Go na content

Go na a tra menu

Go na table of contents

Yehovah Kotoigi

Sranantongo

Studie-Waktitoren  |  augustus 2016

Aksi fu leisiman

Aksi fu leisiman

Fu san ede Yesus feanti ati ben e bron taki en nanga den bakaman fu en no ben e wasi anu leki fa a Wet ben e taki?

Den feanti fu Yesus ben lobi suku fowtu na en nanga den bakaman fu en. Dati meki den ben kon nanga na aksi disi. A Wet fu Moses ben e sori san ben kan meki taki wan sma no krin moro. Fu eksempre, te wan man en syenpresi ben e puru wan sortu watrawatra sani, noso te wan uma ben e lasi brudu, dan den no ben krin. Wan sma di ben abi gwasi noso di ben fasi a dedeskin fu wan libisma noso fu wan meti no ben krin tu. A Wet ben e sori tu san sma ben musu du fu kon krin baka. Son leisi den ben musu tyari ofrandi, den ben musu wasi den skin, den ben musu wasi sani di den ben fasi, noso den ben musu natinati densrefi.Lef., kap. 11-15; Num., kap. 19.

Ma den Dyu leriman ben kon nanga moro wet srefi. Wan buku e taki dati ibri leisi te wan sma no ben de krin moro, den „ben e poti aksi gi en fu luku fa a du kon taki a no krin, omeni sma a meki taki no de krin moro, sortuwan fu den sani di a fasi ben kan kon krin baka noso no ben kan kon krin moro. Te fu kaba, den ben e taki san a ben musu du fu kon krin baka.”

Den feanti fu Yesus aksi en: „Fu san ede den disipel fu yu no e du san den sma fu fositen ben gwenti du, ma den e nyan nanga doti anu?” (Mark. 7:5) A no taki den kerki fesiman disi ben wani taigi Yesus taki den bakaman fu en ben o kon siki te den ben nyan nanga doti anu. Ma den ben meki wan wet taki sma ben musu kanti watra na tapu den anu, fosi den go nyan. A buku e taki moro fara: „Den man disi ben e taki tu sortu watrakan den ben musu gebroiki fu kanti watra, sortu watra ben bun fu gebroiki, suma ben musu kanti a watra èn sortu pisi fu na anu ben musu wasi.”

Luku san Yesus ben e denki fu den someni wet di den Dyu kerki fesiman ben meki. A taigi den: „A profeiti Yesaya ben abi leti di a ben taki fu unu na ini Gado Buku. A ben taki: ’A pipel disi e gi mi grani nanga den mofo, ma den ati de farawe fu mi [Yehovah]. Na fu soso den e tan anbegi mi, bika na den komando fu libisma den e leri trawan.’ Unu no e gi yesi na den komando fu Gado, ma unu e hori den gwenti fu libisma.”Mark. 7:6-8.