Go na content

Go na a tra menu

Go na table of contents

Yehovah Kotoigi

Sranantongo

Studie-Waktitoren  |  april 2017

„San yu sweri fu du, na dati yu musu du”

„San yu sweri fu du, na dati yu musu du”

„Un musu du san unu pramisi Yehovah.”MAT. 5:33.

SINGI: 63, 59

1. (a) San Yefta nanga Hana ben du? (Luku den prenki na a bigin fu na artikel.) (b) Sortu aksi o kisi piki na ini na artikel disi?

YEFTA ben de wan deki-ati fesiman èn a no ben frede fu feti. Hana ben de wan uma di ben abi sakafasi èn a ben e sorgu en masra nanga en osofamiri. Den tu sma disi ben e anbegi a srefi Gado. Boiti dati, den ala tu ben meki wan sweri na fesi Gado èn den hori densrefi na a sweri dati. Yefta nanga Hana na moi eksempre gi man nanga uma na ini a ten disi di e meki wan sweri na fesi Yehovah. Ma meki wi poti prakseri na den prenspari aksi disi: San na wan sweri? O seryusu a de fu meki wan sweri na fesi Gado? San wi kan leri fu Yefta nanga Hana?

2, 3. (a) San na wan sweri? (b) San Bijbel e taki fu sweri di wi e meki na fesi Gado?

2 Soleki fa Bijbel e sori, dan wan sma di e meki wan sweri na fesi Gado e pramisi Gado wan sani. Kande a e pramisi Gado taki a o du wan sani, taki a o gi en wan sani, taki a o du wan spesrutu wroko gi en, noso taki a no o du son sani. Wan sma e meki wan sweri fu di en srefi wani du dati. Ma te a e meki a sweri, dan Yehovah e si dati leki wan seryusu sani èn a e fruwakti taki a sma e du san a pramisi (Gen. 14:22, 23; Hebr. 6:16, 17). O seryusu a de fu meki wan sweri na fesi Gado? Meki wi luku san Bijbel e taki fu a tori disi.

3 A Wet di Gado gi Moses e taki: „Efu wan man pramisi Yehovah wan sani, noso a sweri fu no du wan sani, dan a musu  sorgu taki a du san a taki. Iya, a musu du ala san a taki” (Num. 30:2). Bakaten, santa yeye meki Salomo skrifi a sani disi: „Te yu sweri gi Gado taki yu o du wan sani, dan yu no musu draidrai fu du en, bika nowan sma e prisiri nanga don sma. San yu sweri fu du, na dati yu musu du” (Preik. 5:4). Yesus ben sori o seryusu a de fu meki wan sweri, di a taki: „Den taigi den sma fu fositen: ’Un no musu sweri taki unu o du wan sani, dan unu no e du en, ma un musu du san unu pramisi Yehovah.’”Mat. 5:33.

4. (a) Te wi meki wan sweri na fesi Gado, dan o seryusu a sani dati de? (b) San wi wani leri fu Yefta nanga Hana?

4 Sobun, a de krin taki te wi e pramisi Gado wan sani, dan dati na wan seryusu tori. Efu wi no e du san wi sweri, dan dati kan pori a matifasi di wi abi nanga Yehovah. David ben skrifi: „Suma kan kren go na tapu a bergi fu Yehovah? Suma kan opo go na a santa presi fu en? Na a sma di no du ogri èn di e du sani nanga wan krin ati . . . èn di no e meki sweri fu kori trawan” (Ps. 24:3, 4). San Yefta nanga Hana ben sweri fu du gi Gado? A ben makriki gi den fu du san den ben sweri?

DEN DU SAN DEN PRAMISI GADO

5. San Yefta ben sweri fu du èn san ben de a bakapisi?

5 Yefta ben pramisi Yehovah wan sani di a go feti nanga den Amonsma. A pipel dati ben de feanti fu Gado en pipel (Krut. 10:7-9). Fu di Yefta ben e angri fu wini a feti, meki a sweri gi Gado: „Efu yu meki mi wini den Amonsma trutru, èn efu yu meki mi drai kon baka fu a feti sondro taki wan sani pasa nanga mi, dan mi o gi Yehovah a sma di o komoto na ini mi oso kon miti mi.” Fa sani waka? Den Amonsma lasi a feti èn a sma di waka kon miti Yefta di a drai kon baka fu a feti ben de en lobi umapikin. Na en Yefta ben o abi fu „gi [na] Yehovah” (Krut. 11:30-34). San dati ben wani taki gi na umapikin disi?

6. (a) A ben makriki gi Yefta nanga en umapikin fu du san a ben sweri? (b) Te a abi fu du nanga sweri, dan san yu e leri fu Deuteronomium 23:21, 23 nanga Psalm 15:4?

6 Fu man du san en papa ben sweri, dan na umapikin fu Yefta ben o abi fu go wroko gi Yehovah na en santa presi en heri libi langa. Yu denki taki Yefta no ben denki fosi a ben meki a sweri disi? Dati no de so, fu di a ben musu fu sabi taki en umapikin ben kan de a sma di ben o waka kon miti en te a ben doro na oso. Awansi fa a no fa, a situwâsi disi ben muilek gi Yefta nanga en umapikin. Di Yefta si en umapikin, dan a „priti en krosi na en skin” èn a taki dati a ben e sari srefisrefi. En umapikin ’krei fu di en heri libi langa a no ben o libi nanga wan man’. Fu san ede a ben e krei fu a sani dati? Yefta no ben abi manpikin èn en wan-enkri umapikin no ben o man trow fu meki bakapikin gi en. Efu Yefta no ben abi bakapikin, dan a nen fu en ben o lasi gowe èn sma ben o frigiti ala san a ben du. Ma dati no ben de a moro prenspari sani gi Yefta. A ben taki: „Mi opo mi mofo pramisi Yehovah wan sani èn now mi no man kenki moro san mi pramisi en.” Na umapikin fu en piki: „Yu musu du nanga mi soleki fa yu pramisi en” (Krut. 11:35-39). Den sma disi ben e tai hori na Gado. Dati meki noiti den ben o prakseri fu no du moro san den ben sweri, awansi a ben muilek gi den.Leisi Deuteronomium 23:21, 23; Psalm 15:4.

7. (a) San Hana ben sweri èn fu san ede a du dati? Fa sani waka gi en? (b) San a sweri fu Hana ben wani taki gi Samuel? (Luku san skrifi na a futuwortu.)

7 Hana na wan tra sma di du san a ben  sweri na fesi Yehovah. A meki a sweri disi di a ben e sari srefisrefi fu di a no ben man kisi wan pikin èn fu di wan tra uma ben e spotu en doronomo fu a sani disi ede (1 Sam. 1:4-7, 10, 16). Hana fruteri Yehovah fa a ben e firi èn a sweri: „Ke mi Masra Yehovah di e tiri den legre, mi e begi yu, poti prakseri na a nowtu fu yu umasrafu èn memre mi trutru. No frigiti mi. Efu yu gi mi wan manpikin, dan mi sa gi en na yu, Yehovah. Ala den dei fu en libi a o dini yu èn nowan sma o koti en ede-wiwiri” (1 Sam. 1:11). * Yehovah du san Hana ben aksi en èn Hana kisi en fosi pikin, wan manpikin. A ben breiti srefisrefi! Toku a no frigiti a sani di a ben pramisi Gado. Di a kisi en manpikin dan a taki: „Na Yehovah mi ben aksi fu gi mi a pikin disi.”1 Sam. 1:20.

8. (a) A ben makriki gi Hana fu du san a ben sweri? (b) Fa Psalm 61 e meki yu prakseri a moi eksempre fu Hana?

8 Di Samuel ben abi sowan dri yari, dan Hana puru en na bobi. A du soifri san a ben pramisi Gado. A no prakseri tu leisi srefi. A teki Samuel tyari go na a tabernakel na Silo èn a taigi Granpriester Eli: „Na fu a boi disi mi ben begi Yehovah, so taki a ben kan gi mi a sani di mi ben aksi en. Now mi leni Yehovah a boi. Solanga a de na libi, en na fu Yehovah” (1 Sam. 1:24-28). Drape „a boi Samuel ben e gro kon bigi na ini na oso fu Yehovah” (1 Sam. 2:21). Ma san dati ben wani taki gi Hana? A ben lobi a pikin boi fu en so te, ma now a no ben o man de nanga en ibri dei. Prakseri fa a ben e angri fu brasa en, fu prei nanga en èn fu sorgu en. Iya, leki wan lobi-ati mama, a ben angri fu si fa a boi fu en ben e gro kon bigi. Toku a no ben hati Hana taki a ben du san a ben sweri na fesi Gado. A ben breiti taki Yehovah ben blesi en.1 Sam. 2:1, 2; leisi Psalm 61:1, 5, 8.

Yu e du san yu sweri na fesi Yehovah?

9. Sortu aksi wi o luku now?

9 Now di wi e frustan o seryusu a de fu meki wan sweri na fesi Gado, dan meki wi luku den aksi disi: Sortu sweri wi leki Kresten kan meki? Boiti dati, o prenspari a de taki wi e du san wi sweri?

TE YU GI YUSREFI ABRA NA GADO

A sweri di yu meki di yu gi yusrefi abra na Gado (Luku paragraaf 10)

10. San na a moro prenspari sweri di wan Kresten kan meki èn san a sweri disi wani taki?

10 A moro prenspari sweri di wan Kresten kan meki, na a wan pe a e gi ensrefi abra na Yehovah. Fu san ede dati de so? Fu di a sma dati e pramisi Yehovah na ini begi taki a o gebroiki en libi fu dini en fu têgo, awansi san e pasa. Soleki fa Yesus ben taki, dan so wan sma ’no e teri ensrefi moro’ èn a e pramisi fu poti a wani fu Gado na a fosi presi na ini en libi (Mat. 16:24). Sensi a dei dati a sma disi „na fu Yehovah” (Rom. 14:8). Iniwan sma di e gi ensrefi abra na Gado musu si a sani disi leki wan seryusu tori. Wi abi a srefi denki leki a psalm skrifiman di ben taki fu den sweri di a ben meki na Gado: „San mi o pai Yehovah baka fu ala bun di a e du gi mi? Mi o du gi Yehovah san mi sweri fu du, iya, san mi sweri fu du na fesi en pipel.”Ps. 116:12, 14.

11. San pasa na a dei di yu teki dopu?

11 Yu gi yu libi abra na Yehovah èn yu dopu? Efu yu du dati, dan dati bun! Yu sabi ete san yu ben pramisi a dei di yu dopu na fesi tra sma? A dei dati, a brada di ben e hori a lezing aksi yu efu yu ben gi yusrefi abra na Yehovah èn efu yu ben e frustan taki „te yu gi yusrefi abra na Gado èn yu dopu, sma o sabi yu now  leki wan Kotoigi fu Yehovah èn wan memre fu en organisâsi di a e tiri nanga en santa yeye”. Di yu piki ’iya’ tapu den aksi disi, dan yu meki ala sma drape kon sabi taki yu gi yu libi abra na Gado èn taki yu mag teki dopu fu dini leki wan dinari fu Yehovah. A no de fu taki dati Yehovah ben musu fu breiti nanga yu!

12. (a) Sortu sani wi musu aksi wisrefi? (b) Sortu fasi Petrus taki dati wi musu pruberi fu kon abi?

12 Ma te yu dopu, dan dati a no ala ete. Baka dati wi wani tan dini Gado soleki fa wi pramisi en. Dati meki a bun te wi e aksi wisrefi: ’Mi kon abi wan moro bun matifasi nanga Gado sensi di mi dopu? Mi e tan dini Yehovah nanga mi heri ati? (Kol. 3:23) Mi gwenti begi? Mi e leisi Gado Wortu ibri dei? Mi gwenti go na den gemeente konmakandra? Mi e teki prati na a preikiwroko so furu leki mi man? Noso mi si taki mi no e du den sani disi so furu moro?’ Soleki fa na apostel Petrus sori, dan boiti taki wi abi bribi, wi musu abi sabi, wi musu horidoro èn wi musu dini Gado fayafaya. Na so wi no o tron sma di no e go na fesi moro.Leisi 2 Petrus 1:5-8.

13. San wan Kresten di gi ensrefi abra na Gado èn teki dopu, musu hori na prakseri?

 13 Te wi gi wisrefi abra na Gado, dan wi no man teki baka san wi pramisi en. Efu wan sma e kon weri fu dini Yehovah noso fu libi leki wan Kresten, dan a no kan taki dati a no ben gi ensrefi abra na Gado trutru èn taki a dopu fu en no e teri. * Di a gi ensrefi abra na Gado, dan dati ben wani taki dati a ben o gebroiki en libi fu dini Gado. Efu a du wan seryusu sondu, dan a o abi fu gi frantwortu na Yehovah èn na a gemeente (Rom. 14:12). Noiti sma musu taki fu wi dati ’wi lasi a lobi di wi ben abi biginbigin’. Na presi fu dati, Yesus musu man taki fu wi: „Mi sabi san yu e du èn mi sabi taki yu abi lobi nanga bribi. Mi sabi fa yu e du a diniwroko fu yu. Mi sabi taki yu e horidoro èn taki den sani di yu e du now, bigi moro den sani di yu ben du fosi” (Openb. 2:4, 19). Meki wi tan du muiti fu du san wi pramisi Gado di wi gi wisrefi abra na en. Na so Yehovah o prisiri nanga wi.

TE YU TROW

A sweri di yu meki di yu trow (Luku paragraaf 14)

14. San na ete wan prenspari sweri di wan sma kan meki èn fu san ede a sweri disi prenspari so?

14 Wan tra prenspari sweri na a wan di wan sma e meki te a e trow. Fu san ede dati de so? Fu di a trowlibi santa. Wan man nanga wan uma di e trow e pramisi makandra na fesi Gado èn na fesi tra sma taki den o tan hori densrefi na den frantwortu fu a trowlibi. Nofo tron den e pramisi makandra taki den o lobi makandra, den o warderi makandra èn taki den o lespeki makandra ’solanga den de makandra na grontapu, na ini a trowlibi di Gado seti’. Kande tra trowpaar no e taki den srefi wortu disi, ma toku den e meki wan sweri na fesi Gado. Te den taki den sani disi, dan den e tron masra nanga wefi èn na so a musu tan den heri libi langa (Gen. 2:24; 1 Kor. 7:39). Yesus srefi ben taki: „Fu dati ede, san Gado tyari kon na wán nowan sma musu prati” awinsi na a masra, a wefi noso wan tra sma. Sobun, wan man nanga wan uma di e trow nanga makandra, no musu prakseri fu broko trow te a trowlibi no e waka bun.Mark. 10:9.

15. Fu san ede Kresten no musu de leki den sma fu grontapu di no e si a trowlibi leki wan seryusu sani?

15 A no de fu taki dati ibri trowlibi abi en problema, fu di ala sma abi fowtu. Dati meki Bijbel e taki dati sma di trow „o kisi banawtu” ten na ten (1 Kor. 7:28). A sari taki furu sma na ini a ten disi no e si a trowlibi leki wan seryusu sani. Te den e kisi problema na ini a trowlibi, dan den no e meki muiti fu lusu den problema dati èn den e gowe libi a trowpatna fu den. Ma Kresten no e denki so fu a trowlibi. Te wan sma no e hori ensrefi na a sweri di a meki na en trowpatna, dan fu taki en leti a lei gi Gado èn Gado no lobi sma di e lei kwetikweti! (Lef. 19:12; Odo 6:16-19) Na apostel Paulus ben skrifi: „Yu abi wan wefi? No suku fu prati nanga en” (1 Kor. 7:27). Paulus ben kan taki dati fu di a ben sabi taki Yehovah no lobi te sma e broko trow na wan triki fasi.Mal. 2:13-16.

16. Sortu rai Bijbel e gi te wan sma wani broko trow noso te a wani prati nanga a trowpatna fu en?

16 Yesus ben leri taki Bijbel e gi sma primisi fu broko trow, soso te a wan patna du sutadu èn a trawan e weigri fu gi en pardon (Mat. 19:9; Hebr. 13:4). Ma fa a de te wan sma wani prati nanga a trowpatna fu en sondro fu broko trow? Bijbel e gi krin rai tu na ini a tori disi. (Leisi 1 Korentesma 7:10, 11.) Bijbel no e taki  efu wan sma mag prati fu a trowpatna fu en. Ma son leisi wan situwâsi kan de pe wan Kresten feni taki a musu prati fu en patna. Kande na fu di a sma e frede taki a o dede efu a tan nanga en patna di e fon en, noso fu di a patna e pruberi fu pori a bribi fu en. *

17. Fa wan Kresten trowpaar kan sorgu taki a trowlibi fu den e tan waka bun?

17 Kande wan trowpaar na ini a gemeente abi problema na ini a trowlibi èn den e go suku rai na den owruman. A bun te den owruman e aksi a trowpaar disi efu den luku a felem San na trutru lobi? èn efu den studeri a brochure Yu kan abi wan koloku osofamiri. Fu san ede den musu du dati? Fu di den sani disi e sori san Gado e fruwakti fu trowpaar. Boiti dati, den yepi furu trowpaar fu kon abi wan moro bun trowlibi. Wan trowpaar ben taki: „Sensi di wi studeri a brochure disi, wi kon abi wan moro koloku trowlibi.” Wan wefi di ben trow 22 yari kaba, ben e prakseri fu broko trow. A ben taki: „Wi ala tu dopu, ma wi no ben e firi moro gi makandra. A felem kon na a yoisti ten! Wi trow ete èn now a e go bun nanga wi.” Yu na wan sma di trow? Du ala san yu man fu fiti den leri fu Yehovah na ini yu trowlibi. Na so yu e hori yusrefi na a sweri di yu meki di yu trow èn yu sa de koloku!

TE YU E GO NA INI A SPESRUTU FURUTEN DINIWROKO

18, 19. (a) San furu Kresten papa nanga mama du? (b) San wi kan taki fu den brada nanga sisa di e du spesrutu furuten diniwroko?

18 Ete wan moi sani na taki a sweri di Yefta nanga Hana ben meki, ben abi leki bakapisi taki na umapikin fu Yefta èn a manpikin fu Hana ben mag gebroiki den libi fu du diniwroko gi Gado na ini a tabernakel fu en. Dati ben de a moro bun fasi fu libi. Na ini a ten disi, furu Kresten papa nanga mama gi den pikin fu den deki-ati fu go na ini a furuten diniwroko èn fu gebroiki den libi fu dini Gado. Den wan di e du dati warti fu kisi prèise.Krut. 11:40; Ps. 110:3.

A sweri di yu meki di yu go na ini a spesrutu furuten diniwroko (Luku paragraaf 19)

19 Nownowde sowan 67.000 brada nanga sisa na memre fu a Wereldwijde orde fu spesrutu furuten dinari fu Yehovah Kotoigi. Sonwan fu den e dini na Betel, trawan e du bow-wroko noso kring-wroko. Sonwan abi a frantwortu fu gi leri na den skoro fu na organisâsi èn trawan e dini leki spesrutu pionier noso zendeling. Trawan abi a frantwortu fu a wroko di musu du na den kongreshal noso na den presi pe Bijbelskoro e hori. Den alamala musu hori densrefi na a Gelofte van gehoorzaamheid en armoede. Dati na a sweri di den e meki taki den o du iniwan wroko di den e kisi fu man horibaka gi Kownukondre afersi, taki den o de tevrede nanga san den abi, èn taki den no o du grontapuwroko sondro fu aksi primisi fosi. Den sma disi no e teri densrefi, ma den e si a frantwortu di den kisi leki wan tumusi prenspari sani. Fu dati ede den de nomonomo fu hori densrefi na a prenspari sweri di den meki solanga den e du furuten diniwroko.

20. San wi musu du „ibri dei” èn fu san ede?

20 Omeni fu den sweri di kari na ini na artikel disi yu meki na fesi Gado? Yu meki wán, tu, noso ala dri fu den sweri disi? A no de fu taki dati yu e frustan taki yu no musu si den sweri disi leki lawlaw sani (Odo 20:25). Te wi no e du san wi sweri na fesi Yehovah, dan dati kan tyari takru bakapisi kon gi wi (Preik. 5:6). Sobun, meki wi ’gi Yehovah glori fu têgo, so taki wi kan du ibri dei san wi ben sweri fu du’.Ps. 61:8.

^ paragraaf 7 Soleki fa Hana ben sweri, dan a pikin fu en ben o de wan Nasireisma en heri libi langa. Dati wani taki dati en manpikin ben o gebroiki en libi fu du santa diniwroko gi Yehovah.Num. 6:2, 5, 8.

^ paragraaf 13 Te wi e luku den difrenti sani di den owruman e du fu de seiker taki wan sma kan teki dopu, dan a no o pasa makriki taki a dopu fu wan sma no e teri.

^ paragraaf 16 Luku na artikel „San Bijbel e taki fu brokotrow èn fu a prati di trowpatna e prati?”, di de fu feni na a pisi „Tra prenspari sani” na ini a buku Meki Gado tan lobi yu.