Go na content

Go na a tra menu

Go na table of contents

Yehovah Kotoigi

Sranantongo

Studie-Waktitoren  |  augustus 2017

 A HISTORIA FU WI

„O ten wan tra bigi konmakandra o hori?”

„O ten wan tra bigi konmakandra o hori?”

NA A kaba fu november 1932, den nyunsuman na ini Meksikow City ben e poti prakseri na wan prenspari afersi. Wan wiki na fesi, den ben e taki fu den fosi stoplicht di ben poti na ini a foto dati pe moro leki wán milyun sma ben e tan. Ma now den stoplicht ben de owru tori. Den nyunsuman fu a foto ben e taki soso fu a sani di ben o pasa a wiki dati. Nyunsuman ben de srekasreka nanga den kamera fu den e wakti na a stadion pe den loko e pasa. Den ben e wakti Joseph F. Rutherford, a presidenti fu a Waktitoren Genootschap. Furu Kotoigi ben lai drape tu fu gi Brada Rutherford wan switikon. A brada disi ben kon gi a dri dei kongres fu den di ben o hori.

A tijdschrift Het Gouden Tijdperk ben taki: „A no de fu taki dati sma o kon sabi a kongres disi leki wan fu den moro prenspariwan di hori fu meki sma na ini Meksikow kon sabi den tru tori fu Bijbel.” Ma fu san ede a kongres disi ben de so prenspari, te 150 sma nomo ben de drape?

Fosi a kongres dati hori, furu sma na ini Meksikow no ben sabi den tru tori fu Bijbel. Sensi 1919 wan tu bigi konmakandra ben hori na ini a kondre, ma na ini den yari baka dati a nomru fu gemeente kon saka. Di a bijkantoro na ini Meksikow City opo na ini 1929, den brada ben howpu taki a wroko ben o go na fesi. Ma wan tu sani ben e gens a wroko. Di wan pionier kisi a rai fu no du bisnis te a ben de na ini a preikiwroko, dan a atibron èn a go seti en eigi Bijbelstudie grupu. Boiti dati, a bijkantoro-opziener no ben tyari ensrefi na wan fasi di e kruderi nanga Bijbel èn den ben musu poti wan tra brada na ini a presi fu en. Den reti-ati Kotoigi na ini Meksikow ben musu kisi deki-ati.

Di Brada Rutherford ben de drape, dan a hori tu moi lezing na a kongres èn feifi tapu radio. Den krakti lezing disi ben de wan bigi deki-ati gi den brada nanga sisa di ben e gi yesi na Yehovah. Disi ben de a fosi leisi di a bun nyunsu prati na ini heri Meksikow nanga yepi fu radio. Baka a kongres, a nyun bijkantoro-opziener orga a wroko èn den Kotoigi ben e du a wroko nanga moro faya now èn den ben e firi taki Yehovah ben e horibaka gi den.

A kongres fu 1941, na ini Meksikow City

A yari baka dati, den hori tu kongres na ini a kondre, wan na ini a foto Veracruz èn a trawan na ini Meksikow City. Fu di den brada nanga sisa ben wroko tranga na ini a preikiwroko meki a wroko bigin go na fesi. Na ini 1931 den ben abi 82 preikiman. Tin yari baka dati tin tron so furu preikiman ben de na ini a kondre! Pikinmoro 1000 Kotoigi kon na Meksikow City gi a kongres di hori na ini 1941.

„DEN BEN LAI NA STRATI”

Na ini 1943, den Kotoigi ben hori wan preikiwaka pe den ben e anga wan bord na fesisei fu den èn wan na bakasei fu meki bekènti taki a „Vrije Natie”-kongres ben o hori. A kongres disi hori na ini 12 foto fu  Meksikow. * Sensi 1936, den Kotoigi ben meki sani bekènti nanga yepi fu den sortu bord disi.

Wan fowtow na ini wan tijdschrift fu 1944 e sori fa den brada nanga sisa e waka nanga bord na den fesi èn na den baka na ini Meksikow City

A tijdschrift La Nación ben taki fu den bun bakapisi di den Kotoigi ben abi nanga a preikiwaka di den hori na ini Meksikow City. A tijdschrift disi skrifi: „A fosi dei [fu a kongres, den Kotoigi] ben kisi a rai fu kari moro sma kon na a kongres. A dei baka dati den sma no ben fiti moro na ini a zaal.” Lomsu Kerki no ben lobi den preikiwaka disi èn den bigin gens den Kotoigi. Ma aladi den ben kisi gens, toku furu brada nanga sisa ben tan teki prati na den preikiwaka disi. A tijdschrift La Nación ben taki tu: „A heri foto ben si den . . . man nanga uma di ben waka nanga wan bord na den fesi èn na den baka fu meki wan boskopu bekènti.” Na ini a tijdschrift, wan fowtow ben de fu den brada nanga sisa na den strati fu Meksikow City. Na ondro a fowtow ben skrifi: „Den ben lai na strati.”

BEDI DI „SAFU ÈN WARAN MORO A STON GRON”

Na ini den yari dati, a no ben makriki gi den Kotoigi fu go na den kongres na ini Meksikow. Furu fu den brada nanga sisa ben e komoto na farawe dorpu pe loko no ben de èn son leisi ston pasi srefi no ben de drape. Sobun, den sma di ben kon na a kongres ben musu rèi tapu buriki, noso den ben musu waka omeni dei langa fu go teki wan loko di ben o tyari den go na a foto pe a kongres ben o hori.

Furu fu den Kotoigi ben pôti èn a no ben makriki gi den fu feni a moni fu go na a kongres. Te den ben doro na ini a foto, dan furu fu den ben e tan na den oso fu den Kotoigi drape. Den brada nanga sisa dati ben gi den wan switikon. Tra brada nanga sisa ben e sribi na ini Kownukondre zaal. Wan leisi, sowan 90 brada nanga sisa sribi na a bijkantoro. Den ben sribi tapu bedi di ben meki fu dosu nanga buku. A Yaribuku ben taki dati den brada nanga sisa ben de nanga tangi fu di den bedi di sma ben meki gi den ben „safu èn waran moro a ston gron”.

A no de fu taki dati den Kotoigi di ben du so furu muiti fu de na den kongres ben prisiri fu de makandra nanga den brada nanga sisa fu den. Tide na a dei a nomru fu preikiman na ini Meksikow, e kren go miti wán milyun safrisafri. Disi e sori taki den brada nanga sisa de nanga tangi te now ete. * Na ini 1949 a bijkantoro fu Meksikow ben meki wan raportu pe den ben taki fu den brada nanga sisa: „Aladi a no makriki gi den, toku den no lasi a faya di den abi gi a tru anbegi, bika ibri leisi te wan kongres hori, den e tan taki fu en wan heri pisi ten baka dati. Èn a sani di den e aksi ala ten baka na: ’O ten wan tra bigi konmakandra o hori?’” Neleki fa a ben de na a ten dati, na so a de tu na ini a ten disi.​—A historia fu wi na ini Mindri-Amerika.

^ paragraaf 9 A Yaribuku fu 1944 ben taki dati a kongres disi meki taki „furu sma kon sabi den Yehovah Kotoigi na ini Meksikow”.

^ paragraaf 14 Na ini Meksikow, 2.262.646 sma ben de na a Memrefesa na ini 2016.