Nownowde, a bun nyunsu fu Gado Kownukondre e preiki na heri grontapu, neleki fa Yesus ben taki na fesi (Mateyus 24:14). A Bijbel buku Danièl e taki dati a Kownukondre disi na wan regering fu Gado. Kapitel 2 fu a buku dati abi wan profeititori di e taki fu den difrenti makti regering noso kownukondre di opo kon, sensi a ten fu owruten Babilon te go miti a ten disi. Vers 44 e taki san e wakti wi na ini a ten di e kon:

„A Gado fu hemel o seti wan kownukondre di noiti no o kisi pori. A kownukondre srefi no o gi na nowan tra pipel. A o broko ala den kownukondre disi pisipisi èn a o tyari wan kaba kon na den. A kownukondre srefi o tan fu têgo.”

A Bijbel profeititori disi nanga trawan e taki dati Gado Kownukondre o kon na ini a presi fu ala libisma tirimakti èn a o seti ala sani bun baka na grontapu. Fa a libi o de te a Kownukondre o tiri? Luku wan tu moi pramisi di o kon tru heri esi.

  • FETI NO O DE MORO

    Psalm 46:9: „Na ala sei fu grontapu [Gado] e meki feti kon na wan kaba. Den bo a e broko na tu èn den lansri a e koti pisipisi. Den fetiwagi a e bron na ini faya.”

    Prakseri fa grontapu ben o de efu sma ben o gebroiki ala a moni nanga a koni fu den fu du sani fu a bun fu trawan, na presi taki den e meki fetisani fu kiri sma! A pramisi dati o kon tru te Gado Kownukondre o tiri.

  • SMA NO O SIKI MORO

    Yesaya 33:24: „Nowan sma di e tan na ini a kondre o taki: ’Mi siki.’”

    Prakseri wan grontapu pe sma no abi ati-siki, kanker, malaria, noso iniwan tra siki. Ati-oso nanga dresi no o de fanowdu moro. Ala sma o abi wan bun gosontu. Na den blesi disi e wakti den sma di o libi na grontapu.

  • SMA NO O PINA NYANYAN MORO

    Psalm 72:16: „Furu nyanyan o kon de na grontapu. Srefi na tapu den ede fu den bergi nyanyan o de pasa marki.”

    Grontapu o gi nofo nyanyan gi ibri sma, èn ala sma o man feni nyanyan. Sma no o de nanga angri moro èn den no o siki moro fu di den no e nyan bun.

  • SARI NOSO KREI NO O DE MORO ÈN DEDE O KON NA WAN KABA

    Openbaring 21:4: „[Gado] o figi ala watra puru na den ai èn dede no o de moro. Nowan sari, noso krei, noso pen no o de moro. Den fositen sani pasa kaba.”

     Disi wani taki dati sma o man libi fu têgo na ini wan paradijs na grontapu. Den no o abi sondu moro! Na dati wi lobi Mekiman, Yehovah Gado, pramisi.

’GADO NO MAN LEI’

Yu e bribi ala den sani disi? Furu sma e agri taki a libi di Bijbel e pramisi na wan moi libi trutru, ma trawan no man bribi taki sma o man libi fu têgo. Dati no e fruwondru wi, bika nowan libisma ben libi fu têgo fu man fruteri wi fa a libi dati de.

Libisma de na ini katibo fu sondu nanga dede, èn so langa kaba den e kisi fu du nanga sari, pina, nanga problema. A sani disi meki taki furu sma e denki taki na so a libi de kaba. Ma a no a libi disi wi Mekiman Yehovah Gado ben wani gi libisma.

Fu di Gado wani taki wi kon frustan taki den pramisi fu en o kon tru seiker, meki a e taki: „Den no o drai kon baka na mi solanga sani no pasa soleki fa mi taki. Sani musu pasa soleki fa mi wani èn den wortu fu mi musu fu abi bun bakapisi.”​—Yesaya 55:11.

Bijbel e taki dati Yehovah na a Gado „di no man lei” (Titus 1:2). Fu di a pramisi wi ala den moi sani disi gi a ten di e kon, dan a ben o bun fu aksi wisrefi: ’A de so trutru taki libisma man libi fu têgo na ini wan paradijs na grontapu? San wi musu du fu man kisi wini fu den sani di Gado pramisi?’ Na ini den tra artikel fu a tijdschrift disi, wi o kisi piki tapu den aksi dati.