Go na content

Go na a tra menu

Go na table of contents

Yehovah Kotoigi

Sranantongo

A Waktitoren  |  Nr. 2 2017

 TORI FU A KAFTI | YU DE NANGA TANGI GI A MORO BIGI KADO DI GADO GI WI?

Wan kado di warti moro ala trawan

Wan kado di warti moro ala trawan

JORDAN ben abi wan slijper na ini en anu di meki leki wan boto. Kande furu sma no ben o si a slijper disi leki wan bigi sani. Ma a de wan fu den moro prenspari sani gi Jordan. A e taki: „Russell, wan owru man di ben de wan mati fu wi famiri, gi mi a slijper di mi ben pikin.” Baka di Russell dede, Jordan kon sabi taki Russell ben du furu gi en granpapa nanga en papa nanga mama di den ben abi en muilek. Jordan taki: „Now di mi kon sabi moro fu Russell, a pikin kado disi kon abi moro waarde gi mi.”

Soleki fa a tori fu Jordan e sori, dan wan kado no abi fu de wan diri sani. Ma gi a sma di kisi en a kan de wan warti sani di moni no man bai. Bijbel e taki fu wan kado di warti moro ala trawan. A e taki: „Gado ben lobi grontapu so te, taki a gi en wan-enkri Manpikin, so taki ala sma di e bribi na ini en no sa dede, ma sa kisi têgo libi.”Yohanes 3:16.

Prakseri a sani disi: Wan kado di kan meki sma kisi têgo libi! Wan moro bigi kado leki disi no de. Kande furu sma no sabi o furu waarde a kado disi abi, ma tru Kresten e si en leki wan sani di „warti trutru” (1 Petrus 1:18, 19; Psalm 49:8). Ma fu san ede Gado seni en manpikin fu dede gi grontapu?

Na apostel Paulus e fruteri wi fu san ede. A taki: „Wán man meki sondu kon na grontapu èn sondu tyari dede kon. Dati meki ala sma e dede” (Romesma 5:12). A fosi man Adam sondu fu espresi. A  trangayesi Gado èn dati meki a dede. Adam meki taki ala den bakapikin fu en, sobun ala sma na grontapu, e dede.

„A pai fu sondu na dede, ma a kado di Gado e gi sma na têgo libi nanga yepi fu Krestes Yesus wi Masra” (Romesma 6:23). Fu kan frulusu libisma, Gado seni en Manpikin Yesus Krestes di no abi sondu, kon na grontapu fu dede gi wi. Ala sma di e sori bribi na ini na ofrandi disi di Bijbel e kari „a lusu-paiman”, o kisi têgo libi.Romesma 3:24.

Luku san Paulus taki fu a lusu-paiman fu Yesus Krestes, di e tyari furu blesi kon gi den anbegiman fu Gado: „Tangi fu Gado taki a gi wi wan kado di bigi pasa marki” (2 Korentesma 9:15). Iya, wortu no de fu taki o bigi a kado disi de. Ma fu san ede a lusu-paiman na a moro bigi kado di Gado gi libisma? * San wi musu du fu di Gado gi wi a kado disi? Wi e gi yu deki-ati fu leisi den tu artikel di e kon now, fu si sortu piki Bijbel e gi tapu den aksi disi.

^ paragraaf 8 Yesus ben de klariklari fu „gi en libi fu a bun fu wi” (1 Yohanes 3:16). Ma na Gado ben wani taki a du dati. Dati meki na ini den artikel di e kon wi o poti moro prakseri na Gado, a sma di gi wi a lusu-paiman.