Go na content

Go na a tra menu

Go na table of contents

Yehovah Kotoigi

Sranantongo

A Waktitoren  |  Nr. 3 2017

 TORI FU A KAFTI | DEN FO ASI FU OPENBARING—SAN DISI ABI FU DU NANGA YU?

Suma na den fo man na tapu den asi?

Suma na den fo man na tapu den asi?

A kan taki furu sma no sabi suma na den fo asiman èn son sma e frede den. Ma dati no abi fu de so. Fu san ede? Fu di Bijbel èn den sani di e pasa na ini a ten disi e yepi wi fu sabi san ibriwan fu den asiman e prenki. Aladi soso rampu kon na grontapu di den man disi bigin rèi na tapu den asi, toku bun nyunsu de gi yu nanga yu osofamiri. Fa so? Meki wi luku fosi suma na den fo asiman disi.

A SMA DI E RÈI A WETI ASI

A fisyun e bigin nanga den wortu disi: „Mi si wan weti asi. A sma di ben e sidon na en tapu ben abi wan bo. A kisi wan kownu-ati èn a hari go feti nanga den feanti fu en. A feti nanga a wan baka a trawan, teleki a wini den alamala.”Openbaring 6:2.

Suma na a sma di e rèi a weti asi? A srefi Bijbel buku Openbaring e yepi wi fu sabi suma na en. Kapitel 19 e kari a sma disi „A Wortu fu Gado” èn a e sori taki a de na hemel (Openbaring 19:11-13). Na Yesus Krestes abi a nen „A Wortu” fu di na en e taki gi Gado (Yohanes 1:1, 14). Boiti dati, Bijbel e kari en „Kownu fu den kownu èn Masra fu den masra”. A e kari en tu „’a wan di de fu frutrow’ èn ’a wan di e taki san tru’” (Openbaring 19:16). A de krin taki Yesus abi a makti fu tiri leki kownu èn fu feti nanga den feanti fu en. Ma a no e gebroiki en makti fu du kruka sani noso fu pina sma. Toku wan tu tra aksi e opo kon.

Suma gi Yesus a makti fu feti nanga den feanti fu en? (Openbaring 6:2) A profeiti Danièl ben kisi wan fisyun pe a si a Mesias di ben gersi „wan manpikin fu libisma”. Yehovah Gado, * „a Graniwan di de sensi owruten” ben gi en „makti fu tiri. A kisi glori èn a kisi wan kownukondre tu” (Danièl 7:13, 14). Sobun, na a Almakti Gado gi Yesus a makti nanga a reti fu tiri èn fu krutu sma. Gado en Manpikin o feti na wan reti fasi. Dati meki a fiti taki a e rèi tapu wan weti asi. Furu leisi te Bijbel e taki fu a kloru weti, dan a abi fu du nanga retidu.Openbaring 3:4; 7:9, 13, 14.

O ten den asiman bigin rèi den asi? Luku taki a fosi asiman, Yesus, bigin rèi di a kisi wan kownu-ati (Openbaring 6:2). O ten Yesus tron Kownu na hemel? A no tron kownu wantewante di a drai go baka na hemel. Bijbel e sori taki a ben musu wakti fu wan pisi ten (Hebrewsma 10:12, 13). Yesus gi den bakaman fu en wan marki di ben o sori o ten a ben o tron Kownu na hemel. A taki dati te a ben o bigin tiri, a situwâsi na grontapu ben o kenki èn sani no ben o go bun srefisrefi. Feti, angriten nanga siki ben o de na ala sei (Mateyus 24:3, 7; Lukas 21:10, 11). Syatu baka di a Fosi Grontapufeti bigin na ini 1914, a ben de krin taki a muilek ten dati ben doro. Bijbel e kari en „den lasti dei”.2 Timoteyus 3:1-5.

Ma di Yesus tron kownu na ini 1914, a situwâsi na grontapu kon moro ogri, na presi taki a kon moro bun. Fu san ede? Fu di na a ten dati Yesus no bigin tiri na grontapu, ma a bigin tiri na hemel. Feti bigin na hemel èn Kownu Yesus, di Bijbel e kari Mikael, trowe Satan nanga den ogri yeye fu en kon na grontapu (Openbaring 12:7-9, 12). Satan no ben mag go moro na hemel. Sensi a ten dati, Satan abi bigi atibron fu di a sabi taki en ten syatu. Iya, heri esi a wani fu Gado o pasa na grontapu te a o puru Satan na pasi (Mateyus 6:10). Meki wi luku now fa den tra dri asiman e sori taki wi e libi trutru na ini den muilek „lasti dei”. A fosi asiman e prenki wan sma, ma den dri tra asiman e prenki sani di ben o miti libisma na ala sei fu grontapu.

A SMA DI E RÈI A REDI ASI

„Ne wan tra asi kon. A ben de wan asi di ben redi leki faya. A sma di ben e sidon na en tapu, ben kisi primisi fu meki feti kon na grontapu, so taki sma ben o kiri makandra. A ben kisi wan bigi feti-owru tu.”Openbaring 6:4.

A sma di e rèi na asi disi e prenki feti. A no na ini wan tu kondre nomo a e meki feti kon, ma na heri grontapu. Na ini 1914, a ben de a fosi leisi taki feti broko na heri grontapu. Baka dati yu ben abi a Di Fu Tu Grontapufeti èn moro sma dede na ini a feti disi. Son sma di ondrosuku a tori disi e taki dati sensi 1914 moro leki 100 milyun sma dede na ini bigi feti nanga pikinpikin feti. Boiti dati, furu sma kisi hebi mankeri na ini den feti disi.

San e sori taki furu feti de na ini a ten disi? Nownow libisma abi fetisani di kan kiri ala sma na grontapu. Noiti ete a sani disi ben de so. Srefi organisâsi, soleki den Verenigde Naties di e feni taki den o tyari freide kon, no man tapu a sma di e rèi a redi asi.

A SMA DI E RÈI A BLAKA ASI

„Mi si wan blaka asi èn a sma di ben e sidon na en tapu ben abi wan wegi na ini en anu. Dan mi yere wan sten. A ben gersi leki a ben komopo na mindri den fo kerub-engel. A taki: ’Wán kilo aleisi gi wán dei moni, nanga dri kilo groto gi wán dei moni. No meki noti pasa nanga na olèif-oli èn nanga a win.’”Openbaring 6:5, 6.

A sma di e rèi na asi disi e prenki angriten. A tekst e sori taki nyanyan ben o kon diri so te taki wán kilo aleisi ben o kostu wán denari. Dati na a moni di wan sma ben e kisi te a ben wroko wan heri dei (Mateyus 20:2). Nanga a srefi moni dati sma ben o man bai 3 kilo groto nomo fu di groto ben bunkopu moro tarwe. Toku a nyanyan disi no ben o sari gi wan bigi osofamiri. A fisyun e taki tu dati sma no musu meki noti pasa nanga na olèif-oli èn nanga a win. Disi na sani di sma fu Bijbel ten ben e gebroiki ibri dei. Sobun, sma e kisi a warskow fu luku bun fa den e gebroiki a pikinso nyanyan di den abi.

Sensi 1914, a sma di sidon na tapu a blaka asi e rèi na asi teleki now. Fu san ede wi kan taki dati? Wi si taki sowan 70 milyun sma dede fu angri na ini den yari 1900-2000. Wan raportu e taki dati „na ini 2012-2014 sowan 805 milyun sma ben siki fu di den no e nyan bun. Sobun fu ibri neigi sma na grontapu, wan fu den no e nyan bun.” Wan tra raportu e taki: „Den sma di e dede fu angri ibri yari, furu moro den sma di e dede fu AIDS, malaria nanga tuberculose ibri yari.” Aladi furu muiti e du fu gi sma nyanyan, toku a sma na tapu a blaka asi e rèi go doro.

A SMA DI E RÈI NA ASI DI ABI WAN SIKISMA KLORU

„Mi si wan asi di abi wan sikisma kloru. A sma di ben e sidon na en tapu, ben nen Dede. Grebi ben e kon leti na en baka. Den ben kisi makti fu tiri wan di fu fo pisi fu grontapu, so taki den ben kan kiri sma nanga wan langa feti-owru, nanga angriten èn nanga takru siki. Den ben kan meki den ogri meti fu grontapu kiri sma tu.”Openbaring 6:8.

A di fu fo sma di e rèi na asi e prenki a dede di sma e dede fu siki nanga tra sani. Syatu baka 1914, a Spaanse griep kiri milyunmilyun sma. A kan taki sowan 500 milyun sma ben kisi a siki disi. Sobun fu ibri dri sma fu a ten dati, wan fu den ben kisi a siki.

Ma a no a Spaanse griep wawan kiri so furu sma. Sabiman e taki dati hondrohondro milyun sma dede fu poki na ini den yari 1900-2000. Te nanga now, milyunmilyun sma e dede fu AIDS, tuberculose nanga malaria aladi datra e du someni ondrosuku fu feni dresi gi den siki disi.

Dede e tan kiri furu sma. Sma e dede na ini feti, den e dede fu angriten noso fu tra sani ede. Grebi e tan teki sma. A no e sari nowan sma.

 BUN TEN E KON!

Heri esi den problema di wi abi now o kaba. No frigiti a sani disi: Na ini 1914, Yesus „hari go feti nanga den feanti fu en” èn a trowe Satan kon na grontapu. Ma Yesus no kaba wini a feti ete (Openbaring 6:2; 12:9, 12). Dyonsro te Armagedon doro, Yesus o sroto Satan na ini wan peti so taki a no man du noti moro èn a o pori ala libisma di e horibaka gi Didibri (Openbaring 20:1-3). Yesus o sorgu taki den tra dri asiman no o rèi moro. A o sorgu tu taki ala sani di den asiman disi pori, kon bun baka. Fa a o du dati? Luku san Bijbel e pramisi.

Na presi fu feti, freide o de. Yehovah „e meki feti kon na wan kaba. Den bo a e broko na tu èn den lansri a e koti pisipisi” (Psalm 46:9). Den sma di lobi freide „o prisiri srefisrefi, fu di freide o de pasa marki”.Psalm 37:11.

Angriten no o de moro, ma nyanyan o lai na grontapu. „Furu nyanyan o kon de na grontapu. Srefi na tapu den ede fu den bergi nyanyan o de pasa marki.”Psalm 72:16.

Heri esi Yesus o sorgu taki ala sani di den dri asiman pori, kon bun baka

Na presi fu siki nanga dede, ala sma o abi wan bun gosontu èn den o libi fu têgo. Gado „o figi ala watra puru na den ai èn dede no o de moro. Nowan sari, noso krei, noso pen no o de moro.”Openbaring 21:4.

Di Yesus ben de na grontapu, a du furu moi sani di e sori fa a libi o de te a o tiri. A ben gi sma deki-ati fu libi na ini freide nanga makandra, a gi dusundusun sma nyanyan, a dresi sikisma èn a wiki srefi den dedewan.Mateyus 12:15; 14:19-21; 26:52; Yohanes 11:43, 44.

Yehovah Kotoigi o breiti fu sori yu na ini yu Bijbel san yu musu du fu de srekasreka gi a ten te den asiman no o rèi moro. Yu wani kon sabi moro?

^ paragraaf 7 Yehovah na a nen fu Gado soleki fa a skrifi na ini Bijbel.