Go na content

Go na a tra menu

Go na table of contents

Yehovah Kotoigi

Sranantongo

Studie-Waktitoren  |  december 2016

Yu e memre disi ete?

Yu e memre disi ete?

Yu man memre san yu leisi na ini den Waktitoren di kon na doro no so langa pasa? We, luku efu yu kan gi piki na tapu den aksi di e kon now:

Fu sortu sondu Yesus ben taki na Mateyus 18:15-17?

A ben taki fu problema di sma abi nanga makandra, èn di den srefi kan lusu. Ma a problema disi na wan seryusu sondu èn efu a no man lusu, dan den kan puru a sma fu a gemeente. Fu eksempre, kande a sma lei fu di a wani gi a trawan porinen, noso kande a du wan kruka sani nanga en.w16.05, blz. 7.

San yu kan du fu kisi wini fu den sani di yu e leisi na ini Bijbel?

Yu kan du den sani disi: Opo yu ati gi den sani di yu e leisi, luku san yu kan leri fu den, poti aksi soleki ’fa mi kan gebroiki den sani disi fu yepi trawan?’, èn gebroiki den sani di wi e kisi fu studeri Bijbel moro bun.w16.05, blz. 24-26.

A fowtu efu wan Kresten di e bribi na ini na opobaka e sari te wan sma fu en dede?

Awinsi wan Kresten e bribi na ini na opobaka, toku dati no wani taki dati a no o firi sari te wan lobiwan fu en dede. Abraham ben row di Sara dede (Gen. 23:2). Baka wan pisi ten a sma no o sari so furu moro.wp16.3, blz. 4.

Na ini Esekièl kapitel 9, Esekièl ben si wan man di ben abi wan enkikokro fu wan sekretarsi, nanga siksi man di ben abi fetisani. Suma den man disi e prenki?

Wi kon frustan taki den e prenki den engel na hemel di ben musu pori Yerusalem èn di Gado o gebroiki tu fu pori na ogri grontapu na Armagedon. Na ini a ten disi, a man di abi na enkikokro fu wan sekretarsi e prenki Yesus Krestes di o gi sma wan marki fu kan tan na libi.w16.06, blz. 16, 17.

Sortu sani ben kan meki taki a Bijbel lasi gowe?

(1) A ben skrifi na tapu lolo fu papirus nanga perkament. Den sani disi ben kan pori gowe makriki; (2) tiriman nanga kerki fesiman ben wani pori a Bijbel; èn (3) sma ben wani kenki a boskopu fu Bijbel.wp16.4, blz. 4-7.

San wan Kresten kan kenki na ini en libi fu du moro gi Yehovah?

Kon sabi san yu abi fanowdu trutru èn no meki paiman di no de fanowdu. Luku omeni moni yu kan gebroiki ibri mun fu bai den sani di yu abi fanowdu. Seri den sani di yu no e gebroiki, noso gi sma den èn pai ala den paiman di yu abi. No teki tumusi furu grontapu wroko èn sreka sani fu kan du moro na ini a diniwroko.w16.07, blz. 10.

Sortu sani warti moro gowtu nanga solfru, soleki fa Bijbel e sori?

Yob 28:12, 15 e sori taki a koni fu Gado betre moro gowtu nanga solfru. Te yu e suku a koni fu Gado, dan yu musu du muiti fu tan abi sakafasi èn fu tranga a bribi fu yu.w16.08, blz. 18, 19.

A fiti taki wan brada e kweki wan barba?

Na ini son kulturu sma no e si en leki wan problema te mansma abi wan barba, solanga a koti netjes èn a no e tapu sma fu arki a Kownukondre boskopu. Ma awinsi dati de so, toku son brada e teki a bosroiti fu no kweki wan barba (1 Kor. 8:9). Na ini tra kulturu noso kondre, a no fiti taki Kresten brada abi wan barba.w16.09, blz. 21.

Fu san ede wi kan bribi den sani di Bijbel e taki fu David nanga Goliat?

Te wi e luku san Bijbel e taki fu Goliat, dan a ben langa sowan 15 centimeter moro a moro langa man di sma sabi na ini a ten fu wi. Te wi e luku wan sani di sma fu owruten skrifi èn san Yesus ben taki fu David, dan a de krin taki a ben de wan trutru sma. A tori pasa na wan trutru presi.wp16.5, blz. 13.

Fa koni e difrenti fu sabi nanga frustan?

Wan sma di abi sabi e leri nyun sani. Wan sma di abi frustan kan si krin san den sani di a leri abi fu du nanga makandra. Ma wan sma di abi koni, sabi fa fu gebroiki den sani di a leri èn di a kon frustan.w16.10, blz. 18.