Go na content

Go na a tra menu

Go na table of contents

Yehovah Kotoigi

Sranantongo

Studie-Waktitoren  |  december 2017

Papa nanga mama​—Yepi yu pikin fu kon ’koni, so taki den kan kisi frulusu’

Papa nanga mama​—Yepi yu pikin fu kon ’koni, so taki den kan kisi frulusu’

„Sensi di yu ben de wan beibi, yu kon leri den sani di skrifi na ini den Santa Buku di kan meki yu kon koni, so taki yu kan kisi frulusu.”​—2 TIM. 3:15.

SINGI: 141, 134

1, 2. Fu san ede son papa nanga mama e broko den ede te den pikin fu den wani gi densrefi abra na Yehovah èn teki dopu?

IBRI yari, dusundusun sma di e studeri Bijbel e gi densrefi abra na Yehovah èn den e teki dopu. Furu fu den na yongusma di kweki na ini a tru anbegi èn den bosroiti fu gebroiki den libi na a moro bun fasi (Ps. 1:1-3). Efu yu na wan Kresten papa noso mama, dan a no de fu taki dati yu o breiti te yu manpikin noso umapikin e dopu.​—Luku 3 Yohanes 4.

2 Ma kande yu e broko yu ede nanga wan tu sani. Kande yu si taki son yonguwan e dopu, ma bakaten den e bigin tweifri efu a e tyari wini kon gi den fu hori densrefi na den wet fu Gado. Wan tu fu den drai baka srefi gi a tru anbegi. Sobun, kande yu e frede taki yu pikin o bigin dini Yehovah, ma taki a o lasi a lobi di a ben abi gi a tru anbegi biginbigin. Den kan tron leki den brada nanga sisa na ini a gemeente Efeise fu a fosi yarihondro. Yesus ben taki fu den: „Yu lasi a lobi di yu  ben abi biginbigin” (Openb. 2:4). Fa yu kan yepi yu pikin fu tan lobi Yehovah èn fu „gro èn kisi frulusu”? (1 Petr. 2:2) Wi kan leri fu na eksempre fu Timoteyus.

„YU KON LERI DEN SANI DI SKRIFI NA INI DEN SANTA BUKU”

3. (a) Fa Timoteyus tron wan Kresten èn fa a fiti den sani di a leri? (b) San na den dri sani di Timoteyus ben musu du?

3 Na ini a yari 47 na apostel Paulus go na a foto Listra fu a fosi leisi. A kan taki na a ten dati Timoteyus di ben de wan yongu boi, kon leri sabi den leri fu Yesus. A fiti den sani di a ben leri èn tu yari baka dati a bigin du zendeling-wroko makandra nanga Paulus. Sowan 16 yari baka dati, Paulus ben taigi Timoteyus na ini wan brifi: „Yu musu tan du den sani di yu leri èn di yu e bribi, fu di sma sori yu krin taki den de so, bika yu sabi fu suma yu leri den. Yu sabi tu taki sensi di yu ben de wan beibi, yu kon leri den sani di skrifi na ini den Santa Buku [den Hebrew Buku fu Bijbel] di kan meki yu kon koni, so taki yu kan kisi frulusu fu di yu e bribi na ini Krestes Yesus” (2 Tim. 3:14, 15). Luku taki Paulus e taigi en fu (1) leri den sani di skrifi na ini den Santa Buku, (2) fu bribi den sani di sma sori en krin, èn (3) fu kon koni, so taki a ben kan kisi frulusu fu di a e bribi na ini Krestes Yesus.

4. Sortu sani yu gebroiki fu gi den yongu pikin fu yu leri? (Luku a prenki na a bigin fu na artikel.)

4 Leki Kresten papa noso mama, yu wani taki yu pikin sabi den Santa Buku, di wi sabi now leki den Hebrew Buku nanga den Griki Buku fu Bijbel. Srefi yongu pikin kan leri sani fu den sma na ini Bijbel èn fu den tori na ini. Yehovah en organisâsi gi wi furu buku, brochure nanga felem di wi kan gebroiki fu gi den pikin fu wi leri. Sortuwan fu den sani disi yu abi na ini a tongo fu yu? No frigiti taki yu pikin musu sabi san skrifi na ini Bijbel, fu man tron wan mati fu Yehovah.

BRIBI DEN SANI DI SMA SORI YU KRIN

5. (a) Sortu overtoigi Timoteyus ben kon abi? (b) Fa wi du sabi taki Timoteyus ben kon abi na overtoigi taki den sani di a ben leri fu Yesus tru?

5 A no nofo fu gi yu pikin leri fu sma na ini Bijbel èn fu sani di pasa na ini Bijbel ten. Hori na prakseri taki Timoteyus ben kon abi ’bribi fu di sma ben sori en krin’ taki den sani di a e leri tru. Den Griki wortu di Paulus gebroiki dyaso wani taki „fu kon de seiker” noso „fu kon abi na overtoigi” taki wan sani tru. Sensi di Timoteyus ben de wan yonguyongu pikin a ben sabi den Hebrew Buku fu Bijbel. Ma te fu kaba a kon abi na overtoigi taki Yesus ben de a Mesias. Fu taki en leti, a bribi fu Timoteyus ben tranga so te taki a tron wan dopu disipel èn a go du zendeling-wroko makandra nanga Paulus.

6. Fa yu kan yepi yu pikin fu kon abi na overtoigi taki den sani di den leri tru?

6 Fa yu kan yepi yu pikin fu kon de leki Timoteyus di ben abi na overtoigi taki den sani di a ben e leri ben tru? Na a fosi presi yu musu abi pasensi. A e teki ten fu yepi yu pikin fu kon abi wan tranga bribi. Yu no musu denki taki yu pikin o bribi wan sani, soso fu di yu e bribi a sani dati. Ibri pikin musu gebroiki en eigi „frustan” fu tranga a bribi di a abi na ini den tru tori fu Bijbel. (Leisi Romesma 12:1.) Yu leki papa noso mama kan du furu fu yepi yu pikin fu kon abi wan tranga bribi, spesrutu te den e poti aksi gi yu. Meki wi go luku wan eksempre.

7, 8. (a) Fa wan Kresten papa sori taki a abi pasensi te a e gi en umapikin leri? (b) Oiti yu ben musu abi pasensi nanga a pikin fu yu?

 7 Thomas, wan papa di abi wan meisje fu 11 yari, e fruteri: „Son leisi mi meisje e aksi mi sani soleki: ’A de so taki Yehovah meki den sani na grontapu nanga yepi fu evolutie?’, noso ’Fu san ede wi no e teki prati na sani di kan tyari kenki kon na ini a libimakandra? Fu eksempre, fu san ede wi no e stem?’ Son leisi mi musu hori misrefi fu no taigi en san a musu bribi.” Thomas sabi taki son leisi a e teki ten fu overtoigi wan sma fu wan sani.

8 Thomas sabi tu taki a musu abi pasensi fu man gi en umapikin leri. Fu taki en leti, ala Kresten musu abi pasensi (Kol. 3:12). Thomas e frustan taki a o abi fu taki difrenti leisi fu wan tori nanga en umapikin. A musu gebroiki Bijbel te a e taki nanga en, so taki a kan bribi den sani di a e leri. Thomas e taki: „Spesrutu te a abi fu du nanga prenspari tori, dan mi nanga mi wefi wani sabi efu na umapikin fu wi e bribi san a e leri èn efu a e frustan den sani dati. Te a e poti aksi gi wi, dan dati bun. Fu taki en leti, wi ben o broko wi ede efu a ben de gaw fu bribi ala sani di wi e taigi en.”

9. Fa yu kan yepi yu pikin fu poti bribi na ini Gado Wortu?

9 Te papa nanga mama abi pasensi nanga den pikin, dan te fu kaba den pikin o bigin frustan „a bradi nanga a langa nanga a hei nanga a dipi” fu a tru bribi (Ef. 3:18). Wi musu hori a yari fu den pikin na prakseri te wi e gi den leri èn wi musu leri den sani di den man frustan. O moro den e bribi den sani di den e leri, o moro den o man opo taki gi a bribi fu den te tra sma noso pikin na skoro e poti aksi gi den (1 Petr. 3:15). Fu eksempre, den pikin fu yu man fruklari nanga yepi fu Bijbel san e pasa nanga wan sma di dede? Den e frustan san Bijbel e leri fu a tori disi? * Iya, yu musu abi pasensi fu yepi yu pikin fu poti bribi na ini Bijbel, ma a muiti di yu e du no o de fu soso.​—Deut. 6:6, 7.

10. San na wan prenspari sani di yu musu hori na prakseri te yu e gi a pikin fu yu leri?

10 A no de fu taki dati te yu wani yepi yu pikin fu abi wan tranga bribi, dan a prenspari taki yu de wan bun eksempre gi den. Stephanie, wan mama di abi dri umapikin, e taki: „Den pikin fu mi ben de yonguyongu ete, di mi bigin aksi misrefi den sani disi: ’Mi e fruteri den pikin fu mi fu san ede mi e bribi na ini Yehovah, fu san ede mi e bribi taki a lobi mi, èn fu san ede mi e bribi taki den sani di a e aksi fu mi na bun sani? Den pikin fu mi man si krin taki mi lobi Yehovah?’ Mi no kan fruwakti taki den pikin fu mi e bribi san mi e leri den, te misrefi no e bribi den.”

’KON KONI SO TAKI YU KAN KISI FRULUSU’

11, 12. O ten wi kan taki dati wan sma koni? Fu san ede wi kan taki dati a no soso a yari fu wan sma e sori taki a lepi?

11 Soleki fa wi si, dan Timoteyus ben (1) sabi Gado Wortu èn (2) a ben de seiker fu den sani di a ben bribi. Ma san Paulus ben abi na prakseri di a taigi Timoteyus taki den sani na ini den Santa Buku ben o yepi en fu ’kon koni so taki a kisi frulusu’?

12 A buku Inzicht in de Schrift, Deel 2,  e sori taki wan sma di abi koni sabi fa fu gebroiki den sani di a leri fu lusu problema, fu wai pasi gi ogri, fu du den sani di a abi na prakseri, noso fu gi trawan rai fa fu du den sani disi. A de krin taki so wan sma no e teki don bosroiti. Bijbel e taki dati „don de na ini na ati fu wan boi” (Odo 22:15). Fu di wan sma di koni no e du don, meki a de wan lepi sma. A no a yari fu wan sma e meki taki a e kon lepi. Wan sma e tron wan lepi sma fu di a e lespeki Yehovah èn fu di a wani gi yesi na en.​—Leisi Psalm 111:10.

13. Fa wan yongusma kan sori taki a abi a koni di o yepi en fu kisi frulusu?

13 Wan yonguwan di de wan lepi sma, no „de leki wan boto di skwala nanga winti e naki go na ala sei” (Ef. 4:14). Dati meki a no e meki den firi fu en basi en èn a e kakafutu gi yonguwan di e dwengi en fu du sani di no fiti. So wan yonguwan leri fu ’gebroiki en frustan fu man si sani krin, so taki a kan sabi san bun èn san no bun’ (Hebr. 5:14). A e teki koni bosroiti awinsi en papa nanga mama, noso tra bigisma no de makandra nanga en (Fil. 2:12). Na a koni dati wi musu abi efu wi wani kisi frulusu. (Leisi Odo 24:14.) Fa yu kan yepi yu pikin fu kon abi a koni dati? Yu musu sori den krin taki yu e hori yusrefi na den leri fu Bijbel. Den musu man si na den sani di yu e taki èn e du, taki yu e meki muiti fu hori yusrefi na den sani di yu leri fu Bijbel.​—Rom. 2:21-23.

Fu san ede papa nanga mama musu tan meki muiti fu yepi den pikin fu den? (Luku paragraaf 14-18)

14, 15. (a) Na sortu sani wan yonguwan musu poti prakseri te a wani dopu? (b) Fa yu kan yepi yu pikin fu poti prakseri na den blesi di den o kisi te den e hori densrefi na den wet fu Gado?

14 Ma efu yu wani yepi den pikin fu yu fu kon abi bribi, dan yu no musu taigi den nomo san bun èn san no bun. A bun te yu e yepi den fu poti prakseri na aksi soleki: ’Fu san ede Bijbel e leri wi fu no du sani di e wiki sondu lostu? Fu san ede mi e bribi taki ala ten den wet fu Bijbel na fu mi eigi bun?’​—Yes. 48:17, 18.

15 Efu yu pikin wani dopu, dan yepi en  fu poti seryusu prakseri na den frantwortu di o kon na en tapu te a dopu. Fa a e si den sani dati? A sabi san na den wini? Sortu tesi a o kisi? Fu san ede den wini betre moro den tesi? (Mark. 10:29, 30) A prenspari taki a prakseri den sani disi bun fosi a teki dopu. Yepi yu pikin fu prakseri den blesi di a o kisi te a e gi yesi, èn den takru bakapisi di a o kisi te a trangayesi. Na so a o moro makriki gi en fu bribi taki a e tyari wini kon gi en ala ten te a e hori ensrefi na den wet fu Bijbel.​—Deut. 30:19, 20.

TE WAN YONGUWAN DI DOPU E BIGIN TWEIFRI

16. San papa nanga mama musu du te den pikin fu den di dopu kaba e bigin tweifri?

16 Ma san yu musu du te yu manpikin noso yu umapikin di dopu kaba e bigin tweifri fu sani? Kande den sani fu grontapu e bigin hari a pikin fu yu. Noso kande a e bigin tweifri efu a o tyari wini kon gi en te a e hori ensrefi na den wet fu Bijbel (Ps. 73:1-3, 12, 13). Yu leki papa noso mama musu luku bun fa yu e yepi yu pikin nanga den tori disi, fu di dati kan meki taki a pikin kon lobi a bribi noso taki a e drai baka gi en. Awinsi a pikin yongu ete noso awinsi a kon bigi kaba, pruberi fu no haritaki nanga en fu a tori disi. Na presi fu dati, yu musu sori yu pikin taki yu lobi en èn taki yu wani yepi en.

17, 18. Fa papa nanga mama kan yepi wan pikin di e tweifri fu a bribi fu en?

17 A no de fu taki dati wan yonguwan di dopu, gi ensrefi abra na Yehovah. Disi wani taki dati a pramisi Gado taki a o lobi en èn taki a o poti a wani fu en na a fosi presi na ini en libi. (Leisi Markus 12:30.) Yehovah e si a pramisi disi leki wan seryusu sani èn na so wi musu si en tu (Preik. 5:4, 5). A bun fu memre yu pikin na a sani disi na wan ten di fiti èn du dati na wan switi fasi. Ma fosi yu du dati, leisi èn studeri den artikel noso tra sani di Yehovah organisâsi sreka fu yepi papa nanga mama. Na so yu o sabi moro bun fa fu sori yu pikin taki a bosroiti di a teki fu gi ensrefi abra na Yehovah èn fu teki dopu, na wan seryusu bosroiti. A pikin musu kon frustan taki a bosroiti disi o tyari blesi kon gi en.

18 Yu kan feni bun rai na a pisi di nen „Vragen van ouders” na ini na appendix fu a buku Wat jonge mensen vragen​Praktische antwoorden, Deel 1. Drape skrifi: „No de gaw fu denki taki a pikin fu yu drai baka gi a bribi fu yu. Nofo tron a de so taki wan tra sani e meki taki a e tweifri.” Kande tra yonguwan e dwengi en fu du son sani, noso kande a feni taki a no abi mati, noso taki a no e go na fesi leki tra yonguwan. Na appendix e sori tu taki disi no wani taki dati a pikin no e bribi den sani di a e leri. Nofo tron wan pikin e bigin tweifri fu di wan tra sani e trobi en. Na appendix e gi papa nanga mama rai fa den kan yepi wan pikin di e tweifri fu a bribi fu en.

19. Fa papa nanga mama kan yepi den pikin fu ’kon koni so taki den kisi frulusu’?

19 Yu leki papa noso mama abi a frantwortu nanga a grani fu kweki yu pikin „nanga a leri èn nanga den rai fu Yehovah” (Ef. 6:4). Soleki fa wi si, dan a no nofo fu leri den pikin nomo san Bijbel e taki, ma wi musu yepi den tu fu bribi den sani di den e leri. Iya, te den bribi tranga, dan dati o meki taki den o gi densrefi abra na Yehovah èn den o dini en nanga den heri ati. Meki a Wortu fu Yehovah, a yeye fu en, nanga a muiti di yu e du, yepi yu pikin fu ’kon koni so taki den kisi frulusu’.

^ paragraaf 9 Wi kan gebroiki den werkbladen gi a buku „San Bijbel e leri wi trutru?fu yepi yongusma nanga bigisma fu kon frustan èn fu fruklari den tru tori fu Bijbel. Wi kan feni den na tapu jw.org na ini difrenti tongo. Go na jw.org/nl, klik tapu WAT DE BIJBEL LEERT > BIJBELCURSUS.