Go na content

Go na a tra menu

Go na table of contents

Yehovah Kotoigi

Sranantongo

A Waktitoren  |  Nr. 5 2017

 TORI FU A KAFTI | ENGEL​—FU SAN EDE WI MUSU SABI MORO FU DEN?

Ogri engel de trutru?

Ogri engel de trutru?

Iya, ogri engel de. Pe den komoto? Kande yu e memre ete taki di Gado meki engel, a gi den a grani fu teki den eigi bosroiti. Syatu baka di Gado meki a fosi man nanga uma, Adam nanga Eva, wan yeye di no ben abi sondu, bosroiti fu trangayesi Gado. A ben man kori Adam nanga Eva èn den srefi trangayesi Gado tu (Genesis 3:1-7; Openbaring 12:9). Bijbel no e taki fa a yeye disi nen noso sortu posisi a ben abi na ini hemel fosi a trangayesi Gado. Ma baka di a opo ensrefi teige Gado, Bijbel kari en Satan, san wani taki „Gensman” èn a kisi a nen Didibri tu, san wani taki „Ogri-ati leiman”.​—Mateyus 4:8-11.

Ma a sari fu taki dati a no den sma disi nomo trangayesi Gado. Na ini a ten fu Noa, wan grupu engel „gowe libi a tanpresi fu den” na ini hemel pe na osofamiri fu Gado de. Den kon na grontapu èn den teki libisma skin fu du ogri-ati sani nanga sma èn fu libi wan huru libi. Na so den drai baka gi a libi di Gado ben seti gi den.​—Yudas 6; Genesis 6:1-4; 1 Petrus 3:19, 20.

San pasa nanga den ogri engel disi? Di Gado meki wan bigi frudu kon fu puru ala ogri na grontapu, den engel disi tron yeye baka èn den drai go baka na hemel. Ma Gado no meki den kisi a posisi baka di den ben abi na a bigin. Na presi fu dati, a strafu den èn a trowe den go na wan agersi peti pe „deki dungru de”. A lagi posisi di den engel disi abi now, Bijbel e kari Tartarus. Na so den no man kon sabi noti moro fu Yehovah (Yudas 6; 2 Petrus 2:4). Den ogri yeye disi meki taki Satan Didibri, di e „tan du neleki en na wan engel fu leti” tron „a tiriman fu den”.​—Mateyus 12:24; 2 Korentesma 11:14.

Bijbel e sori taki Gado Kownukondre di abi a Mesias leki tiriman na ini hemel, seti na ini 1914. * Baka di a Kownukondre seti, den trowe Satan nanga den ogri yeye fu en, komoto na ini hemel èn now den e tan na ini a birti fu grontapu. Den bigi ogri di sma e du na grontapu nanga a doti sekslibi fu den, e sori krin taki den ogri yeye disi takru srefisrefi èn taki den e du ala san den man fu pori sma libi.​—Openbaring 12:9-12.

Dyonsro den ogri yeye no o abi a makti moro fu du ogri. Dati meki wi e si taki sma e du moro bigi ogri now èn taki a libi e go na baka dei fu dei. Gado o tapu den, so taki den no man du noti moro. Baka te Gado Kownukondre o tiri a paradijs grontapu 1000 yari, dan den ogri yeye o kisi na okasi fu tesi libisma gi wan syatu pisi ten. Baka dati Gado o kiri den fu ala ten.​—Mateyus 25:41; Openbaring 20:1-3, 7-10.

^ paragraaf 6 Efu yu wani sabi moro fu Gado Kownukondre, dan luku kapitel 8 fu a buku San Bijbel kan leri wi? di Yehovah Kotoigi meki. A de fu feni tu na www.jw.org/srn.

Kon sabi moro

GADO ABI BUN NYUNSU GI WI!

Fu san ede Gado e gi pasi taki ogri de èn taki sma e pina?

Fa ogri bigin èn fu san ede Gado gi pasi taki sma e pina te now ete? Wan ten o kon pe nowan sma e pina?