Go na content

Go na a tra menu

Go na table of contents

Yehovah Kotoigi

Sranantongo

Studie-Waktitoren  |  december 2017

Gado o gi sma wan opobaka

Gado o gi sma wan opobaka

„A lasti Adam tron wan yeye di e gi libi.”​—1 KOR. 15:45.

SINGI: 151, 147

1-3. (a) Sortu leri wi musu si leki den moro prenspariwan fu a bribi fu wi? (b) Fu san ede na opobaka prenspari so? (Luku a prenki na a bigin fu na artikel.)

EFU wan sma ben o aksi yu san na den moro prenspari leri fu a bribi fu wi, dan san yu ben o piki? A no de fu taki dati yu ben o sori a sma krin taki Yehovah na a Mekiman èn taki na en gi wi libi. Kande yu ben o fruteri en tu taki yu e bribi na ini Yesus Krestes, di gi en libi leki lusu-paiman gi wi. Yu ben o breiti tu fu fruteri en taki grontapu o tron wan paradijs pe a pipel fu Gado o libi fu têgo. Ma yu ben o taki dati a leri fu na opobaka na wan fu den moro prenspari leri gi yu?

2 Wi abi bun reide fu si a leri fu na opobaka leki wan fu den moro prenspariwan, awansi wi abi a howpu fu pasa a bigi banawtu libilibi èn fu libi fu têgo na grontapu. Na apostel Paulus ben sori fu san ede na opobaka prenspari so: „Efu a tru taki den dede sma no sa opo baka, dan Krestes no opo baka tu.” Efu Yesus no ben kisi wan opobaka, dan a no ben o tiri leki wi Kownu now èn na fu soso wi ben o gi sma leri fu a tiri fu en. (Leisi 1 Korentesma 15:12-19.) Ma wi sabi taki Yesus ben kisi wan opobaka. Fu di wi e bribi dati, meki wi de tra fasi leki den Saduseiman di ben e weigri fu bribi taki den dedewan o kisi wan opobaka. Awansi sma e spotu wi, toku wi e tan bribi na ini na opobaka.​—Mark. 12:18; Tori 4:2, 3; 17:32; 23:6-8.

 3 Paulus ben taki dati a leri fu na „opobaka” na wan fu den „fosi sani” di wi leri fu Krestes (Hebr. 6:1, 2). Èn Paulus ben sori krin taki a ben e bribi na ini na opobaka (Tori 24:10, 15, 24, 25). Ma aladi Bijbel e sori taki na opobaka na wan fu den „moro makriki sani fu den santa boskopu fu Gado”, toku dati no wani taki dati a leri disi no prenspari (Hebr. 5:12). Fu san ede?

4. Sortu sani wan sma ben kan aksi wi fu na opobaka?

4 Te sma e bigin studeri Bijbel, dan furu fu den e leisi fu den sma di ben kisi wan opobaka na ini a ten di pasa. Wan fu den sma dati ben de Lasarus. Boiti dati, den e leri taki Abraham, Yob, Danièl, nanga tra anbegiman fu Gado ben abi a frutrow taki na ini a ten di e kon, den dedewan ben o libi baka. Ma san yu ben o taki efu wan sma aksi yu fu sori en na ini Bijbel fu san ede wi kan bribi taki sma o kisi wan opobaka, aladi Bijbel ben pramisi dati hondrohondro yari na fesi? Bijbel e sori krin o ten na opobaka o pasa? Den sani dati abi krakti tapu a bribi fu wi, sobun, meki wi go luku san Bijbel e taki.

WAN OPOBAKA DI BEN O PASA BAKA HONDROHONDRO YARI

5. San wi o luku fosi?

5 Kande a makriki gi wi fu frustan taki wan sma di no dede so langa ete o kisi wan opobaka (Yoh. 11:11; Tori 20:9, 10). Ma fa yu e denki fu a pramisi di skrifi na ini Bijbel hondrohondro yari pasa taki sma o kisi wan opobaka na ini a ten di e kon? Yu e bribi taki sma di dede langa ten pasa noso sma di e dede now sa kisi wan opobaka trutru na ini a ten di e kon? Te yu luku en bun, wan sma ben kisi wan opobaka hondrohondro yari baka di Bijbel ben taki dati disi ben o pasa, èn yu e bribi a tori dati. Sortu opobaka na dati? Èn san disi abi fu du nanga a howpu di wi abi taki sma o kisi wan opobaka na ini a ten di e kon?

6. San Psalm 118 abi fu du nanga Yesus?

6 Wi o poti prakseri now na wan opobaka di pasa hondrohondro yari baka di Bijbel ben taki fu en. Psalm 118, di kande David ben skrifi, e taki: „Ke Yehovah, wi e begi yu, frulusu wi! . . . Blesi fu a sma di e kon na ini a nen fu Yehovah.” Kande yu sabi ete taki sma ben taki den srefi wortu disi di abi fu du nanga a Mesias. Dati ben de tapu 9 Nisan, di Yesus rèi go na ini Yerusalem tapu wan buriki, syatu fosi den kiri en (Ps. 118:25, 26; Mat. 21:7-9). Ma fa Psalm 118 sori taki wan opobaka ben o pasa baka omeni yari? Luku sortu tra sani a psalm disi e taki: „A ston di den bowman no ben wani, na dati tron a moro prenspari ukuston.”​—Ps. 118:22.

Den „bowman no ben wani” si Yesus leki a Mesias (Luku paragraaf 7)

7. Fa den Dyu sori taki den no ben wani poti bribi na ini Yesus?

7 „Den bowman”, noso den Dyu fesiman, ben weigri fu poti bribi na ini a Mesias. Ma a no ben de so nomo taki den ben drai baka gi Yesus noso taki den ben weigri fu si en leki a Krestes. Furu Dyu ben de nomonomo taki a ben musu dede (Luk. 23:18-23). Iya, den e tyari frantwortu tu gi a dede fu Yesus.

Yesus kisi wan opobaka leki „a moro prenspari ukuston” (Luku paragraaf 8, 9)

8. Fa Yesus ben man tron „a moro prenspari ukuston”?

8 Efu a de so taki sma no ben poti bribi na ini Yesus èn taki den kiri en, dan fa a ben man tron „a moro prenspari ukuston”? Dati ben kan pasa soso te a ben kisi wan opobaka. Yesus tyari dati kon na krin di a fruteri a tori fu wan man di ben abi wan droifidyari. A man disi ben seni boskopuman go na den gronman di ben e wroko gi en. Den gronman dati du ogri nanga den boskopuman disi, neleki fa den Israelsma ben du ogri nanga den  profeiti di Gado ben seni go na den. Na agersitori e taki dati te fu kaba a man seni en lobi manpikin gi den gronman. A manpikin disi ben o kisi ala den gudu fu en. Den gronman gi yesi na a manpikin? Kwetikweti. Den gronman kiri en. Baka di Yesus fruteri na agersitori disi, dan a gebroiki den wortu di skrifi na Psalm 118:22 (Luk. 20:9-17). Na apostel Petrus ben gebroiki a srefi vers dati di a ben e taki nanga ’den tiriman fu den Dyu, den owru man, nanga den leriman fu Wèt di ben kon makandra na ini Yerusalem’. Petrus taki fu ’Yesus Krestes fu Nasaret di den ben spikri na wan postu, ma di Gado gi wan opobaka’. Baka dati, Petrus taki krin: „[Yesus] na ’a ston di unu leki bowman si leki wan soso sani, ma a tron a moro prenspari ukuston.’”​—Tori 3:15; 4:5-11; 1 Petr. 2:5-7.

9. Fu sortu prenspari sani Psalm 118:22 e taki?

9 Iya, hondrohondro yari na fesi, a profeititori di skrifi na Psalm 118:22 ben sori taki wan opobaka ben o pasa. Sma ben o weigri fu poti bribi na ini a Mesias èn den ben o kiri en. Ma a ben o kisi wan opobaka fu tron a moro prenspari ukuston. Na so a Manpikin disi di kisi wan opobaka tron a wan-enkri sma „di sa meki wi kisi frulusu”.​—Tori 4:12; Ef. 1:20.

10. (a) San ben o pasa, soleki fa Psalm 16:10 e sori? (b) Fu san ede wi kan de seiker taki Psalm 16:10 no abi fu du nanga David?

10 Luku wan tra vers di ben e sori taki wan opobaka ben o pasa. A ben skrifi moro leki wan dusun yari na fesi èn a sani disi musu gi yu a frutrow taki wan opobaka kan pasa langa ten baka di Bijbel ben pramisi dati. Na ini Psalm 16 di David skrifi, wi e leisi: „Yu no o libi mi na ini Grebi. Yu no o meki a sma di tai hori na yu, tan na ini a grebi-olo” (Ps. 16:10). David no ben taki dati ensrefi no ben o dede noiti. Gado Wortu e sori krin taki David kon owru. Baka di a dede, „den beri en na ini a Foto fu David” (1 Kow. 2:1, 10). Sobun, fu suma Psalm 16:10 e taki?

11. O ten Petrus taki fu Psalm 16:10?

11 Moro leki wán dusun yari baka di David skrifi den wortu dati, Petrus tyari kon na krin fu suma Psalm 16:10 e taki. Wan tu wiki baka di Yesus dede èn a kisi wan opobaka, dan Petrus taki nanga dusundusun Dyu èn nanga sma di ben teki a Dyu bribi. (Leisi Tori fu den apostel 2:29-32.) A taigi den taki David ben dede trutru èn taki den ben beri en. Den sma di ben arki Petrus ben sabi dati. Èn Bijbel no e taki dati den no ben agri nanga Petrus di a taki dati David „ben sabi kaba taki a Krestes ben o kisi wan opobaka”.

12. Fa Psalm 16:10 kon tru, èn fa a e yepi wi fu poti bribi na ini na opobaka?

12 Petrus e gebroiki sosrefi den wortu di David ben taki na Psalm 110:1. (Leisi Tori fu den apostel 2:33-36.) Fu di Petrus ben e fruklari sani nanga yepi fu Bijbel, meki a ben man overtoigi a pipel taki Yesus ben tron „Masra nanga Krestes”. Ma san moro prenspari, na taki den sma ben agri taki Psalm 16:10 kon tru di Yesus kisi wan opobaka. Bakaten, na apostel Paulus ben taki den srefi sani di a ben taki nanga Dyu na ini a foto Antiokia na ini Pisidia. Den sani di a taki ben naki den ati èn den ben wani yere moro. (Leisi Tori fu den apostel 13:32-37, 42.) A moi fu si taki wi kan frutrow den Bijbel profeititori di e taki fu wan opobaka, aladi den kon tru baka hondrohondro yari.

O TEN NA OPOBAKA O PASA?

13. Sortu sani wi ben kan aksi wisrefi fu na opobaka?

13 A de wan deki-ati gi wi taki sma kan kisi wan opobaka hondrohondro yari  baka di Bijbel ben taki dati a sani disi ben o pasa. Toku wan sma ben kan aksi ensrefi: ’A sani disi wani taki dati mi o abi fu wakti wan langa ten fu man si a lobiwan fu mi baka? O ten a sma di mi wani si baka o kisi wan opobaka?’ We, Yesus ben taigi den apostel fu en taki wan tu sani ben de di den no ben sabi èn di den no ben kan sabi. Èn wi no kan sabi ala sani fu „a ten noso den spesrutu dei”, fu di „a Tata wawan abi a reti fu bosroiti o ten dati sa de” (Tori 1:6, 7; Yoh. 16:12). Ma toku wi sabi pikinso o ten na opobaka o pasa.

14. Fa na opobaka fu Yesus ben de tra fasi leki den wan di ben pasa fosi en?

14 A moro prenspari opobaka na ini Bijbel, na a opobaka fu Yesus. Efu Yesus no ben kisi wan opobaka, dan nowan fu wi ben o abi a howpu fu si den dede lobiwan fu wi baka. Fosi Yesus ben kisi wan opobaka, Elia nanga Elisa ben gi sma wan opobaka tu, ma den sma dati no libi fu têgo. Den dede baka èn den tron doti na ini a grebi. Ma tra fasi leki den, Yesus „kisi wan opobaka, [èn] a no sa dede moro. Dede no man basi en moro”. Na ini hemel a e libi „fu têgo, iya, fu ala ten”.​—Rom. 6:9; Openb. 1:5, 18; Kol. 1:18; 1 Petr. 3:18.

15. Fu san ede Bijbel e taki dati Yesus na „a fosiwan di kisi wan opobaka”?

15 Yesus ben de a fosi sma di kisi wan opobaka leki wan yeye èn di opo go na hemel. Na opobaka dati ben de a moro prenspariwan tu (Tori 26:23). Ma Yesus a no a wan-enkri sma di o kisi wan opobaka fu go libi leki wan yeye na hemel. Yesus ben pramisi den reti-ati apostel fu en taki den ben o tiri makandra nanga en na ini hemel (Luk. 22:28-30). Ma den ben o abi fu dede fosi, fu man kisi a blesi disi. Bakaten, den ben o kisi wan opobaka leki yeye, neleki fa dati ben pasa nanga Yesus. Paulus ben skrifi taki „Krestes kisi wan opobaka trutru. Fu den wan di dede en na a fosiwan di kisi wan opobaka.” Paulus sori moro fara taki tra sma ben o kisi wan opobaka tu fu libi na ini hemel. A taki: „Ibri sma o kisi wan opobaka te en ten doro. Krestes kisi wan opobaka leki fosiwan, èn bakaten den wan di de fu Krestes o kisi wan opobaka te a kon baka.”​1 Kor. 15:20, 23.

16. Fa wi kan sabi o ten na opobaka o pasa na hemel?

16 Den sani di Paulus taki e yepi wi fu kon si o ten na opobaka ben o pasa na hemel. A ben o pasa na a ten „te [Yesus] kon baka”. Langa ten kaba Yehovah Kotoigi e sori sma nanga yepi fu Bijbel taki a ten „te a kon baka” bigin na ini 1914 èn taki a kaba fu na ogri sistema disi de krosibei.

17, 18. San o pasa nanga den salfuwan di o de na libi ete na a ten te „Masra kon”?

 17 Bijbel e taki moro fara fu den wan di o kisi wan opobaka na hemel: „Wi wani taki un musu sabi tu san o pasa nanga den wan di dede kaba . . . Efu wi e bribi taki Yesus dede èn taki a opo baka, dan wi kan bribi tu taki Gado o gi libi na den wan di dede . . . Wi di o de na libi ete te Masra kon, no o kisi wan opobaka kwetikweti fosi den wan di dede kaba. Bika Masra srefi o saka komoto fu hemel. A o gi komando . . . dan den bakaman fu Krestes di dede kaba, o de den fosiwan di o opo baka. Baka dati, wi di de na libi ete, o opo go na ini den wolku fu de nanga den wan dati èn fu miti Masra na loktu. Na so fasi wi o de ala ten nanga Masra.”​—1 Tes. 4:13-17.

18 Den salfuwan ben o kisi wan opobaka na hemel, wan pisi ten baka di „Masra kon”. Ma den salfuwan di o de na libi ete na a ten fu a bigi banawtu, o „opo go na ini den wolku”. Den sma disi „no o dede” fu langa. Den „alamala o kenki na ini wan momenti, fosi yu pingi yu ai, te a lasti trompeti o bari”.​—1 Kor. 15:51, 52; Mat. 24:31.

19. San na „wan moro betre opobaka” di o pasa na ini a ten di e kon?

19 Na ini a ten disi, furu reti-ati Kresten no salfu èn den no abi a howpu fu go dini na ini hemel makandra nanga Krestes. Na presi fu dati, den e wakti „a dei fu Yehovah” te na ogri sistema disi o kon na wan kaba. Nowan sma kan sabi soifri o ten a kaba dati o kon, ma buweisi e sori taki a dei dati de krosibei (1 Tes. 5:1-3). Baka dati, wan tra sortu opobaka o pasa. Sma o kisi wan opobaka fu libi na grontapu di tron wan paradijs. Den wan di kisi wan opobaka o abi a howpu fu tron sma di no abi sondu moro èn den no o abi fu dede baka. A no de fu taki dati na opobaka dati o de „wan moro betre opobaka” leki den wan fu den sma di kon na libi baka na ini owruten, ma di dede baka te fu kaba.​—Hebr. 11:35.

20. Fu san ede wi kan abi a frutrow taki sma o kisi wan opobaka na wan orga fasi?

20 Bijbel e taki dati ibriwan fu den sma di o go na hemel o kisi wan opobaka „te en ten doro” (1 Kor. 15:23). Wi kan abi a frutrow taki sani o waka na wan orga fasi tu te sma o kisi wan opobaka na grontapu. A sani disi kan meki taki wi e aksi wisrefi: ’Den sma di dede no so langa pasa o kisi wan opobaka na a bigin fu a Dusun Yari Tiri fu Krestes, so taki den wan di sabi den kan gi den wan switikon? A de so taki reti-ati man fu owruten di ben de bun tiriman o kisi wan opobaka fruku fu kan yepi orga a pipel fu Gado na ini a nyun grontapu? Fa a de nanga sma di noiti ben dini Yehovah? O ten den o kisi wan opobaka, èn pe dati o pasa?’ Someni sani de di wi kan aksi wisrefi. Ma a de fanowdu taki wi e broko wi ede nanga den sani dati now? A no moro bun taki wi e wakti fu si san o pasa? Wi kan abi a frutrow taki a o span fu si nanga wi eigi ai fa Yehovah e seti den tori dati.

21. Sortu howpu yu abi?

21 Teleki a ten dati doro, wi musu tranga a bribi di wi abi na ini Yehovah. Gado meki Yesus pramisi wi taki a o memre den dedewan èn taki den o kisi wan opobaka (Yoh. 5:28, 29; 11:23). Fu di Yesus ben wani gi libisma moro buweisi taki Yehovah o wiki den dedewan, meki a taki disi fu Abraham, Isak, nanga Yakob: „Gi [Gado] den alamala e libi” (Luk. 20:37, 38). A de krin taki wi abi nofo reide fu taki a srefi sani di na apostel Paulus ben taki: „Mi abi a howpu taki Gado sa gi [sma] wan opobaka.”​—Tori 24:15.