FU DI wi e libi na ini „den lasti dei”, meki a libi e kon moro muilek (2 Tim. 3:1-5). Dati meki wi musu abi moro pasensi. Wi e libi na ini wan grontapu pe sma lobi densrefi nomo, den no wani meki kruderi èn den no man dwengi densrefi. Den sortu sma disi no abi pasensi srefisrefi. Dati meki wi musu aksi wisrefi: ’Mi de leki den sma na ini a grontapu disi di no abi pasensi? San a wani taki fu abi pasensi? San o yepi mi fu kon abi a fasi disi?’

SAN A WANI TAKI FU ABI PASENSI?

Na ini Bijbel, a wortu pasensi no wani taki nomo taki wi e frudrage wan muilek situwâsi fu di tra fasi no de. Wan sma di abi pasensi e horidoro fu di a abi a howpu taki sani o go moro bun. A no e denki ensrefi nomo, ma a e prakseri a bun fu trawan, awinsi den du wan hati sani nanga en. A abi a howpu taki en nanga a sma o kon bun baka. Dati meki wi kan frustan fu san ede Gado Wortu e taki dati lobi abi „pasensi” (1 Kor. 13:4). * A moi fu si taki pasensi kari leki a fosiwan fu den tra fasi di kari na ini a tekst disi. Boiti dati, Bijbel e taki dati „langa pasensi” noso „pasensi” na wan fu „den fasi di a yeye e meki sma kisi” (Gal. 5:22, 23). San wi musu du fu kon abi a moi fasi disi?

SAN WI MUSU DU FU KON ABI PASENSI?

Efu wi wani kon abi pasensi, dan wi musu begi Yehovah fu gi wi en yeye. Soleki fa wi sabi, dan a e gi en yeye na den sma di e frutrow na en tapu (Luk. 11:13). Ma awinsi a yeye fu Gado na a moro bigi krakti di de, toku wi no musu begi wawan, ma wi musu du wan sani tu (Ps. 86:10, 11). Wi musu du muiti fu sori pasensi ibri dei so taki wi kan tron sma di abi pasensi. Toku a kan muilek gi wi fu sori pasensi son leisi. San kan yepi wi?

Wi kan kon abi pasensi te wi e studeri na eksempre fu Yesus èn e pruberi fu de neleki en. Na apostel Paulus ben taki dati wi musu kon abi „nyun fasi”, èn „pasensi” na wan fu den. Baka dati a gi wi a deki-ati fu ’meki a freide fu Krestes tiri na ati fu wi’ (Kol. 3:10, 12, 15). Wi kan meki a freide disi „tiri” wi ati te wi e teki na eksempre fu Yesus di ben abi a frutrow taki Yehovah o poti sani kon reti na a yoisti ten. Te wi abi a frutrow dati, dan awinsi san e miti wi, wi no o lasi pasensi.​—Yoh. 14:27; 16:33.

Aladi wi wani taki a nyun grontapu kon esi-esi, toku wi o man sori moro pasensi te wi e prakseri taki Yehovah abi pasensi nanga wi. Bijbel e taki: „Yehovah no e draidrai fu du san a pramisi, soleki fa son sma e prakseri. Ma a abi pasensi nanga  unu, bika a no wani taki wan sma lasi libi. A wani taki ala sma musu kisi na okasi fu sori berow” (2 Petr. 3:9). Te wi e prakseri taki Yehovah abi pasensi nanga wi, dan dati e yepi wi fu abi pasensi nanga trawan (Rom. 2:4). Na ini sortu situwâsi wi musu sori pasensi?

SITUWÂSI PE WI MUSU ABI PASENSI

Ibri dei difrenti situwâsi de pe wi musu sori pasensi. Fu eksempre, kande wan sma e taki, aladi yu feni taki yu abi wan prenspari sani fu taki tu. Na ini den sortu situwâsi dati wi musu hori wisrefi fu no koti a sma mofo (Yak. 1:19). Wi musu hori pasensi tu te den sani di trawan e du e fuga wi. Na presi taki wi e atibron, wi musu prakseri taki wisrefi abi swakifasi tu èn taki Yehovah nanga Yesus abi pasensi nanga wi. Den no e krutu wi fu den pikinpikin sani di wi no e du bun. Na presi fu dati den e luku den bun fasi fu wi èn den e gi wi na okasi fu tyari kenki kon.​—1 Tim. 1:16; 1 Petr. 3:12.

Wi musu sori pasensi tu te wan sma e taigi wi taki wi du wan sani noso taki wan sani di no bun. Nofo tron wi e mandi èn wi wani sori taki wi no du noti. Ma Gado Wortu e sori wi san wi musu du na ini den sortu situwâsi dati. A e taki: „Moro betre wan sma abi pasensi, leki fu abi heimemre. No de wan sma di e mandi esi, bika na soso don sma e mandi esi” (Preik. 7:8, 9). Sobun, awinsi a sani di den taki fu wi no tru, toku wi musu abi pasensi èn wi musu denki bun san wi o taki. Na dati Yesus ben du te sma ben taki sani fu en di no tru.​—Mat. 11:19.

Papa nanga mama musu abi pasensi nanga den pikin fu den, spesrutu te den wani yepi den pikin fu kenki wan denki noso wan fasi di no bun. Meki wi luku a tori fu Mattias, di e dini na a Skandinafia Bijkantoro. Di Mattias ben moro yongu, dan den pikin na skoro ben dreigi en fu a bribi fu en ede. Na a bigin en papa nanga mama no ben sabi. Ma den ben kon si taki a boi fu den ben bigin tweifri na a bribi fu den. Gillis, a papa fu Mattias, e taki: „Wi ben musu abi furu pasensi nanga Mattias.” A ben gwenti aksi en papa nanga mama: „Suma na Gado? Fa wi du sabi taki Bijbel na Gado Wortu? Fa wi du sabi taki na Gado e aksi den sani disi fu wi?” A ben aksi en papa tu: „Fu san ede unu e krutu mi fu di mi no e bribi den sani di unu e bribi?”

Gillis e taki: „Son leisi, te a boi fu wi ben e poti aksi gi wi, a ben e taki nanga atibron. En ati no ben e bron tapu mi noso en mama, ma tapu a tru anbegi, fu di a ben feni taki na anbegi ben meki a libi muilek gi en.” San Gillis du? A e taki: „Mi nanga a boi fu mi ben e sidon èn wi ben e taki omeni yuru langa. Moro furu mi ben arki èn son leisi mi ben poti aksi gi en fu kon frustan fa a ben firi èn fa a ben e si sani. Son leisi mi ben sori en san Bijbel e  taki fu wan tori, dan mi ben gi en wan tu dei fu prakseri, fosi mi taki go doro nanga en. Tra leisi mi ben aksi en fu gi mi ten fu denki fu wan sani di a ben taigi mi. Na a fasi disi mi ben man yepi Mattias fu kon frustan moro bun o prenspari a lusu-paiman de, o furu lobi Yehovah abi gi wi èn taki a abi a reti fu tiri wi. A teki ten, ma safrisafri a kon kisi lobi gi Yehovah. Mi nanga mi wefi breiti taki wi ben abi a pasensi fu yepi a boi fu wi èn taki wi ben man doro en ati.”

Gillis nanga en wefi ben abi pasensi nanga a boi fu den èn den ben frutrow taki Yehovah ben o yepi den. Gillis e taki: „Furu leisi mi ben taigi Mattias taki mi nanga en mama lobi en èn dati meki wi ben begi Yehovah ibri leisi baka fu yepi en fu frustan den leri fu Bijbel.” A no de fu taki dati a papa nanga mama disi breiti taki den hori pasensi nanga a boi fu den.

Wi musu abi pasensi tu te wi musu sorgu gi wan famiriman noso wan mati di e siki langa ten kaba. Meki wi go luku na eksempre fu Ellen * di e libi na ini Skandinafia tu.

Sowan aiti yari pasa, brudu naki a masra fu Ellen tu leisi. A sani disi meki taki son pisi fu en edetonton no e wroko bun moro. Dati meki a no abi son firi moro. Fu eksempre, a no sabi te a e prisiri noso te a e firi sari èn a no man sori firi gi tra sma. A situwâsi disi no makelek gi Ellen. A e taki: „Mi musu abi furu pasensi nanga en èn mi e begi furu. A tekst di mi lobi leisi èn di e trowstu mi na Filipisma 4:13, pe skrifi: ’Mi man du ala sani nanga yepi fu a sma di e gi mi krakti.’” Yehovah e gi Ellen a krakti fu sori pasensi èn fu horidoro na ini a muilek situwâsi disi.​—Ps. 62:5, 6.

SORI PASENSI NELEKI YEHOVAH

A no de fu taki dati Yehovah na a moro bun eksempre fu wan sma di e sori pasensi (2 Petr. 3:15). Bijbel abi furu tori di e sori fa Yehovah e sori pasensi (Neh. 9:30; Yes. 30:18). Fu eksempre, san Yehovah du di Abraham poti wan lo aksi gi en di a taigi en taki a o pori Sodom? We, Bijbel e sori taki Yehovah no tapu Abraham fu taki fa a ben e firi. Na presi fu dati a arki en nanga pasensi. Baka dati Yehovah taki ete wan leisi fu den broko-ede fu Abraham èn a pramisi en taki efu a ben feni tin reti-ati sma nomo na ini Sodom, a no ben o pori a foto (Gen. 18:22-33). Iya, ala ten Yehovah e arki wi nanga pasensi.

Pasensi na trutru wan fu den nyun fasi di ala Kresten musu kon abi. Efu wi wroko tranga fu kon abi a fasi disi, wi o gi grani na wi hemel Tata di lobi wi èn di e hori pasensi nanga wi. Wi o de wan fu ’den sma di o kisi den sani di Gado pramisi den, fu di den ben abi bribi èn fu di den ben abi pasensi’.​—Hebr. 6:10-12.