Go na content

Go na a tra menu

Go na table of contents

Yehovah Kotoigi

Sranantongo

Studie-Waktitoren  |  februari 2016

Yehovah kari en „mi mati”

Yehovah kari en „mi mati”

„Ma yu, Israel, yu na mi futuboi. Yakob, yu na a wan di mi teki, a pikin fu mi mati Abraham.”YES. 41:8.

SINGI: 91, 22

1, 2. (a) Fa wi sabi taki libisma kan tron wan mati fu Gado? (b) San wi o luku na ini na artikel disi?

„SENSI wi gebore teleki wi dede, wi alamala abi lobi fanowdu.” Libisma abi bun mati fanowdu di lobi den. Ma a lobi disi a no a srefi leki te wan man nanga wan uma lobi makandra. Ala sma wani abi wan mati. Wi no man tan sondro sma. Ma a moro prenspari sani na taki wi abi a lobi fu Yehovah fanowdu. Furu sma no man frustan taki libisma man tron bun mati fu na Almakti Gado di de wan Yeye na hemel. Na so wi srefi e denki tu? Nôno.

2 Bijbel e taki fu sondu libisma di ben tron mati fu Gado. A bun fu go luku fa den tron mati fu Gado, fu di so wan matifasi na a moro prenspari sani di wi musu suku fu abi. Luku a moi eksempre fu Abraham di ben de wan mati fu Gado. (Leisi Yakobus 2:23.) Fa a du kon taki Abraham ben de so wan bun mati fu Yehovah? Wan prenspari sani na taki a ben abi bribi. Fu taki en leti, Bijbel e kari Abraham, a „tata fu ala sma di e  bribi” (Rom. 4:11). Sobun, meki wi go luku fa a bribi fu Abraham yepi en fu de wan bun mati fu Gado. Ibriwan fu wi musu aksi ensrefi: ’Fa mi kan abi bribi neleki Abraham èn fa mi kan tron wan moro bun mati fu Yehovah?’

FA ABRAHAM TRON WAN MATI FU YEHOVAH?

3, 4. (a) Fruteri san ben de a moro bigi tesi di Abraham kisi kande. (b) Fu san ede Abraham ben de klariklari fu tyari Isak leki ofrandi?

3 Pruberi fu si fa wan owru man e kren wan bergi. A man disi na Abraham. Kande disi na a moro muilek sani di a du na ini en libi. A hebi gi en fu kren a bergi, ma a no fu di a owru. Bika aladi a abi sowan 125 yari, toku a tranga ete. [1] Wan yongu man e waka leti na en baka. A yongu man disi na en manpikin Isak èn a abi kande sowan 25 yari. A e tyari bron-udu. Abraham srefi abi wan nefi nanga wan tu sani fu meki faya. Yehovah ben aksi en fu gi en eigi manpikin leki ofrandi.Gen. 22:1-8.

4 Kande disi ben de a moro bigi tesi di Abraham kisi na ini en libi. Son sma e taki dati na wan ogri-ati sani Gado aksi Abraham fu du. Trawan e taki dati Abraham no ben abi firi èn taki a gi yesi na Gado sondro fu denki. Den e taki den sani disi fu di den no abi bribi èn fu di den no e frustan san na bribi (1 Kor. 2:14-16). A no tru taki Abraham gi yesi na Gado sondro fu denki. A gi yesi fu di a ben abi trutru bribi. Na bribi meki taki a ben frustan taki en hemel Papa Yehovah noiti o aksi den futuboi fu en fu du wan sani di ben o abi takru bakapisi gi den. Abraham ben sabi taki efu a ben o gi yesi na Yehovah, dan Gado ben o blesi en nanga en lobi manpikin. San yepi Abraham fu abi so wan tranga bribi? A ben sabi Yehovah èn a ben ondrofeni san a man du.

5. Fa Abraham leri sabi Yehovah kande èn fa den sani di a kon sabi meki a firi?

5 A ben sabi Yehovah. Abraham gro kon bigi na ini Ur, wan foto fu den Kaldeyasma. Furu sma drape ben e anbegi falsi gado. Srefi en papa Tera ben e du dati. Sobun, fa a du kon taki Abraham ben kon sabi Yehovah? (Yos. 24:2) Bijbel no e taki fu a tori, ma a e sori taki Abraham ben de wan bakapikin fu Sem. A man disi ben de wan manpikin fu Noa èn a ben abi wan tranga bribi. Sem ben de na libi ete na a ten di Abraham ben abi sowan 150 yari. Wi no sabi seiker efu Sem ben leri Abraham suma na Yehovah. Ma wi kan de seiker taki Sem leri den famiriman fu en san a ben sabi fu Yehovah. Kande na so Abraham kon leri sani fu Yehovah èn den sani disi naki en ati. Na so a kon lobi a Gado di a ben leri sabi èn dati yepi en fu kisi wan tranga bribi.

6, 7. Fa den sani di Abraham ondrofeni tranga a bribi fu en?

6 A ondrofeni san Yehovah man du. Fa den sani di Abraham ondrofeni meki taki a bribi di a ben abi na ini Yehovah kon moro tranga? Sma e taki dati te wi e sidon prakseri wan sani, dan wi kan kisi a firi fu du en èn te fu kaba wi e du en tu. Den sani di Abraham kon leri fu Gado, meki taki a kisi a firi fu lespeki „Yehovah, a Moro Hei Gado, Mekiman fu hemel nanga grontapu” (Gen. 14:22). Bijbel e sori taki sma musu abi a lespeki disi gi Gado efu den wani tron wan bun mati fu en (Hebr. 5:7; Ps. 25:14). Fu di Abraham ben abi lespeki gi Gado, meki a ben man gi yesi na en.

7 Gado ben aksi Abraham nanga Sara, di ben owru kaba, fu gowe libi Ur èn fu froisi go na wan tra kondre. Den ben o abi fu libi na ini tenti den heri libi langa. Fu di Abraham gi yesi na Yehovah, meki  Yehovah blesi en èn a sorgu taki sani waka bun nanga en. Fu eksempre, Abraham ben frede taki sma ben o kiri en, dan den ben o teki en moi wefi Sara puru na en anu. A ben abi leti fu frede, ma toku a no ben meki den broko-ede fu en tapu en fu gi yesi na Yehovah. Wan tu leisi Yehovah yepi Abraham nanga Sara èn a du wan wondru srefi fu kibri den (Gen. 12:10-20; 20:2-7, 10-12, 17, 18). Den sani disi di Abraham ondrofeni tranga a bribi fu en.

8. Te wi leri sabi Yehovah èn wi e ondrofeni san a e du gi wi, dan fa dati o yepi wi fu tron wan moro bun mati fu en?

8 Wi kan tron wan mati fu Yehovah? Iya, a kan. Na ini Bijbel wi kan leri furu sani fu Yehovah èn wi kan ondrofeni san a du gi wi. Abraham ben sabi pikinso nomo fu Yehovah, ma wi sabi moro leki en (Dan. 12:4; Rom. 11:33). Gado Wortu lai nanga moi sani di kan leri wi moro fu a „Mekiman fu hemel nanga grontapu”. Disi o yepi wi fu kisi lespeki gi en, fu lobi en èn fu gi yesi na en. Wi o kon si taki a rai fu en e kibri wi, taki a e blesi wi èn taki a e meki a bribi fu wi kon moro tranga. Wi e leri tu taki te wi e dini Gado nanga wi heri ati, dan wi o firi koloku, sani o go bun nanga wi èn wi o prisiri (Ps. 34:8; Odo 10:22). Te wi kon sabi Yehovah moro bun èn wi e ondrofeni san a du gi wi, dan a bribi fu wi o kon moro tranga èn wi o tron wan moro bun mati fu en.

SAN ABRAHAM DU FU TAN WAN MATI FU GADO?

9, 10. (a) San wi musu du fu tron wan moro bun mati fu Gado? (b) Fa wi sabi taki Abraham du ala san a man fu tan wan mati fu Yehovah?

9 Te wi de mati nanga wan sma, dan wi kan si dati leki wan diri gudu. (Leisi Odo 17:17.) A no leki te yu e bai wan diri vaas di yu poti na wan presi sondro fu gebroiki en. Ma a de leki wan moi bromki di wi e sorgu, so taki a e gro bun. Abraham ben e du ala san a man fu tan wan mati fu Yehovah. Fa a ben e du dati?

10 Noiti Abraham ben denki taki den sani di a ben du gi Gado na ini a ten di pasa, ben nofo kaba. Di en nanga a bigi osofamiri fu en froisi go na Kanan, a tan suku a yepi fu Yehovah te a ben musu teki bosroiti, awinsi na bigi bosroiti noso pikin bosroiti. Wán yari fosi en manpikin Isak gebore, di Abraham ben abi 99 yari, Yehovah aksi en fu besnèi ala mansma na ini en osofamiri. A de so taki Abraham aksi Yehovah fu san ede a ben musu du so wan sani? A ben e suku fasi fu no du san Yehovah aksi fu en? Nôno. A frutrow na tapu Gado èn na „a srefi dei dati” a du san Gado taki.Gen. 17:10-14, 23.

11. Fu san ede Abraham ben broko en ede nanga Sodom nanga Gomora èn fa Yehovah yepi en?

11 Fu di Abraham ben abi a gwenti fu gi  yesi na Yehovah srefi na ini pikinpikin sani, meki a ben man tan de wan bun mati fu Gado. A no ben frede fu taigi Yehovah krin san de na tapu en ati èn a ben aksi Yehovah fu yepi en te a no ben e frustan son sani. Fu eksempre, di Abraham kon sabi taki Gado ben o pori den foto Sodom nanga Gomora, a ben frede taki reti-ati sma ben o kisi pori makandra nanga den ogrisma. Kande Abraham ben e broko en ede nanga en neef Lot nanga en osofamiri di ben e libi na ini Sodom na a ten dati. Nanga sakafasi, Abraham poti aksi gi Gado èn a ben sori taki a e frutrow na tapu Yehovah, „a sma di e krutu heri grontapu”. Nanga pasensi Yehovah sori Abraham taki En na wan Gado di abi sari-ati èn taki a man si san de na ini sma ati. Te a musu tyari strafu kon, a e luku fosi suma na den reti-ati sma èn a e hori den na libi.Gen. 18:22-33.

12, 13. (a) Fa den sani di Abraham ben sabi fu Yehovah èn den sani di a ben ondrofeni, yepi en bakaten? (b) San e sori taki Abraham ben frutrow na tapu Yehovah?

12 Soleki fa wi si, dan ala sani di Abraham ben sabi fu Gado èn den sani di a ben ondrofeni kaba, yepi en fu tan wan bun mati fu Yehovah. Sobun bakaten, di Yehovah aksi Abraham fu gi en manpikin Isak leki ofrandi, a ben sabi taki Yehovah na wan Gado di abi pasensi nanga sari-ati, di de fu frutrow èn di e kibri sma. Meki wi go doro nanga a tori pe Abraham e kren a bergi na ini a kondre Moria. A ben denki taki Yehovah kenki? A ben feni taki Yehovah tron wan ogri-ati Gado di no abi sari-ati? Abraham ben sabi seiker taki Yehovah no ben kenki. Fu san ede wi kan taki dati?

13 Fosi Abraham libi den futuboi fu en na a futu fu a bergi, a taigi den: „Un tan dya nanga a buriki. Ma mi nanga a boi o go drape fu anbegi Gado. Dan wi o drai kon baka na unu” (Gen. 22:5). Fu san ede Abraham ben taki a sani disi? A ben e lei gi den futuboi fu en taki Isak ben o drai kon baka nanga en, aladi a ben sabi taki a ben o gi Isak leki ofrandi? Nôno. Bijbel e sori wi san Abraham ben e denki. (Leisi Hebrewsma 11:19.) Abraham „ben prakseri na ensrefi taki efu Isak ben o dede, dan Gado ben o man gi en wan opobaka”. Abraham ben e bribi trutru taki sma o kisi wan opobaka. A ben sabi taki Yehovah ben gi en nanga Sara a krakti baka fu kisi pikin, aladi den ben owru kaba (Hebr. 11:11, 12, 18). Abraham kon si taki nowan sani no de di Yehovah no man du. Dati meki a ben sabi seiker taki awinsi san ben o pasa na a muilek dei dati, a ben o kisi en lobi manpikin baka so taki ala den sani di Yehovah ben pramisi en ben o kon tru. Dati meki a no e fruwondru wi taki Bijbel e kari Abraham a „tata fu ala sma di e bribi”.

14. San kan meki en muilek gi yu fu dini Yehovah èn fa na eksempre fu Abraham kan yepi yu?

 14 Fa a de nanga wi? Na ini a ten disi, Yehovah no e aksi wi fu du den sortu sani disi. Ma a e aksi wi fu gi yesi na en, awinsi a hebi gi wi son leisi fu du dati noso awinsi wi no man frustan fu san ede wi musu du en. Wan sani de di Gado e aksi yu fu du, ma di muilek gi yu? Gi son sma na a preikiwroko. Kande a muilek gi den fu di den e syen. Dati meki a no makriki gi den fu taki fu a bun nyunsu nanga sma di den no sabi. Gi trawan, a de wan muilek sani fu de tra fasi leki sma na skoro noso na wrokope (Eks. 23:2; 1 Tes. 2:2). Yu e firi son leisi neleki Abraham? Yu e firi neleki yu musu kren wan bergi fu di yu musu du wan sani di hebi gi yu? Efu yu e firi so, dan meki na eksempre fu Abraham nanga a bribi fu en gi yu deki-ati. Te wi e denki dipi fu na eksempre fu reti-ati man nanga uma, dan dati o yepi wi fu de leki den èn fu kon krosibei na wi Mati Yehovah.Hebr. 12:1, 2.

WI E KISI BLESI TE WI DE WAN MATI FU GADO

15. Fu san ede wi kan de seiker taki noiti Abraham sari taki a gi yesi na Yehovah?

15 Yu denki taki Abraham sari bakaten taki a gi yesi na Yehovah? Luku san Bijbel e taki fu Abraham di a ben kon owru: „Baka di Abraham libi wan bun libi a hari en lasti bro èn a dede. A ben owru srefisrefi” (Gen. 25:8). Di Abraham ben abi 175 yari a kon swaki, ma toku a ben de tevrede nanga en libi. En heri libi langa a poti prakseri na a matifasi di a ben abi nanga Yehovah Gado. Ma te wi e leisi na ini Bijbel taki Abraham „ben owru srefisrefi”, dan wi no musu denki taki a ben weri fu a libi èn taki a no ben wani libi na ini a ten di e kon.

16. Fa Abraham o prisiri na ini a paradijs?

16 Bijbel e taki fu Abraham: „A ben fruwakti a foto di abi trutru fondamenti. A sma di prakseri fa fu meki a foto dati èn di bow en, na Gado” (Hebr. 11:10). Abraham ben e bribi taki wan dei a ben o si a foto dati, a Kownukondre fu Gado, di o tiri heri grontapu. Prakseri nomo fa Abraham o breiti fu libi na ini a paradijs na grontapu èn fa a o de wan mati baka fu Yehovah. A o breiti fu sabi taki na eksempre fu en yepi futuboi fu Yehovah dusundusun yari baka di a dede. Na ini Paradijs, Abraham o kon sabi taki a fasi fa a kisi Isak baka, ben e prenki wan moro bigi sani (Hebr. 11:19). A o leri taki a pen di a ben firi di a ben e sreka Isak fu tyari en leki ofrandi, yepi milyunmilyun sma fu frustan san Yehovah ben musu firi di a gi en Manpikin Yesus Krestes leki ofrandi (Yoh. 3:16). Na eksempre fu Abraham e yepi wi alamala fu sori moro warderi gi a lusu-paiman, fu di dati na a moro moi fasi fa wan sma sori lobi gi wi.

17. Sortu muiti yu musu meki èn san wi o luku na ini a tra artikel?

17 Ibriwan fu wi musu meki muiti fu teki na eksempre fu Abraham. Te wi e tan leri sabi Yehovah moro bun èn wi e ondrofeni san a du gi wi, dan wi o man gi yesi na en neleki Abraham. Wi o si tu taki a o blesi wi èn taki a o kibri wi. (Leisi Hebrewsma 6:10-12.) Meki Yehovah de wi Mati fu ala ten. Na ini a tra artikel wi o luku ete dri eksempre fu reti-ati futuboi fu Gado di tron bun mati fu en.

^ [1] (paragraaf 3) Fosi, den ben e kari a man disi Abram èn en wefi den ben e kari Sarai. Ma na ini na artikel disi wi o gebroiki den nen di Yehovah gi den bakaten: Abraham nanga Sara.