du wan sani di no bun, a hebi gi en fu lusu en. Spesrutu te wan lobiwan fu wi gowe libi a tru anbegi, dan wi no musu frigiti taki na Yehovah wi musu tai hori.Leisi Mateyus 22:37.

7. Fa wan sisa ben man tai hori na Gado di a ben de na ini wan muilek situwâsi?

7 A kan pasa taki wan famiriman fu wi puru fu a gemeente. Na ini den situwâsi disi wi musu bosroiti na suma wi o tai hori. Luku a tori fu wan sisa di nen Anne. [1] Wan dei en mama, di ben puru fu a gemeente, bel en. A mama ben wani kon luku Anne fu di a ben sari taki a no ben man taki moro nanga en famiri. A sani disi ben hebi gi Anne èn a taigi en mama taki a ben o skrifi en wan brifi fu fruteri en san a o du. Ma fosi a skrifi a brifi, a go luku san Bijbel e taki fu a tori (1 Kor. 5:11; 2 Yoh. 9-11). Baka dati Anne skrifi en mama fu taigi en na wan switi fasi taki na en srefi  ben meki taki a no ben man taki moro nanga a famiri fu di a du wan ogri èn a no sori berow. Anne taigi en: „Na soso te yu o drai kon baka na Yehovah, yu o man de koloku baka.”Yak. 4:8.

8. San o yepi wi fu tai hori na Gado?

8 San yepi den futuboi fu Yehovah na ini a ten fu David fu tai hori na Gado? Den ben abi sakafasi, switifasi nanga deki-ati. Meki wi go luku den fasi disi wan-fru-wan.

WI MUSU ABI SAKAFASI FU MAN TAI HORI NA GADO

9. Fu san ede Abner pruberi fu kiri David?

9 Di David go na Kownu Saul nanga na ede fu Goliat, dan awinsi tu man si en. Wan fu den ben de Yonatan, a manpikin fu Saul, di ben meki wan frubontu nanga David fu tan wan mati fu en fu ala ten. A tra man ben de a legre-edeman Abner (1 Sam. 17:57–18:3). Bakaten Abner horibaka gi Saul di a ben wani kiri David. David skrifi: „Ogri-ati sma e suku fu kiri mi” (Ps. 54:3; 1 Sam. 26:1-5). Fu san ede Yonatan tai hori na David, ma Abner no du dati? Neleki Yonatan, Abner ben sabi taki Gado ben teki David fu tron kownu fu Israel. Baka di Saul dede, Abner ben kan horibaka gi David na presi fu Saul manpikin Isboset. Na so a ben o sori taki a abi sakafasi èn taki a tai hori na Gado. Bakaten Abner teki wan fu den frow fu Kownu Saul, kande fu di a ben wani tron kownu.2 Sam. 2:8-10; 3:6-11.

10. San meki Absalom no ben tai hori na Gado?

10 Fu di David manpikin Absalom no ben abi sakafasi, meki a no ben man tai hori na Gado. „Absalom poti sma fu meki wan asiwagi gi en èn a teki asi gi ensrefi tu. Dan a meki feifitenti srudati lon na fesi en asiwagi” (2 Sam. 15:1). A bigin taki sani tu fu drai sma ede, so taki den ben o horibaka gi en. Neleki Abner, Absalom pruberi fu kiri David, aladi a ben sabi taki Yehovah ben poti David leki kownu fu Israel.2 Sam. 15:13, 14; 17:1-4.

11. San wi kan leri fu a tori fu Abner, Absalom nanga Baruk?

11 Na eksempre fu Abner nanga Absalom e sori krin taki te wan sma e suku biginen, dan dati kan meki taki a no e tai hori moro na Gado. Noiti wan futuboi fu Yehovah musu go du ogri fu di a e denki ensrefi nomo. Ma te wan Kresten e suku fu kon gudu noso fu meki en na ini a grontapu disi, dan dati kan pori a matifasi di a abi nanga Gado. Wan ten ben de taki  Baruk, a sekretarsi fu Yeremia, no ben e prisiri so furu moro nanga na anbegi fu en fu di wan sani ben puru en prakseri. Ma disi na san Yehovah taigi Baruk: „Luku, a sani di mi bow, mi o broko baka èn a sani di mi prani, mi o rutu puru. Iya, na dati mi o du nanga a heri kondre. Ma yu e tan suku bigi sani gi yusrefi. No suku den moro” (Yer. 45:4, 5). Baruk teki a rai fu Yehovah. Sobun, aladi wi e wakti a kaba fu a grontapu disi, a bun fu hori na prakseri san Gado ben taigi Baruk.

12. Fruteri fu san ede wi no o man tai hori na Gado te wi e suku wi eigi bun.

12 Daniel, wan brada na Meksikow, ben musu bosroiti efu a ben o tai hori na Gado noso efu a ben o suku en eigi bun. A ben wani trow nanga wan meisje di no ben de wan Kotoigi. Daniel e taki: „Mi tan skrifi brifi gi en, srefi di mi bigin pionier. Ma te fu kaba mi sori sakafasi èn mi taigi wan owruman di ben abi ondrofeni taki mi lobi wan meisje èn taki a ben hebi gi mi fu du san Gado wani. Na owruman yepi mi fu si taki efu mi wani tai hori na Gado, dan mi musu stop skrifi brifi gi a meisje. Na dati mi du tu, baka di mi begi furu èn mi krei langalanga watra-ai. Ma syatu baka dati, mi bigin prisiri baka nanga a preikiwroko.” Bakaten Daniel trow nanga wan bun sisa èn now a de wan kring-opziener.

TE WI E TAI HORI NA GADO, DAN WI O ABI SWITIFASI

Te yu sabi taki wan brada noso sisa di de yu mati e du wan seryusu sondu, dan yu o gi en deki-ati fu go taki nanga den owruman? (Luku paragraaf 14)

13. Fa Natan ben man tai hori na Gado èn na David, aladi David ben sondu?

13 Te wi e tai hori na Gado, dan wi o man yepi tra sma na wan switi fasi. Na so wi e sori taki wi e tai hori na den. A profeiti Natan tai hori na David, aladi a ben tai hori na Gado tu. Baka di Natan kon sabi taki David du hurudu nanga wan uma èn taki a ben seti sani fu meki a masra fu na uma disi dede na ini feti, dan Yehovah seni Natan fu piri-ai gi David. A profeiti teki deki-ati èn a du san Gado taki. A piri-ai gi David na wan switi fasi, ma a du disi nanga koni. Fu meki David si o seryusu a sondu fu en ben de, Natan gebroiki wan agersitori di ben sori fa wan guduman teki a wan-enkri skapu fu wan pôtiman. David ati bron di a yere san a guduman du. Ne Natan taigi en: „Na yu na a man!” Na so David kon si taki a du wan seryusu sondu.2 Sam. 12:1-7, 13.

14. Fa yu kan tai hori na Yehovah, aladi yu e tai hori tu na den mati fu yu noso na den famiri fu yu?

14 Switifasi kan yepi yu fu tai hori na  Yehovah èn na tra sma. Fu eksempre, kande yu sabi taki wan brada noso sisa e du wan seryusu sondu. A kan taki yu no wani taki san a du, spesrutu efu na wan bun mati noso wan famiri fu yu. Ma te yu ben o pruberi fu kibri san a e du, dan yu e sori taki yu no e tai hori na Gado. A no de fu taki dati a moro prenspari sani gi wi na taki wi musu tai hori na Yehovah. Sobun neleki Natan, abi deki-ati, ma yepi yu mati noso yu famiri na wan switi fasi tu. Taigi en fu go suku yepi na den owruman. Efu a e wakti tumusi langa fu du en, dan yu musu sori taki yu e tai hori na Yehovah fu di yu e go taki nanga den owruman fu a tori. Te yu e du disi, dan yu e sori switifasi gi en fu di den owruman o pruberi fu yepi en na wan safri-ati fasi.Leisi Lefitikus 5:1; Galasiasma 6:1.

WI MUSU ABI DEKI-ATI FU MAN TAI HORI NA GADO

15, 16. Fu san ede Husai ben abi deki-ati fanowdu fu man tai hori na Gado?

15 Wan man di nen Husai ben abi deki-ati fanowdu fu man tai hori na Gado. A ben de wan bun mati fu Kownu David. Ma wan ten ben de taki David manpikin Absalom pruberi fu teki a makti abra na ini Yerusalem èn a ben kisi furu sma kon na en sei. Na a ten dati, a ben hebi gi Husai fu luku na suma a ben o tai hori (2 Sam. 15:13; 16:15). David ben abi fu lowe komoto na ini Yerusalem, ma san Husai ben o du? A ben o tai hori na Absalom, noso a ben o horibaka gi wan owru kownu di ben musu lowe fu man tan na libi? Fu di Husai bosroiti fu tai hori na a kownu di Gado ben poti fu tiri, meki a go miti David na tapu Olèif-bergi.2 Sam. 15:30, 32.

16 David aksi Husai fu go baka na Yerusalem, fu du leki a ben de Akitofel mati èn fu sorgu taki Absalom no teki a rai fu Akitofel. Husai ben kan lasi en libi, ma toku a sori taki a tai hori na Yehovah. Dati meki a du san David aksi en. Neleki fa David begi, na so a pasa tu. Absalom arki a rai fu Husai, na presi fu arki Akitofel.2 Sam. 15:31; 17:14.

17. Fu san ede wi abi deki-ati fanowdu fu man tai hori na Gado?

17 Wi srefi abi deki-ati fanowdu tu fu man tai hori na Yehovah. Furu fu wi horidoro di famiriman, sma na wrokope, noso tiriman ben e gens wi. Na so wi sori taki wi e tai hori na Gado. Fu eksempre, luku a tori fu Taro di e libi na Yapan. Sensi di a ben pikin, a ben e du ala ten san en papa nanga mama aksi en. A no ben du en nomo fu di a ben musu, ma a ben wani prisiri na ati fu en papa nanga mama. Sobun, di a bigin bumui nanga Yehovah Kotoigi, en papa nanga mama gens en. A ben hebi gi Taro fu taigi den taki a ben bosroiti fu go na den konmakandra. A e taki: „Den ati ben bron so furu nanga mi, taki omeni yari langa den no ben wani mi kon na den. Mi begi Gado fu gi mi deki-ati so taki mi ben kan hori misrefi na a bosroiti di mi teki. Now mi papa nanga mama no e gens mi moro èn mi kan go luku den o ten mi wani.”Leisi Odo 29:25.

18. San yu leri na ini na artikel disi?

18 Te wi e tai hori na Yehovah neleki David, Yonatan, Natan nanga Husai, dan wi o de koloku. Noiti wi wani de leki Abner nanga Absalom di no ben tai hori na Gado. Wi wani tan na Yehovah sei neleki David. Wi leki sondusma o tan meki fowtu. Toku wi kan sori taki a moro prenspari sani gi wi na fu tai hori na Yehovah.

^ [1] (paragraaf 7) Wi kenki wan tu nen.