Go na content

Go na a tra menu

Go na table of contents

Yehovah Kotoigi

Sranantongo

A Waktitoren  |  Nr. 6 2017

Fa Yesus ben de trutru?

Fa Yesus ben de trutru?

Nowan sma abi wan fowtow fu Yesus. Noiti a go tanapu fu meki wan sma meki wan tekening noso wan skedrei fu en. Toku furu sma meki tekening nanga skedrei fu en na ini den hondrohondro yari di pasa.

A no de fu taki dati den sma disi no sabi soifri fa Yesus ben de. Nofo tron te den ben e teken Yesus, den ben e hori a kulturu nanga a bribi fu a ten dati na prakseri. Boiti dati a sma di ben wani bai a skedrei ben e bepaal fa den ben musu teken Yesus. Ma den tekening disi ben e meki taki sma abi wan heri tra denki fu Yesus nanga den leri fu en.

Son sma ben e teken Yesus leki wan man di swaki èn di abi langa wiwiri nanga wan fini barba, noso leki wan man di e sari. Na ini son prenki Yesus de leki wan engel nanga wan brenki leti tapusei fu en ede, neleki a hei moro ala tra sma. Yu denki taki den tekening disi e sori fa Yesus ben de trutru? Fa wi kan kon sabi dati? Wan sani di kan yepi wi na Bijbeltekst di e taki fu Yesus. Te wi e ondrosuku den tekst disi, dan wi kan kon frustan pikinso fa Yesus ben de. Den kan yepi wi tu fu si Yesus na a yoisti fasi.

„YU BEN SREKA WAN SKIN GI MI”

Soleki fa a sori, dan Yesus taki a sani disi na a ten di a dopu (Hebrewsma 10:5; Mateyus 3:13-17). Fa a skin dati ben de? Sowan 30 yari na fesi, na engel Gabrièl ben taigi Maria: „Yu o de nanga bere èn yu o kisi wan manpikin. . . . Gado Manpikin” (Lukas 1:31, 35). Sobun Yesus ben de wan man di no ben abi sondu, neleki fa Adam ben de di Gado meki en (Lukas 3:38; 1 Korentesma 15:45). A musu fu de so taki Yesus ben abi wan moi skin. Kande a ben e gersi en mama Maria di ben de wan Dyu.

Tra fasi leki den Romesma, Yesus ben abi wan barba fu di dati ben de a gwenti fu den Dyu. Ini a kulturu dati, sma ben e lespeki wan mansma di ben abi wan barba di no ben langa èn di ben koti netjes. Wi kan de seiker taki Yesus ben koti en barba nanga en wiwiri so taki den no kon langa. Na soso den Nasireisma, soleki Simson, no ben mag koti den wiwiri.​—Numeri 6:5; Krutuman 13:5.

Sowan 30 yari langa, Yesus ben de wan temreman. A no ben abi den wrokosani di sma abi na ini a ten disi (Markus 6:3). Sobun, a musu fu de so taki a ben abi wan moi steifi skin. Di a bigin nanga a wroko di Gado seni en kon fu du, dan a „yagi ala den sma, makandra nanga den skapu nanga den kaw komoto fu a tempel. A trowe a moni fu den sma di ben e broko moni èn a drai den tafra fu den tapu.” A du den sani disi sondro taki wan sma yepi en (Yohanes 2:14-17). Wan sma musu tranga fu man du so wan sani. Yesus gebroiki a skin di Gado ben sreka gi en fu du a wroko di Gado gi en. A ben taki: „Mi musu go fruteri a bun nyunsu fu Gado Kownukondre na tra foto tu, bika na fu disi Gado ben seni mi kon” (Lukas 4:43). Yesus ben musu abi furu krakti fu man waka go preiki a bun nyunsu disi na ini heri Palestina.

 „UN KON NA MI ÈN MI O GI UNU KRAKTI BAKA”

Yesus ben abi switifasi èn a ben e firi gi sma. Dati meki den sma ’di ben musu wroko hebi èn di ben musu tyari hebi lai’ no ben e frede fu go na en (Mateyus 11:28-30). Den ben kan de seiker taki den ben o kisi krakti baka te den ben e teki leri fu Yesus. Srefi yongusma ben wani de krosibei fu Yesus. Bijbel e taki dati ’a ben brasa den pikin hori’.​—Markus 10:13-16.

Aladi furu sani miti Yesus fosi a dede, toku a no ben de wan man di ben e sari tumusi noso di ben brokosaka. Fu eksempre, a ben meki taki sma di ben de na wan trow-oso na ini Kana prisiri fu di a ben kenki watra kon tron win (Yohanes 2:1-11). Na tra okasi pe sma ben kari en kon na den oso, a leri sma prenspari sani.​—Mateyus 9:9-13; Yohanes 12:1-8.

San moro prenspari, na taki a fasi fa Yesus ben e du a preikiwroko ben gi furu sma a moi howpu fu libi fu têgo (Yohanes 11:25, 26; 17:3). Di 70 fu den disipel fu en kon fruteri en san den ben ondrofeni na ini a preikiwroko, dan a „prisiri pasa marki” èn a taki: „Un musu prisiri fu di un nen skrifi na ini hemel.”​—Lukas 10:20, 21.

„MA UN NO MUSU DE SO”

Den kerki fesiman na ini Yesus ten ben e du ala sani fu meki sma poti prakseri na den èn fu sori sma taki den abi furu makti (Numeri 15:38-40; Mateyus 23:5-7). Ma Yesus ben leri den apostel fu en taki den no musu „basi” trawan (Lukas 22:25, 26). Yesus ben warskow srefi: „Luku bun nanga den leriman fu Wèt di lobi waka nanga langa krosi èn di lobi te sma na wowoyo e gi den odi.”​—Markus 12:38.

Ma Yesus no ben de so. A ben e moksi nanga sma èn son leisi sma no ben sabi srefi taki a ben de na den mindri (Yohanes 7:10, 11). Srefi te a ben de nanga den 11 apostel fu en, sma no ben man sabi sortuwan fu den na Yesus. Dati meki di Yudas ben o tori Yesus, a bosi en fu meki den sma sabi suma na Yesus.​—Markus 14:44, 45.

Sobun, aladi wi no sabi finifini fa Yesus ben de, toku wi kan de seiker taki a no ben de leki fa sma lobi teken en. Ma a fasi fa Yesus ben de trutru a no a moro prenspari sani. San moro prenspari na fa wi e si Yesus now.

„ETE WAN SYATU PISI TEN, DAN GRONTAPU NO O SI MI MORO”

A srefi dei di Yesus taki a sani disi, sma kiri en èn den beri en (Yohanes 14:19). A gi en libi leki „wan lusu-paiman fu frulusu furu sma” (Mateyus 20:28). Tapu a di fu dri dei, Gado wiki en baka „leki wan yeye” èn Gado meki taki wan tu fu den disipel fu en si en (1 Petrus 3:18; Tori fu den apostel 10:40). Fa Yesus ben de di den disipel si en? Soleki fa a sori, dan a ben abi wan heri tra skin, fu di den disipel fu en srefi no ben sabi wantewante taki na en. Maria Makdalena ben denki taki na wan man di e krin dyari, èn den tu disipel di ben de na pasi e go na Ema-us ben denki taki a ben de fu wan tra kondre.​—Lukas 24:13-18; Yohanes 20:1, 14, 15.

Fa wi musu si Yesus na ini a ten disi? Moro leki 60 yari baka di Yesus dede, Yohanes na apostel di a ben lobi, kisi fisyun fu en. Yohanes no ben si wan man di e dede na wan kroisi, ma a si a „Kownu fu den kownu èn Masra fu den masra”. Dati na a Kownu fu Gado Kownukondre di o wini ala den ogri yeye nanga den libisma di de feanti fu Gado. Baka dati a o meki taki libisma kisi blesi fu têgo.​—Openbaring 19:16; 21:3, 4.

Kon sabi moro

YESUS​—EN NA A PASI, EN NA SAN TRU, EN NA A LIBI

En na a pasi, en na san tru, en na a libi

Den Evangelietori e taki fu den sani di Yesus leri sma èn den sani di a du. Den sani disi kan kenki yu libi.