Go na content

Go na a tra menu

Go na table of contents

Yehovah Kotoigi

Sranantongo

A Waktitoren  |  Nr. 4 2016

 TORI FU A KAFTI | BIJBEL—FA A DU KON TAKI A DE TE NOW ETE?

Bijbel no pori gowe

Bijbel no pori gowe

SAN BEN KAN PASA: Den Bijbel skrifiman nanga den sma di ben e skrifi Bijbel abra ben gwenti skrifi na tapu lolo fu papirus nanga perkament (2 Timoteyus 4:13). * Fa den sani disi ben kan meki a boskopu fu Bijbel lasi gowe?

Papirus e priti makriki, a e lasi kloru èn a e kon swaki. Den sabiman Richard Parkinson nanga Stephen Quirke di e ondrosuku owruten sani fu Egepte, taki: „Te papirus e bigin pori, dan te fu kaba soso pisipisi titei nanga finifini doti e tan abra. Wan bukulolo di sma kibri na wan presi kan kon buku èn alata noso insekt soleki weti mira kan nyan en te den kibri en ondro gron.” Baka di sma feni son papirus-bukulolo, den poti den na presi pe furu leti noso dampu de. A sani disi meki taki den bigin pori moro esi.

Perkament-bukulolo e tan moro langa leki papirus-bukulolo. Ma den e pori gowe tu efu sma no e gebroiki den na a yoisti fasi. Disi e pasa tu efu den e tan na wan presi di kowru noso di faya tumusi, na wan presi pe dampu de, noso na wan presi pe tumusi furu leti de. * Insekt e nyan perkament-bukulolo tu. Dati meki furu fu den no de moro. Efu den Bijbel bukulolo ben pori gowe, dan a boskopu na ini ben o lasi gowe tu.

FA A DU KON TAKI BIJBEL DE TE NOW ETE: A Dyu Wet ben taki dati ibri kownu ben musu „skrifi a wèt abra na ini wan buku” (Deuteronomium 17:18). Sobun, a ben musu skrifi den fosi feifi buku fu Bijbel abra. Boiti dati, sma di ben sabi fa fu skrifi sani abra, meki bun furu kopi fu Bijbel. Dati meki pikinmoro 100 yari Baka Krestes, Gado Wortu ben de fu feni na ini snoga na ini heri Israel èn srefi te na ini Masedonia! (Lukas 4:16, 17; Tori fu den apostel 17:11) Fa a du kon taki son owru bukulolo de ete na ini a ten disi?

Den bukulolo di sma sabi leki den Dede Se Lolo tan bun hondrohondro yari langa na ini prapi di ben kibri na ini bergi-olo na ini wan drei kontren

Philip. W. Comfort, wan sabiman di e ondrosuku den buku fu a Nyun Testamenti, taki dati „den Dyu ben gwenti poti bukulolo fu Bijbel na ini prapi noso bigi watrakan fu hori den bun”. Soleki fa a sori, dan den Kresten ben teki a gwenti dati abra tu. Dati meki sma feni son owruten Bijbel bukulolo na ini prapi, na ini dungru kamra nanga bergi-olo èn na ini kontren di ben drei srefisrefi.

A BAKAPISI: Dusundusun bukulolo fu Bijbel de te now ete. Sonwan fu den bukulolo disi owru moro leki 2000 yari. Nowan tra owruten buku abi so furu kopi di owru so.

^ paragraaf 3 Papirus na papira di meki fu papirus-grasi di e gro na ini watra. Perkament meki fu metibuba.

^ paragraaf 5 Fu eksempre, a prenspari dokumenti di e sori taki Amerkankondre kisi srefidensi ben skrifi na tapu wan lolo fu metibuba. Now, sowan 250 yari baka di sma ben meki a dokumenti disi, a lasi kloru so te, taki sma no man si bun san skrifi na en tapu.