Go na content

Go na a tra menu

Go na table of contents

Yehovah Kotoigi

Sranantongo

A Waktitoren  |  Nr. 3 2017

 TEKI NA EKSEMPRE FU SMA DI BEN ABI BRIBI | SARA

„Yu na wan moi uma”

„Yu na wan moi uma”

PRUBERI fu si a situwâsi disi na yu fesi: Sara e tanapu na mindrisei fu a kamra èn a e luku lontu. En na wan moi uma fu wan fu den kondre krosibei fu Israel èn a abi moi blaka ai. Kande yu kan si na en ai taki a e sari pikinso. Efu dati de so, dan wi kan frustan fu san ede. En nanga en lobi masra Abraham libi omeni yari na ini na oso disi. * Den du furu sani makandra èn den e libi koloku na ini den oso.

Den ben e libi na ini Ur, wan gudu foto. Na ini a foto disi, yu ben abi bun wrokoman, sma di ben sabi meki moimoi sani nanga bisnisman. Sobun, wi kan de seiker taki den ben abi furu sani. Ma Sara no ben e prakseri nomo fu tyari gudu kon na ini en oso. Na ini na oso disi, en nanga en masra ben libi koloku omeni yari, ma problema ben miti den tu. Boiti dati, den ben gwenti begi Yehovah, a lobi Gado fu den na ini na oso disi. Sobun, wi kan frustan fu san ede Sara ben lobi en oso.

Toku Sara ben de klariklari fu gowe libi ala sani na baka. Aladi a ben abi sowan 60 yari, a ben o abi fu go libi na presi di a no ben sabi. Ogri ben kan miti en, a libi no ben o makriki gi en èn a no ben sabi efu a o drai kon baka na en oso. San meki taki so wan bigi kenki kon na ini en libi? Èn san wi kan leri fu a bribi fu en?

„GOWE LIBI YU KONDRE”

A kan taki Sara gro kon bigi na ini Ur. A foto disi na wan brokopresi nownow. Ma na ini a ten fu Sara, bisnisman fu ala sortu kondre ben e kon nanga boto na Eufraat-liba èn den ben e tyari warti sani kon na ini a gudu foto disi. Furu sma ben e waka na ini den smara pasi fu Ur di lai boktu. Den lanpe ben span nanga boto èn ala sortu sani ben de fu feni na den wenkri fu a foto disi. Na ini so wan foto Sara gro kon bigi èn a kan taki a ben sabi furu sma. Wi kan de seiker taki den sma ben sabi en tu fu di a ben de wan heri moi uma. A ben abi furu famiri dyaso tu.

Na ini Bijbel, wi sabi Sara leki wan uma di ben abi wan tranga bribi. Den sma fu Ur ben e anbegi a mun-gado èn den ben abi wan hei toren na ini a foto gi a gado disi. Ma Sara no ben e bribi na ini a gado disi. A ben e anbegi a tru Gado, Yehovah. Bijbel no e sori fa Sara kon abi wan tranga bribi. Wan pisi ten en papa ben e anbegi falsi gado. Ma san wi sabi, na taki Sara ben trow nanga Abraham, wan man di ben owru tin yari moro en (Genesis 17:17). * Bakaten Bijbel kari Abraham a „tata fu ala sma di e bribi” (Romesma 4:11). Abraham nanga Sara ben abi wan bun trowlibi. Den ben e lespeki makandra, den ben e taki bun nanga makandra èn den ben e wroko makandra fu lusu den problema fu den. Ma san moro  prenspari na taki den ala tu ben lobi a Gado fu den.

Sara ben lobi en masra. En nanga en masra ben abi den oso na ini Ur pe den ben e libi na mindri den famiri. Ma syatu baka dati, den ben abi wan problema. Bijbel e taki dati Sara „no ben man kisi pikin. Dati meki a no ben abi pikin” (Genesis 11:30). Na a ten dati èn na ini a kulturu fu den, a ben de wan syen efu wan uma no ben man kisi pikin. Ma Sara tan dini a Gado fu en èn a no gowe libi en masra. Soleki fa a sori, dan Lot, a neef fu den di no ben abi papa moro, ben de leki den eigi pikin. Na so a libi fu den ben e go, teleki a dei doro pe ala sani kenki.

Abraham kon na Sara èn a abi wan span sani fu taigi en. A no man bribi san pasa dyonsro. A Gado di den e anbegi, taki nanga en. Kande a sori ensrefi na en nanga yepi fu wan engel. Pruberi fu si fa Sara e luku en masra nanga den moi ai fu en. A no man wakti fu Abraham taigi en san pasa. A e aksi en: „San a taki? Grantangi taigi mi!” Kande Abraham e sidon fosi èn a e prakseri fa a musu fruteri en a nyunsu. Baka dati a e taigi en san Yehovah taki: „Gowe libi yu kondre èn yu famiri, dan go na a kondre di mi o sori yu” (Tori fu den apostel 7:2, 3). A no de fu taki dati Abraham nanga Sara ben skreki di den yere a nyunsu disi. Ma now den go sidon prakseri san Yehovah aksi den fu du. Den ben o abi fu gowe libi a bun libi di den ben abi èn go tan na ini tenti. San Sara ben o du? A ben o de klariklari fu horibaka gi en masra, now di wan bigi kenki kon na ini den libi? A no de fu taki dati Abraham ben e luku en fu si san a o piki.

Ma kande wi e denki: ’Mi no abi fu teki a bosroiti di Sara ben musu teki. Noiti Gado aksi mi noso mi trowpatna fu du so wan sani!’ Toku wi alamala musu teki wan srefi sortu bosroiti. Wi e libi na ini wan grontapu pe sma lobi gudu. Den kan gi wi deki-ati fu prakseri wisrefi nomo, fu suku gudu noso fu abi wan bun libi. Ma Bijbel e gi wi deki-ati fu teki wan tra bosroiti. Wi musu poti a wani fu Gado na a fosi presi. Sobun wi musu plisi Gado, na presi fu denki wisrefi nomo (Mateyus 6:33). Te wi e prakseri san Sara du, dan wi kan aksi wisrefi: ’Sortu bosroiti mi o teki na ini mi libi?’

DEN „GOWE LIBI A KONDRE”

Sara e sreka sani fu froisi. A e luku san a musu tyari èn san a musu libi na baka. A no kan tyari tumusi bigi sani di den buriki nanga den kameili no o man tyari èn di ben o meki en muilek gi en fu froisi fu a wan presi go na a trawan. Wi de seiker taki den ben o abi fu seri furu fu den sani fu den noso gi sma den. A no ben o man du den sani moro di a ben gwenti du na ini a foto. A no ben o man go na den wowoyo noso wenkri fu bai aleisi, meti, froktu, krosi, moimoi sani nanga tra sani di a ben abi fanowdu.

A bribi fu Sara meki taki a gowe libi en oso nanga den gudu fu en

 Kande a moro muilek sani gi Sara, na fu gowe libi na oso fu en. Efu na oso fu Sara ben meki leki den oso fu Ur di sabiman ondrosuku, dan a no de fu taki dati a ben o gowe libi wan heri moi oso. Sonwan fu den oso dati ben abi moro leki twarfu kamra èn den ben abi watra nanga toilet inisei. Srefi wan pikin oso ben abi wan bun daki, muur nanga doro di ben man sroto. Ma wan tenti abi den sani dati fu man kibri sma gi fufuruman? Wan tenti man kibri sma gi lew, penitigri, beer nanga busidagu di ben lai na ini den kondre fu a ten dati?

Fa a ben de nanga en famiri? Suma Sara ben o gowe libi? Gado ben taigi en fu ’gowe libi en kondre nanga en famiri’. Disi ben musu de wan hebi sani gi en. Sara ben de wan uma di ben lobi sma. A ben musu fu abi brada nanga sisa, neef nanga nicht, tante nanga omu di a ben lobi èn a kan taki a no ben o si den sma disi noiti moro. Toku Sara no lasi-ati, ma ibri dei a ben e sreka sani fu gowe.

Aladi a ben hebi gi Sara, toku di a dei doro a ben de srekasreka fu gowe. Tera, na osofamiri-edeman ben abi sowan tu hondro yari, toku a ben o gowe makandra nanga Abraham nanga Sara (Genesis 11:31). A no de fu taki dati Sara ben musu du furu fu sorgu en papa di ben owru. Lot srefi go nanga den di den gi yesi na Yehovah èn den „gowe libi a kondre fu den Kaldeyasma”.Tori fu den apostel 7:4.

A fosi presi pe den go, na Haran di ben de sowan 960 kilometer go na a noordwest-sei. Fu doro drape, den teki a pasi di e waka sei Eufraat-liba. A famiri tan wan pisi ten na Haran. A kan taki Tera ben siki èn a no ben man teki waka go moro fara. Den tan drape teleki a dede di a ben abi 205 yari. Fosi den teki waka go moro fara, Yehovah taki nanga Abraham baka. A taigi en taki a musu gowe libi Haran, dan a musu go na a kondre di a o sori en. Ma a leisi disi, Gado pramisi en wan moi sani: „Mi o meki yu tron na afo fu wan bigi pipel” (Genesis 12:2-4). Ma di den gowe libi Haran, Abraham ben abi 75 yari èn Sara ben abi 65 yari èn den no ben abi pikin. Dan fa Abraham ben o tron na afo fu wan bigi pipel? A ben o teki wan tra wefi? Na a ten dati, a gwenti ben de taki wan man ben abi moro leki wán wefi. Sobun, a kan taki Sara ben e denki taki Abraham ben o teki ete wan wefi.

Awinsi fa a no fa, den gowe libi Haran. Ma luku suma ben de now nanga den. Bijbel e sori taki Abraham gowe nanga den gudu di a ben kisi èn nanga „ala den srafu di den ben kon abi na ini Haran” (Genesis 12:5). A no de fu taki dati Abraham nanga Sara ben fruteri ala sma di wani arki, fu a bribi fu den. Son owruten Dyu vertaling e taki dati den sma di kari na ini a vers disi na sma di bigin dini Yehovah makandra nanga Abraham nanga Sara. Efu dati de so, dan kande na a tranga bribi fu Sara meki taki te a ben fruteri sma fu a Gado fu en nanga a howpu fu en, den ben e bribi en. Disi na wan moi eksempre gi wi, fu di wi e libi na ini wan ten pe furu sma no abi bribi èn den no abi wan howpu tu. Te yu leri wan moi sani fu Bijbel, yu kan fruteri wan sma fu en?

A „GO NA EGEPTE”

Baka di den abra Eufraat-liba, den hari go na a zuidsei na a kondre di Yehovah ben pramisi den. Kande dati ben de tapu 14 Nisan 1943 Fosi Krestes (Eksodes 12:40, 41). Yu man si kaba fa Sara e drai luku a heri kondre? A si fa a kondre moi. A si den bergi nanga lagipresi èn a e firi fa a weer switi. Na a presi Sikem, krosibei fu den bigi bon fu Morei, Yehovah sori ensrefi na Abraham baka. A taigi en: „Na den bakapikin fu yu, mi o gi a kondre disi.” A wortu „bakapikin” ben wani taki furu gi Abraham. Kande a ben meki a prakseri san ben pasa na ini a dyari fu Eden pe Yehovah ben pramisi taki wan pikin ben o masi na ede fu Satan. Yehovah ben taigi Abraham kaba taki na den bakapikin fu en ben o meki taki ala sma na grontapu kisi blesi.Genesis 3:15; 12:2, 3, 6, 7.

Toku a famiri fu Abraham ben kisi problema tu. Wan angriten ben kon na ini Kanan èn Abraham bosroiti fu froisi nanga en famiri go na Egepte na a zuidsei. Ma a si taki wan tra problema ben o miti en drape. Dati meki a taigi Sara: „Mi e begi yu, arki mi! Mi sabi taki yu na wan moi uma. Sobun, te den Egeptesma si yu, den o taki: ’Na uma disi na en wefi.’ Dan den o kiri mi, ma yu den no o kiri. Mi e begi yu fu taigi den taki yu na mi sisa, so taki sani o waka bun gi mi fu yu ede, dan mi o tan na libi”  (Genesis 12:10-13). Fu san ede Abraham aksi en fu du so wan sani?

Son sabiman feni taki Abraham ben lei èn taki a ben de wan bobo. Ma dati no de so. Sara na trutru wan afu-sisa fu Abraham. Èn Abraham ben abi leti fu aksi Sara fu du so wan sani. Abraham nanga Sara ben sabi taki a moro prenspari sani na taki a prakseri fu Gado musu kon tru. Gado ben abi na prakseri taki Abraham ben o tron na afo fu wan spesrutu pikin èn fu wan pipel. Dati meki a ben de tumusi prenspari taki noti pasa nanga Abraham. Boiti dati, sabiman feni buweisi di e sori taki a ben e pasa trutru taki makti man na ini Egepte ben e teki wan man en frow, dan den ben e kiri a man. Sobun, Abraham teki wan koni bosroiti èn Sara horibaka gi en.

Heri esi wan sani pasa di sori taki Abraham ben abi leti fu frede. Wan tu heihei man fu Farao si taki Sara ben moi kefalek. Furu frow di ben abi a yari fu en no ben moi so. Den man disi go fruteri Farao fa Sara moi èn Farao seni den fu go teki Sara! Abraham ben musu fu de nanga bigi broko-ede èn prakseri fa Sara ben frede. Ma soleki fa a sori, dan Farao no ben si Sara leki wan srafu, ma a ben gi en ala sani fu meki a firi switi. Kande Farao ben wani kisi Sara nanga den gudu fu en. Dan bakaten a ben o aksi en brada, Abraham, fu gi en Sara leki wefi.Genesis 12:14-16.

Prakseri fa Sara e sidon na ini a balkon fu a kownu-oso e luku a kontren fu Egepte. Fa a ben e firi fu libi baka na ini wan moi oso èn fu abi ala sortu switi nyanyan? Kande a ben abi en moro bun srefi leki di a ben de na Ur. Yu denki taki a bun libi disi ben e hari en? Prakseri fa Satan ben o breiti efu Sara ben libi Abraham fu trow nanga Farao! Ma Sara no du dati. A ben lobi en masra nanga en Gado èn a no ben wani pori a trowlibi fu en. Wi winsi taki ala trowpatna na ini a ten disi ben e denki so! A bun fu teki a moi eksempre fu Sara èn tai hori na den lobiwan fu yu èn na den mati fu yu.

Aladi Farao ben pruberi fu kisi Sara nanga den gudu fu en, toku Sara no gowe libi en masra

Yehovah du wan sani fu kibri a lobi uma disi. A meki Farao nanga den sma fu en oso kisi hebi siki. Di Farao kon yere taki Sara ben de a wefi fu Abraham, a seni en go baka na en masra èn a taigi a heri osofamiri fu gowe libi Egepte (Genesis 12:17-20). Abraham ben breiti trutru fu kisi en lobi wefi baka! Yu sabi ete taki a ben taigi en: „Mi sabi taki yu na wan moi uma.” Ma a no a moi fesi fu Sara nomo a ben lobi. Wan tra sani ben de di ben e meki taki Sara ben moro moi gi en. Sara ben moi na ini en ati. A ben abi moi fasi di Yehovah lobi (1 Petrus 3:1-5). Wi alamala kan moi na a fasi disi. Sobun, meki wi poti na anbegi fu Gado na a fosi presi, na presi fu feti baka gudu. Meki wi fruteri trawan fu Gado èn meki wi tan tyari wisrefi na wan krin fasi te wi e kisi tesi. Te wi e du den sani disi, dan wi e sori bribi neleki Sara.

^ paragraaf 3 Fosi, den nen ben de Abram nanga Sarai. Ma bakaten Yehovah kenki a nen fu den kon tron Abraham nanga Sara. Na den nen dati furu sma sabi.Genesis 17:5, 15.

^ paragraaf 8 Sara ben de wan afu-sisa fu Abraham. Tera ben de a papa fu den, ma den no ben abi a srefi mama (Genesis 20:12). Na ini a ten disi, a no fiti taki famiri e trow nanga makandra. Ma wi musu hori na prakseri taki sani ben de tra fasi na a ten dati. Sma ben de moro krosibei fu a ten fu Adam nanga Eva. Sobun, sondu no ben de so langa ete na grontapu èn dati meki sma ben abi wan moro bun gosontu. Te den sma dati ben trow nanga den famiri, dan den no ben e kisi siki pikin. Ma sowan 400 yari baka dati, sma no ben e libi so langa moro, neleki fa a de now. Dati meki a Wet di Gado ben gi Moses ben e sori taki sma no ben mag abi seks nanga krosibei famiri.Lefitikus 18:6.