Go na content

Go na a tra menu

Go na table of contents

Yehovah Kotoigi

Sranantongo

Studie-Waktitoren  |  augustus 2017

Tron nyun sma èn no lasi den nyun fasi di yu kon abi

Tron nyun sma èn no lasi den nyun fasi di yu kon abi

„Kon tron nyun sma di kisi nyun fasi.”​—KOL. 3:10.

SINGI: 126, 28

1, 2. (a) Fu san ede wi kan bribi taki wi man tron nyun sma? (b) Fu sortu fasi Kolosesma 3:10-14 e taki?

NA INI a Bijbel​—Nyun-Grontapuvertaling den wortu „kisi nyun fasi” de fu feni tu leisi (Ef. 4:24; Kol. 3:10). Den wortu disi e sori taki wi musu du muiti fu „tron sma di de leki fa Gado wani”. Wi alamala kan tron den sortu sma dati. Fu san ede wi kan bribi dati? Fu di Yehovah meki libisma soleki fa ensrefi de, meki wi man sori den moi fasi fu en.​—Gen. 1:26, 27; Ef. 5:1.

2 Ma fu di wi kisi sondu fu wi fosi papa nanga mama, meki sondu firi kan abi krakti na wi tapu. Den sma na wi lontu kan abi bigi krakti na wi tapu tu. Ma fu di Yehovah abi sari-ati nanga wi, meki a e yepi wi fu tron den sortu sma di a wani taki wi de. Dati meki wi o luku wan tu fu den fasi di wi musu kon abi, so taki wi kan tan meki muiti fu tron nyun sma. (Leisi Kolosesma 3:10-14.) Wi o luku tu fa wi kan sori den fasi disi na ini a preikiwroko.

 „UN ALAMALA DE WÁN”

3. San na wan fu den fasi di wi musu abi te wi tron nyun sma?

3 Paulus e sori taki fu man tron nyun sma, dan wi no musu desko trawan. A taki: „A no abi trobi efu a de wan Grikisma noso wan Dyu, efu a besnèi noso efu a no besnèi, efu a de wan trakondre sma, wan Skitsma, wan srafu noso wan friman.” * Fu san ede wi no musu desko sma fu wan tra ras, sma fu tra kondre, noso sma di gudu noso pôti? Fu di trutru bakaman fu Krestes „de wán”.​—Kol. 3:11; Gal. 3:28.

4. (a) Fa futuboi fu Yehovah musu libi nanga trawan? (b) Sortu situwâsi kan meki en muilek gi Kresten fu de na ini wánfasi?

4 Sma di kisi nyun fasi e sori lespeki gi brada nanga sisa èn gi tra sma, awinsi den gudu noso pôti èn awinsi fu sortu ras den de (Rom. 2:11). A sani disi kan de wan problema na ini son kondre. Fu eksempre, na ini Zuid-Afrika furu Kotoigi e libi ete na ini kontren pe sma di no de fu a srefi ras no mag tan na ini wán birti. Furu Kotoigi e libi ete na ini den kontren dati. Dati meki a Tiri Skin ben wani gi den brada nanga sisa deki-ati fu ’opo den ati moro gi makandra’. Sobun, na ini oktober 2013, den agri nanga wan spesrutu seti di ben o yepi den brada nanga sisa fu kon sabi makandra moro bun (2 Kor. 6:13). San ben de a seti disi?

5, 6. (a) Sortu seti ben musu yepi fu tyari wánfasi kon na mindri a pipel fu Gado na ini Zuid-Afrika? (Luku a prenki na a bigin fu na artikel.) (b) Sortu bakapisi den ben abi?

5 Den brada seti sani so taki tu gemeente di no ben e taki a srefi tongo, noso di ben abi brada nanga sisa fu wan tra ras ben e moksi nanga makandra tapu son satra nanga sonde. Brada nanga sisa fu den tu gemeente ben e wroko na ini a preikiwroko, den ben e go na a srefi konmakandra, èn den ben e go na makandra oso fu abi switi demakandra. Hondrohondro gemeente ben e teki prati na a sani disi èn furu sma skrifi go na a bijkantoro fu taki fa den ben lobi a seti disi. Srefi sma di no de Kotoigi ben skrifi brifi. Fu eksempre, wan domri ben taki: „Mi a no wan Kotoigi, ma mi musu taki dati a preikiwroko fu unu seti heri bun èn den memre fu unu de na ini wánfasi aladi den de fu difrenti ras.” Fa den Kotoigi ben feni a seti disi?

6 Na a bigin, Noma, wan sisa di e taki Eksosatongo ben e tweifri fu kari weti brada nanga sisa fu wan Ingrisitongo gemeente kon na a pôti oso fu en. Ma baka di a wroko makandra nanga weti Kotoigi na ini a preikiwroko èn a go na den oso, dan a taki: „Den de leki wi!” Sobun, di a Eksosatongo gemeente fu en ben musu sori switifasi gi na Ingrisitongo gemeente, dan a bori wan nyanyan èn a kari wan tu brada nanga sisa kon. Wan fu den ben de wan weti owruman. Noma taki: „Mi ben lobi taki a no ben si en leki wan problema fu sidon na tapu wan plastik krat.” Fu di den gemeente e tan moksi nanga makandra, meki furu brada nanga sisa meki nyun mati èn den e tan du muiti fu leri sabi makandra moro bun.

SORI TRUTRU SARI-ATI NANGA SWITIFASI

7. Fu san ede wi musu tan sori sari-ati gi sma?

7 Solanga a grontapu fu Satan no kon na wan kaba, wi o tan kisi tesi. A kan pasa taki wi e lasi wi wroko noso taki wi e kisi wan seryusu siki. Kande sma e frufolgu wi, kande wan bigi rampu e pasa, kande ogrisma e fufuru den gudu fu wi, noso kande wi e kisi tra problema. Fu man yepi den brada nanga sisa fu wi te den e pina noso te den  abi problema, dan wi musu abi sari-ati nanga den. Te wi abi sari-ati nanga sma, dan wi o sori switifasi gi den (Ef. 4:32). Te wi e sori den fasi disi, dan wi o de leki Gado èn wi o de wan trowstu gi trawan.​—2 Kor. 1:3, 4.

8. Sortu bun bakapisi a abi te wi e sori sari-ati nanga switifasi gi ala sma na ini a gemeente? Gi wan eksempre.

8 Fa wi kan sori taki wi e broko wi ede nanga trakondre sma nanga pôtisma na ini wi gemeente? Wi musu tron mati fu den sortu sma dati èn wi musu yepi den fu kon si taki den prenspari gi a gemeente (1 Kor. 12:22, 25). Luku san pasa nanga Dannykarl di froisi gowe libi den Filippijnen fu go tan na Yapan. Sma na en wrokope no ben e libi so bun nanga en leki fa den ben e du dati nanga den wrokoman fu a kondre dati. Ne a go na wan konmakandra fu Yehovah Kotoigi. Dannykarl e taki: „Pikinmoro ala sma drape ben de sma fu Yapan, ma toku den gi mi wan switikon, neleki den ben de owru mati fu mi.” Den brada nanga sisa tan sori switifasi gi en, èn a sani dati yepi en fu go na fesi. A teki dopu, èn tide na a dei a e dini leki owruman. Den tra owruman na ini a gemeente fu Dannykarl e si en nanga en wefi leki wan blesi gi a gemeente. Den owruman e taki fu den: „Leki pionier den de tevrede nanga den moro prenspari sani di den abi fanowdu èn den de wan bun eksempre fu di den e poti a Kownukondre na a fosi presi.”​—Luk. 12:31.

9, 10. Gi wan tu eksempre fu sori sortu blesi wi e kisi te wi e sori sari-ati gi sma na ini a preikiwroko.

9 Te wi e preiki a Kownukondre boskopu gi trawan, dan dati e gi wi na okasi fu du „bun gi ala sma” (Gal. 6:10). Furu Kotoigi e du muiti fu leri wan nyun tongo, fu di den abi sari-ati nanga sma di gowe libi a kondre fu den (1 Kor. 9:23). A sani disi tyari furu blesi kon gi den. Fu eksempre, Tiffany, wan pionier sisa na ini Australia leri Swahilitongo so taki a ben man yepi wan Swahilitongo gemeente na ini a foto Brisbane. Aladi a no ben makriki gi Tiffany fu leri a tongo, toku a kisi furu blesi. A e taki: „Efu yu wani ondrofeni span sani na ini a diniwroko fu yu, dan yu musu go dini na ini wan gemeente pe sma e taki wan tra tongo. A de neleki yu e go na wan tra kondre, sondro taki yu e gowe libi yu foto. Yu e kon leri sabi difrenti brada nanga sisa èn yusrefi e si fa a switi fu de na ini wánfasi.”

Fu san ede Kresten preikiman e yepi sma di gowe libi den kondre? (Luku paragraaf 10)

10 Luku sosrefi na eksempre fu wan osofamiri na ini Yapan. Sakiko, na umapikin fu na osofamiri disi e fruteri: „Na ini den yari baka 1990, wi ben gwenti miti sma fu  Brasyonkondre te wi ben de na ini a preikiwroko. Te wi ben e sori den Bijbeltekst soleki Openbaring 21:3, 4 noso Psalm 37:10, 11, 29 na ini a Potogisi Bijbel fu den, dan den ben e arki èn son leisi den ben e krei srefi.” Ma dati a no ala san na osofamiri disi du. Sakiko e taki: „Di wi si fa den ben e angri fu kon sabi moro fu Gado, dan wi bosroiti fu leri Potogisitongo leki osofamiri.” Bakaten, na osofamiri disi yepi fu seti wan Potogisitongo gemeente. Na ini den yari di pasa, a famiri disi yepi furu sma di ben gowe libi a kondre fu den, fu tron futuboi fu Yehovah. Sakiko e taki: „Wi ben musu du tranga muiti fu leri Potogisitongo, ma a muiti dati na noti te wi e luku den blesi di wi kisi. Wi de nanga tangi trutru taki Yehovah gi wi den blesi disi.”​—Leisi Tori fu den apostel 10:34, 35.

UN MUSU ABI SAKAFASI

11, 12. (a) Fu san ede wi musu abi a yoisti denki te wi e du muiti fu tron sma di abi nyun fasi? (b) San o yepi wi fu tan sori sakafasi?

11 Wi musu tron sma di abi nyun fasi fu di wi wani gi Yehovah grani. Wi no musu du dati fu kisi grani fu sma. Hori na prakseri taki srefi wan engel di no ben abi sondu kisi heimemre èn na so a du wan bigi sondu. (Luku Esekièl 28:17.) A no de fu taki dati sondu libisma kan kisi heimemre moro makriki! Toku wi man sori sakafasi. San o yepi wi fu du dati?

12 Fu man tan sori sakafasi, wi musu meki ten ibri dei fu denki dipi fu den sani di wi e leisi na ini Gado Wortu (Deut. 17:18-20). San prenspari, na taki wi musu prakseri fu den sani di Yesus leri wi èn fu a sakafasi di a sori (Mat. 20:28). Yesus ben wasi den futu srefi fu den apostel fu en (Yoh. 13:12-17). Wi musu begi Gado doronomo tu fu gi wi en santa yeye so taki wi no e kisi a denki taki wi bun moro trawan.​—Gal. 6:3, 4; Fil. 2:3.

13. Sortu blesi wi o kisi te wi abi sakafasi?

13 Leisi Odo 22:4. Ala tru anbegiman musu abi sakafasi èn dati o tyari bigi blesi kon gi den. Te wi abi sakafasi, dan dati o yepi wi fu tyari wánfasi nanga freide kon na ini a gemeente. Te wi e tan du muiti fu sori sakafasi, dan wi o si a bun-ati fu Yehovah. Na apostel Petrus ben taki: „Un alamala musu abi sakafasi te unu de nanga makandra, bika Gado e kakafutu gi den wan di abi heimemre, ma a e sori bun-ati gi den sma di abi sakafasi.”​—1 Petr. 5:5.

UN MUSU ABI SAFRI-ATI NANGA PASENSI

14. Suma na a moro bun sma di kan sori wi san na trutru safri-ati nanga pasensi?

14 Na ini a grontapu fu tide, sma e si den wan di abi safri-ati nanga pasensi leki swaki sma. Ma a no tru kwetikweti taki den sma disi swaki. Den moi fasi disi e komoto fu a moro makti sma na hemel èn na grontapu. Yehovah na a moro bun sma di kan sori wi san na trutru safri-ati nanga pasensi (2 Petr. 3:9). Luku san a meki wan engel piki Abraham nanga Lot di den aksi en fu du son sani (Gen. 18:22-33; 19:18-21). Boiti dati, moro leki 1500 yari, Yehovah hori pasensi nanga a tranga-ede pipel fu Israel.​—Esek. 33:11.

15. San wi e leri te wi e luku fa Yesus sori safri-ati nanga pasensi?

15 Yesus ben abi „safri-ati” (Mat. 11:29). Fu di a ben abi pasensi meki a ben man frudrage den swakifasi fu den bakaman fu en. Di a ben e du a diniwroko fu en na grontapu, dan a no lasi pasensi di gensman fu tra bribi krutu en sondro taki a ben du ogri. Di Yesus ben e nyan pina na a pinapostu, a begi taki en Tata gi den sma di ben du ogri nanga en pardon fu di, soleki fa a ben taki,  ’den no ben sabi san den ben e du’ (Luk. 23:34). Dati na wan heri moi fasi fa a sori safri-ati nanga pasensi di a ben e nyan pina!​—Leisi 1 Petrus 2:21-23.

16. Na sortu fasi wi kan sori safri-ati nanga pasensi?

16 Fa wi kan sori safri-ati nanga pasensi? Paulus ben taki fa wi kan du dati di a skrifi den Kresten brada nanga sisa fu en. A taki: „Tan frudrage makandra èn gi makandra pardon nanga un heri ati, srefi te wan sma feni taki wan trawan du wan hati sani nanga en. Soleki fa Yehovah e gi unu pardon nanga en heri ati, na so un musu gi trawan pardon tu” (Kol. 3:13). A tru taki wi musu abi safri-ati nanga pasensi fu man du den sani disi. Te wi de klariklari fu gi trawan pardon, dan wi e yepi fu sorgu taki a gemeente e tan na ini wánfasi.

17. Fu san ede safri-ati nanga pasensi prenspari?

17 Yehovah wani taki ibri Kresten musu abi safri-ati nanga pasensi. Den fasi disi prenspari efu wi wani libi na ini a nyun grontapu fu en (Mat. 5:5; Yak. 1:21). San moro prenspari, na taki te wi abi den fasi disi, dan wi e gi grani na Yehovah èn wi e yepi trawan fu du a srefi.​—Gal. 6:1; 2 Tim. 2:24, 25.

„MEKI LOBI KON DE LEKI WAN KROSI NA UN SKIN”

18. San wi no o du te wi abi lobi?

18 Ala den fasi di wi luku na ini na artikel disi abi fu du nanga lobi. Fu eksempre, a disipel Yakobus ben musu piri-ai gi den brada nanga sisa fu di den ben e desko den pôtiwan. A sori den taki den ben e pasa a moro hei wet di e taki: „Yu musu lobi tra sma leki fa yu lobi yusrefi.” A ben taki moro fara: „Efu unu e tan gi a wan sma moro grani leki a trawan, dan unu e du wan sondu” (Yak. 2:8, 9). Ma te wi abi lobi, dan wi no o desko sma fu di den no kisi heiskoro, fu di den de fu wan spesrutu ras, noso fu di den pôti. A fasi fa wi e libi nanga trawan musu sori krin taki wi no e desko nowan sma.

19. Fu san ede a prenspari taki wi e sori lobi?

19 Boiti dati, lobi „abi pasensi èn a abi switifasi” èn „a no abi heimemre” (1 Kor. 13:4). A no de fu taki dati wi musu abi pasensi, switifasi, nanga sakafasi fu man tan preiki a Kownukondre boskopu gi tra sma (Mat. 28:19). Den srefi fasi disi e meki en moro makriki gi wi fu feni en nanga ala den brada nanga sisa na ini a gemeente. Sortu blesi wi o kisi te wi e sori a lobi dati? A sani disi e meki taki a wánfasi di de na ini den gemeente e gi grani na Yehovah èn a e hari nyun sma kon na a gemeente. Dati meki Bijbel e taki a prenspari sani disi sosrefi: „Boiti den sani disi, un musu meki lobi kon de leki wan krosi na un skin, bika lobi e meki sma kon de wán trutru.”​—Kol. 3:14.

„TAN DU MUITI FU MEKI A DENKI FU UNU KON NYUN”

20. (a) Sortu sani wi musu aksi wisrefi, èn fu san ede? (b) Sortu ten wi e fruwakti?

20 Ibriwan fu wi musu aksi ensrefi: ’San moro mi musu du fu kenki a fasi fa mi ben de fosi èn fu no libi na a fasi dati moro?’ Wi musu begi Gado fayafaya fu yepi wi èn wi musu du tranga muiti fu wai pasi gi denki noso gwenti di o tapu wi fu kisi a Kownukondre fu Gado (Gal. 5:19-21). Wi musu aksi wisrefi a sani disi tu: ’Mi e tan du muiti fu meki a denki fu mi kon nyun?’ (Ef. 4:23, 24) Wi na sondusma èn fu dati ede wi musu tan meki muiti fu tron sma di kisi nyun fasi. Noiti wi kan tapu nanga a sani disi. Prakseri fa a libi o switi te ala sma di wi sabi tron nyun sma di no abi nowan sondu!

^ paragraaf 3 Na ini Bijbel ten, sma ben e si den Skitsma leki wisiwasi sma.