Go na content

Go na a tra menu

Go na table of contents

Yehovah Kotoigi

Sranantongo

A Waktitoren  |  Nr. 6 2017

Fa yu e si den fowtu di yu e meki?

Fa yu e si den fowtu di yu e meki?

Don nanga Margaret * breiti taki den umapikin nanga en osofamiri kon luku den. Di den ben o gowe baka, Margaret di ben de kok fosi, meki macaroni fu di den tu granpikin fu en lobi a nyanyan dati.

Di ala sma sidon na tafra, Margaret tyari a nyanyan kon èn a poti en leti na mindrisei fu a tafra. Di a opo a deksel fu a patu, a skreki fu si taki na soso a sowsu di a ben meki fu kasi ben de na ini. Margaret ben frigiti a moro prenspari sani, a macaroni. *

Awinsi o owru wi de, noso awinsi o furu ondrofeni wi abi, wi alamala e meki fowtu. Kande wi e taki wan sani di hati trawan, noso kande wi du wan bun sani, ma a no ben de a yoisti momenti. A kan taki wi no ben poti prakseri na wan sani noso kande wi frigiti fu du wan sani. Fu san ede wi e meki fowtu? San wi kan du te wi e meki fowtu? Wi kan sorgu taki wi no e meki fowtu? Wi o luku wan tu sani di kan yepi wi fu piki den aksi disi.

FA WI MUSU SI DEN FOWTU DI WI E MEKI ÈN FA GADO E SI DEN?

Te wi du wan bun sani, wi e breiti te sma e prèise wi gi dati èn te den e taigi wi taki wi du bun. Fa a de te wi e meki fowtu? Awinsi a no fu espresi noso awinsi tra sma no si dati, a bun te wi e taki dati wi meki wan fowtu. Wi musu abi sakafasi fu man du dati.

Efu wi e denki tumusi furu fu wisrefi, wi kan pruberi fu meki a gersi leki a no wan bigi fowtu. Wi kan gi tra sma a fowtu noso wi kan taki srefi taki wi no meki a fowtu. Ma nofo tron disi e tyari takru bakapisi kon. A no e lusu a problema èn wi kan krutu wan tra sma somaar. Awinsi wi man skoifi wan fowtu puru na wi tapu, toku wi no musu frigiti taki te fu kaba „ibriwan fu wi o abi fu gi Gado frantwortu fu den sani di a du”.​—Romesma 14:12.

Fa Gado e si den fowtu di wi e meki? A buku Psalm e sori taki Gado „abi sari-ati nanga switifasi”. A „no o tan suku fowtu na wi èn a no o hori wi na ati fu têgo tu”. A sabi taki libisma abi sondu èn a sabi den swakifasi fu wi. A e „hori na prakseri taki na fu doti wi meki”.​—Psalm 103:8, 9, 14.

Boiti dati, leki wan lobi-ati papa, Gado wani taki den pikin fu en e si den fowtu di den e meki, leki fa en e si den (Psalm 130:3). A Wortu fu en abi furu rai di e yepi wi te wi meki wan fowtu noso te wan tra sma meki wan fowtu.

SAN WI MUSU DU TE WI MEKI WAN FOWTU?

Nofo tron te wan sma meki wan fowtu, a e lasi furu ten nanga krakti soso fu skoifi en poti tapu wan tra sma noso fu sori taki a no en meki a fowtu. A sani dati no bun. Te yu taki wan sani di hati  wan trawan, dan a bun fu aksi pardon èn fu meki en bun baka nanga a sma. Efu yu du wan sani di no bun èn a tyari problema kon gi yu noso wan tra sma, dan no atibron tapu yusrefi èn no krutu wan trawan. Ma du muiti fu lusu a problema. Efu yu feni nomonomo taki a fowtu no de na yu, dan dati kan meki a trobi tan moro langa èn a problema kan kon moro bigi. Na presi fu dati, leri fu den fowtu di yu meki, sorgu taki yu no e meki a srefi fowtu èn go doro nanga yu libi.

Te wan tra sma meki wan fowtu, dan a makriki gi wi fu sori a sma taki san a du no bun. Ma a ben o moro bun fu teki a rai fu Yesus Krestes: „Ala sani di unu wani meki sma du gi unu, na dati un musu du gi den tu” (Mateyus 7:12). Te yu meki wan fowtu, awinsi na wan pikinwan, dan seiker yu ben o wani taki sma sori sari-ati gi yu noso taki den frigiti srefi san yu du. Sobun, fu san ede yu no e pruberi fu du a srefi te wan trawan meki wan fowtu?​—Efeisesma 4:32.

RAI DI KAN YEPI WI FU NO MEKI TUMUSI FURU FOWTU

Wan wortubuku e taki dati sma e meki fowtu fu di den no e frustan wan sani bun, fu di den no sabi ala sani, noso fu di den no e poti bun prakseri na san den e du. Wi alamala miti a sani disi kaba. Ma te wi e poti prakseri na wan tu prenspari rai fu Bijbel, dan dati o yepi wi fu no meki so furu fowtu.

Wan fu den rai dati skrifi na Odo 18:13: „Te wan sma e gi piki fosi a yere wan tori, dan dati na wan don sani fu du. A o kisi syen.” Iya, te yu e teki pikinso ten fu arki a heri tori èn fu prakseri san yu o taki, dan dati o yepi yu fu no taki sani di o hati trawan èn fu no du wan sani sondro fu denki. Sobun, a prenspari fu sabi a heri tori, fu di dati o yepi wi fu no krutu sani na wan fowtu fasi èn fu no taki wan sani di no bun.

Wan tra Bijbel rai na: „Du ala san yu man fu libi bun nanga ala sma” (Romesma 12:18). Du muiti fu libi bun nanga trawan èn fu taki bun nanga den. Te yu e wroko nanga trawan, dan hori den firi na prakseri èn sori lespeki gi den. Pruberi fu prèise den èn fu gi den deki-ati. Te yu e du dati, dan awinsi wan sma taki noso du wan sani sondro fu denki, yu o man gi en pardon èn frigiti a sani di a du. Èn efu a meki wan moro bigi fowtu srefi, yu o man lusu a problema na wan switi fasi.

Luku san yu kan leri fu den fowtu di yu meki. Te yu taki noso du wan sani di no bun, dan no suku fu taki bun fu en. Ma si en leki wan okasi fu kweki moi fasi. Kande yu musu sori moro pasensi, moro switifasi noso kande yu musu dwengi yusrefi moro. Yu denki taki yu musu kon abi moro safri-ati, moro lobi noso taki yu musu leri fu libi na ini freide nanga trawan? (Galasiasma 5:22, 23) Awinsi fa a no fa, yu o leri fu no meki a srefi fowtu wan tra leisi. Aladi wi musu teki a frantwortu fu den fowtu di wi meki, toku wi no musu broko wi ede tumusi. Te wi kan lafu fu wan fowtu di wi meki, dan dati kan puru afu fu a stress.

WI O KISI WINI TE WI ABI SAKAFASI

Te wi abi sakafasi, dan wi o man du den yoisti sani te wi meki wan fowtu. Wi o abi wan korostu firi èn wi o abi freide nanga trawan. Te wi e du muiti fu leri fu den fowtu fu wi, dan wi o kon moro koni èn sma o lobi wi moro. Wi no o brokosaka tumusi tu èn wi no o denki tumusi takru fu wisrefi. Te wi e frustan taki tra sma e du muiti tu fu no meki tumusi furu fowtu, dan dati o meki taki wi lobi den moro. San moro prenspari na taki wi kan leri fu sori lobi neleki Gado èn fu gi trawan pardon nanga wi heri ati.​—Kolosesma 3:13.

Yu denki taki a fowtu di Margaret meki ben pori a dei fu en famiri? Kwetikweti. Ala sma bigin lafu fu a tori, Margaret srefi. Èn ala sma nyan, aladi a macaroni no ben de. Baka omeni yari, den tu granpikin fruteri den pikin fu den a tori disi. Èn den e memre ete fa den ben lafu a dei dati. Iya, ala sma kan meki wan fowtu!

^ paragraaf 2 Wi kenki den nen.

^ paragraaf 3 Te sma e meki macaroni, den e bori a macaroni èn baka dati den e meki wan switi sowsu nanga kasi fu poti na en tapu.