Go na content

Go na a tra menu

Go na table of contents

Yehovah Kotoigi

Sranantongo

Studie-Waktitoren  |  augustus 2017

Aksi fu leisiman

Aksi fu leisiman

Fu san ede den sani di Mateyus nanga Lukas fruteri fu Yesus en yongu yari e difrenti fu makandra?

Den sani di Mateyus fruteri fu a ten di Yesus gebore, e difrenti pikinso fu den sani di Lukas fruteri. Disi e kon fu di Mateyus e taki fu tori di abi fu du nanga Yosef èn Lukas e taki moro furu fu Maria.

A tori fu Mateyus e sori wi san Yosef du di Maria fruteri en taki a ben de nanga bere. A e fruteri fa wan engel fruteri Yosef na ini wan dren san ben pasa nanga Maria èn fa Yosef du san na engel ben taigi en (Mat. 1:19-25). Mateyus e fruteri moro fara fa wan engel taigi Yosef na ini wan dren taki a musu lowe go na Egepte, a e fruteri fa Yosef lowe nanga en osofamiri, fa wan engel taigi en na ini wan dren taki a musu drai go baka na Israel, èn taki a drai go baka drape èn bosroiti fu go libi nanga en osofamiri na Nasaret (Mat. 2:13, 14, 19-23). Na ini den fosi kapitel fu na Evangelietori di Mateyus skrifi, Yosef en nen kari tin leisi, aladi Maria nen kari feifi leisi nomo.

Na a tra sei, Lukas e fruteri wi fa na engel Gabrièl kon na Maria, fa Maria go luku en tante Elisabet èn fa Maria prèise Yehovah (Luk. 1:26-56). Lukas e fruteri tu taki Simeon ben taigi Maria taki Yesus ben o pina na ini a ten di ben o kon. Srefi te Lukas e fruteri taki na osofamiri fu Yesus go na a tempel di Yesus ben abi 12 yari, dan Lukas no e skrifi san Yosef ben taki, ma a skrifi san Maria ben taki (Luk. 2:19, 34, 35, 48, 51). Na ini den fosi tu kapitel fu na Evangelietori fu Lukas, Maria nen kari 13 leisi, ma di fu Yosef kari fo leisi nomo. Sobun, Mateyus e taki moro fu den broko-ede fu Yosef èn fu den sani di a du, aladi Lukas e taki moro furu fu Maria èn fu den sani di Maria ondrofeni.

Na so a de tu taki te den tu Evangelie skrifiman disi e kari den afo fu Yesus, dan den no e kari den srefi afo. Mateyus e taki fu den afo fu Yosef èn a e sori taki Yesus di ben de a kwekipikin fu Yosef, ben abi a reti fu tron kownu. Fu san ede wi kan taki dati? Fu di Yosef ben de wan bakapikin fu Salomo èn na so a ben de wan bakapikin fu Kownu David, a papa fu Salomo (Mat. 1:6, 16). Ma Lukas e taki fu den afo fu Maria èn a e sori taki Yesus ben de wan trutru „bakapikin” fu Kownu David (Rom. 1:3). Fu san ede wi kan taki dati? Fu di Maria ben de wan bakapikin fu Natan, èn na so a ben de wan bakapikin tu fu Kownu David di ben de a papa fu Natan (Luk. 3:31). Ma fu san ede Lukas no e kari Maria leki na umapikin fu Eli, te a e kari den afo fu Maria? Fu di a gwenti ben de taki te sma ben e luku suma na den afo fu wan sma, dan den ben e kari soso den nen fu den mansma. Sobun, te Lukas e kari Yosef leki a manpikin fu Eli, dan dati wani taki dati Yosef ben de a masra fu Eli en umapikin.​—Luk. 3:23.

Den afo di Mateyus nanga Lukas kari e sori krin taki Yesus na a Mesias di ben o kon. Fu taki en leti, ala sma ben sabi taki Yesus ben de wan bakapikin fu David. Dati meki srefi den Fariseiman nanga den Saduseiman no ben man taki dati a sani disi no tru. Na ini a ten disi, den Evangelietori fu Mateyus nanga Lukas di e sori suma na den afo fu Yesus e tranga a bribi fu wi èn den e gi wi a dyaranti taki den pramisi fu Gado o kon tru.