Go na content

Go na a tra menu

Go na table of contents

Yehovah Kotoigi

Sranantongo

Studie-Waktitoren  |  augustus 2016

Yu feni taki a de fanowdu fu yepi trawan fu go na fesi?

Yu feni taki a de fanowdu fu yepi trawan fu go na fesi?

„Mi o gi unu bun leri.”ODO 4:2.

SINGI: 93, 96

1, 2. Fu san ede wi musu leri trawan fa fu tyari frantwortu na ini a gemeente?

A MORO prenspari wroko di Yesus ben e du na fu preiki a bun nyunsu fu a Kownukondre. Ma a ben e teki ten tu fu yepi trawan fu de leriman nanga skapuman fu Gado pipel (Mat. 10:5-7). Aladi Filipus ben abi furu fu du leki preikiman, toku a ben yepi den umapikin fu en fu tron bun preikiman fu Gado Wortu (Tori 21:8, 9). O prenspari a de na ini a ten disi fu yepi trawan fu du disi tu?

2 Na heri grontapu, moro nanga moro sma e bigin studeri Bijbel. Nyun sma di no teki dopu ete musu kon frustan o prenspari a de fu studeri nanga densrefi. Den musu leri tu fa fu preiki a bun nyunsu èn fa fu studeri nanga tra sma. Na ini den gemeente fu wi, den brada musu kisi deki-ati fu wroko tranga so taki den kan lepi nofo fu tron dinari ini a diniwroko noso owruman. Te lepi Kresten e gi nyunwan „bun leri”, dan den nyunwan disi o go na fesi.Odo 4:2.

 LERI NYUNWAN FA DEN MUSU STUDERI GADO WORTU

3, 4. (a) Fa Paulus sori taki a prenspari fu studeri Bijbel efu wi wani abi bun bakapisi na ini a diniwroko? (b) Fosi wi gi den Bijbelstudenti fu wi deki-ati fu studeri Bijbel nanga densrefi, san wi srefi musu du?

3 O prenspari a de taki futuboi fu Gado e studeri Bijbel? Te wi e luku san na apostel Paulus taigi den Kresten na Kolose, dan wi o si san na a piki tapu na aksi disi. A ben skrifi: „Wi no tapu fu begi gi unu èn fu aksi Gado fu meki unu kisi koni èn fu meki a yeye fu en yepi unu fu kon frustan sani moro krin, so taki unu kan kon sabi finifini san na a wani fu en. Dan unu o tyari unsrefi na wan fasi di Yehovah feni bun, so taki unu kan tan prisiri en dorodoro. Na a srefi ten un musu tan du muiti fu abi bun bakapisi nanga ala san unu e du èn fu kon sabi den finifini tori fu Gado moro nanga moro” (Kol. 1:9, 10). Te den Kresten fu Kolose ben o kon sabi den tori disi, den ben o man ’tyari densrefi na wan fasi di Yehovah feni bun, so taki den ben kan tan prisiri en dorodoro’. Disi ben o yepi den tu fu ’abi bun bakapisi nanga ala san den ben e du’, spesrutu te den ben e preiki a bun nyunsu. Fu man dini Yehovah moro bun, den futuboi fu en musu abi a gwenti fu studeri Bijbel. Wi musu yepi Bijbelstudenti fu kon frustan disi.

4 Fosi wi yepi trawan fu si fu san ede a de fanowdu fu studeri Bijbel nanga densrefi, wi srefi musu frustan o prenspari a de. Fu taki en leti, wi musu abi a gwenti fu studeri Bijbel bun. Kande yu kan aksi yusrefi: ’Te den ososma e taki sani di no e kruderi nanga san Bijbel e leri noso te den e poti muilek aksi, mi man gi den wan piki di komoto fu Bijbel? Te mi e leisi fa Yesus, Paulus nanga tra sma ben e horidoro na ini a diniwroko, mi e prakseri fa disi kan yepi mi te mi e du a preikiwroko?’ Wi alamala abi sabi nanga rai fanowdu di komoto fu Gado Wortu. Dati meki te wi e fruteri trawan sortu wini wi e kisi te wi e studeri Bijbel, dan wi kan gi den deki-ati fu studeri fayafaya so taki den kan kisi wini fu dati tu.

5. Kari wan sani di wi kan du fu yepi nyunwan fu kon abi a gwenti fu studeri Bijbel.

5 Kande yu e denki: ’Fa mi kan yepi a Bijbelstudenti fu mi fu kon abi a gwenti fu studeri Bijbel?’ Kande yu kan bigin sori en fa a musu sreka ensrefi gi a Bijbelstudie. Yu kan aksi en fu leisi a pisi di nen „Tra prenspari sani” di de na bakasei fu a buku San Bijbel e leri wi trutru? èn fu suku den Bijbeltekst di kari drape. Yepi en fu sreka gi den konmakandra so taki a kan gi piki. Gi en deki-ati fu leisi ibri Waktitoren nanga Ontwaakt! Yu kan sori en fa a kan gebroiki a Sranantongo Watchtower Library na tapu DVD noso a Waktitoren LIBRARY TAPU INTERNET te a e suku piki tapu aksi fu Bijbel. Te yu e  yepi en na a fasi disi, dan a kan taki a o prisiri fu studeri Gado Wortu nanga ensrefi.

6. (a) Fa yu kan yepi yu Bijbelstudenti fu kon abi moro lobi gi Bijbel? (b) San wan Bijbelstudenti o du kande te a o kon lobi Gado Wortu?

6 Ma wi no musu dwengi nowan sma fu leisi èn fu studeri Bijbel. Na presi fu dati, meki wi gebroiki den sani di Yehovah organisâsi e gi wi fu yepi wi Bijbelstudenti fu kon kisi moro lobi gi Bijbel. Baka wan pisi ten, den Bijbelstudenti di wani go na fesi, o firi leki a psalm skrifiman di ben singi: „A bun gi mi fu kon krosibei na Gado. Na a Moro Hei Masra Yehovah mi e si leki mi kibripe” (Ps. 73:28). A yeye fu Yehovah o yepi den Bijbelstudenti di wani kon krosibei na en èn di de nanga tangi gi san den e leri.

LERI NYUNWAN FA FU PREIKI ÈN FU GI LERI

7. Fa Yesus ben leri den bakaman fu en fu preiki a bun nyunsu? (Luku a prenki na a bigin fu na artikel.)

7 Na Mateyus kapitel 10, wi kan leisi san Yesus leri den 12 apostel fu en. A no taigi den nomo fu preiki, ma a sori den krin san den ben musu taki èn san den ben musu du. [1] Den apostel arki di Yesus leri den fa fu preiki na wan bun fasi. Baka dati a grupu go preiki. Fu di den ben teki na eksempre fu Yesus, meki a no teki langa fosi den tron bun leriman fu Gado Wortu (Mat. 11:1). Wi kan leri den Bijbelstudenti fu wi fu tron bun preikiman. Meki wi go luku tu fasi fa wi kan yepi den.

8, 9. (a) Fa Yesus ben e taki nanga sma te a ben e preiki? (b) Fa wi kan yepi nyun preikiman fu taki nanga sma leki fa Yesus ben e du dati?

8 Leri fa fu taki nanga sma. Yesus ben e taki furu fu a Kownukondre. Wan leisi di a ben de na a peti fu Yakob krosibei fu a foto Sikar, a ben abi wan moi takimakandra nanga wan uma èn a ben abi bun bakapisi (Yoh. 4:5-30). A ben taki tu nanga Mateyus, wan belasting-man di ben nen Leifi tu. Bijbel no e taki furu fu a takimakandra disi, ma di Yesus aksi Mateyus fu tron en bakaman, a teki a kari dati. Mateyus nanga tra sma yere tu fa Yesus ben abi wan langa takimakandra na wan fesa di ben hori na Mateyus oso.Mat. 9:9; Luk. 5:27-39.

9 Wan tra leisi, Yesus ben taki na wan switi fasi nanga Natanael, di ben denki takru fu sma fu Nasaret. Ma a fasi fa Yesus taki nanga Natanael, meki a bigin denki tra fasi. A bosroiti fu kon sabi moro fu san Yesus, wan man fu Nasaret, ben e leri sma (Yoh. 1:46-51). Sobun, den eksempre disi e sori fu san ede a prenspari fu leri nyun preikiman fu taki nanga sma na wan switi fasi. [2] Te wi e leri den fu preiki na a fasi disi, dan den o prisiri fu si taki reti-ati sma e arki fu di den e taki na wan switi fasi nanga den.

10-12. (a) San Yesus ben e du te sma ben wani sabi moro fu a bun nyunsu? (b) Fa wi kan yepi nyun preikiman fu gi sma leri fu Bijbel moro bun?

10 Gi leri na sma di wani arki. Aladi Yesus ben abi dri nanga afu yari nomo fu du a preikiwroko, toku a ben e teki en ten fu gi leri na sma di ben wani arki a bun nyunsu. Fu eksempre, wan leisi Yesus go na ini wan boto fu preiki gi wan bigi grupu sma di ben e tanapu na a syoro. A dei dati, a du wan wondru so taki Petrus ben kan fanga wan heri ipi fisi. Ne a taigi en: „Now yu o bigin kisi sma libilibi.” San ben de a bakapisi di Yesus preiki na a fasi disi? Petrus nanga den mati fu en „tyari den boto fu den go baka na syoro, dan den libi ala sani èn den waka na [Yesus] baka”.Luk. 5:1-11.

11 Nikodeimus, di ben de wan memre  fu a Sanhedrin, ben wani kon sabi moro fu den sani di Yesus ben e leri sma. Ma a ben frede san trawan ben o taki te den ben o si taki a e taki nanga Yesus. Yesus fiti ensrefi na a situwâsi fu Nikodeimus èn a teki en ten fu taki nanga en na netiyuru te nowan sma ben o si den (Yoh. 3:1, 2). San wi kan leri fu den tori disi? Gado Manpikin ben e teki en ten fu tranga a bribi fu sma di ben wani sabi moro. Sobun, wi musu meki ala muiti fu go baka na sma di ben arki èn wi musu studeri Bijbel nanga den.

12 Te wi e wroko nanga nyun preikiman, dan disi kan yepi den fu gi sma Bijbel leri moro bun. Wi kan leri den taki awinsi sma sori pikinso nomo taki den wani sabi moro, toku den kan go baka na den. Wi kan aksi nyun preikiman fu kon nanga wi te wi e tyari gobaka noso te wi e go na wan Bijbelstudie. Te wi e yepi preikiman di no abi so furu ondrofeni èn wi e gi den deki-ati, dan den o wani meki muiti fu go baka na sma di ben arki èn fu studeri Bijbel nanga den. Den o leri tu fu no lasi-ati te den no man miti den sma moro, ma fu de nanga pasensi èn fu tan go na den.Gal. 5:22; luku a faki di nen „ No kon weri fu go baka na den sma”.

LERI NYUNWAN FU YEPI TRA BRADA NANGA SISA

13, 14. (a) San yu kan leri fu den eksempre fu sma na ini Bijbel di du furu fu yepi trawan? (b) Fa yu kan yepi nyun preikiman nanga yongusma fu sori lobi gi brada nanga sisa?

13 Bijbel e sori taki wi musu si en leki wan grani fu ’lobi wi brada’ èn fu yepi makandra. (Leisi 1 Petrus 1:22; Lukas 22:24-27.) A Manpikin fu Gado ben e du ala san a man fu dini trawan, iya, a dede srefi gi den (Mat. 20:28). Dorkas ’ben e du furu bun sani èn a ben e meki furu sani gi den pôti sma’ (Tori 9:36, 39). Maria, wan sisa na Rome, ’ben e wroko tranga’ fu yepi den brada nanga sisa na ini a gemeente (Rom. 16:6). Fa wi kan yepi nyunwan fu si taki a prenspari fu yepi brada nanga sisa?

Leri nyunwan fu sori lobi gi brada nanga sisa (Luku paragraaf 13, 14)

14 Lepi Kresten kan aksi nyunwan fu kon nanga den te den e go luku brada nanga sisa di owru noso di siki. Efu a fiti, dan papa nanga mama kan tyari den pikin kon nanga den te den e go luku den sma disi. Owruman kan seti sani makandra nanga brada nanga sisa fu sorgu taki den owruwan abi sani fu nyan èn taki sma yepi den fu meki sani na a oso fu den te dati de fanowdu. Te yonguwan nanga nyunwan e si fa brada nanga sisa e yepi makandra, dan den o wani du dati tu. Wan owruman ben gwenti go luku den Kotoigi na ini a kontren pe a ben e preiki. Na so wan yongu brada di ben gwenti go nanga na owruman disi kon leri taki wi musu lobi ala brada nanga sisa.Rom. 12:10.

15. Fu san ede a prenspari taki owruman e yepi yongu brada fu go na fesi na ini a gemeente?

15 Fu di Yehovah e gebroiki mansma leki leriman na ini a gemeente, meki a prenspari taki brada e leri fa fu hori bun lezing. Leki owruman, yu kan arki bun te wan dinari ini a diniwroko e oefen fu hori wan lezing. Te yu e yepi en, dan a kan tron wan moro bun leriman fu Gado Wortu.Neh. 8:8. [3]

16, 17. (a) Fa Paulus ben e yepi Timoteyus fu go na fesi? (b) Fa owruman kan yepi brada fu tron skapuman na ini a gemeente?

16 Furu owruman de fanowdu na ini den gemeente fu wi èn den brada di o du a wroko disi musu tan kisi leri. Paulus ben yepi Timoteyus fu go na fesi èn a ben gi en deki-ati tu fu yepi trawan. A taigi Timoteyus: „Mi pikin, meki a bun-ati di Gado e sori sma te den de wán nanga Krestes Yesus, tan gi yu moro krakti.  Fruteri den man di e gi yesi na Gado ala ten, den sani di mi taigi yu èn di furu sma e taki fu dati. Dan den man disi srefi o kon koni nofo fu gi tra sma leri” (2 Tim. 2:1, 2). Timoteyus teki leri fu di a ben e wroko makandra nanga Paulus, di ben de wan owruman. Te Timoteyus ben e du a diniwroko fu en, dan a ben e du en leki fa Paulus leri en.2 Tim. 3:10-12.

17 Fu di Paulus ben wani de seiker taki Timoteyus kisi bun leri, meki a teki en ten fu yepi en. A ben tyari a yonguman disi go nanga en te a ben e go preiki (Tori 16:1-5). Owruman kan teki na eksempre disi fu Paulus. Te den e go luku brada nanga sisa fu gi den deki-ati, dan den kan tyari lepi dinari go nanga den te a fiti. Na so owruman kan gi yongu brada na okasi fu si fa den musu gi leri èn fa den kan sori bribi, pasensi nanga lobi te den e go luku brada nanga sisa. Disi kan yepi brada fu tron bun skapuman di e sorgu „den skapu fu Gado”.1 Petr. 5:2.

A PRENSPARI FU YEPI TRAWAN FU GO NA FESI

18. Fu san ede wi musu si en leki wan prenspari sani fu yepi trawan fu du a diniwroko fu Yehovah?

18 Fu di moro yepi de fanowdu èn moro sani de fu du na ini Yehovah organisâsi, meki a prenspari fu yepi trawan fu go na fesi. Yesus nanga Paulus leri wi fa wi musu du dati. Yehovah wani taki den futuboi fu en na ini a ten disi musu leri du a diniwroko bun. Gado gi wi a grani fu leri nyunwan fa fu du a wroko di de fu du na ini a gemeente. Fu di a situwâsi na grontapu e go na baka dei fu dei èn fu di moro okasi e opo fu preiki a bun nyunsu, meki a kon de moro prenspari srefi fu yepi trawan fu go na fesi.

19. Fu san ede yu kan de seiker taki a muiti di yu e du fu leri trawan fu du a wroko fu Yehovah no o de fu soso?

19 A tru taki a e teki ten nanga muiti fu gi trawan leri. Ma Yehovah nanga en lobi Manpikin o horibaka gi wi èn den o gi wi a koni di de fanowdu fu man yepi trawan. Wi o prisiri te wi e si taki den wan di wi e yepi, „e wroko tranga èn e du bun furu muiti” na ini a diniwroko (1 Tim. 4:10). Meki a de so tu taki wi srefi e tan go na fesi te wi e du a wroko fu Yehovah.

^ [1] (paragraaf 7) Wan tu fu den sani di Yesus leri den bakaman fu en na: (1) Preiki a yoisti boskopu. (2) De tevrede nanga san Gado e gi yu. (3) No haritaki nanga den ososma. (4) Frutrow na tapu Gado te yu e miti gensman. (5) No frede.

^ [2] (paragraaf 9) Kisi wini fu a Theokrasia Diniwroko-skoro, blz. 62-64 abi moi rai di e sori fa wi kan taki nanga sma na ini a preikiwroko.

^ [3] (paragraaf 15) Kisi wini fu a Theokrasia Diniwroko-skoro, blz. 52-61 e sori san de fanowdu fu kan de wan bun takiman.