Go na content

Go na a tra menu

Go na table of contents

Yehovah Kotoigi

Sranantongo

A Waktitoren  |  Nr. 2 2017

Yu o kisi furu wini te yu lobi fu gi sma sani

Yu o kisi furu wini te yu lobi fu gi sma sani

„A BUS kan go, ma a Sneisi man musu tan dya!” Na dati Alexandra yere wan man taki di a ben e sidon wakti na ini wan bus. A bus ben o abra go na ini wan tra kondre fu Zuid-Amerika. Di Alexandra komoto na ini a bus fu luku san e pasa a si taki wan yongu Sneisi man ben e pruberi fu fruteri wan skowtu sortu nowtu miti en. Ma a man no ben man taki Spanyorotongo bun. Fu di Alexandra e go na wan Sneisitongo gemeente fu Yehovah Kotoigi, meki a bosroiti fu vertaal gi a skowtu san a man ben taki.

A man taki dati a e tan na ini a kondre, ma sma fufuru den papira fu en nanga en moni. A skowtu no ben wani bribi en èn a ben e denki srefi taki Alexandra ben yepi smokkel sma kon na ini a kondre. Ma te fu kaba a skowtu bribi a man, ma toku a taigi en taki a musu pai wan butu fu di a no abi den papira fu en. Fu di a man no ben abi moni, meki Alexandra leni en 20 Amerkan dala. A man ben breiti srefisrefi èn a taki dati a o pai en moro leki 20 Amerkan dala baka. Alexandra sori a man taki a no wani taki a pai moro moni, ma a breiti taki a ben kan yepi en fu di dati ben de a yoisti sani fu du. A gi a man wan tu sani fu leisi, so taki a kan kon sabi moro fu Bijbel. A gi en deki-ati tu fu studeri Bijbel nanga den Kotoigi.

A e naki wi ati te wi e yere fa sma e du bun gi trawan di den no sabi. A no de fu taki dati sma fu ala sortu kerki èn sma di no de fu wan kerki e du bun gi trawan tu. Yu de klariklari fu du furu muiti tu fu yepi wan tra sma? Na aksi disi prenspari fu di Yesus ben taki: „Wan sma sa de moro koloku te a e gi sani, leki te a e kisi sani” (Tori fu den apostel 20:35). Boiti dati, sabiman kon si taki te wi e gi sma sani, dan dati bun gi wi. Meki wi luku fu san ede dati de so.

A „SMA DI E GI SANI NANGA PRISIRI”

Ondrofeni sori taki sma di lobi gi trawan sani, de koloku. Na apostel Paulus skrifi taki „Gado lobi a sma di e gi sani nanga prisiri”. A ben e taki fu Kresten di ben de klariklari fu gi sani fu yepi tra brada nanga sisa di ben de na nowtu (2 Korentesma 8:4; 9:7). Paulus no taki dati den Kresten disi ben gi sani fu di den ben de nanga prisiri. Ma a taki dati den ben e prisiri fu di den ben man gi sani.

Sabiman kon si taki te sma e gi trawan sani, dan dati „e wroko tapu den pisi fu na edetonton di e meki taki den e firi prisiri, di e meki taki den lobi trawan èn taki den e frutrow trawan. Den sma disi e firi bun fu di den du wan sani gi wan trawan.” Wan tra ondrosuku e sori taki „sma di ben gi trawan moni, ben de moro koloku leki den sma di gebroiki a moni gi densrefi”.

Oiti yu firi leki a situwâsi fu yu no e gi yu pasi fu du furu gi sma? Fu taki en leti, ala sma kan ondrofeni o switi a de fu  „gi sani nanga prisiri”. Te wi e gi sani nanga wan krin-ati, dan a no abi trobi efu wi no man gi furu. Wan Yehovah Kotoigi ben seni wan brifi gi den sma di e meki a tijdschrift disi. A seni wan moni tu fu horibaka gi a wroko fu den. Na uma disi taki: „Den yari di pasa mi no ben man poti furu moni na a Kownukondre zaal fu horibaka gi a wroko.” Toku a taki: „Yehovah Gado gi mi moro leki san mi gi en. . . . Grantangi taki mi abi na okasi fu gi moni fu horibaka gi a wroko fu Yehovah.”

Ma a no moni wawan wi kan gi. Furu tra fasi de fa wi kan gi.

TE WI E GI SANI, DAN DATI BUN GI WI GOSONTU

Sma e firi bun te yu e yepi den, ma yu srefi o prisiri tu

Bijbel e taki: „Wan man di e sori trawan bun-ati e tyari wini gi ensrefi, ma wan ogri-ati sma o meki taki ogri miti en” (Odo 11:17). Bun-ati sma lobi fu gi sani. Den de klariklari fu gebroiki den ten, den krakti, nanga tra sani fu yepi sma. Fu di den lobi fu gi sani, meki den e kisi furu wini fu dati. Wan sani na taki a bun gi a gosontu fu den.

Ondrosuku sori taki den sma di e meki ten fu yepi tra sma no e sikisiki furu èn den no e firi brokosaka so furu tu. Den abi wan moro bun gosontu. Srefi sma di abi wan seryusu siki soleki multiple sclerosis noso HIV e firi moro bun te den lobi fu gi sani. Ondrosuku sori tu taki sma di e feti fu tapu nanga a gwenti fu dringi furu sopi no e firi brokosaka so furu te den e yepi tra sma. Disi kan yepi den tu fu no bigin dringi sopi baka.

A sani disi tru? Wan tijdschrift e taki dati „te sma abi sari-ati gi trawan, te den e du bun sani gi den èn te den e sori switifasi, dan den no abi ten fu prakseri sani di kan meki den firi brokosaka”. Te wi e gi sani, dan dati kan yepi wi fu no kisi hei-brudu so makriki èn fu no abi so furu stress. Boiti dati, sma di e sari fu di a patna fu den dede e kisi densrefi moro esi te den e yepi tra sma.

A de krin taki a e tyari wini gi wi te wi lobi fu du bun gi sma.

TE WI E GI SMA SANI, DAN TRAWAN O WANI DU A SREFI

Yesus ben taigi den bakaman fu en: „Abi a gwenti fu gi sma sani, dan sma sa gi unu sani tu. Den o lai wan baskita, stampu en moi, seki en bun, furu en pasa marki, dan den o kanti en poti na ini a saka fu un krosi. Bika na a fasi fa unu e libi nanga trawan, na a fasi dati den sa libi nanga unu tu” (Lukas 6:38). Nofo tron te yu e gi sma sani, dan den o de nanga tangi èn den srefi o wani gi sma sani tu. Sobun, sma di lobi fu gi sani e meki nyun mati fu di den e yepi trawan.

Sma di lobi fu gi sani e meki nyun mati fu di den e yepi trawan

Sabiman di e ondrosuku fa sma e libi nanga makandra kon si taki „sma di lobi du bun gi trawan e gi tra sma deki-ati fu du a srefi”. Fu taki en leti, „te sma e leisi nomo fa trawan du bun, dan densrefi wani du bun tu”. Dati meki wan tra ondrosuku sori taki „wan sma di e du bun kan meki taki someni tra sma noso hondrohondro sma srefi du bun tu. Kande a no sabi son wan fu den sma disi noso a no miti den srefi.” Sobun, efu wán sma na ini wan birti  e du bun, dan dati kan gi tra sma na ini a birti deki-ati fu du bun tu. Yu no ben o wani libi na so wan presi? Iya, a ben o tyari furu wini kon te moro sma ben o du bun gi trawan.

Wan sani di pasa na ini Florida, na Amerkankondre e sori taki a sani disi tru. Wan grupu Yehovah Kotoigi ben go yepi sma na ini wan kontren pe wan bigi draiwinti ben de. Den ben musu meki wan tu sani na wan oso, ma den wrokosani no ben kon ete. Di den ben e wakti, den si taki a skotu fu wan fu den birtisma ben broko. Dati meki den go yepi a man. Baka wan pisi ten a man seni wan brifi gi na edekantoro fu Yehovah Kotoigi. A taki: „Mi de nanga tangi trutru. Noiti ete mi miti sma di abi so furu switifasi.” Fu di a man disi ben warderi a sani di den Kotoigi du gi en, meki a seni wan bigi moni fu horibaka gi a moi wroko di Yehovah Kotoigi e du.

TEKI NA EKSEMPRE FU YEHOVAH DI GI WI BUN FURU SANI

Wan moi sani di sabiman kon si, na taki „ala libisma abi a firi fu yepi trawan”. Wan ondrosuku sori taki ’srefi pikin-nengre di no leri fu taki ete, wani du sani fu yepi trawan’. Fu san ede dati de so? Bijbel e gi a piki. A e taki: „Gado meki libisma leki fa ensrefi de.” Dati wani taki dati libisma abi den srefi fasi leki Gado.Genesis 1:27.

Wan fu den moi fasi di wi Mekiman Yehovah Gado abi, na taki a lobi fu gi sani. A gi wi libi nanga ala sani di kan meki wi de koloku (Tori fu den apostel 14:17; 17:26-28). Te wi e studeri en Wortu Bijbel, dan wi kan leri sabi wi hemel Tata èn wi kan kon sabi san a o du gi wi. Bijbel e sori tu taki Gado seti sani di kan meki wi abi wan koloku libi na ini a ten di e kon (1 Yohanes 4:9, 10). * Fu di Yehovah Gado lobi fu gi sani èn fu di a meki wi leki fa ensrefi de, meki wi kan de seiker taki a o tyari furu wini kon gi wi te wi lobi fu gi sani. Boiti dati, Gado o prisiri nanga wi.Hebrewsma 13:16.

Fa sani waka nanga Alexandra di wi taki fu en na a bigin fu na artikel disi? Wan man na ini a bus ben taigi en taki a no o feni en moni moro. Ma a Sneisi man di Alexandra ben yepi miti den mati fu en na ini a foto pe a bus stop, dan den pai Alexandra a 20 Amerkan dala baka. Boiti dati, a man du san Alexandra ben taigi en èn a bigin studeri Bijbel. Alexandra ben breiti di a miti a man disi baka dri mun na wan Sneisitongo Kongres fu Yehovah Kotoigi na ini Peru. Fu di a man disi ben warderi san Alexandra du gi en, meki a kari en nanga den sma di kon na a kongres nanga en, fu kon nyan na en restaurant.

Te wi e gi sma sani èn te wi e yepi den, dan dati e gi wi furu prisiri. Ma wi e kisi moro prisiri te wi kan yepi wan sma fu kon sabi Yehovah Gado, a sma di e gi wi soso bun sani (Yakobus 1:17). Yu lobi fu gi sma sani? A o tyari furu wini kon gi yu te yu e du disi!

^ paragraaf 21 Efu yu wani sabi moro, dan luku a buku San Bijbel e leri wi trutru? Yehovah Kotoigi meki a buku disi èn yu kan feni en tu tapu a website www.jw.org/srn. Go na BUKU NANGA TRA SANI > BUKU NANGA BROCHURE.