Go na content

Go na a tra menu

Go na table of contents

Yehovah Kotoigi

Sranantongo

Studie-Waktitoren  |  augustus 2017

Lobi​—Wan tumusi moi fasi

Lobi​—Wan tumusi moi fasi

SANTA yeye ben meki na apostel Paulus skrifi fu den neigi „fasi di a yeye e meki sma kisi” (Gal. 5:22, 23). * Na den neigi fasi disi wan sma musu abi te a tron wan „nyun sma” (Kol. 3:10). Neleki fa wan bon o gi froktu te sma e sorgu en bun, na so wan sma o sori den fasi disi te santa yeye abi krakti tapu en libi.​—Ps. 1:1-3.

A fosi fasi fu a yeye di Paulus ben taki fu en, na lobi. O prenspari a fasi disi de? Paulus ben taki dati sondro lobi a „no de noti” (1 Kor. 13:2). Ma san na lobi? Fa wi kan kon abi en èn fa wi kan sori en ibri dei?

SAN NA LOBI?

Aladi a no makriki fu taki krin san na lobi, toku Bijbel e sori fa wan sma di abi lobi e denki èn e tyari ensrefi. Fu eksempre, Bijbel e taki dati lobi „abi pasensi èn a abi switifasi”. Boiti dati, wan sma di abi lobi e „prisiri nanga sani di tru”, a e „frudrage ala sani, a e bribi ala sani, a e howpu ala sani, èn a e horidoro awansi san e pasa”. Wan sma di abi lobi e firi tu gi trawan èn a e broko en ede trutru nanga den. Boiti dati a e tai hori na trawan fu di a abi warderi gi den trutru. Ma nofo tron wan sma di no abi lobi e dyarusu, a abi heimemre, a no e tyari ensrefi na wan bun fasi, a e denki ensrefi nomo èn a e weigri fu gi trawan pardon. Tra fasi leki den sma dati, wi wani sori trutru lobi gi trawan, iya, wi no wani ’suku wi eigi bun’.​—1 Kor. 13:4-8.

A FASI FA YEHOVAH NANGA YESUS E SORI LOBI

„Gado na lobi” (1 Yoh. 4:8). Den sani di a meki èn den sani di a du e sori taki a lobi wi. A moro bigi sani di Gado du gi libisma, na taki a seni Yesus kon na grontapu fu pina èn fu dede fu a bun fu wi. Na apostel Yohanes ben taki: „Disi na a fasi fa Gado sori taki a lobi wi: Gado ben seni en wan-enkri Manpikin kon na grontapu, so taki a kan yepi wi fu kisi libi. A lobi disi no wani taki dati na wi ben lobi Gado, ma taki en ben lobi wi èn a seni en Manpikin kon leki wan ofrandi di e tapu den sondu fu wi èn di e meki wi kon bun baka nanga Gado” (1 Yoh. 4:9, 10). Fu di Gado lobi wi, meki a e gi wi pardon fu sondu, wi abi wan howpu èn wi kan kisi têgo libi.

Yesus sori taki a lobi libisma di a dede gi den soleki fa Gado ben wani. Paulus ben skrifi: „[Yesus] taki: ’Luku, mi kon fu du yu wani.’ . . . Na a ’wani’ fu Gado di den e taki fu en dyaso, meki wi kon santa, fu di Yesus Krestes gi en skin leki wan ofrandi wán leisi nomo fu ala ten” (Hebr. 10:9, 10). Nowan sma kan sori moro lobi leki en. Yesus ben taki: „A moro bigi lobi di wan sma kan sori, na fu gi en libi gi den mati fu en” (Yoh. 15:13). Ma wi leki sondu libisma kan sori lobi na a fasi fa Yehovah nanga Yesus ben sori dati? Iya! Meki wi luku fa wi kan du dati.

 „TAN LOBI MAKANDRA”

Paulus e gi wi a rai disi: „Teki na eksempre fu Gado leki lobi pikin. Tan lobi makandra neleki fa Krestes ben lobi unu tu. A gi en libi leki wan ofrandi gi unu” (Ef. 5:1, 2). Te wi e „tan lobi makandra”, dan wi e sori lobi doronomo. A no den sani di wi e taki nomo e sori taki wi abi a lobi disi, ma sosrefi den sani di wi e du. Yohanes ben skrifi: „Un pikin, wi no musu taki nanga wi mofo nomo taki wi lobi makandra, ma nanga wan krin ati wi musu du sani fu sori taki wi lobi makandra” (1 Yoh. 3:18). Fu eksempre, te wi lobi Gado nanga tra sma, dan wi o de klariklari fu preiki ’a bun nyunsu fu a Kownukondre’ gi den (Mat. 24:14; Luk. 10:27). Wi e sori tu taki wi abi lobi te wi abi pasensi, te wi abi switifasi, èn te wi de klariklari fu gi trawan pardon. Dati meki Bijbel e gi wi a rai disi: „Soleki fa Yehovah e gi unu pardon nanga en heri ati, na so un musu gi trawan pardon tu.”​—Kol. 3:13.

Ma te wi abi trutru lobi gi trawan, dan dati no wani taki dati wi e tapu wi ai gi iniwan sani di den e du, awansi wi sabi taki den sani dati no bun. Fu eksempre, kande wan papa noso wan mama e gi a pikin fu en iniwan sani di a wani soso fu di a no wani taki a pikin krei. Ma efu den abi trutru lobi gi a pikin fu den, dan den o gi en piri-ai te dati de fanowdu. Yehovah na lobi, ma a e „strafu a sma di a lobi” (Hebr. 12:6). Te wi abi lobi, dan wi o gi trawan piri-ai tu te dati de fanowdu èn na wan fasi di fiti (Odo 3:11, 12). A no de fu taki, dati te wi e du dati wi musu hori na prakseri taki wi abi sondu tu èn taki son leisi wi srefi no e sori lobi. Sobun, wi alamala musu tan du muiti fu sori moro lobi. Fa wi musu du dati? Meki wi luku dri fasi fa wi kan du dati.

FA WI KAN SORI LOBI?

A fosi sani, na taki yu musu aksi Gado fu gi yu a yeye fu en di e meki taki wi e kon abi lobi. Yesus ben taki dati Yehovah e gi „santa yeye na den sma di e aksi en” (Luk. 11:13). Te wi e begi fu kisi santa yeye èn te wi e meki muiti fu „tan du san a yeye wani”, dan wi o man sori moro lobi gi trawan (Gal. 5:16). Fu eksempre, efu yu na wan owruman na ini a Kresten gemeente, dan yu kan aksi Gado fu gi yu en santa yeye so taki yu kan gi trawan rai fu Bijbel na wan lobi-ati fasi. Noso efu yu na wan papa noso wan mama, dan yu kan aksi Gado fu gi yu en santa yeye so taki yu kan gi den pikin fu yu piri-ai na wan lobi-ati fasi na presi fu du dati nanga atibron.

A di fu tu sani, na taki yu musu luku fa Yesus sori lobi srefi te dati no ben makriki gi en (1 Petr. 2:21, 23). Te sma du wan hati sani nanga wi noso te sma du ogri nanga wi, dan a prenspari fu prakseri na eksempre fu Krestes. Te den sortu sani dati e miti wi, dan a bun fu aksi wisrefi a sani disi: ’San Yesus ben o du?’ Wan sisa di nen Leigh, kon si taki te a ben e aksi ensrefi a sani disi, dan dati ben e yepi en fu denki bun fosi a du wan sani. A e fruteri: „Wan leisi, wan sma na mi wrokope seni wan e-mail gi den tra sma na wroko, èn na ini na e-mail dati a taki takru fu mi èn fu a wroko di mi ben du. A sani dati hati mi. Ma dan mi aksi misrefi: ’San Yesus ben o du efu a sani disi ben pasa nanga en?’ Baka di mi prakseri san Yesus ben o du, dan mi bosroiti fu libi a sani. Bakaten mi kon sabi taki a sma di ben du a sani dati nanga mi ben abi wan seryusu problema nanga a gosontu fu en èn a sani dati ben e gi en broko-ede. Mi prakseri taki kande a no ben skrifi a sani fu espresi. Fu di mi prakseri fa Yesus sori lobi srefi di a no ben makriki gi en, dan dati yepi mi fu sori a srefi sortu lobi dati tu gi a sma na mi wrokope.” Iya, efu wi e teki na eksempre fu Yesus, dan ala ten wi o sori lobi.

A di fu dri sani, na taki yu musu leri fu abi trutru lobi, fu di na a lobi dati tru Kresten e sori gi trawan (Yoh. 13:34, 35). Dati meki Bijbel e gi wi a deki-ati fu kon abi a „srefi denki” di Yesus ben abi. Di Yesus gowe libi hemel, „a gowe libi ala san a ben abi” fu a bun fu wi, èn  a „dede na wan pinapostu” srefi (Fil. 2:5-8). Te wi e sori a srefi lobi di Yesus ben abi, dan dati o yepi wi fu denki leki Krestes èn fu firi soleki fa en ben e firi. Na so wi o du muiti fu suku a bun fu trawan na presi fu suku wi eigi bun. Sortu tra wini wi o kisi te wi e suku fu kon abi lobi?

DEN WINI DI WI O KISI TE WI E SORI LOBI

Te wi e sori lobi, dan wi o kisi furu wini. Luku tu eksempre:

Fa wi e kisi wini te wi e sori lobi?

  • WI ABI BRADA NANGA SISA NA HERI GRONTAPU: Fu di wi lobi makandra, meki wi sabi taki awansi sortu gemeente wi go na grontapu, den brada nanga sisa o gi wi wan switikon. A de wan blesi trutru taki wi abi brada nanga sisa „na heri grontapu” di lobi wi! (1 Petr. 5:9) Sortu tra pipel e sori a lobi disi gi makandra? A no a pipel fu Gado wawan?

  • WI ABI FREIDE: Te wi e „frudrage makandra” fu di wi lobi makandra, dan wi o de na ini „wánfasi” (Ef. 4:2, 3). Wi e si a wánfasi disi na den gemeente konmakandra, na den kring konmakandra èn na den kongres. A no de fu taki dati a fasi disi di a yeye e meki wi kisi no de fu feni makriki na ini a grontapu fu tide (Ps. 119:165; Yes. 54:13). Te wi e suku freide nanga trawan, dan wi e sori taki wi lobi den trutru èn na so wi hemel Tata o prisiri nanga wi.​—Ps. 133:1-3; Mat. 5:9.

„LOBI E GI SMA DEKI-ATI”

Paulus ben skrifi: „Lobi e gi sma deki-ati” (1 Kor. 8:1). Fa so? Na ini kapitel 13 fu a fosi brifi di Paulus ben skrifi gi den Korentesma, a e fruteri fa lobi e gi sma deki-ati. Wán sani, na taki lobi e suku a bun fu tra sma (1 Kor. 10:24; 13:5). Boiti dati, wan sma di abi lobi e denki trawan, a e hori den firi fu trawan na prakseri, a abi pasensi nanga trawan èn a abi switifasi. Te sma de so, dan moro lobi o de na ini osofamiri èn freide o de na ini den gemeente.​—Kol. 3:14.

A lobi di wi leki pipel abi gi Gado na a moro prenspari lobi di de, fu di a e tyari sma fu ala kulturu, ala ras, nanga ala tongo kon na wan so taki den e prisiri fu dini Yehovah leki „wán man” (Sef. 3:9). Dati meki ibri dei wi musu du muiti fu sori a tumusi moi fasi disi di a yeye fu Gado e meki sma kisi.

^ paragraaf 2 Disi na a fosiwan fu den neigi artikel pe wi o poti prakseri na ibriwan fu den fasi di a yeye fu Gado e meki sma kisi.