A YARI di pasa dusundusun brada tron owruman nanga dinari na ini Yehovah organisâsi. Efu yu na wan fu den brada disi, dan a no de fu taki dati yu breiti nanga a nyun grani di yu kisi.

Ma wi kan frustan tu taki yu e broko yu ede pikinso. Jason, wan yongu owruman e taki: „Di mi tron owruman mi ben firi leki mi no ben o man tyari ala den nyun frantwortu di mi kisi.” Moses nanga Yeremia ben firi so tu di Yehovah gi den wan nyun wroko (Eks. 4:10; Yer. 1:6). Efu yu e firi leki den man disi, dan san kan yepi yu fu no firi so moro èn fu tan go na fesi? Meki wi luku na eksempre fu na Kresten disipel Timoteyus.​—Tori 16:1-3.

TEKI NA EKSEMPRE FU TIMOTEYUS

A kan taki Timoteyus ben abi sowan 20 yari di na apostel Paulus aksi en fu du a zendeling-wroko makandra nanga en. Fu di Timoteyus ben yongu, a ben kan denki taki a no ben o man tyari a nyun frantwortu di a kisi èn kande a ben frede fu du en wroko na ini a gemeente (1 Tim. 4:11, 12; 2 Tim. 1:1, 2, 7). Ma toku tin yari baka dati, Paulus ben man taigi a gemeente na ini Filipi: „Mi howpu taki, efu Masra Yesus wani, mi kan seni Timoteyus kon na unu heri esi . . . Mi no abi nowan tra sma di e denki leki fa en e denki.”​—Fil. 2:19, 20.

Fa Timoteyus tron so wan bun owruman? Meki wi go luku siksi sani di wi kan leri fu en.

1. A ben e broko en ede nanga sma. Paulus ben taigi den brada nanga sisa na ini Filipi: „[Timoteyus] o sorgu trutru gi den sani di abi fu du nanga unu” (Fil. 2:20). Iya, Timoteyus ben poti prakseri na sma. A ben wani taki den tron mati fu Yehovah èn a ben du ala san a man fu yepi den.

Wi no musu de leki wan bus chauffeur di e feti nomo fu doro biten na den presi pe a e go, ma a no e stop fu teki sma na pasi. William, wan brada di e dini leki owruman moro leki 20 yari e gi owruman nanga dinari a rai disi: „Sori lobi gi den brada nanga sisa. Luku fa yu kan yepi den na presi fu broko yu ede nomo nanga den wroko di yu abi.”

2. A ben poti a preikiwroko na a fosi presi. Timoteyus ben de tra fasi leki den tra brada. Paulus ben taki: „Ala den trawan e suku den eigi bun. Den no e suku a bun fu Krestes Yesus” (Fil. 2:21). Paulus ben de na ini Rome di a skrifi a brifi disi. A ben si taki den brada drape ben broko den ede soso nanga den eigi sani. Den no ben du ala san den man na ini a diniwroko. Ma Timoteyus no ben de so. Te a ben kisi na okasi fu prati a bun nyunsu, a ben de leki Yesaya di ben taki: „Dya mi de! Seni mi.”​—Yes. 6:8.

Fa yu kan sorgu taki den sani di yu musu du gi yusrefi no e tapu yu fu tyari yu frantwortu na ini a gemeente? A fosi sani na taki yu musu „kon sabi san na den moro prenspari sani” (Fil. 1:10). A wroko fu Gado musu de a moro prenspari sani gi yu. A di fu tu sani na taki yu musu luku bun nanga sani di e teki tumusi furu fu yu ten nanga yu krakti. Paulus ben gi  Timoteyus a rai disi: „Wai pasi gi den lostu di yongu sma abi. Ma du muiti fu de wan reti-ati sma, fu abi bribi, fu sori lobi èn fu abi freide.”​—2 Tim. 2:22.

3. A ben wroko tranga gi Yehovah. Paulus ben taigi den Kresten na ini Filipi: „Unu sabi taki [Timoteyus] ben sori krin kaba sortu sma a de, taki neleki wan pikin nanga en papa, a wroko tranga nanga mi fu meki a bun nyunsu go na fesi” (Fil. 2:22). Timoteyus no ben lesi. A ben wroko tranga makandra nanga Paulus èn a sani disi meki taki den tron bun mati.

Na ini a ten disi furu wroko de fu du na ini Yehovah organisâsi. A wroko dati o gi yu furu prisiri èn a o meki taki yu tron bun mati nanga den brada nanga sisa. Dati meki ala ten yu musu „abi furu fu du na ini a wroko fu Masra”.​—1 Kor. 15:58.

4. A ben du san a ben e leri. Paulus ben skrifi Timoteyus: „Yu poti prakseri finifini na san mi leri yu, na a fasi fa mi ben e libi, na san mi ben wani na ini mi libi, na a bribi fu mi, na a pasensi fu mi, na a lobi fu mi, na a fasi fa mi horidoro” (2 Tim. 3:10). Fu di Timoteyus ben du san a ben leri, meki a ben kan kisi moro bigi frantwortu.​—1 Kor. 4:17.

Yu abi wan lepi brada di kan yepi yu fu du yu diniwroko moro bun? Efu dati no de so, dan suku wan brada di kan yepi yu. Tom, wan brada di de owruman furu yari kaba e taki: „Wan owruman di abi furu ondrofeni ben poti prakseri na mi èn a leri mi fu du furu sani. Mi ben gwenti aksi en rai èn mi ben du san a ben taigi mi. Fosi yu denki, mi kisi deki-ati fu du mi wroko.”

5. A ben tan du muiti fu go na fesi. Paulus ben gi Timoteyus a rai disi: „Yu musu oefen yusrefi fu dini Gado fayafaya” (1 Tim. 4:7). Aladi wan sport man abi wan trainer, toku a musu oefen bun tu. Paulus ben taigi Timoteyus: „Tan meki muiti fu leisi gi sma, fu gi sma deki-ati èn fu gi leri . . . Prakseri bun fu den sani disi. Du den nanga yu heri ati, so taki ala sma kan si taki yu e go na fesi.”​—1 Tim. 4:13-15.

Yusrefi musu meki muiti fu go na fesi na ini den sani di yu e du. Tan studeri bun èn sorgu taki yu sabi sortu kenki kon na ini a fasi fa sani musu du na ini a gemeente. Boiti dati, yu no musu frutrow tumusi tapu yusrefi. No denki taki yu abi so furu ondrofeni taki yu man lusu iniwan problema sondro fu ondrosuku sani. Neleki Timoteyus yu musu „tan poti prakseri na yusrefi èn na den sani di yu e leri sma”.​—1 Tim. 4:16.

6. A ben e frutrow tapu a yeye fu Yehovah. Paulus ben gi Timoteyus a rai disi: „Meki a santa yeye di de na ini wi, yepi yu fu kibri a gudu disi di yu ben kisi” (2 Tim. 1:14). Efu Timoteyus ben wani tan si a diniwroko fu en leki wan gudu, dan a ben musu frutrow tapu a yeye fu Gado.

Donald di de owruman furu yari kaba e taki: „Owruman nanga dinari musu si a matifasi di den abi nanga Gado leki wan prenspari sani. Te den e du disi, dan den o ’kisi krakti’ fu du a diniwroko fu den. Te den e begi Gado fu gi den santa yeye èn te den e du muiti fu kon abi den fasi di a yeye e meki sma kisi, dan den o de wan blesi gi den brada nanga sisa.”​—Ps. 84:7; 1 Petr. 4:11.

WARDERI A GRANI DI YU ABI

Wi abi furu nyun owruman nanga dinari na ini na organisâsi now. A e gi wi furu deki-ati fu si taki unu e tan go na fesi. Jason, di kari na a bigin, e taki: „Mi leri furu sani na ini a heri pisi ten di mi e dini leki owruman èn mi no e frede moro fu tyari den frantwortu fu mi. Now mi lobi a wroko di mi e du leki owruman èn mi e si en leki wan moi grani!”

Yu wani taki Yehovah tan gebroiki yu fu wroko gi en? Tan leri fu na eksempre fu Timoteyus. Te yu e du dati, dan yusrefi o de wan blesi gi Gado pipel.