Go na content

Go na a tra menu

Go na table of contents

Yehovah Kotoigi

Sranantongo

A Waktitoren  |  Nr. 5 2017

 TORI FU A KAFTI | ENGEL​—FU SAN EDE WI MUSU SABI MORO FU DEN?

Engel man yepi yu?

Engel man yepi yu?

Wan sonde bakadina Kenneth nanga Filomena di e libi na Korsow, go luku wan trowpaar nanga suma den e studeri Bijbel.

Kenneth e fruteri: „Di wi doro na a oso fu den, ala sani ben tapu èn a wagi no ben de. Ma wan sani taigi mi fu bel a frow.”

A frow teki a telefon èn a fruteri taki en masra de na wroko. Ma di a si taki na Kenneth nanga Filomena kon drape, a opo a doro èn a kari den kon inisei.

Den ben kan si wantewante taki a ben e krei. Di Kenneth begi fu bigin a studie, a frow bigin krei baka. Na wan switi fasi Kenneth nanga Filomena aksi en san pasa.

A frow fruteri den taki a ben wani kiri ensrefi a bakadina dati, ma na a telefon fu Kenneth stop en. Na a momenti dati a ben e skrifi wan brifi gi en masra taki a o kiri ensrefi. A fruteri den taki a e firi brokosaka srefisrefi. Dati meki den trowstu en nanga wan tu moi Bijbeltekst. A trowstu di a kisi kibri en libi.

Kenneth e fruteri: „Wi taigi Yehovah tangi taki a gebroiki wi fu yepi na uma disi di no ben sabi moro san a musu du. Wi e taigi en tangi spesrutu fu di a gebroiki en engel noso kande en santa yeye fu meki wi bel a frow!” *

Yu denki taki Kenneth nanga Filomena abi leti fu bribi taki na Gado meki sani waka na a fasi disi, kande fu di a gebroiki wan engel noso en santa yeye? Noso yu ben o taki dati na koloku meki Kenneth bel a frow?

Wi no sabi seiker. San wi sabi na taki Gado e gebroiki en engel fu yepi sma di wani kon sabi en. Fu eksempre, Bijbel e taki dati Gado gebroiki wan engel fu tyari Filipus, wan preikiman fu a bun nyunsu, go na wan heihei man fu Etiopia. A man disi ben wani kon frustan Gado Wortu moro bun.​—Tori fu den apostel 8:26-31.

Furu kerki e leri sma taki den musu bribi na ini makti yeye. Den e taki dati sonwan fu den yeye disi na bun yeye di e du a wani fu Gado noso di e kibri sma gi ogri. Furu sma e bribi taki engel de trutru. Boiti dati, den e bribi tu taki den engel disi kan du bun sani gi den. Ma furu sma de tu di no e bribi na ini engel srefisrefi.

Engel de trutru? Efu dati de so, dan pe den komoto? San Bijbel e taki fu engel? Den kan yepi yu na ini a libi? Meki wi go luku den tori disi.

^ paragraaf 8 Yehovah na a nen fu Gado soleki fa a skrifi na ini Bijbel.​—Psalm 83:18.