Go na content

Go na a tra menu

Go na table of contents

Yehovah Kotoigi

Sranantongo

A Waktitoren  |  Nr. 4 2016

Yu ben sabi a sani disi?

Yu ben sabi a sani disi?

Yesus ben poti prakseri na den gwasiman. Fu san ede disi de so aparti?

Den Dyu fu owruten ben e frede gi a sortu gwasi di furu sma ben abi na ini Bijbel ten. A takru siki dati ben e pori den senwe-titei fu sma èn a ben kan meki taki den skin pori gowe. Dresi no ben de gi gwasi. Na presi fu dati, den sma di ben abi a siki disi ben musu go tan aparti fu ala tra sma èn den ben musu warskow sma taki den abi a siki disi.Lefitikus 13:45, 46.

Den Dyu kerki fesiman ben e meki ala sortu tra wet di no ben skrifi na ini Gado Wortu èn di ben meki a libi hebi gi den gwasiman. Fu eksempre, wan fu den wet fu den ben taki dati sma no ben mag kon krosibei fu wan gwasiman. Den ben musu tan 2 meter fara fu en. Ma efu winti ben e wai, dan den ben musu tan sowan 45 meter fara fu en. Bijbel e taki dati den gwasiman ben musu tan „na dorosei fu a kampu”. Son sabiman fu a Talmud (a Dyu wet) ben feni taki a wet disi e sori taki den gwasiman ben musu tan na dorosei fu den foto di abi skotu. Wan leisi di wan Dyu kerki fesiman si wan gwasiman na ini wan foto, a trowe ston na en tapu èn a taki: „Go na yu eigi tanpresi èn no kon doti tra sma dyaso.”

Ma Yesus ben de heri tra fasi! A no ben e yagi den gwasiman. A no ben frede fu fasi den èn a ben dresi den srefi.Mateyus 8:3.

O ten den Dyu kerki fesiman ben e gi sma primisi fu broko trow?

Wan brokotrow papira fu a ten fu 71 noso 72 Baka Krestes

Na ini a a ten fu Yesus den kerki fesiman ben lobi haritaki fu brokotrow. Fu dati ede, son Fariseiman di ben wani tesi Yesus aksi en a sani disi: „Wan man abi a reti fu broko trow nanga en wefi fu ala sortu sani ede?”Mateyus 19:3.

A Wet di Gado gi Moses ben gi wan man pasi fu broko trow nanga en wefi, efu „na uma du wan sani di no fiti” (Deuteronomium 24:1). Na ini a ten fu Yesus a Dyu bribi ben prati na ini tu grupu. Den tu grupu disi ben e leri tu difrenti sani fu brokotrow. A Shammai-grupu ben e hori densrefi moro fini na a wet disi. Den ben feni taki a wan-enkri sani di ben gi wan sma reti fu broko trow, na te en trowpatna ben du sutadu. Ma a Hillel-grupu ben feni taki iniwan trobi na ini a trowlibi ben gi wan man reti fu broko trow, awinsi na wan pikin kesekese nomo. Den ben taki dati wan man ben kan broko trow srefi efu en wefi no ben bori wan bun nyanyan gi en, noso efu a ben si wan tra uma di a ben feni moro moi.

Ma fa Yesus piki den Fariseiman? A taki krin: „Efu wan man broko trow nanga en wefi, ma a wefi no du hurudu èn a man trow nanga wan tra uma, dan a du sutadu.”Mateyus 19:6, 9.