DI MI nanga mi wefi Danièle doro na ini a hotel, dan a frow di e teki telefon na a hotel taigi mi: „Meneer, yu kan bel den skowtu grantangi?” Wan tu yuru na fesi, wi doro na ini Gabon, wan kondre fu Afrika pe lanti ben tapu a wroko fu wi na ini a pisi ten baka a yari 1970.

Ma Danièle srapu. A ben sabi kaba san ben e pasa. A taigi mi na ini mi yesi: „Yu no abi fu bel den skowtu, den de dya kaba!” Leti na wi baka, wan wagi stop na fesisei fu a hotel. Baka wan tu miniti srudati teki wi tyari gowe. Ma fu di Danièle warskow mi na fesi, meki mi ben man gi wan tra brada di ben de drape wan tu prenspari papira.

Di den ben e tyari wi go na a skowtu-post, mi ben e prakseri: ’A bun taki mi abi wan wefi di abi deki-ati èn di e horibaka gi Yehovah nanga en organisâsi.’ Disi na wan fu den someni okasi pe mi nanga Danièle wroko so bun nanga makandra. Meki mi fruteri yu fu san ede wi ben e go na kondre pe lanti ben tapu a wroko fu Yehovah Kotoigi.

YEHOVAH YEPI MI FU FRUSTAN DEN TRU LERI FU BIJBEL

Mi gebore na ini 1930 na ini a pikin foto Croix na ini Fransikondre. Mi famiri ben de fayafaya Lomsu. Wi ben e go na kerki ala wiki èn mi papa ben abi furu frantwortu na ini a kerki. Ma di mi ben abi pikinmoro 14 yari, wan sani pasa di meki mi si fa a kerki e hoigri.

Den Doisri ben teki Fransikondre abra na ini a Di Fu Tu Grontapufeti. Te a priester ben e preiki na ini kerki, a ben e gi wi deki-ati fu horibaka gi a regering fu a foto Vichy di ben e horibaka gi Doisrikondre. Wi no ben man bribi taki a priester ben e taki fu den sortu tori disi na ini kerki. Neleki furu sma na ini Fransikondre, wi ben e arki BBC radio kibrikibri. A radio station disi ben e gi nyunsu fu den kondre di ben e feti teige den Doisri. Di den legre disi bigin wini den Doisri na ini september 1944, a priester teki a sei baka fu den kondre disi èn a hori wan spesrutu konmakandra fu taki Gado tangi. Mi skreki di mi si a sani disi. Mi no ben e frutrow den kerki fesiman moro.

Syatu baka a feti, mi papa dede. Mi bigi sisa ben trow kaba èn a ben e libi na ini Belgia. Dati meki mi ben feni taki na mi ben abi a frantwortu fu sorgu gi mi mama. Mi feni wan bun wroko na ini wan bedrijf. Mi basi nanga den boi fu en ben de fayafaya Lomsu. Mi ben kan meki en na ini a bedrijf disi, ma heri esi mi ben o abi fu teki wan prenspari bosroiti.

 Mi sisa Simone, di ben tron wan Kotoigi, kon luku wi na ini 1953. A ben man sori wi na ini en Bijbel taki Lomsu Kerki e leri sma sani di no e kruderi nanga Bijbel. A sori wi taki hel no de, taki Gado, Yesus nanga a santa yeye no de a srefi sma, èn taki a sili man dede. Na ini a bigin, mi taigi en taki a no e gebroiki a Lomsu Bijbel, ma heri esi mi kon frustan taki den sani di a taigi mi tru. Bakaten a tyari wan tu owru Waktitoren gi mi di mi ben e leisi na ini mi kamra te neti. Wantewante mi si taki disi na a tru bribi. Ma mi ben frede taki efu mi ben o bigin dini Yehovah, mi ben o lasi mi wroko.

Wan tu mun langa mi srefi ben e studeri Bijbel èn mi ben e leisi den Waktitoren. Te fu kaba mi bosroiti fu go na wan Kownukondre zaal. A lobi di den brada nanga sisa fu a gemeente ben sori, naki mi ati. Baka di mi studeri Bijbel nanga wan lepi brada siksi mun langa, mi dopu na ini september 1954. Syatu baka dati mi ben breiti fu si taki mi mama nanga mi pikin sisa dopu tu.

WI FRUTROW TAPU YEHOVAH DI WI DU A PIONIERWROKO NANGA A KRINGWROKO

Mi ben kisi a grani fu go na a internationaal kongres fu 1958, di ben o hori na New York. Ma a sari taki mi mama dede wan tu wiki fosi a kongres hori. Di mi drai kon baka, mi no ben abi nowan sma moro fu sorgu. Dati meki mi libi a wroko fu mi èn mi bigin pionier. Na a ten dati, mi meki mofo fu trow nanga Danièle Delie, wan sisa di ben de wan fayafaya pionier. Wi trow na ini mei 1959.

Danièle bigin pionier na ini Brittany, wan boitipresi farawe fu en oso. A ben musu abi deki-ati fu kan preiki gi den sma drape di ben de Lomsu èn fu rèi en baisigri go na farawe presi. Neleki mi a ben e preiki fayafaya. Wi ala tu ben frustan taki a kaba de krosibei (Mat. 25:13). Fu di a no ben e denki ensrefi nomo, meki wi ben man tan pionier.

Wan tu dei baka di wi trow, wi ben musu du a kringwroko. Wi ben e go na gemeente pe den brada nanga sisa no ben abi furu èn wi ben fiti wisrefi na a situwâsi fu den. A fosi gemeente pe wi go ben abi 14 preikiman èn den brada nanga sisa no ben abi wan sribipresi gi wi. Dati meki wi sribi na tapu matrasi na tapu a podium fu a Kownukondre zaal. Wi no ben sribi so switi, ma a ben bun gi a baka!

Wi e go na den gemeente nanga a pikin wagi fu wi

Wi ben abi furu fu du èn wi ben musu go na difrenti presi, ma Danièle teki gwenti esi. Furu tron a ben musu wakti tapu mi na ini a wagi fu wi fu di sondro taki mi ben fruwakti, mi ben musu hori wan owruman konmakandra. Ma noiti a ben e krutukrutu. Wi du a kringwroko tu yari nomo. Na a ten dati wi leri o prenspari a de gi wan trowpaar fu taki krin nanga makandra èn fu wroko bun nanga makandra.​—Preik. 4:9.

WI KISI TRA GRANI

Na ini 1962 wi kisi a kari fu go na a di fu 37 klas fu Gileadskoro. A skoro disi ben hori na ini Brooklyn, New York èn a ben teki 10 mun langa. Fu den 100 studenti, 13 trowpaar ben de. Sobun, wi ben si en leki wan grani fu go makandra na a skoro. Mi man memre ete fa wi ben abi demakandra nanga brada soleki Frederick Franz, Ulysses Glass, nanga  Alexander H. Macmillan. Den brada disi ben abi wan tranga bribi èn den ben de stonfutu fu na organisâsi.

Wi breiti taki wi kan go na Gileadskoro makandra!

Di wi ben de na a skoro den brada gi wi deki-ati fu leri fu gebroiki wi ai bun. Son satra bakadina, te wi ben kaba nanga les, wi ben go luku wan tu presi na ini New York City. Wi ben sabi taki a munde fu en wi ben o abi fu skrifi san wi ben si. Furu tron wi ben kon na oso weriweri te satra neti, ma a Betel brada di ben tyari wi go luku den presi ben e poti aksi fu yepi wi fu memre prenspari sani di wi ben o kisi na a repetitie. Wan satra wi waka lontu a foto a heri bakadina. Wi go na wan presi pe sabiman e ondrosuku den stari. Drape wi leri san na a difrenti na mindri wan meteoor nanga wan meteoriet. Di wi go na wan museum (American Museum of Natural History) wi leri fu difrenti sortu kaiman. Di wi ben de baka na Betel, a brada di ben tyari wi go luku den presi aksi wi san na a difrenti na mindri wan meteoor nanga wan meteoriet? Fu di Danièle ben weri, a piki: „Wel, wan meteoriet abi moro langa tifi!”

Wi ben lobi go luku den brada nanga sisa na ini Afrika

Wi no ben fruwakti taki den ben o seni wi go na a bijkantoro fu Fransikondre. Wi dini drape moro leki 53 yari. Na ini 1976 den poti mi leki fesiman fu a Bijkantoro Komte. Mi kisi a grani tu fu go luku den brada nanga sisa na ini difrenti kondre fu Afrika nanga kondre na ini a kontren fu Israel pe lanti ben tapu a wroko fu wi noso pe wi no ben man preiki so fri. Na fu dati ede wi ben go na Gabon, soleki fa mi fruteri na ini a bigin. Fu taki en krin, a no ala ten mi ben feni taki mi ben o man tyari ala den frantwortu disi. Ma Danièle ben de wan bigi yepi gi mi èn dati meki mi ben man tyari iniwan frantwortu.

Mi e vertaal wan lezing fu Brada Theodore Jaracz na a „Retidu fu Gado” kongres na ini Parijs, 1988

WI KISI WAN BIGI TESI

Sensi a bigin wi ben lobi a libi na Betel. Danièle di ben leri taki Ingrisitongo na ini feifi mun fosi wi go na Gilead, ben kon tron wan bun vertaler. A wroko na Betel ben gi wi furu prisiri, ma wi ben abi furu prisiri tu te wi ben e go na wi gemeente. Mi man memre ete fa mi nanga Danièle ben e teki loko na ini Parijs fu go na oso te lati neti. Wi ben weri, ma wi ben breiti srefisrefi taki wi ben kan studeri Bijbel nanga sma di ben e meki muiti fu go na fesi. Ma a sari taki wantronso Danièle kon siki èn a no ben man du so furu moro.

Na ini 1993 datra kon si taki a ben abi kanker na en bobi. A ben musu du wan oparâsi èn a kisi chemo. Disi ben hebi gi en srefisrefi. Tinafeifi yari baka dati, a kisi kanker baka. A disi ben moro ogri srefi. Ma a ben lobi a vertaalwroko so te, taki a ben go na wroko solanga a ben e firi moro bun.

Aladi Danièle ben siki so, toku wi no ben prakseri fu gowe libi Betel. Ma a no makelek fu tan na Betel aladi yu siki, spesrutu efu tra sma no sabi o seryusu a siki fu yu de (Odo 14:13). Danièle ben pasa 75 yari, ma fu di a ben de wan moi frow èn fu di a ben lobi lafu, meki furu sma no ben man si taki a ben siki. A no ben lobi sidon sari. Na presi fu dati, a ben meki muiti fu yepi tra sma. A ben sabi taki a ben kan de wan bigi trowstu gi tra sma te a ben e  arki den problema fu den (Odo 17:17). Noiti Danièle du leki a sabi ala sani, ma a gebroiki en ondrofeni fu yepi furu sisa fu no frede kanker.

Wi no ben man du so furu moro èn dati no ben makelek gi wi. Di Danièle no ben man wroko heri dei moro, a ben e meki muiti fu yepi mi moro. A ben de wan bigi yepi gi mi, èn dati meki mi ben man tan dini leki fesiman fu a Bijkantoro Komte 37 yari langa. Fu eksempre, a ben gwenti sreka ala sani so taki wi ben kan nyan na ini wi kamra èn sidon pikinso nanga makandra ala dei.​—Odo 18:22.

„IBRI DEI ABI NOFO FU EN EIGI OGRI”

Danièle ben de wan sma di ben lobi prakseri den bun sani fu a libi èn a ben lobi a libi. Ma a kisi kanker a di fu dri leisi. Wi no ben sabi san fu du. A datrayepi di a ben e kisi ben swaki en so te, taki son leisi a no ben man waka. A ben hati mi srefisrefi fu si fa mi lobi wefi di ben de wan bun vertaler, no ben man taki bun.

Aladi wi no ben sabi san fu du, toku wi ben e tan begi. Wi ben de seiker taki Yehovah no ben o meki wi kisi tesi di hebi moro leki san wi man tyari (1 Kor. 10:13). Ala ten wi pruberi fu de nanga tangi gi a yepi di Yehovah ben gi wi nanga yepi fu en Wortu, den datra na Betel èn den brada nanga sisa.

Furu tron wi ben e aksi Yehovah fu gi wi a koni fu sabi sortu datrayepi wi ben musu teki. Wan leisi den datra no ben man yepi wi moro. A datra di ben e yepi Danièle 23 yari no ben sabi fu san ede a ben e flaw baka te a ben kisi chemo. A no ben sabi sortu tra dresi a ben kan gebroiki. Wi ben abi a firi leki nowan sma ben man yepi wi èn wi ben aksi wisrefi san ben o pasa. Ne wan tra datra taki dati a o yepi Danièle. Wi si taki Yehovah yepi wi nanga den broko-ede fu wi.

Wi leri fu no broko wi ede tumusi nanga san o pasa tamara. Yesus taki: „Ibri dei abi nofo fu en eigi ogri” (Mat. 6:34). Wi ben e poti prakseri na den bun sani fu a libi èn wi ben lobi meki grap fu son sani. Fu eksempre, di Danièle no ben kisi chemo tu mun langa, a taki nanga wan lafu fesi: „Yu sabi, noiti ete mi ben firi so bun”! (Odo 17:22) Aladi a ben abi furu pen, toku a ben lobi oefen den nyun Kownukondre singi nanga wan tranga sten.

Fu di Danièle ben lobi prakseri den bun sani fu a libi, meki dati yepi mi fu no broko mi ede tumusi nanga san mi no man du. Fu taki en leti, na ini den 57 yari di wi trow, a du difrenti sani gi mi. A no ben wani sori mi srefi fa fu baka eksi! Sobun, di a kon siki seryusu, mi ben musu leri fu wasi dotisani, fu wasi krosi èn fu bori. Mi broko wan tu grasi, ma toku mi ben prisiri fu du sani gi en. *

MI DE NANGA TANGI GI ALA DEN BUN DI YEHOVAH DU GI WI

Te mi e prakseri a libi fu mi, dan a no ben makelek gi wi di wi kon owru èn di mi wefi kon siki. Toku mi leri furu fu den sani di miti wi. A fosi sani, na taki noiti wi musu abi so furu sani fu du, taki wi no e meki ten gi wi trowpatna. Te wi yongu èn te wi abi furu krakti, dan wi musu gebroiki a ten dati fu sorgu bun gi den sma di wi lobi (Preik. 9:9). A di fu tu sani, na taki wi no musu broko wi ede tumusi nanga pikinpikin sani. Efu wi e du dati, dan wi no o man si den furu blesi di wi e kisi ala dei.​—Odo 15:15.

Te mi e prakseri a libi fu wi na ini a furuten diniwroko, dan mi e si krin taki Yehovah blesi wi moro leki san wi ben fruwakti. Mi e firi a srefi fasi leki a psalm skrifiman di ben taki: ’Yehovah du bun gi mi.’​—Ps. 116:7.

^ paragraaf 32 Sisa Danièle Bockaert dede na a ten di wi ben e skrifi na artikel disi. A ben abi 78 yari.