Go na content

Go na a tra menu

Go na table of contents

Yehovah Kotoigi

Sranantongo

A Waktitoren  |  Nr. 6 2016

 TORI FU A KAFTI | FISYUN DI E SORI FA SANI DE NA HEMEL

Sani di sma e taki fu hemel

Sani di sma e taki fu hemel

Oiti yu aksi yusrefi fa sani de na hemel èn suma e tan drape? Efu dati de so, dan yu a no a wan-enkri sma. Milyunmilyun sma e taki ala sortu sani fu a tori disi. Son sma e bribi taki na den afo fu den di den musu gi grani e libi drape. Tra sma e si hemel leki wan presi pe freide de èn pe engel nanga bun sma di dede e libi. Trawan e bribi taki hemel na wan presi pe milyunmilyun gado e tan.

Furu sma feni taki wi no man sabi noti fu hemel fu di nowan sma saka komoto na hemel fu fruteri wi fa sani de drape. Ma dati no tru. Yesus Krestes ben e libi na hemel, fosi a kon na grontapu. Na dati a ben taigi den kerki fesiman fu a ten fu en. A ben taki krin: „Mi no saka komoto fu hemel fu du mi wani, ma fu du a wani fu en di seni mi kon.” Fu di Yesus srefi ben libi na hemel, meki a ben man taigi den apostel fu en a sani disi: „Furu tanpresi de na ini na oso fu mi Tata.”Yohanes 6:38; 14:2.

A Tata fu Yesus na Gado èn en nen na Yehovah. En srefi e tan na hemel (Psalm 83:18). Sobun, den moro bun sma di kan sori wi fa a de na hemel, na Yehovah Gado nanga Yesus Krestes. Wi kan kon sabi furu sani fu hemel te wi e poti prakseri na den moi fisyun di den gi reti-ati futuboi.

Na ini a tra artikel wi o taki fu wan tu fisyun di anbegiman fu Gado ben kisi èn di skrifi na ini Bijbel. Te wi o taki fu den fisyun disi, dan no frigiti taki a presi pe Yehovah nanga den engel e libi, no abi sani di yu kan si noso fasi. Dati meki di Gado gi libisma fisyun, a sori den sani di den man frustan. Efu a ben fruklari sani gi den soleki fa den engel e taki, wi no ben o man frustan fa sani de na hemel. Den fisyun o yepi yu fu kon sabi moro fu den sma di e libi na hemel.