Go na content

Go na a tra menu

Go na table of contents

Yehovah Kotoigi

Sranantongo

A Waktitoren  |  Nr. 5 2017

Yu ben sabi a sani disi?

Yu ben sabi a sani disi?

Na kosi Yesus ben kosi di a agersi sma nanga „pikin dagu”?

Wan popki fu wan meisje nanga wan pikin dagu. Na fu Grikikondre noso Rome. A meki na mindri a fosi yarihondro Fosi Krestes nanga a di fu tu yarihondro Baka Krestes

Wan leisi Yesus ben de na wan distrikt fu Siria dorosei fu Israel. Di a ben de na ini a distrikt disi di den Romesma ben e tiri, wan Griki uma kon suku yepi na en. Di Yesus piki en, a gebroiki wan agersitori di ben kan meki sma denki taki a ben e si sma di no de Dyu, leki „pikin dagu”. Soleki fa a wet fu Moses e taki, dan dagu no ben de krin meti (Lefitikus 11:27). Ma na kosi Yesus ben wani kosi a Griki uma disi nanga tra sma di no de Dyu?

Kwetikweti. Soleki fa Yesus ben taigi den disipel fu en, dan na a momenti dati a ben moro prenspari gi en fu yepi den Dyu. Na dati a ben wani taki di a taigi a Griki uma: „A no bun fu teki a brede fu den pikin èn trowe dati gi den pikin dagu” (Mateyus 15:21-26; Markus 7:26). Den Grikisma nanga den Romesma ben lobi kweki dagu na den oso. Den dagu ben e tan na ini den oso èn den ben e prei nanga den pikin-nengre. Sobun, di Yesus gebroiki den wortu „pikin dagu”, dan kande dati no ben meki a frow prakseri wan fruferi sani. A Griki uma gebroiki den srefi wortu fu Yesus di a piki en: „Iya mi Masra, ma toku den pikin dagu e nyan den pikin pisi brede di e fadon komoto na a tafra fu den basi fu den.” Yesus prèise na uma taki a ben abi wan tranga bribi èn a meki a meisje fu na uma kon betre.​—Mateyus 15:27, 28.

Na bun rai Paulus ben gi den botoman di a taigi den taki den no musu seiri a sipi go moro fara?

Wan bigi sipi di e tyari lai. A de fu a fosi yarihondro Baka Krestes

Wan tranga winti ben e wai di den tyari na apostel Paulus nanga sipi go na Italiakondre. Di den stop na wan presi, Paulus gi den a rai fu no seiri go doro (Tori fu den apostel 27:9-12). Fu san ede a gi den a rai disi?

Na ini owruten, botoman ben sabi taki sipi ben kan go lasi efu den ben go na a Mindrikondre Se na ini a kowru pisi ten fu a yari. Na mindri 15 november te go miti 15 maart den sma no ben gwenti tyari boto go tapu se. Ma a ben de september noso oktober di Paulus gi den botoman a rai fu no seiri go doro. Na ini a yari 400, Vegetius, wan Rome skrifiman, skrifi fa a ben de te boto ben de na a Mindrikondre Se: „Na ini son mun, a ben bun fu waka nanga boto, tra mun a no ben bun so. Ma tra pisi fu a yari boto no ben man go na se kwetikweti” (Epitome of Military Science). Vegetius ben taki dati a ben bun fu de tapu se na mindri 27 mei te go miti 14 september. Ma fu 15 september te go miti 11 november èn fu 11 maart te go miti 26 mei, a no ben bun so fu de na se noso a ben de kefalek srefi. Paulus, di ben gwenti go na difrenti presi, ben sabi den sani disi heri bun. Aladi a kapten fu a sipi nanga a sma di ben abi a sipi ben sabi den sani disi tu, toku den no teki a rai fu Paulus. A bakapisi ben de taki a sipi sungu.​—Tori fu den apostel 27:13-44.