Go na content

Go na a tra menu

Go na table of contents

Yehovah Kotoigi

Sranantongo

Studie-Waktitoren  |  augustus 2016

Yu feni taki a de fanowdu fu go na fesi?

Yu feni taki a de fanowdu fu go na fesi?

„Tan meki muiti fu leisi gi sma, fu gi sma deki-ati èn fu gi leri.”1 TIM. 4:13.

SINGI: 45, 70

1, 2. (a) Fa Yesaya 60:22 kon tru na ini a ten disi fu a kaba? (b) San de fanowdu na ini a pisi fu Yehovah organisâsi di de na grontapu?

„A PIKIN grupu o tron wan grupu fu dusun èn a pikin pipel o tron wan makti pipel” (Yes. 60:22). A profeititori disi e kon tru na ini den lasti dei disi. Iya, na ini a dienstyari 2015, wi ben abi 8.220.105 Kownukondre preikiman na heri grontapu. A lasti pisi fu a profeititori musu abi krakti tapu ala Kresten, fu di wi hemel Tata e taki drape: „Mi, Yehovah, o meki disi pasa esi-esi te a ten doro.” Neleki fa sma na ini wan wagi kan si te a e bigin rèi moro tranga, na so wi e si tu taki a preikiwroko e go na fesi. San wi e du now di wi e si taki a wroko e go moro esi? Wi e du ala san wi man fu preiki a Kownukondre boskopu fayafaya? Furu brada nanga sisa e tron gewoon pionier noso yepi-pionier. Wi breiti tu te wi e si taki someni brada nanga sisa wani go dini na presi pe moro yepi de fanowdu noso taki den e yepi du tra wroko di abi fu du nanga a Kownukondre.

2 Ma wi e si tu taki moro nanga moro yepi de fanowdu. Sowan 2000 gemeente e seti ibri yari. Efu 5 owruman musu dini na ini ibri nyun gemeente, dan 10.000 dinari ini a diniwroko  musu tron owruman ibri yari. Disi wani taki dati dusundusun brada musu meki muiti fu man dini leki dinari ini a diniwroko. Boiti dati, awinsi wi na brada noso sisa, wi de seiker taki yu „abi furu fu du na ini a wroko fu Masra”.1 Kor. 15:58.

SAN WI MUSU DU FU KAN GO NA FESI?

3, 4. San yu wani du fu go na fesi?

3 Leisi 1 Timoteyus 3:1. Dyaso Paulus e prèise brada di e „suku fu” teki fesi na ini a gemeente. Te wan sma e suku fu teki wan sani di no de krosibei, dan a musu meki muiti fu en. Kande a musu langa en anu srefi fu grabu a sani disi hori. Na so a de tu te wan brada wani go na fesi. Kande a e denki san a wani du na ini a gemeente. A kan taki a no e dini ete leki wan dinari ini a diniwroko, ma a sabi taki a musu meki muiti fu kon abi den moi fasi di Kresten musu abi. A fosi sani di a e du, na taki a e meki muiti fu tron dinari ini a diniwroko. Baka wan pisi ten, a e howpu taki a lepi nofo fu tron wan owruman. Ma fosi a ten dati doro, a e tan du sani fu go na fesi so taki a man tyari moro frantwortu na ini a gemeente.

4 Na so a de tu nanga brada nanga sisa di wani tron pionier, di wani wroko na Betel noso di wani yepi bow Kownukondre zaal. Den srefi musu meki muiti fu go na fesi so taki te fu kaba den man du den wroko disi. Meki wi go luku now fa Gado Wortu e gi wi alamala deki-ati fu go na fesi na ini a tru anbegi.

DU MORO MUITI FU GO NA FESI

5. Fa yonguwan kan gebroiki a krakti fu den fu du moro na ini a diniwroko?

5 Yongusma kan du furu na ini a diniwroko fu di den tranga èn den gosontu. (Leisi Odo 20:29.) Son yongu brada na Betel e wroko na den presi pe den e druk Bijbel nanga den buku fu wi. Furu yongu brada nanga sisa e yepi fu bow Kownukondre zaal noso fu seti den baka. Te rampu de, dan yonguwan e wroko makandra nanga den moro lepi brada nanga sisa di go yepi pe a rampu pasa. Furu yongu pionier e go preiki na wan tra presi pe sma no yere a bun nyunsu ete noso den e leri wan tra tongo fu kan preiki gi trakondre sma.

6-8. (a) Fa wan yongu man kenki a fasi fa a ben e si a diniwroko èn san ben de a bakapisi? (b) Fa wi kan „tesi èn si taki Yehovah bun”?

6 Kande yu e frustan taki a prenspari fu du moro gi Yehovah. Ma a kan taki yu e firi leki fa wan brada di nen Aron ben e firi fosi. Aladi a gro kon bigi na ini wan Kresten osofamiri, a e taki: „Den konmakandra nanga a preikiwroko ben soi gi mi.” A ben wani dini Gado nanga prisiri, ma a ben firi taki a no ben de koloku. San a du?

7 Fu di Aron ben wani go na fesi, meki a bigin meki muiti fu leisi Bijbel ibri dei, fu sreka gi den konmakandra èn fu gi piki. A ben e begi ibri dei tu. Na so a lobi di a ben abi gi Yehovah kon moro tranga èn a bigin go na fesi. Sensi a ten dati, Aron kon lobi a pionierwroko, a go yepi na presi pe rampu ben pasa èn a go preiki na wan tra kondre. Now Aron e dini na Betel èn a de wan owruman. Fa a e si a libi di a abi now? A e taki: „Mi ’tesi èn si taki Yehovah bun’. Fu di Gado blesi mi, meki mi firi taki mi de na paiman na en èn mi wani du moro gi en. Disi meki taki mi e kisi moro blesi.”

8 A psalm skrifiman ben singi: „Den sma di e suku yepi na Yehovah, no o mankeri noti.” (Leisi Psalm 34:8-10.)  Iya, noiti Yehovah e frigiti den sma di e dini en fayafaya. Te wi e du ala san wi man na ini a diniwroko, dan wi srefi e „tesi èn si taki Yehovah bun”. Boiti dati, te wi e dini Gado nanga wi heri ati, dan wi o de koloku trutru.

HORIDORO ÈN NO KON WERI

9, 10. Fu san ede a prenspari taki wi e ’wakti nanga pasensi’?

9 Te yu e meki muiti fu go na fesi, ’yu musu wakti nanga pasensi’ tu (Mika 7:7). Yehovah o yepi den futuboi fu en ala ten, aladi a kan meki den wakti son leisi fosi den kisi wan grani noso kande den abi fu hori pasensi teleki a situwâsi fu den kon kenki. A ben pramisi Abraham taki a ben o gi en wan manpikin, ma Abraham ben abi fu sori bribi èn a ben musu abi pasensi (Hebr. 6:12-15). Aladi Abraham wakti omeni yari fosi Isak gebore, toku a no lasi-ati èn Yehovah gi en san a ben pramisi en.Gen. 15:3, 4; 21:5.

10 A no makriki fu wakti (Odo 13:12). Efu wi e tan prakseri den sani di e miti wi, wi kan lasi-ati. Dati meki a moro bun fu gebroiki wi ten na wan koni fasi so taki wi kan go na fesi. Luku dri fasi fa wi kan du dati.

11. Sortu moi fasi wan Kresten musu meki muiti fu kon abi èn fu san ede den fasi disi prenspari?

11 Meki muiti fu kon abi den moi fasi di Kresten musu abi. Te wi e leisi Gado Wortu èn wi e denki dipi fu en, wi o kon koni, wi o man si sani moro krin, wi o man krutu sani na wan reti fasi, wi o kisi sabi èn wi o de nanga krin frustan. Den moi fasi disi prenspari te wi wani teki fesi na ini a gemeente (Odo 1:1-4; Tit. 1:7-9). Te wi e leisi den buku nanga tijdschrift fu wi, dan wi o si krin tu fa Gado e denki fu difrenti tori. Ibri dei wi musu  teki bosroiti di abi fu du nanga wi krosi, a fasi wi fa wi e meki prisiri, fa wi e gebroiki wi moni nanga fa wi e libi nanga trawan. Te wi e du san Bijbel e taki, dan wi o man teki bosroiti di e meki Yehovah firi bun.

12. Fa brada nanga sisa kan sori taki den de fu frutrow?

12 Sori taki yu de fu frutrow. Awinsi wi na wan brada noso wan sisa, te wi kisi wan frantwortu na ini a gemeente, wi musu meki muiti fu du en. Nehemia ben musu suku man di ben kan tyari frantwortu na mindri Gado pipel. Suma a ben gi a grani disi? A teki den man di ben e lespeki Gado, di ben de fu frutrow èn di ben e du den wroko bun (Neh. 7:2; 13:12, 13). Na ini a ten disi, a prenspari tu taki futuboi fu Gado e du den wroko bun (1 Kor. 4:2). Ala sma o man si krin san na den bun wroko di wi e du.Leisi 1 Timoteyus 5:25.

13. Fa yu kan teki na eksempre fu Yosef te trawan du sani nanga yu di hati yu?

13 Frutrow na tapu Yehovah. San yu kan du te trawan du wan sani di hati yu? A bun fu no draidrai fu lusu a tori. Ma te yu e pruberi fu sori nomo taki a fowtu no de na yu, yu kan meki a problema kon moro bigi. Yosef brada ben du hati sani nanga en, ma a no ben hori den na ati. Bakaten sma lei gi Yosef taki a du wan ogri èn den trowe en go na ini strafu-oso. Ma a meki Yehovah yepi en na ini den muilek situwâsi disi. A frutrow na tapu Yehovah, a denki den pramisi fu Yehovah èn a tan dini a Gado fu en (Ps. 105:19). Di a muilek ten disi pasa, Yosef ben abi fasi di ben o yepi en fu man tyari wan bigi frantwortu (Gen. 41:37-44; 45:4-8). Te hebi problema miti yu, dan begi Gado fu gi yu koni, fu yepi yu fu taki, fu du sani na wan switi fasi èn fu gi yu krakti. Yehovah o horibaka gi yu ala ten.Leisi 1 Petrus 5:10.

MEKI MUITI FU DU A PREIKIWROKO MORO BUN

14, 15. (a) Fu san ede wi musu „tan poti prakseri” na a fasi fa wi e preiki? (b) San yu kan du te a situwâsi na ini yu kontren kon kenki? (Luku a prenki na a bigin fu na artikel nanga a faki di nen „ Yu de klariklari fu pruberi preiki na wan tra fasi”?)

14 Paulus gi Timoteyus a deki-ati disi: „Tan meki muiti fu leisi gi sma, fu gi sma deki-ati èn fu gi leri. . . . Tan poti prakseri na yusrefi èn na den sani di yu e leri sma” (1 Tim. 4:13, 16). Timoteyus ben de wan preikiman kaba di ben abi furu ondrofeni. Ma soso te a ben o „tan poti prakseri” na a fasi fa a ben e gi sma leri, a ben kan du a preikiwroko moro bun. A no ben kan fruwakti taki sma ben o tan arki en efu a no ben o meki muiti fu gi leri moro bun. Te a ben de fanowdu, a ben musu kenki a fasi fa a ben e gi leri fu man doro sma ati. Wi leki Kownukondre preikiman musu du a srefi.

15 Nofo tron wi e si taki sma no de te wi e preiki oso fu oso. Na ini son birti yu abi presi pe yu no kan go preiki sondro fu kisi primisi. Efu dati de so na ini yu kontren, dan fu san ede yu no e suku tra fasi fu preiki a bun nyunsu?

16. Fa yu kan preiki na presi pe furu sma de?

16 Wan bun fasi fu preiki a bun nyunsu na te wi e go na presi pe furu sma de. Furu Kotoigi man du a wroko disi heri bun èn den abi bun bakapisi. Den e poti ten na wan sei fu taki nanga sma na wowoyo, na presi pe den e teki bus, pe den e go koiri èn na tra presi pe furu sma gwenti go. Wan Kotoigi kan bigin taki nanga wan sma fu wan sani di a yere na ini nyunsu, noso kande a kan taki wan  moi sani fu den pikin fu a sma. A kan aksi a sma tu fa a e go nanga en wroko. Te a si taki a sma lobi a takimakandra, dan a kan taki wan sani fu Bijbel èn aksi a sma fa a e denki fu a tori. Nofo tron disi kan meki den e taki go doro fu Bijbel.

17, 18. (a) San kan yepi yu fu no frede fu preiki pe furu sma de? (b) Fu san ede yu lobi den sani di David taki fu prèise Yehovah èn fa disi kan yepi yu na ini a preikiwroko?

17 Kande yu feni en muilek fu preiki na presi pe furu sma de, ma no lasi-ati. Eddie, wan pionier na New York, ben frede fu taki nanga sma na strati. Ma baka wan pisi ten a no ben frede moro. San yepi en? A taki: „Na a Osofamiri Anbegi, mi nanga mi wefi ben e luku san wi kan taki te sma e suku fu tapu a takimakandra noso te den e denki tra fasi fu wan tori. Wi aksi tra Kotoigi tu san den e du.” Now Eddie lobi a fasi disi fu preiki.

18 Te yu leri du a preikiwroko moro bun, sma o man si krin taki yu e go na fesi. (Leisi 1 Timoteyus 4:15.) Boiti dati, yu o man gi glori na wi hemel Tata leki fa David ben du dati di a singi: „Mi o prèise Yehovah ala ten. Doronomo mi o opo mi mofo fu gi en grani. Mi o prèise Yehovah gi den sani di a du. Den safri-ati sma o yere èn den o prisiri” (Ps. 34:1, 2). Kande a preikiwroko fu yu o meki taki wan safri-ati sma tron wan anbegiman fu Yehovah tu.

YU E GI GADO GLORI TE YU E GO NA FESI

19. Fu san ede wan futuboi fu Yehovah man de koloku, srefi te a de na ini muilek situwâsi?

19 David ben singi tu: „Yehovah, ala den sani di yu meki, o gi yu glori. Den sma di tai hori na yu, o prèise yu. Den o fruteri taki yu na wan kownu di e tiri nanga furu glori. Den o taki fu a bigi makti di yu abi, so taki libisma o yere fu den bigi sani di yu du. Den o fruteri taki yu e tiri leki kownu èn taki yu abi bigi glori nanga grani” (Ps. 145:10-12). Wi de seiker taki na so ala Kotoigi di lobi Yehovah, e firi. Ma san yu kan du te yu no man du so furu na ini a preikiwroko fu di yu siki noso owru? No frigiti taki te yu e preiki a bun nyunsu gi datra, ati-oso zuster noso gi tra sma di e sorgu gi yu, dan dati o gi wi lobi-ati Gado glori. Te yu de na strafu-oso fu a bribi fu yu ede, dan kande yu kan preiki gi sma drape efu na okasi de èn disi o meki Yehovah ati prisiri (Odo 27:11). A o prisiri tu te yu e tan meki muiti fu dini en, aladi yu de na ini wan osofamiri pe trawan no de Kotoigi (1 Petr. 3:1-4). Iya, srefi te yu de na ini wan muilek situwâsi, yu kan prèise Yehovah èn tan go na fesi.

20, 21. Te yu e kisi moro frantwortu na ini Yehovah organisâsi, dan fa yu kan de wan blesi gi trawan?

20 Te yu e tan meki muiti fu go na fesi, dan yu kan de seiker taki Yehovah o blesi yu. Kande te yu e kenki wan tu sani na ini yu schema noso na a fasi fa yu e libi, yu kan feni moro ten fu preiki a moi boskopu fu Gado gi sma di no abi howpu. Boiti dati, te yu e go na fesi èn yu e du ala san yu man fu yepi yu brada nanga sisa na ini a gemeente, dan dati o tyari furu wini kon gi den. Te yu e yepi den na wan saka fasi, dan yu o kisi furu blesi fu di den o lobi yu, den o warderi yu èn den o horibaka gi yu.

21 Awinsi wi e dini Yehovah omeni yari kaba noso wan tu mun nomo, wi alamala kan go na fesi na ini a tru anbegi. Ma fa lepi Kresten kan yepi den nyunwan fu go na fesi? Na ini a tra studie-artikel wi o taki fu a tori disi.