Efu a no Gado e meki sma pina, dan fa a du kon taki bun furu sma e dede fu angri, taki sma pôti srefisrefi, taki sma e kiri makandra leki meti, taki sma e kisi ala sortu takru siki, èn taki rampu e pasa? Gado Wortu, Bijbel e sori dri prenspari sani di e meki taki libisma e pina:

  1. Sma e denki densrefi nomo, den gridi, èn den abi bita-ati. „Sensi di libisma bigin tiri tra libisma, sani no waka bun gi den” (Preikiman 8:9). Nofo tron sma e pina fu di ogri-ati sma di e denki densrefi nomo, e du ogri nanga den.

  2. Ogri ten nanga sani di den no e fruwakti. Furu sma e pina fu di „ogri ten nanga sani di den no e fruwakti kan miti den alamala” (Preikiman 9:11). Dati wani taki dati ogri e miti sma fu di den de na wan presi na a momenti te wan ogri noso wan ongoloku e pasa, noso te tra sma no e luku bun.

  3. Na ogri-ati tiriman fu grontapu. Bijbel e sori krin san na a moro prenspari reide fu san ede libisma e pina. A e taki: „Heri grontapu de na ini a makti fu na ogriwan” (1 Yohanes 5:19). Na „ogriwan” na Satan Didibri, wan makti yeye di ben de wan engel fu Gado fosi, ma di „drai baka gi san tru” (Yohanes 8:44). Tra engel go horibaka gi Satan èn den opo densrefi teige Gado fu man du san den srefi wani. Na so den tron ogri yeye (Genesis 6:1-5). Sensi di Satan nanga den ogri yeye opo densrefi teige Gado den abi furu krakti tapu grontapu afersi èn den e meki taki furu ogri pasa. Wi e si dati krin na ini a ten fu wi. Now Didibri de nanga bigi atibron èn „a e kori sma na heri grontapu”. Dati meki Bijbel e taki „helu fu grontapu” (Openbaring 12:9, 12). Iya, Satan na wan ogri-ati tiriman. A lobi te libisma e pina. Na Satan e meki sma pina, a no Gado.

PRAKSERI A SANI DISI: Soso wan takru-ati sma di no e firi gi trawan ben o meki taki sma di no du nowan ogri, e pina. Ma luku san Bijbel e taki fu Gado: „Gado na lobi” (1 Yohanes 4:8). Fu di a tru Gado abi lobi, meki „a no tru kwetikweti taki Gado e du ogri! Noiti na Almaktiwan e du kruktu sani!”​—Yob 34:10.

Ma kande yu e aksi yusrefi: ’O langa na Almakti Gado o gi pasi taki Satan e tan du ogri nanga libisma?’ Soleki fa wi si, dan Gado no lobi ogridu kwetikweti, èn a e hati en te wi e pina. Boiti dati, a Wortu fu en e gi wi a rai disi: „Trowe ala un hebi na en tapu, bika a e broko en ede nanga unu” (1 Petrus 5:7). Gado lobi wi èn a abi a makti fu puru ala pina nanga kruktudu. Dati wi o si na ini a tra artikel. *

^ paragraaf 7 Efu yu wani sabi moro fini fu san ede Gado e gi pasi taki pina de, dan luku kapitel 11 fu a buku San Bijbel kan leri wi?, di Yehovah Kotoigi meki. Yu kan feni en tu na www.jw.org/srn.