Go na content

Go na a tra menu

Go na table of contents

Yehovah Kotoigi

Sranantongo

Studie-Waktitoren  |  december 2016

 ONDROFENITORI

Mi tron „ala sani gi ala sortu sma”

Mi tron „ala sani gi ala sortu sma”

„Efu yu dopu, mi e gowe libi yu!” Na so mi papa tapu skreki gi mi mama na ini 1941. Aladi mi papa taki a sani dati, toku mi mama dopu fu sori taki a ben gi ensrefi abra na Yehovah Gado. Dati meki mi papa gowe libi en tu. Na a ten dati mi ben abi aiti yari nomo.

WAN pisi ten na fesi, mi ben bigin leisi sani kaba di abi fu du nanga Bijbel. Mi mama ben kisi buku di e taki fu Bijbel tori èn mi ben e leisi ala den sani na ini. Mi ben lobi spesrutu den prenki. Mi papa no ben wani taki mi mama fruteri mi fu den sani di a ben e leri. Ma fu di mi ben gridi fu kon sabi moro, meki mi ben e poti aksi gi en. Dati meki a ben e studeri nanga mi te mi papa no ben de na oso. Te fu kaba mi srefi ben wani gi mi libi abra na Yehovah. Na ini 1943, mi dopu na ini Blackpool, Ingrisikondre. Na a ten dati mi ben abi tin yari.

MI E BIGIN DINI YEHOVAH

Baka di mi dopu, mi nanga mi mama bigin wroko makandra na ini a preikiwroko. Wi ben e preiki a Bijbel boskopu nanga yepi fu gramofon. Den sani disi ben bigi èn den ben e wegi sowan 4.5 kilo. Yu man si kaba fa wan yongu boi leki mi ben e syow wan fu den gramofon disi?

Di mi ben abi 14 yari, mi ben wani  pionier. Mi mama taigi mi taki mi ben musu taki fosi nanga a ’dinari fu den brada’ (now wi e kari en wan kring-opziener). A taigi mi fu leri wan wroko fu man sorgu misrefi te mi e pionier. Na dati mi du tu. Baka di mi wroko tu yari langa, mi aksi wan tra kring-opziener efu mi kan pionier. A taki, „Iya, du en!”

Sobun, na ini april 1949, mi nanga mi mama gi sma pikinmoro ala sani na ini a yuru-oso fu wi, dan wi froisi go na Middleton, krosibei fu Manchester. Drape wi bigin pionier. Baka fo mun, mi suku wan brada fu tron mi pionier patna. A bijkantoro taigi wi fu froisi go na wan nyun gemeente na ini Irlam. Mi mama ben e pionier nanga wan sisa na ini wan tra gemeente.

Aladi mi ben abi 17 yari nomo, mi nanga a pionier patna fu mi kisi a frantwortu fu hori konmakandra na ini a nyun gemeente drape fu di nofo brada no ben de fu tyari den frantwortu dati. Bakaten, mi kisi a kari fu go na Gemeente Buxton. A gemeente dati ben abi wan tu preikiman nomo èn den ben abi yepi fanowdu. Ala den sani di mi miti na a ten dati sreka mi gi frantwortu di mi ben o kisi bakaten.

Mi nanga trawan e meki bekènti taki wan lezing o hori na Rochester, New York, 1953

Na ini 1951, mi poti mi nen fu go na a Waktitoren Bijbelskoro Gilead. Ma na ini december 1952, mi kisi a kari fu go na ini a legre. Mi aksi lanti fu no seni mi go na ini a legre fu di mi ben e de wan furuten dinari. Ma lanti no ben feni en prenspari taki mi  ben de wan dinari. Den gi mi siksi mun strafu. Di mi ben de na strafu-oso, mi kisi a kari fu go na a di fu 22 klas fu Gilead. Sobun, na ini yuli 1953, mi ben de na ini a sipi Georgic di ben e go na New York.

Di mi doro na New York, mi ben man go na a New World Society (Nieuwe-Wereldmaatschappij) kongres di hori na ini 1953. Baka a kongres mi teki loko go na South Lansing, New York, pe a skoro ben de. Fu di mi ben de na strafu-oso fosi mi kon na New York, meki mi no ben abi furu moni. Di mi saka fu a loko, mi ben musu teki wan bus fu go na South Lansing. Mi no ben abi a moni fu pai a bus, sobun mi ben abi fu leni a moni fu wan tra sma na ini a bus.

MI E GO DINI NA INI WAN TRA KONDRE

Na Gilead Skoro wi leri moi sani di yepi wi fu „tron ala sani gi ala sortu sma” na ini a zendeling wroko (1 Kor. 9:22). Dri fu wi kisi a grani fu go dini na den Filippijnen. Dati na mi, Paul Bruun, nanga Raymond Leach. Wi ben musu wakti wan tu mun fosi wi kisi visum. Baka dati wi teki sipi go na Rotterdam, dan wi pasa a Mindrikondre Se, a Suez kanaal, na India Se, Maleisia, nanga Hong Kong. Ala nanga ala wi ben de na se 47 dei langa! Te fu kaba wi doro Manila tapu 19 november 1954.

Mi nanga mi zendeling patna Raymond Leach ben de na tapu wan sipi 47 dei langa di wi ben e go na den Filippijnen

Baka dati wi ben musu fiti wisrefi na wan nyun pipel nanga wan nyun kondre èn wi ben musu leri wan nyun tongo. Ma na a bigin, wi ala dri ben musu go dini na ini wan gemeente na ini Quezon City, pe furu sma ben e taki Ingrisitongo. Sobun, baka siksi mun, wi ben sabi wan tu wortu Tagalog nomo. A tra gemeente pe wi ben o go dini ben o lusu a problema dati.

Wan dei na ini mei 1955, di wi doro oso baka a preikiwroko, mi nanga Brada Leach feni wan tu brifi na ini wi kamra. Wan fu den brifi ben e taki dati wi ben musu go dini now leki kring-opziener. Mi ben abi 22 yari nomo, ma a frantwortu disi gi mi tra okasi fu „tron ala sani gi ala sortu sma”.

Mi e hori wan lezing na wan kring konmakandra di hori na ini Bicoltongo

Fu eksempre, a fosi lezing di mi hori leki kring-opziener ben de na fesi wan wenkri na ini wan dorpu. Heri esi mi kon si taki na a ten dati den sma na ini den Filippijnen no ben gwenti hori publikitaki na ini wan zaal, ma na presi pe furu sma de! Di mi ben e go na den difrenti gemeente na ini a kring, mi ben e hori lezing na wowoyo, na fesi lanti kantoro, tapu basketbal veld, na presi pe sma e koiri, èn furu tron na tapu uku fu strati. Wan leisi di mi ben de na ini San Pablo City, wan hebi alen fadon èn mi no ben man hori wan lezing na wowoyo. Dati meki mi taigi den owruman taki mi ben o hori a lezing na ini a Kownukondre zaal. Bakaten den owruman aksi mi efu den ben kan kari a lezing dati wan publikitaki, fu di mi no ben hori a lezing na wan presi na dorosei.

Ala ten wi ben e tan na den oso fu brada nanga sisa. Aladi den sma disi ben de pôtisma, toku ala ten den oso ben krin. Nofo tron mi ben e sribi na tapu wan matamata na tapu a planga vloer. Den sma drape no ben abi inisei wasi-oso, sobun mi leri fu wasi mi skin sondro taki sma ben abi fu si mi nanga sososkin. Mi ben e teki bus fu go na tra presi, èn te mi ben e go na den tra èilanti, dan son leisi mi ben e go nanga boto. Te nanga now mi no abi mi eigi oto.

Fu di mi ben e teki prati na a preikiwroko èn mi ben e go luku den gemeente, meki mi leri taki Tagalog. Noiti mi teki les na wan presi, ma mi leri a tongo fu di mi arki fa den brada nanga sisa ben e taki na ini a preikiwroko èn na den konmakandra. Den brada ben wani yepi mi fu leri a tongo. Mi ben warderi en taki den ben abi pasensi nanga mi èn taki den ben e taigi mi krin te mi ben taki wan sani di no bun.

 Baka wan pisi ten, den nyun frantwortu di mi kisi dwengi mi fu fiti misrefi moro fara. Na ini 1956, di Brada Nathan Knorr kon na den Filippijnen, mi kisi a frantwortu fu wroko na a afdeling fu public relations na a kongres. Mi no ben abi nowan ondrofeni, sobun tra sma leri mi fa fu du a wroko. Wan tu mun baka dati, ete wan kongres hori, èn Brada Frederick Franz fu na edekantoro kon na ini a kondre. Di mi ben e dini leki kongres fesiman, mi si taki Brada Franz ben de klariklari fu fiti ensrefi na a pipel. Den brada fu a kondre ben breiti fu si taki di Brada Franz ben e hori a lezing fu en, a ben e weri a barong Tagalog, wan krosi di den sma fu den Filippijnen gwenti weri.

Mi ben musu fiti misrefi na moro sani di mi tron distrikt-opziener. Na a ten dati, wi sori sma a felem Het geluk van de Nieuwe-Wereldmaatschappij. Nofo tron wi ben e drai a felem disi na wan presi na dorosei. Son leisi maskita nanga freifrei ben lai. A faya fu a felem projector ben e hari den èn den ben go fasi na ini. A ben de wan heri sani fu krin a projector bakaten! A no ben makriki fu seti sani fu sori a felem disi, ma a ben moi fu si fa den sma ben breiti te den ben kon si fa na organisâsi fu Yehovah ben bigi.

Den priester fu a Lomsu kerki ben e dwengi wan tu lantiman fu drape fu no gi wi vergunning fu hori bigi konmakandra. Te  wi ben e hori lezing krosibei fu den kerki fu den, dan den ben e naki den kerki bel fu den soso fu no meki sma yere a lezing bun. Toku a wroko ben e go na fesi èn furu fu den sma na ini den kontren drape e anbegi Yehovah now.

MI E KISI MORO FRANTWORTU ÈN MI E LERI MORO SANI

Na ini 1959, mi kisi wan brifi di taigi mi taki mi ben musu go dini na a bijkantoro. Drape mi leri moro sani. Baka wan pisi ten, den brada aksi mi fu go luku den bijkantoro na tra kondre. Wan fu den leisi dati, mi leri sabi Janet Dumond, wan zendeling sisa di ben e dini na ini Thailand. Wan pisi ten wi seni brifi gi makandra èn bakaten wi trow. Mi nanga en ben abi a moi grani fu du a furuten diniwroko makandra sowan 51 yari.

Mi nanga Janet de na tapu wan fu den someni èilanti fu den Filippijnen

Ala nanga ala mi go na 33 kondre fu go luku a pipel fu Yehovah, èn a sani disi gi mi furu prisiri. Mi de nanga tangi trutru taki den frantwortu di mi kisi na ini a bigin yepi mi fu fiti misrefi na sma fu someni difrenti kulturu. Di mi go na den kondre dati, dan mi leri moro sani èn dati yepi mi fu si fa Yehovah lobi ala sortu sma.Tori fu den apostel 10:34, 35.

Wi e sorgu taki wi e teki prati doronomo na a preikiwroko

TE NOW ETE MI E FITI MISREFI

A gi mi furu prisiri fu wroko nanga den brada nanga sisa fu wi na ini den Filippijnen! Now tin tron so furu preikiman de na ini a kondre, leki di mi bigin dini drape. Mi nanga Janet e dini ete na a bijkantoro fu den Filippijnen di de na ini Quezon City. Aladi mi e dini na ini wan tra kondre moro leki 60 yari kaba, toku mi musu leri ete fu fiti misrefi na san Yehovah e aksi fu mi. Den kenki di kon na ini na organisâsi no so langa pasa, leri wi taki wi musu tan fiti wisrefi fu man dini Gado nanga den brada nanga sisa fu wi.

Wi e breiti ibri leisi te wi e si taki moro nanga moro sma e tron Kotoigi

Wi du muiti fu du iniwan sani di Yehovah aksi fu wi, èn dati na a moro bun fasi fu libi. Wi pruberi tu fu tyari kenki kon di ben de fanowdu èn fu de wan yepi gi wi brada nanga sisa. Iya, wi teki a bosroiti fu de „ala sani gi ala sortu sma”, solanga Yehovah wani dati.

Wi e dini ete na a bijkantoro na ini Quezon City