Go na content

Go na a tra menu

Go na table of contents

Yehovah Kotoigi

Sranantongo

Studie-Waktitoren  |  december 2016

Yehovah e pai den wan di e suku en fayafaya

Yehovah e pai den wan di e suku en fayafaya

„A sma di e anbegi Gado musu bribi taki a de trutru èn taki a e pai den wan di e suku en fayafaya.”HEBR. 11:6.

SINGI: 85, 134

1, 2. (a) San lobi nanga bribi abi fu du nanga makandra? (b) Sortu aksi wi o luku?

WI LOBI Yehovah ’fu di na en fosi ben lobi wi’ (1 Yoh. 4:19). Wán fasi fa Yehovah sori taki a lobi den reti-ati futuboi fu en, na taki a pramisi fu blesi den. O moro wi lobi wi Gado, o moro a bribi fu wi e kon tranga. Wi no e bribi nomo taki a de trutru, ma wi de seiker taki a o blesi den wan di a lobi.Leisi Hebrewsma 11:6.

2 Yehovah e si en leki wan prenspari sani fu blesi den futuboi fu en. Wi no kan taki dati wi abi trutru bribi efu wi no abi a frutrow taki Gado o blesi den wan di e suku en fayafaya. Dati meki Bijbel e taki dati „bribi na te wan sma e fruwakti taki den sani di a e howpu, o kon tru nomonomo” (Hebr. 11:1). Iya, wan sma di abi bribi e frutrow taki den sani di Gado pramisi o kon tru. Ma fa wi e kisi wini fu a howpu di wi abi taki Yehovah o blesi wi? Fa Yehovah blesi den futuboi fu en na ini owruten èn na ini a ten disi? Meki wi go luku.

YEHOVAH PRAMISI TAKI A O BLESI DEN FUTUBOI FU EN

3. San Gado e pramisi wi na Maleaki 3:10?

3 Yehovah Gado fruplekti ensrefi fu blesi den futuboi fu en.  Dati meki a e gi wi deki-ati fu meki muiti fu kisi den blesi fu en. Na ini Bijbel Yehovah e taigi den sma di e du dati: „’Grantangi, un luku san mi o du . . . Unu o si fa mi o opo den sroisi fu hemel, so taki blesi fadon leki alen gi unu. Mi o blesi unu so te, taki unu no o mankeri nowan sani’, na so Yehovah di e tiri den legre taki” (Mal. 3:10). Te wi e du muiti fu kisi den blesi dati, dan wi e sori taki wi abi furu warderi gi a moi okasi disi di Yehovah e gi wi.

4. Fu san ede wi kan bribi a sani di Yesus pramisi na Mateyus 6:33?

4 Yesus ben pramisi den disipel fu en taki Gado ben o horibaka gi den efu den ben o suku a Kownukondre fosi. (Leisi Mateyus 6:33.) Yesus ben kan pramisi den a sani dati, fu di a ben sabi taki ala ten Gado e du san a pramisi (Yes. 55:11). Wi kan abi a frutrow tu taki efu wi e sori nanga wi heri ati taki wi e bribi na ini Yehovah, dan a o du a sani disi: „Mi no o libi yu kwetikweti èn noiti mi o gowe fu yu” (Hebr. 13:5). Den wortu disi abi fu du nanga a rai di Yesus ben gi fu suku Gado en Kownukondre nanga en retidu fosi.

Yesus ben sori taki den disipel fu en o kisi blesi gi den sani di den e du gi Gado (Luku paragraaf 5)

5. Fu san ede a fasi fa Yesus piki Petrus e tranga wi bribi?

5 Wan leisi, na apostel Petrus ben aksi Yesus: „Wi gowe libi ala sani èn wi kon waka na yu baka. San wi o kisi dan?” (Mat. 19:27) Yesus no bari Petrus fu di a ben aksi a sani dati, ma a taigi den disipel fu en taki a ben o blesi den fu di den ben libi sani na baka fu man tron en bakaman. Den reti-ati apostel nanga  trawan o tiri makandra nanga en na hemel. Ma wi kan kisi blesi nownow kaba. Yesus ben taki: „Ibri sma di gowe libi en oso, noso en brada, noso en sisa, noso en papa, noso en mama, noso en pikin, noso en gron fu mi nen ede, o kisi moro leki dati. A sma dati o kisi têgo libi leki gudu” (Mat. 19:29). Den disipel fu en ben o kisi blesi di bigi moro den sani di den ben libi na baka. Te wi e luku den Kresten brada nanga sisa di wi e si leki papa, mama, brada, sisa, nanga pikin, dan den sma dati warti moro leki iniwan sani di wi libi na baka fu a bun fu a Kownukondre, a no so?

„WAN ANKRA GI WI LIBI”

6. Fu san ede Yehovah e pramisi den anbegiman fu en taki a o blesi den?

6 Fu di Yehovah pramisi den anbegiman fu en taki a o blesi den, meki den man horidoro te den e kisi tesi. Boiti taki den reti-ati futuboi fu Yehovah kan kisi furu blesi nownow kaba, den e fruwakti fu kisi moro bigi blesi na ini a ten di e kon (1 Tim. 4:8). Iya, te wi abi a frutrow taki Yehovah „e pai den wan di e suku en fayafaya”, dan dati o yepi wi fu tanapu kánkan na ini a bribi.Hebr. 11:6.

7. Fa howpu kan de leki wan ankra?

7 Na ini a prenspari lezing di Yesus ben hori na tapu wan bergi, a ben taki: „Un musu breiti èn prisiri pasa marki, fu di unu o kisi wan bigi pai na hemel. Bika na so sma ben frufolgu den profeiti di ben de fosi unu” (Mat. 5:12). Boiti den wan di o kisi a grani fu libi na hemel, den wan di abi a howpu fu libi fu têgo na grontapu, o man „breiti èn prisiri” tu (Ps. 37:11; Luk. 18:30). Awansi wi abi a howpu fu libi na hemel noso na grontapu, toku a howpu dati kan de leki „wan ankra gi wi libi. A tranga èn a e hori wi tanapu” (Hebr. 6:17-20). Neleki fa wan ankra e meki taki wan boto no e seki tumusi te bigi winti e wai na se, na so a howpu di wi abi fu kisi blesi kan yepi wi fu no sari tumusi, fu no broko wi ede tumusi, èn fu no lasi bribi. A howpu disi kan gi wi a krakti fu horidoro te tesi e miti wi.

8. Fa a howpu di wi abi kan yepi wi fu no broko wi ede tumusi?

8 A Bijbel howpu di wi abi man yepi wi fu no broko wi ede tumusi. Den sani di Gado pramisi wi de leki wan salfu di e kowru wi ati. A de wan trowstu fu sabi taki Yehovah ’o horibaka gi wi’ te wi e ’trowe wi hebi na en tapu’ (Ps. 55:22). Wi kan abi a frutrow taki Gado kan du „moro leki iniwan sani di wi e aksi noso prakseri” (Ef. 3:20). Denki a tori, Bijbel no e taki nomo dati a o du san wi aksi en, ma taki a o du „moro leki iniwan sani” di wi aksi noso e fruwakti!

9. Fu san ede wi kan abi a frutrow taki Yehovah o blesi wi?

9 Efu wi wani kisi blesi, dan wi musu frutrow tapu Yehovah nanga wi heri ati èn wi musu gi yesi na en. Moses ben taigi a pipel fu Israel: „Yehovah un Gado o blesi unu na ini a kondre di Yehovah gi unu fu tan. Ma Yehovah un Gado o blesi unu, soso te unu e gi yesi na en èn te unu e du ala sani soifri leki fa mi e taigi unu tide. Yehovah un Gado o blesi unu soleki fa a pramisi” (Deut. 15:4-6). Yu e bribi taki Yehovah o blesi yu efu yu e tan dini en nanga yu heri ati? A no de fu taki dati yu kan abi a frutrow dati.

YEHOVAH BLESI DEN

10, 11. Fa Yehovah blesi Yosef?

10 Bijbel skrifi, so taki wi kan kisi wini fu en. A abi furu tori na ini di e sori taki Gado ben blesi reti-ati futuboi fu en trutru (Rom. 15:4). Yosef na wan moi eksempre  fu dati. Den brada fu en ben span anu makandra fu du ogri nanga en èn bakaten a wefi fu a basi fu en tori en. Na so a doro na strafu-oso na ini Egepte. A de so taki a ben de tumusi fara fu a Gado fu en? Kwetikweti! Bijbel e taki: „Yehovah ben de nanga Yosef ala ten. A tan sori en taki a ben e tai hori na en . . . Yehovah ben de nanga Yosef. Yehovah meki ala sani di Yosef ben e du, waka bun” (Gen. 39:21-23). Aladi a ten dati ben de wan tesi gi Yosef, toku a wakti a Gado fu en nanga pasensi.

11 Furu yari baka dati, Farao puru Yosef na strafu-oso èn a meki a srafu disi di ben abi sakafasi tron a di fu tu tiriman na ini Egepte (Gen. 41:1, 37-43). Bijbel e taki: „Di Yosef kisi en fosi manpikin, a kari en Manase, bika soleki fa ensrefi ben taki: ’Gado meki mi frigiti ala mi broko-ede èn a heri oso fu mi papa.’ A kari a tra manpikin fu en Efrayim, bika soleki fa ensrefi ben taki: ’Gado meki mi kisi pikin na ini a kondre pe mi ben e pina’” (Gen. 41:51, 52). Fu di Yosef tai hori na Gado, meki Gado kibri a libi fu na osofamiri fu Yakob nanga den Egeptesma. Ma san prenspari, na taki Yosef ben sabi taki na Yehovah ben blesi en.Gen. 45:5-9.

12. Fa Yesus ben man tan horidoro di a ben e kisi tesi?

12 Yesus Krestes tan gi yesi tu na Gado aladi a kisi difrenti sortu tesi. Dati meki Gado blesi en tu. San yepi Yesus fu horidoro? Gado Wortu e taki: „Na fu di a ben sabi taki prisiri ben e wakti en, meki a ben de klariklari fu dede na a pinapostu sondro fu broko en ede taki a ben o kisi syen” (Hebr. 12:2). A no de fu taki dati Yesus ben breiti taki a ben man santa a nen fu Gado. Boiti dati, en Papa ben feni en bun èn a kisi furu moi grani. Bijbel e taki dati „a go sidon na a reti-anusei fu a kownusturu fu Gado”. Wan tra tekst e taki: „Gado poti en moro hei tu leki fa a ben de kaba èn a gi en wan nen di bigi moro ibri tra nen.”Fil. 2:9.

YEHOVAH NO E FRIGITI SAN WI DU

13, 14. Fa Yehovah e si den sani di wi e du gi en?

13 Wi kan de seiker taki Yehovah e warderi iniwan muiti di wi e meki fu dini en. A e frustan iniwan tweifri di wi abi. A sabi te wi abi moni problema èn a e frustan tu te wi no man du furu gi en fu di wi siki noso fu di wi e firi brokosaka. Boiti dati, wi no abi fu tweifri taki Yehovah e warderi en te den futuboi fu en e tan gi yesi na en awinsi den abi problema.Leisi Hebrewsma 6:10, 11.

14 No frigiti taki wi kan taki nanga „a sma di e arki begi”. Wi kan abi a frutrow taki a o poti prakseri na den problema fu wi (Ps. 65:2). Bijbel e sori krin taki „a Tata di abi furu sari-ati, a Gado fu ala trowstu” o de klariklari fu trowstu wi èn fu gi wi deki-ati te wi abi dati fanowdu. Kande a o gebroiki den Kresten brada nanga sisa fu wi fu yepi wi (2 Kor. 1:3). A e naki Yehovah ati te wi e sori taki wi e firi gi trawan. A Wortu fu en e taki: „A sma di e du bun gi den mofinawan e leni Yehovah èn A o pai a sma dati baka gi den bun di a du” (Odo 19:17; Mat. 6:3, 4). Dati meki te wi de klariklari fu yepi den wan di de na nowtu, dan Yehovah e si en leki na leni wi e leni en wan sani. A e pramisi wi taki a o pai wi gi a bun di wi du.

BLESI NOW ÈN FU ALA TEN

15. Sortu blesi yu wani kisi? (Luku a prenki na a bigin fu na artikel.)

15 Wan sani di e yepi salfu Kresten fu horidoro, na a howpu di den abi taki den o kisi ’a kownu-ati fu retidu. Na dati Masra di de wan reti-ati krutuman, o gi den  leki pai’ (2 Tim. 4:7, 8). Ma efu yu abi wan tra howpu, dan dati no wani taki dati Gado feni taki yu no bun nofo. Milyunmilyun fu den „tra skapu” fu Yesus e wakti fayafaya fu kisi têgo libi na ini wan paradijs na grontapu. Drape „den o prisiri srefisrefi, fu di freide o de pasa marki”.Yoh. 10:16; Ps. 37:11.

16. Sortu trowstu wi e feni na 1 Yohanes 3:19, 20?

16 Son leisi wi kan feni taki wi no e du so furu. Noso kande wi e aksi wisrefi efu Yehovah breiti nanga den sani di wi e du gi en. Kande wi e denki srefi taki wi no bun nofo fu kisi blesi. Ma meki wi no frigiti noiti taki „Gado bigi moro wi ati èn taki a sabi ala sani”. (Leisi 1 Yohanes 3:19, 20.) Te wi e dini Gado fu di wi e bribi na ini en èn fu di wi lobi en, dan a o pai wi gi iniwan sani di wi e du gi en, awinsi wi feni taki a sani dati pikin.Mark. 12:41-44.

17. San na wan tu fu den blesi di wi e kisi nownow kaba?

17 Aladi a pipel fu Yehovah e libi na ini den muilek lasti dei fu na ogri grontapu fu Satan, toku Yehovah e tan blesi den. A e sorgu taki ala den anbegiman fu en de koloku fu di den de na ini wan agersi paradijs pe den e kisi furu leri fu Gado (Yes. 54:13). Neleki fa Yesus ben pramisi, Yehovah e blesi wi nownow kaba fu di a gi wi Kresten brada nanga sisa na heri grontapu (Mark. 10:29, 30). Boiti dati, den wan di e suku Gado fayafaya e kisi tumusi moi blesi tu. Den e kisi wan korostu firi, den de tevrede nanga den sani di den abi, èn den de koloku.Fil. 4:4-7.

18, 19. Fa den futuboi fu Yehovah e si den blesi di den e kisi?

18 Den futuboi fu Yehovah na heri grontapu kan taki fu den moi blesi di den kisi fu en. Fu eksempre, Bianca di e libi na Doisrikondre, e taki: „Mi no man kaba taigi Yehovah tangi fu di a yepi mi nanga den broko-ede fu mi èn fu di a horibaka gi mi ibri dei. Grontapu bruya èn a no e gi sma nowan howpu. Ma fu di mi e tan krosibei na Yehovah, meki mi abi a bribi taki sani o waka bun nanga mi. Ibri leisi te mi e du muiti gi Gado, a e blesi mi wan hondro tron so furu.”

19 Noso luku Paula di abi 70 yari èn di e libi na ini Kanada. A sisa disi abi wan siki di e meki taki a no man waka. A e taki: „Mi no man waka, ma dati no wani taki dati mi no man preiki. Mi e gebroiki tra fasi fu teki prati na a preikiwroko. Mi e preiki nanga yepi fu telefon èn na ibri okasi di mi feni. Mi abi wan pikin buku pe mi e skrifi Bijbeltekst nanga moi prakseri di mi leisi na ini den buku fu wi. Ten na ten mi e luku den sani dati baka fu gi misrefi deki-ati. Mi e kari en ’Mi buku fu horidoro’. Te wi e poti prakseri na den pramisi fu Yehovah, dan wi no o firi brokosaka doronomo. Ala ten Yehovah de drape fu yepi wi, awansi san na a situwâsi fu wi.” Kande a situwâsi fu yu de heri tra fasi leki a di fu Bianca noso Paula. Ma seiker yu kan memre wan tu fasi fa Yehovah blesi yu nanga den mati fu yu. A bun srefisrefi fu prakseri fa Yehovah e blesi yu nownow kaba èn fa a o du dati na ini a ten di e kon!

20. San wi kan fruwakti fu kisi efu wi e tan dini Yehovah nanga wi heri ati?

20 Noiti no frigiti taki yu „o kisi wan bigi pai” te yu e begi Gado nanga yu heri ati èn te yu no frede fu taki nanga en. Yu kan de seiker taki ’baka te yu du a wani fu Gado, yu o kisi san a ben pramisi yu’ (Hebr. 10:35, 36). Meki wi go doro fu tranga wi bribi èn meki wi dini Yehovah nanga wi heri ati. Te wi e du disi wi kan de seiker taki Yehovah o blesi wi.Leisi Kolosesma 3:23, 24.