Go na content

Go na a tra menu

Go na table of contents

Yehovah Kotoigi

Sranantongo

A Waktitoren  |  Nr. 5 2017

 TORI FU A KAFTI | ENGEL​—FU SAN EDE WI MUSU SABI MORO FU DEN?

Fa engel kan yepi yu?

Fa engel kan yepi yu?

Den engel di e gi yesi na Gado, wani sabi fa a e go nanga libisma èn den e du a wani fu Yehovah fayafaya. Di Gado meki grontapu, den engel ’bari fu prisiri èn den manpikin fu Gado bigin prèise en nanga wan tranga sten’ (Yob 38:4, 7). Ala ten den engel ben e „angri fu kon frustan” den profeititori di e sori san o pasa na grontapu na ini a ten di e kon.​—1 Petrus 1:11, 12.

Bijbel e sori taki son leisi den engel kibri anbegiman fu Gado, so taki a wani fu Gado ben kan pasa (Psalm 34:7). Luku wan tu eksempre:

  • Di Yehovah pori den ogri foto Sodom nanga Gomora, engel yepi a reti-ati man Lot nanga en osofamiri fu lowe.​—Genesis 19:1, 15-26.

  • Na ini owruten Babilon, di dri Hebrew yonguman yere taki den ben o dede na ini wan faya onfu, Gado „seni en engel kon fu frulusu den futuboi [disi] fu en”.​—Danièl 3:19-28.

  • Baka di a reti-ati man Danièl tan wan heri neti na ini wan olo pe ogri lew ben de, a taki dati fu di „Gado seni en engel kon èn a tapu a mofo fu den lew”, meki a ben man tan na libi.​—Danièl 6:16, 22.

A no tide engel e yepi reti-ati sma

ENGEL BEN E HORIBAKA GI A FOSI KRESTEN GEMEENTE

Fu meki a wani fu Gado pasa, dan son leisi te a ben de fanowdu, den engel di de boskopuman fu Gado, ben e bumui nanga a fasi fa sani ben e go na ini a Kresten gemeente. Luku wan tu eksempre:

  • Wan engel ben opo den doro fu wan strafu-oso èn a taigi den apostel di ben de na ini a strafu-oso fu go doro fu preiki na ini a tempel.​—Tori fu den apostel 5:17-21.

  • Wan engel taigi Filipus, wan preikiman fu a bun nyunsu, fu go na wan sabana pasi di ben e waka fu Yerusalem te go miti Gasa. Drape a preiki gi wan Etiopiaman di ben komoto na Yerusalem baka di a go anbegi Gado.​—Tori fu den apostel 8:26-33.

  • Di Gado feni taki a ten ben doro fu meki sma di no ben de Dyu tron Kresten, dan wan engel sori ensrefi na ini wan fisyun na Kornelius, wan legre-edeman fu Rome. A taigi Kornelius fu seni kari Petrus kon na en oso.​—Tori fu den apostel 10:3-5.

  • Di na apostel Petrus ben de na strafu-oso, wan engel kon na en èn a puru Petrus drape.​—Tori fu den apostel 12:1-11.

 FA ENGEL KAN YEPI YU?

Wi no abi buweisi taki na ini a ten disi Gado e gebroiki engel fu yepi sma na wan wondru fasi soleki fa a ben du dati na ini owruten. Ma Yesus ben taki fu a ten fu wi: „A bun nyunsu disi fu a Kownukondre o preiki gi sma na heri grontapu, so taki sma fu ala kondre kan yere dati, èn dan a kaba o kon” (Mateyus 24:14). Yu sabi taki te den bakaman fu Krestes e du a wroko disi, den engel e tiri den?

Engel e yepi fu preiki a bun nyunsu na heri grontapu

A Bijbel buku Openbaring e taki dati engel ben o wroko fayafaya fu yepi libisma fu meki den kon sabi sani fu Yehovah Gado èn san a o du gi libisma. Na apostel Yohanes ben skrifi: „Mi si wan tra engel e frei na loktu. A ben abi têgo bun nyunsu di a ben musu fruteri den sma di e libi na grontapu, iya, sma fu ala kondre, lo, tongo, nanga pipel. Nanga wan tranga sten a ben e taki: ’Un frede Gado èn gi en glori, bika a yuru doro kaba taki a o krutu sma. Fu dati ede, anbegi a sma di meki hemel, grontapu, a se, nanga ala den presi pe watra e komopo’” (Openbaring 14:6, 7). Na ini a ten disi wi abi furu ondrofenitori di e sori taki den engel e horibaka gi a Kownukondre preikiwroko di e du na heri grontapu. Iya, srefi te wán sondari e sori berow èn e drai kon baka na Yehovah, „den engel fu Gado e prisiri”.​—Lukas 15:10.

San o pasa te a preikiwroko kon na wan kaba? Dan ’den legre fu engel na hemel’ o yepi Yesus Krestes, a Kownu fu den kownu, te a o feti na ini Armagedon. Dati na „a feti na a bigi dei fu Gado na Almaktiwan” (Openbaring 16:14-16; 19:14-16). Tranga engel o tyari a strafu fu Gado kon tapu libisma te Yesus „o puru atibron na tapu den sma di . . . no e gi yesi na a bun nyunsu di e taki fu wi Masra Yesus”.​—2 Tesalonikasma 1:7, 8.

Sobun, yu kan de seiker taki den engel wani sabi fa a e go nanga yu. Den e broko den ede nanga sma di wani dini Gado. Furu tron Yehovah gebroiki den engel disi fu tranga a bribi fu den futuboi fu en na grontapu èn fu kibri den.​—Hebrewsma 1:14.

Dati meki ibriwan fu wi musu teki wan prenspari bosroiti: Wi o arki a bun nyunsu di sma e meki bekènti na heri grontapu? Yehovah Kotoigi na ini yu birti o breiti fu sori yu fa yu kan kisi wini fu a yepi di den makti engel fu Gado wani gi yu.

 

Kon sabi moro

GADO ABI BUN NYUNSU GI WI!

Fa yu kan kon krosibei na Gado?

Yu wan sabi efu Gado e arki ala begi? Fa wi musu begi? Sortu tra sani wi musu du fu kon krosibei na Gado?

A WAKTITOREN

Fisyun di e fruteri wi suma de na hemel

San Bijbel e leri wi fu Yehovah Gado, Yesus Krestes nanga den bun engel?