Go na content

Go na a tra menu

Go na table of contents

Yehovah Kotoigi

Sranantongo

Studie-Waktitoren  |  december 2017

A de so taki Yakob ben tron wan afo fu a Mesias fu di a ben bai a reti fu a fosi manpikin puru na Esau anu?

Aksi fu leisiman

Aksi fu leisiman

A de so taki na ini Bijbel ten, soso den fosi manpikin ben kan tron afo fu a Mesias?

Son leisi wi skrifi sani di ben e meki a gersi leki na so a ben musu de. A ben gersi leki a sani dati ben e kruderi nanga san skrifi na Hebrewsma 12:16. A vers dati e taki dati Esau ’no ben e warderi santa sani’ èn taki a „gi en reti leki fosi pikin na [Yakob], soso fu kan kisi wán preti nyanyan”. Te wi ben e luku a tekst dati dan a ben gersi leki na di Yakob kisi a „reti leki fosi pikin”, dan dati meki taki a tron wan afo fu a Mesias.​—Mat. 1:2, 16; Luk. 3:23, 34.

Ma te wi e luku den Bijbel tori, dan wi e si taki wan man no ben abi fu de a fosi manpikin fu man tron wan afo fu a Mesias. Luku wan tu buweisi:

Yakob (Israel) en fosi manpikin ben de Ruben, di a ben kisi nanga Lea. Bakaten, Yosef ben de a fosi manpikin di Yakob kisi nanga en lobi wefi Rakel. Di Ruben ben tyari ensrefi na wan fasi di no fiti, dan a lasi a reti fu a fosi manpikin èn Yosef kisi a reti dati (Gen. 29:31-35; 30:22-25; 35:22-26; 49:22-26; 1 Kron. 5:1, 2). Toku Ruben nanga Yosef no tron afo fu a Mesias. Na Yuda, a di fu fo manpikin di Yakob kisi nanga Lea, tron wan afo fu a Mesias.​—Gen. 49:10.

 Lukas 3:32 e taki fu feifi sma di ben de wan afo fu a Mesias. Soleki fa a sori, dan ibriwan fu den man dati ben de wan fosi manpikin. Sobun, Boas tron a papa fu Obed, èn Obed tron a papa fu Isai.​—Rut 4:17, 20-22; 1 Kron. 2:10-12.

Ma David, a manpikin fu Isai, no ben de a fosi manpikin. A ben de a lastiwan fu den aiti manpikin fu en papa. Toku David tron wan afo fu a Mesias (1 Sam. 16:10, 11; 17:12; Mat. 1:5, 6). Na so a de tu taki Salomo tron wan afo fu a Mesias aladi a no ben de a fosi manpikin fu David.​—2 Sam. 3:2-5.

Disi no wani taki dati a ben de wan lawlaw sani te wan man ben de a fosi manpikin. A ben de wan grani fu de a fosi manpikin èn nofo tron na a manpikin dati ben e tron edeman fu a famiri. Boiti dati, a ben e kisi tu tron moro furu fu a famirigudu leki san den tra pikin ben e kisi.​—Gen. 43:33; Deut. 21:17; Yos. 17:1.

Ma wan sma ben kan lasi a reti fu a fosi manpikin. Abraham ben seni Ismael gowe èn a gi Isak a reti fu a fosi manpikin (Gen. 21:14-21; 22:2). Soleki fa wi si, dan Ruben ben lasi a reti fu a fosi manpikin èn Yosef kisi a reti dati.

Meki wi go luku Hebrewsma 12:16 baka pe skrifi: „Luku bun tu taki nowan huruman de na un mindri, noso wan sma di no e warderi santa sani, leki fa a ben de nanga Esau di a ben gi en reti leki fosi pikin na wan tra sma, soso fu kan kisi wán preti nyanyan.” San a tekst disi e leri wi?

Na apostel Paulus no ben e taki fu den afo fu a Mesias. Syatu na fesi, a ben gi Kresten a rai fu ’meki den pasi kon grati gi den futu’. Na so a no ben o pasa taki ’Gado no sori den bun-ati moro’. A sani dati ben kan pasa efu den ben e du hurudu (Hebr. 12:12-16). Efu den ben o du dati, dan den ben o de leki Esau. A no ben e „warderi santa sani” èn a go du sani di Gado e tegu gi.

Esau ben e libi na a ten pe den famiri edeman ben e tyari ofrandi gi den osofamiri fu den, sobun a kan taki ten na ten Esau srefi ben abi a grani fu tyari ofrandi (Gen. 8:20, 21; 12:7, 8; Yob 1:4, 5). Ma fu di a no ben abi a denki fu Gado meki a no sori warderi gi den grani di a ben kan kisi leki a fosi manpikin. A lasi ala den grani dati fu wan preti nyanyan ede. Kande a ben wani wai pasi gi a pina di ben o miti den bakapikin fu Abraham, soleki fa Gado Wortu ben taki na fesi (Gen. 15:13). Di Esau trow nanga uma di ben e anbegi falsi gado, dan na so a sori taki a ben lobi tegu sani, èn taki a no ben abi warderi gi santa sani. En papa nanga mama ben sari srefisrefi fu a sani dati (Gen. 26:34, 35). A de krin taki Esau ben de heri tra fasi leki Yakob di sorgu taki a trow nanga wan uma di ben e anbegi a tru Gado!​—Gen. 28:6, 7; 29:10-12, 18.

Sobun, san disi e sori te a abi fu du nanga den sma di ben de afo fu a Mesias? Son leisi wan fosi manpikin ben e tron wan afo fu a Mesias, ma dati no ben de so ala ten. Den Dyu ben sabi a sani disi èn den ben e lespeki en tu, fu di den ben e agri taki a Krestes ben o de wan bakapikin fu David, a lasti manpikin fu Isai.​—Mat. 22:42.